سەرنجەكانی هەڵمەتی دادپەروەری لەسەر پرۆژەی یاسای  چاكسازی لە خانەنشینی و موچەو دەرماڵەكان  لە هەرێمی كوردستان

بۆ  بەڕێز دەستەی سەرۆكایەتی پەرلەمانی كوردستان

هەڵمەتی دادپەروەری  وەك تاكە دەستە  لە 9 ساڵی رابردوو بە دەیان چالاكی و هەڵمەتی جەماوەری بۆ دۆسیەی خانەنشینی پلە باڵاكان و جیاوازی موچەی ئەنجامداوە,  وە خۆشی خاوەند بیرۆكەكە بووە, دۆسیەی نادادپەروەری لە دابەشكردنی داهات و هەڵوەشاندنەوەی خانەنشینی پلە باڵاكانی كردە بابەتی رۆژ,  مخابن بەهۆی قەیرانی دارایی و سیاسەتی تەقەشوفەوە ئەم دۆسیەیە  لە دو ساڵی رابردوو چاوی لەسەر لاچوو, حكومەتی ئێستای هەرێمی كوردستان بۆ رزگاركردنی خۆی لە غەرق بوون و فەوتان ئەم هەنگاوەی ناوە, وەلێ بەلای ئێمەوە باشە, بۆ هەنگاوی ئێستای حكومەت و پەرلەمان كۆمەڵێك سەرنجمان هەیە بەهیوای جێكردنەوەی لە پرۆسەی چاكساییەكان :

1- داواكارین لە هەرێمی كوردستان هیچ موچەیەك لە 3 ملیۆن دینار تێنەپەڕێت.

2- بە یاسا سنورێك بۆ جیاوازی بەرزترین و كەمترین موچە لە هەرێمی كوردستان دابندرێت كە لە 10 بۆ 12 جار جیاوازیان زیاتر نەبێت.

3-ئەو موچانەی لە 500 هەزار كەمترن پاشكەوت لە هیچ بارودۆخێكدا نەیانگرێتەوە.

4-دامەزراندن لە داهاتوودا تەنها بۆ ئەوكەسانە بێت هیچ سەرچاوەیەكی داهاتی  لە خێزانەكانیان نییە, ئەمەش دەبێتە هۆكار  بۆ كەمكردنەوەی هەژاری  لە كۆمەڵگادا.

5- یاسای بودجەی حیزبەكان پێداچونەوەی بۆ بكرێت بۆ كەمكردنەوەیان, بە پێی بڕەكەیان رێژەی كەمبكرێتەوە.

6- خەرجی حیزب و رێكخراوەكان و كەناڵەكانی راگەیاندن كۆمەك پێیان بە یاسا رێك بخرێت و سەرچاوەكانیان یاسایی بێت و هەموو كۆمەكێكی دەرەوەی هەرێم قەدەغە بكرێت .

7-خانەنشینی پەرلەمانتار و وەزیرو سەرجەم پلە باڵاكان بە پێی یاسای خانەنشینی رێك بخرێتەوە, واتا جیاوازی لە موچەی خانەنشینی بە پێی تەمەن و ساڵی خزمەتیان بگۆڕێت.

8-تەمەنی خانەنشینی لە كوردستان بۆ 60 ساڵ كەمبكرێتەوە .

9-ئیمتیازاتی شەهیدان و قوربانیانی جینۆساید و زیندانیان وەك خۆیان بمێننەوە, لیستی شەهیدان و قوربانیان و زیندانیان و پێشمەرگەی دێرین بڵاو بكرێنەوە.

10-باج بخرێتە سەر كۆمپانیاكا .

11- بەرپرسانی حكومی و حیزبی لە چالاكی ئابووری  دوربخرێنەوە.

12-ئیمتیازی دامەزراندن بە پلەی یەكەم  بۆ ئەو قوتابیانە بێت كە قوتابخانەو زانكۆی حكومیان تەواو  كردوەو سەرچاوەی داهات لە خێزانەكانیان نییە, دەستی حیزب لە دامەزراندن ببڕدرێت.

13-هیوادارین  هەنگاوەكانی ئەمجارە, وەك پرۆژە یاسا فریودەریەكانی رابردوو نەبێت , هەنگاو بەرەو كەمكردنەوەی موچەی پلە باڵاكان بنرێت و  ئیمتیازاتەكانیان هەڵوەشێنرێنەوە.

لە كۆتادا ئێمە لە گەڵ هەموو هەتگاوێكین بۆ كەمكردنەوەی جیاوازی موچەو نا دادپەروەری لە هەرێمی كوردستان و شەفافیەت و بنەبڕكردنی گەندەڵی, كە خواستی گەلە و بە ئیرادە دەكرێت و پێویستە دەسەڵاتداران  لە ئیمتیازات و سامانی خۆیانەوە  دەستی پێبكەن.

20-2-2018