رۆژەكانى ژن و خەباتى ژنانى كورد

Wednesday, 23/03/2011, 12:00

هەڵبەتە كەنارگیركردن و پەراوێزخستنى ژن مێژوویەكى دوور و درێژى هەیە، ئەو مێژووەش دەگەڕێتەوە بۆ سەردەمى سۆمەرییەكان كە پێنج هەزار ساڵ بەر لە ئێستایە، ئەگەر شەڕ و ململانێكە سەرەتا بۆ شەڕى نێوان (ئینانا) خوداوەندى ژن و (ئەنكیدۆ) خوداوەندى پیاو بگەڕێتەوە و بە قازانجى ئەنكیدۆ كۆتایى هاتبێت، بێگومان ئەمە كۆتایهاتنێكى یەكجارى نەبووە، بەڵكو لە تەواوى مێژوو و قۆناغە جۆراوجۆرەكاندا تا ئێستاش ئەنجامگیر نەبووە، بەپێویستى نازانم ئەوەندە رۆبچینە قوڵایى مێژووەوە، بێگومان لە كورتە باسێكدا ناتوانرێت خاڵ بە بەخاڵ ئاماژەى پێ بكرێت، ئەوەى بە پێویستى دەزانم سەرنج و تێبینى لەسەر بدەم سەبارەت بە خەباتى رێكخراوەكانى ژنانە لە باشورى كوردستان، لە مێژووى دواى راپەڕینى بەهارى (1991)ەوە، وەك ئاشكرایە لە دواى ئازادكردنى بەشێكى خاكى باشورى كوردستان و فەراهەمبوونى زەمینەیەك بۆ كارى سیاسى و رێكخراوەیى، ژمارەیەك رێكخراوى تایبەت بە ژنان و بەناو داكۆكیكار لە مافى ژنان دامەزرا، پێم وایە دامەزراندنى ئەو ژمارە رێكخراو و كۆمەڵانە چەندە لەپێناو مافەكانى ژندا بوو، دە ئەوەندە وەك مۆدێلێك دەهاتە بەرچاو، بە دەلیلى ئەوەى هەر پارتێكى سیاسى، لە پەراوێزى خۆیدا رێكخراوێكى بۆ ژنان دا دەمەزراند، ئەمەش وایكرد تەنانەت ناویش نەمابوو لە رێكخراوەكانى بنێن، بە چەندین ناوى وەك (ژنان، ئافرەتان، خانمان، خوشكان) رێكخراوى تایبەت بە ژنان دامەزرا، لە راستیدا ئەو كۆمەڵە و رێكخراوانە هەرچەندە بە رواڵەت كاریان بۆ مافەكانى ژن دەكرد، بەڵام لە ناوەڕۆكدا جگە لە كادرێكى حزبى شتێكى دیكە نەبوون، بە هەمان ئەقڵیەتى پیاوانى دەسەڵاتدارى ناو حزب مامەڵەیان لەگەڵ بارودۆخەكەدا دەكرد، ئەگەر لەكاتێكدا حزبەكان ناكۆكى و شەڕیان هەبوایە، بەهەمان شێوە رێكخراوەكانى ژنانیش پشكى خۆیان لەو ناكۆكییە بەردەكەوت، جگە لەوەش بەشێكیان لە رووى فكرى و ئایدۆلۆژیەوە تا سەر ئێسقان دژ بە یەك و ناتەبا بوون، رێكخراوەكانى ژنان لە باشورى كوردستان تا ئێستاش بەشێكى زۆریان رەخنەكانیان لە شێوازى بیركردنەوە و كار و خەباتى یەكترە، نەك لە سیستەمى پیاوسالارى، ئەگەر بە هەڵەدا نەچووبم تا ئێستاش ژنان لە باشورى كوردستاندا رێگەى خەباتى خۆیان نەدۆزیوەتەوە، هیوادارم لەو بۆچونەدا هەڵەبم و ژنان ئەو رێچكەیەیان دۆزیبێتەوە كە بیانباتەوە سەر رێگەى راستى و دروستى تێكۆشان، ئاستى پێشكەوتنى ژن لە باشورى كوردستان هێشتا زۆر سنوردارە، سەرەڕاى ئەو ژمارە زۆر و زەوەندەى رێكخراو و یەكێتى و كۆمەڵە و بزاڤ و خوشكان و ئەو ناوە جۆراوجۆرانەى بەناوى ژنەوە كار دەكەن، ئەوەى كە بە زەقى و ئاشكرایى دركى پێ دەكرێت، تەنها ئەو كاتانەى بە رۆژى ژن ناودەبرێت، جموجۆڵێكى یەك دوو رۆژەى لە كار و چالاكى و ئاهەنگێڕان ئەنجام دەدرێت و ئیدى تا یەك ساڵى دیكە لە پشودا دەبن.

هەڵبەتە ئەمە لە كاتێكدایە كە رۆژانە روپەلى رۆژنامەكان كارەساتێكى دڵتەزێنى مەرگى ژنان دەخاتە بەرچاو، تا ئێستا ئەو ژمارە زۆرەى رێكخراوەكانى ژنان نەیانتوانیوە، بەرەیەكى یەكگرتووى ژنان پێكبێنن و لە چوارچێوەى ئەو بەرەیەدا میكانیزمێكى گونجا و بۆ كار و خەبات بخەنەڕوو، بە بێ لەبەرچاوگرتنى هەر جۆرە ئایدیا و جیهانبینییەك، ژنان دەتوانن بە بیر و باوەڕە جیاوازەكانیانەوە لەسەر یەك خاڵ كۆك و تەبا بن و كارى جدى بۆ بكەن، ئەوەش (چى بكرێت بۆ ئەوەى مەینەتییەكانى ژن بنبڕ بكرێت؟) پێم وایە دۆزینەوەى ئەو رێگەچارەیە لەوەدا نییە تەنها لە بۆنە و یادەكاندا لە دەورى یەكتر كۆببنەوە و رەخنە لە سیستەمى پیاوسالارى بگرن و ستەملێكراوى ژنان باس بكەن، ئەمە تەنها كات بەڕێكردنە و هیچ ئەنجامێكى ئەرێنى نابێت، پێویستە بەدواى چارەسەرییەكى ریشەیدا بگەڕێن بۆ ئەوەى لە ماوەیەكى كورتخایەنى دیاریكراودا بگەنە سەرەتاى گەیشتن بە ئامانج، لەو بڕوایەدام نە بە شێوازى باو و كۆنى رۆژهەڵاتى، نە بە شێوازى چاولێكەرى و دووبارەكردنەوەى رۆژئاوایى ئاریشە و نەهامەتییەكانى ژنى كورد چارەسەر نابێت، ئەو دوو یادكردنەوەیەش كە ساڵانە ژنان لە دەورى یەكتر كۆدەكاتەوە كە هەشتى مارس و (25)ى نۆڤەمبەرە، جگە لەوەى وەك نەریتێكى باوى لێهاتووە، ئەزموون لە ناوەرۆك و جەوهەرى وەرناگیرێت، ساڵانە تەنها وەك جەژنێك تەماشا دەكرێت و ئامادەكارى بۆ دەكرێت، بێ ئەوەى یادێك تا یادێكى تر ساڵێك تا ساڵێكى تر گۆڕانكارییەك رویدابێت.

ئەو دوو رۆژە كە ساڵانە تەواوى ژنانى جیهان یادى دەكەنەوە بە بڕواى من رۆژى ماتەمن، نەك رۆژى شایى و ئاهەنگێڕان، چونكە لە هەشتى مارسدا جینۆسایدى ژنان كراوە و كۆمەڵكوژ كراون، لە (25)ى نۆڤەبەریشدا بە شێوەیەكى تراژیدى و تیرۆریستى سێ خوشك لە یەك كاتدا تیرۆر كران، لە هەردوو حاڵەتەكەدا كۆمەڵكوژكردن و تیرۆركردنى ژنان لە دوو مێژووى جیاوازدا، لەبەر خەباتى ژنانە نەبووە كە لەپێناو داوا و مافەكانى خۆیاندا بوبێت، بەڵكو لە روداوى یەكەمدا كە لە ویلایەتە یەكگرتووەكانى ئەمریكا لە ویلایەتى (شیكاگۆ) رویدا، لە خەباتێكى چینایەتیدا بوو داواى مافى كرێكارى خۆیان دەكرد، نەك مافى زەوتكراوى ژنێتى و یەكسانى جێندەرى. دووەمیش لە كۆمارى (دۆمەنیكان) لە خەباتى سیاسى دژ بە دیكتاتۆر (رافائیل ترۆخیۆ) هەر سێ خوشكى میرابال تیرۆركران، ئەم دوو روداوە تراژیدییە ئەگەرچى لە جێى خۆیدایە یادیان بكرێتەوە، بەڵام پێم وا نییە رێچكەیەكیان لە دواى خۆیان دەستنیشان كردبێت بۆ خەبات و تێكۆشانى ژنان لەپێناو بەدەستهێنانى مافى یەكسانى و وەكیەكى لە رووى سیاسى و ئابورى و بەڕێوەبەرایەتى و لایەنەكانى دیكەى ژیان، بۆیە ژنانى كورد پێویستە رێچكەى خەباتى خۆیان بدۆزنەوە و چالاكییەكانیان تەنها لەو یادكردنەوانەدا سنوردار نەكەن، چونكە ئەگەر ژنانى جیهان خەباتیان بۆ مافى تاك و هەندێ خواستى دیاریكراو بێت، بێگومان ژنانى كورد جیاوازە و پێویستە خەبات بۆ تاك و كۆمەڵگە و نەتەوەكەى بكات.

لە (8)ى مارسدا چى رویدا؟

هەرچەندە روداوى هەشتى مارس هەزاران جار باسكراوە، دڵنیام ئێستاش راپرسییەك لەناو ژناندا ئەنجام بدەیت و بپرسیت ئایا هەشتى مارس واتاى چییە؟ ژمارەیەكى كەم وەڵامى راستت بە دەست دەكەوێت، جگە لەو ژنانەى چالاكى رێكخراوە مەدەنى و فێمێنیستییەكانن، ژنان زۆریان پێیان وایە هەشتى مارس رۆژى ئاهەنگگێڕانە، لەراستیدا لەو رووەوە مافدارن، چونكە ئەوە كەمتەرخەمى رێكخراوەكانى تایبەت بە ژنانە كە نەیانتوانیوە تەنانەت ئەو رۆژەش بە ژنان ئاشنا بكەن، ئەمەش ئەوە ئاشكرا دەكات كە چالاكییەكانى رێكخراوەكانى ژنان تەنها لە چوارچێوەى بارەگاكانیاندا دەرباز نەبووە، نەیانتوانیوە یاخود نەیانخواستووە شۆڕببنەوە بۆ ناو گوند و كوچە و كۆڵانەكان و تەواوى ژنان بە مێژووى خەبات و تێكۆشان و رابردو ئاشنا بكەن، روداوى هەشتى مارس دەگەڕێتەوە بۆ ساڵى (1857) لەو ساڵەدا كۆمەڵكوژییەكى ژنان بە دەستى پیاوانى ستەمكار و بەرژەوەندخوازى سیستەمى سەرمایەدارى ئەنجامدرا، لە ویلایەتى (شیكاگۆ)ى ویلایەتە یەكگرتووەكانى ئەمریكا لە كارگەیەكى رستن و چنین بۆ بەدەستهێنانى مافى رەواى خۆیان و دژ بەو هەڵوێستە نامرۆڤانەیەى پیاوانى خاوەن كارگە و سیستەمى سەرمایەدارى كە كرێكار وەك كۆیلەیەك دەبینێت و مافى ماندوبوون و هێز و بازووى خۆى پێ رەوا نابینێت، ماندەگرن لە كاركردن بۆئەوەى سنورێك بۆ ئەو غەدر و ستەمەى لە كرێكاران دەكرێ دابنێن و مافە رەواكانیان بەدەست بهێنن، بەڵام ئەنجامى ئەو داواكارییە رەوایە بە شێوەیەكى زۆر تراژیدى كۆتایى هات، پیاوانى سەرمایەدار و ستەمكار بە شێوەیەكى زۆر دڕندانە روبەڕوى ژنانى مافخوراو بونەوە و ئاگریان تێیان بەردا، لە ئەنجامدا (129) ژنى كرێكار گیانیان لەدەستدا، ئەو كۆمەڵكوژیە دڕندانەیە كە لە كات و ساتى خۆیدا كاردانەوەیەكى ئەوتۆى لێ نەكەوتەوە ببێتە هۆى ئەوەى سیستەمى نادادپەروەى ئەوكات بگۆڕێت و چیدى مافى كرێكاران و ژنان پێشێل نەكرێت.

لەدواى (53) ساڵ كە دەكاتە ساڵى (1910) لە كۆنگرەى ژنانى ئینتەرناسیۆنالیستدا بە پێشنیارى (كلارا زەكتین) ژنە شۆڕشگێڕى ئەڵمانى رۆژى هەشتى مارس وەك رۆژى جیهانى ژن پەسەند كرا، ئێستا كە (101) ساڵە ئەو رۆژە بە رۆژى جیهانى ژن دیارى كراوە و (154) ساڵ بەسەر ئەو كۆمەڵكوژەیەدا تێپەڕ بووە، ئایا رەوشى ژنان لە چى ئاستێكدایە؟ ئایا لە ماوەى ئەو (154) ساڵەدا چەند تراژیدیاى هاوشێوە رویداوە و هەروا بە ئاسانى تێپەڕیوە؟ ئایا ژنان پێیان وایە ئەمریكا و رۆژئاوا بە گشتى چۆن لەگەڵ مافەكانى ژناندا مامەڵە دەكەن؟ بە بڕواى من هێشتا ژنانى رۆژئاوا نە لە واتاى ئازادى تێگەیشتوون و نە ئازادیشیان بەدەستهێناوە، هەرچەندە ئەو بیر و رایانە زۆرن كە پێیان وایە ژنانى رۆژئاوا بە مافەكانى خۆیان گەیشتوون و وەك تاكێكى ئازاد سەرجەم خواستەكانیان فەراهەم كراوە، بەڵام پێم وایە ژنانى رۆژئاوا لەناو سیستەمى سەرمایەداریدا كراون بە كۆیلەیەكى مۆدێرن و سەرجەم بەها ئاكارى و ئینسانییەكانیان زەوتكراوە بێ ئەوەى دركى پێ بكەن، وەك كاڵا لە بازاڕدا مامەڵەیان پێوە دەكرێت، ژنانى رۆژئاوا بە ئاشكرا كراون بە ئامرازى ریكلام و پڕوپاگەندە بۆ سیستەمى سەرمایەدارى، ئەو سوكایەتى پێكردنەش كە بە رەگەزى ژن دەكرێت و لە بەها و پیرۆزى خۆى دادەبڕرێنریت بە شێواوزێكە ژنان وا هەست دەكەن كە ئازادى كەسێتى و مافى خۆیان بەدەستهێناوە، بەداخەوە ئەو شێوازە ژیانكردنەى ژنانى رۆژئاوا لە رێگەى فیلم و دراماكانەوە ئاراستەى تەواوى جیهان كراوە و كوردستانیش بێ بەش نەبووە لە كاریگەرییە خراپەكانى، بە بڕواى من ژنانى كوردستان ئەگەر ئەو بەكاڵاكردنەى رۆژئاوا بە ئازادى ژن بزانن بەهەڵەدا چوون، چونكە لە بەرنامە و سیستەمى مۆدێرنیتەى كاپیتالیزمى سەرمایەداریدا هیچ نرخ و بەهایەك بۆ ژن دانەنراوە، ئەو ژنانەش كە كەوتونەتە ناو تەڵەزگەى ئەو سیستەمە و خۆیان بە ئازاد دەزانن ئەوە بێگومان، خیانەت لە گیانى ئەو ژنە تێكۆشەرانە دەكەن كە جەستەى ماندویان كرا بە خۆڵەمێش، لە سایەى ئەو سیستەمەى كە تا ئێستاش بێڕێزى بە رەگەزى ژنەوە دەكات و وەك كۆیلەیەكى مۆدێرن دەیچەوسێنێتەوە، بێ ئەوەى ژن هەست بەو كۆیلە بوونە بكات، هەڵبەتە ئامرازەكانى سڕكردنى ئەقڵ هێندە كاریگەرە درك بە ئازار و نەهامەتییەكانى ناكرێت، كاتێك مرۆڤ لەناو بۆتەى حەز و رەمەك و ئارەزووەكانى توایەوە ئیدى بەهاكانى مرۆڤایەتى لێ ون دەبێت.

(25) نۆڤەمبەر خوشكانى میرابەل

وەك پێشتر ئاماژەى پێكرا (25) نۆڤەمبەر رۆژێكى ترە لەو دوو رۆژەى كە ساڵانە ژنان یادى دەكەنەوە، بەسەرهاتى (25)ى نۆڤەمبەریش كارەساتى تیرۆر و كوشتنى سێ خوشكى چالاكى سیاسییە، ئەو سێ خوشكە شۆڕشگێڕە كە بە خوشكانى میرابال ناسراون خەبات و تێكۆشانیان لە دژى دیكتاتۆر (رەفائیل ترۆخیۆ) سەرۆكى كۆمارى (دۆمەنیكان) دەكرد، خوشكانى میرابەل بە ناوەكانى (پاتریا، میرسدس، میرابال، ماریا ئارژانتینا، مینێروا میرابال، ئانتۆنیا ماریا تێرازا میرابال) لە رۆژى (25/11/1960) لەلایەن دارودەستەى رەفائیلى دیكتاتۆرەوە لەیەك كاتدا تیرۆركران، تیرۆركردنى خوشكانى شۆڕشگێڕى میرابال وەك كارەساتێكى دڕندانەى دیكتاتۆرى كۆمارى دۆمەنیكان پێناسە دەكرێت، ئیدى لە ساڵى (1991)ەوە (25/11) وەك رۆژى بەرەنگاربوونەوەى توندوتیژى سەر ژنان ناسێنرا، لە دواى (39) ساڵ تێپەڕبوون بەسەر ئەو كارە تیرۆریستییەدا كۆمەڵەى گشتى نەتەوە یەكگرتووەكان لە (83)هەمین كۆبونەوەى خولى (54)ى خۆیدا لە (17)ى ئۆكتۆبەرى ساڵى (1999) بیست و پێنجى نۆڤەمبەر وەك رۆژى نەهیشتنى توندوتیژى دیاریكرا، ئەم رۆژەش هەروەك هەشتى مارس ژنانى جیهان ساڵانە یادى دەكەنەوە و كار و چالاكى ئەنجام دەدەن، هەرچەندە ئەو دوو رۆژە لە جیهاندا وەك رۆژى خەباتى ژن ناسراوە، بەڵام پێم وایە تەنها تایبەت نین بە ژن، چونكە هەر دوو روداوەكە لە ئەنجامى خەباتى چینایەتى و سیاسیدا رویداوە.

بۆیە چەندە ژن پەیوەندیدارە بەو دوو روداوەوە، ئەوەندە پیاوى ئازادیخواز پێویستە خاوەندارى لێ بكات، بەڵام ئەوەى جێگەى سەرنجە ئەو دوو روداوە هیچیان لە ئەنجامى تێكۆشان و خەباتى فێمێنیستى و یەكسانى جێندەریدا نەبوە، بەڵكو لە ئەنجامى خەباتێكى مرۆییانەدا روبەڕوى مەرگ بونەتەوە، لە جێى خۆیدایە بپرسین ئەى بۆچى تایبەت كراوە بە رۆژى ژن، تا ئێستاش نەتەوەى كورد لە چوار پارچەى كوردستاندا توندوتیژى رۆژانە روبەڕوى دەبێتەوە، هەڵبەتە ژنان دووجار روبەڕوى ئەشكەنجە و ستەم دەبنەوە، لەلایەك ستەمى دوژمنى داگیركار و سەردەست، لەلایەكى دیكەوە ستەمى خێزان و كۆمەڵگە، مێژووى كورد و كوردستان پڕە لە كارەساتى دڵتەزێن و بەردەوامیش كارەساتەكان لە زیادبووندان، جگە لە كارەساتەكانى ئەنفال و كیمیابانكردن و كۆمەڵكوژكردن و جینۆسایكردنى ژنانى كورد، كە هاوكات لەگەڵ پیاواندا لەبەین براون، جارێكى دیكە خودى پیاوى كورد ژنان دەچەوسێننەوە و دەستدرێژى دەكەنە سەر و تیرۆریان دەكەن، یان لەژێر فشارى دەرونى و جەستەیدا ناچارى خۆكوشتن و خۆسوتاندنیان دەكەن، ئەگەر وەك مشتێك لە خەروارێك دوو نمونە بخەینە بەرچاو، لەو بڕوایەدام هیچى لە كارەساتى خوشكانى میرابال كەمتر نییە و بەڵكو زۆر بەئازارتر و كردەوەیەكى وەحشیگەرانەتریشە.

یەكەم دوو خوشك لە سلێمانى لە ساڵانى رابردوو بە ناوەكانى (جوان و مەهاباد) بە شێوەیەكى نامرۆڤانە لە دواى غەد و ستەملێكردن زۆر بە شێوەیەكى دڕندانە تیرۆر كران، ئەم كارەساتە نەك گرنگى پێ نەدرا تەنانەت بكوژەكەشیان ساڵى رابردوو ئازادكرا.!!

پێویست بوو سەرجەم ژنانى باشورى كوردستان بە تەواوى بیروڕا جیاوازەكانەوە لە دژى ئازادكردنى بكوژانى جوان و مەهاباد بڕژانایاتە سەر شەقامەكان و ئەو نادادپەروەریەیان لە دەسەڵات قەبوڵ نەكردایە، جێى نیگەرانییە كە جگە لە هەندێ ناڕەزایى سنوردار هیچ چالاكیەكى بەرفراوان ئەنجام نەدرا سەرەڕاى ئەوەى دەیان رێكخراو و كۆمەڵەى تایبەت بە ژنان هەیە.

دووەم كارەساتى دڵتەزێن لە سەرەتاى ساڵى (2011)دا رویدا لە چەمچەماڵ، ئەوەش رفاندن و دواتر كوشتنى هەردوو خوشك (شادى و شۆخان) بوو، ئەم دوو خوشكەش بە هەمان شێوە زۆر بە دڕندانە و بێ بە زەییانە گوللەباران كران و شەهیدكران، هیچ كەسێكیش بە تۆمەتى ئەو تاوانە گەورەیە دادگایى نەكرا و بۆ راى گشتى ئاشكرا نەكرا، بێگومان سەدان تاوانى لەو جۆرە لە كوردستان ئەنجام دراوە و بەردەوامیش ئەنجام دەدرێت، خوشكانى میرابال بوون بە هێماى بەرەنگاربونەوەى توندوتیژى دژ بە ژنان لە جیهاندا، بەڵام خوشكانى كوردستان كە لە دوو كارەساتى هاوشێوەدا تیرۆكران، نەبون بە هەوێنى یەكهەڵوێستى و تەبایى و پێكهێنانى بەرەیەكى هاوبەشى رێكخراو و سازییەكانى ژنان لە باشورى كوردستان، ئیدى چۆن مرۆڤ هیواى بەو ژمارى زۆر و زەوەندەى رێخكراوى ژنان هەبێت؟! دەبوو هەزاران ژن مانگرتن و رێپێوانیان ئەنجامبدایە تا ئەوكاتەى دەسەڵاتیان ناچار دەكرد بە ئەركى یاسایى خۆیان هەڵسن و تاوانباران بە سزاى رەواى خۆیان بگەیەنن، بۆ ئەوەى كەسانى دیكە پەند و عیبرەتى لێ وەرگرن.





خەباتی ژنانی باكور ئەزمونێكی نوێ

كاتێ قسەلەسەر خەباتی ژنی كورد دەكەین پێویستە بەكورتیش بێت ئاماژە بەخەبات وتێكۆشانی ژنانی باكوری كوردستان بكەین،هەرچەندە هەڵوەستەكردن لەسەر بەتەڤگەربونی ژنانی باكوری كوردستان كاتی زۆری دەوێت تامێژوی ئەوتێكۆشانە هەڵسەنگێنین ،بەڵام ئاماژەكردن بەچەند خاڵێك ئەزمون بەخش دەبێت ،بێگومان رەوشی ژنانی باكوری كوردستان لەرابردوو دا زۆرلە حاڵ وگوزەرانی ژنانی باشورخەراپتربوو،چونكەلەباشوری كوردستاندا زەمینەی خۆپەروەردەكردن و كاری سیاسی ورێكخراوەیی بەشێوەیەكی بەرچاو بونی هەبووە ،بەتایبەتی لەبیست ساڵی رابردوو دا هەمودەرفەتێك هەبووە بۆئەوەی ژنان كاروچالاكی ئەنجام بدەن ،سەرەكی ترین مژار كە لەمپەر بووە لەپێش ژنانی باكوری كوردستان مژاری ناسنامە و نكوڵی كردن لەكوردبونیان بووە لەلایەن رژێمی توركیاوە ،كاتێ ئاخاوتن بەزمانی دایك یاساخ بێت ئیدی دەرفەتێك بۆكارێكی دیكە نامێنێتەوە ،رێگری لەوەی مرۆڤ بەزمانی دایك گوزارشت لەهەبونی خۆی بكات هێدی هێدی ناسنامەی نەتەوەی ون دەكەیت ولە بۆتەی نەتەوەی سەردەست دا دەتوێتەوە ،ژنانی باكوری كوردستان لەرەوشێكی بەوشێوازەدابون ،لەگەڵ بەرپابونی شۆڕشی ئازادی خوازی كوردستان لەسەرەتای حەفتاكاندالەدەستپێكی بزاڤەكەدا ژن بەشداری كردووە رۆڵی كاریگەری تێدا بینیوە ،یەكەم هەنگاو بەفەرمی لەخەباتی سیاسی ورێكخراوەیی دا لەباكوری كوردستان كەلەمپەرێكی گەورەی تێكشكان و سەدایەكی مەزنی لەتەواوی جیهاندا هەبو ، ئاخاوتنی بەكوردی ژنە تێكۆشەری ناسراوی كورد (لەیلازانا) بو بەزمانی كوردی لەسەرەتای نەوەدەكاندا ، هەرچەندە ئەوهەنگاوە كاردانەوەی توندی شۆڤێنیەكانی توركی لێكەوتەوە لەیلا زاناو هەڤاڵەكانی راپێچی زیندن كران ،بەڵام دانانی پشكۆیەك بو كەئێستا بڵێسەی ئاگرێكی مەزنی شۆڕش وبەرخۆدانە، لەناوەراستی نەوەدەكاندا خۆپێشاندان ونارەزایە كانی گەلی كورد لەباكوری كوردستان بەشداربونی ژن ژمارەیەكی زۆركەم بوون ،بەڵام ئێستا ئەگەر سەرنج بدەی لەمیتینگ وكۆبونەوەكانیاندا بەدەیان هەزارژنی كورد دەبینیت كەلەپیاوان بەجۆشوگەرمو گوڕترن وشەقاماكانی شارەكانی باكوری كوردستان و توركیا رەنگاورەنگ دەكەن ،ژنانی باكور بەدروشمی (ئازادی كوردستان پەیوەستە بەئازادی ژنی كوردەوە) دەستیا بەخەبات و تێكۆشان كرد،ئێستا لەشۆرشی شاخەوە تادەگاتە ناو هۆڵی پەرلەمانی توركیاوشارەوانیەكان وتەڤگەروسازی و پارتی سیاسی ژنان ئەگەركەسی یەكەم نەبن ئەوە بێگومان كەسی دووەمن ،جگەلەوەش بەفەرمی بڕیاردراوە لەسەرجەم دامودەزگا كوردیەكاندا دبێت لەهەركاروخەباتێكدا رێژەی لەسەداچل پشكی ژنان بێت،خۆئەگەرلەهەڵبژاردنیشدا لەورێژەیە زیاتریان بەدەست هێنا ئەوەمافی رەوای خۆیانە، ئێستا لەباكوری كوردستان پارتی ئاشتی ودیموكراسی نوێنەرایەتی گەلی كورد دەكات ،ئەوپارتە حاوەنی بیست پەرلەمانتارە هەشت كەسیان ژنن ، سەرۆكایەتی پارتەكەش بەسیستەمی هاوسەرۆكی بەڕێوەدەبرێت واتە ژنێك وپیاوێك بەڕێوەی دەبەن ،جگەلەوەش چەندین ژن سەرۆكی شارەوانی سەرۆكی رێكحستنی شارەكان و ئەندامی ئەنجومەنەكانی شارەوانی ودەزگاوسازییەكانی كوردستانن،ژن رۆڵێكی زۆرگرنگ و بەرچاودەبینن لەباكوری كوردستان ئەگەرلەپێش پیاوانەوە نەبن لەتێكۆشاند ئەوا بەردەوام هاتەریب لەهاوشانیان رێدەكەن ،باشترە بڵێن شۆرشی باكوری كوردستان ئێستا بوە بەشۆرشی ژن،

ئەنجام

بەپێویستی دەزانم پێشنیاربكەم بۆ رێكخراوەكانی ژنانی باشوری كوردستان ، ئەگەربەچڕوپڕی بەدواداچونێك بكەن بۆئاشنابون بەشێوازی خەبات وبەرخۆدانی ژنان لەباكوری كوردستان بێگومان سودوقازانجێكی زۆرباش بەدەست دەخەن وئەزمونێكی نوێ ورێبازێكی نوێ دەدۆزنەوە بۆگەیشتن بەئازادی راستەقینە،ژنانی باكور لەماوەی پازدە ساڵدا توانییان خۆیان بەرێكخستن بكەن وتەڤگەرێك بەرپابكەن كەببێتە جێگەی سەرنجی هەموجیهان ،لەساڵی رابردوو لەكۆنگرەیەكدا لەشاری ئامەد زیاتر لەدەهەزارژن لەدەوری یەكتر كۆبونەوە ،چەندین میوانی بیانی بانگهێشت كرابون زۆر بەسەرسوڕمانەوە لەوتەڤگەرە مەزنەیان دەڕوانی كە چۆن بەدەرفەت وئیمكانێكی كەمەوە ژنانی كوردستان گەیشتون بەوئاستەو ئەوشۆڕشە مەزنەیان بەئەنجام گەیاندووە،ئەمساڵیش هەروەك ساڵانی رابردووهەشتی مارس یان كرد بەكەرنەڤاڵێكی نەتەوەیی وسەرنجی هەمولایەكیا بۆلای خۆیان راكێشا ،دیمەنەكانی شارەكانی ئامەد-وان-شەرناخ-باتمان-جەزیرە-سلۆپی-گەڤەر-ماردین-بایزید-رۆحا-دیلۆك-مێرسین،دەیان هەزارژن لەسەرشەقامەكاندابانگی ئازادی یان ئەدا،تەنها بینینی ئەودیمەنانە پێویستی بەهیچ شرۆڤەیەك نەدەكرد،هیوادارم ژنانی باشوری كوردستان بەوهزرو رامانەوە تێكۆشان ئەنجام بدەن كەلەباكوری وڵات كاری پێدەكریت نەك ئەوەی لەوڵاتانی رۆژئاوامرۆڤ بەرەوداروخان دەبات و بەهاوبیرۆزیەكانی لەبەین دەبات،