66 ساڵه خيانه‌تكارى، به‌چاره‌نووسمان چاك ئه‌كه‌ن يارى
Friday, 17/08/2012, 12:00
هه‌ركه‌سێك ئه‌گه‌ر نه‌شاره‌زابێت و سه‌ربكات به‌ناو شارى سلێمانيدا و ئه‌و هه‌موو لافيته‌و نوسراوه پرِدرۆ و ده‌له‌سه و په‌رِۆ زه‌ردانه ببينێت،قه‌ناعه‌ت ئه‌كات كه پارتى حزبێكى تا دوا راده نيشتمانى و به‌هه‌لَوێست و شۆرِشگێرِه‌و هه‌موو خه‌لَكى سلێمانى به‌گه‌وره و بچوكيه‌وه ئه‌ندامى دلَسۆز وگيانبازى ئه‌و پارته‌يه،و قسه‌كه‌ى عه‌بدولوه‌هابه سه‌رخۆش يش سه‌د ده‌ر سه‌د راسته كه ده‌لَێت رۆژانه سێ چوار هه‌زار كه‌س ده‌بن به‌پارتى، ئه‌لَێم تۆبلَێى پارتى حزب بێت يان كۆمپانياى هاوشێوه‌ى ئاسيا سێل بێت وا به‌لێشاو خه‌لَك رووى تێده‌كه‌ن؟
سه‌يرترين شت كه به‌درێژايى ته‌مه‌نم بيرم لێكردۆته‌وه و لێكم داوه‌ته‌وه بوونى هێلَكى پان وبه‌رينى خيانه‌ت و ته‌سليم كاريه كه به‌درێژايى مێژووى هه‌زار سالَه‌مان له‌ناو هه‌موو بزوتنه‌وه شۆرِش و سه‌رهه‌لَدانێكدا به‌ديمان كردووه ،هه‌رله‌خيانه‌تى هه‌رباكۆسى ئيمپراتۆريه‌تى ميديا وبۆ ئيدريسى به‌تليسى ومه‌لاى خه‌تێ و روخانى ميريايه‌تى پاشاى كۆره، بۆ چاوساغى موشيرى حه‌مه‌ى سلێمان و به‌ديلگرتنى شێخى نه‌مرو و خيانه‌ته‌كانى ناوخۆى حيزبه‌كان چ له‌ناو خودى خۆياندا چ به‌رامبه‌ر به‌شۆرِشگێرِه‌كان و پارته‌كانى به‌شه‌كانى ديكه تا دوا لوتكه‌ى خيانه‌ت كه 31ى ئابه‌و پارتى و بنه‌مالَه‌ش پالَه‌وانى ئه‌و نامه‌رديه پرِ شه‌رم و خه‌جالَه‌تيه‌ن، له‌گه‌لَ ئه‌و هه‌مووخيانه‌ت و سه‌رشۆرِيه كه‌چى تاكو ئێستا نه‌مان توانيوه كۆ ده‌نگيه‌ك و هاوهه‌لَوێستيه‌ك بنوێنين له‌به‌رامبه‌ر ئه‌و خيانه‌ت و ريسواييه و بكه‌ره‌كانى سوك وبێ نرخ و چروك بكه‌ين و له ناوخۆ و ده‌ره‌وه‌دا وه‌كو پارت و لايه‌نێكى قێزه‌ون و نه‌فرين به‌دونيا بناسێنين، وه‌ها لێيان برِوانين كه ئه‌وانه ئه‌و خيانه‌ت كارو ولاَت فرۆشانه شياوى هيچ شتێك نين و ته‌نانه‌ت گوناح وتاوانيشه ئاو وهه‌واو به‌روبومى ئه‌و ولاَته‌ى كه‌فرۆشتويانه و خيانه‌تى لێده‌كه‌ن بنۆشن، له‌دواى كاره‌ساتى31 ى ئاب وده‌ست له‌ملكردنى مه‌سعود و رژێمى به‌عس ئيدى به‌هاى پارتى و بنه‌مالَه به‌ئه‌ندازه‌ى پوشێك نه‌ماو و ناو و شوهره‌ت و مێژوويان چووه ناو زبلَدانى خيانه‌ته‌وه ئه‌و له‌كه شه‌رمه‌زاريه‌يان دا له‌ته‌ويلى خۆيان. من وام لێكده‌دايه‌وه له‌پاش ئه‌و تاوانه پرِ شوره‌يى ئابرِو به‌ره ئيدى پارتى له‌رووى نايه‌ت جارێكى تر ناوى كوردستان و شۆرش و خه‌بات بێنێت،له‌به‌رامبه‌ريشدا خه‌لَك وميلله‌ت به‌چاوى زۆر كه‌م وسوك وبێ نرخ لێيان ده‌رِوانن و رێگه‌ناده‌ن به‌هيچ شێوه‌يه‌ك له كوردستاندا يه‌ك باره‌گا و لق و ناوچه‌ى پارتى هه‌بێت وه‌كو سالاَنى ئه‌وسا به‌رووزه‌ردى و سه‌رشۆرِى ئه‌رِۆنه‌وه به‌ديوى ئێراندا ، ئيدى شتێك نامێنێت ناوى پارتى و بارزانى بێت،كه‌چى لێكدانه‌وه‌كه‌م وا نه‌كه‌وته‌وه و ئه‌وه خيانه‌ته گه‌وره و بێ هاوتايه هه‌ر زوو له زاكيره وياده‌وه‌ريماندا كالَ بۆوه و له‌ماوه‌يه‌كى كه‌مدا ته‌واو ته‌واو له‌بيركراو فه‌رامۆشمان كرد،پارتيش وه‌كو پالَه‌وانێكى سه‌ركه‌وتوو و قاره‌مان و خاوه‌ن داستانێكى پرِسه‌روه‌رى ئه‌وه‌ى كرد به شانازى و مێژوويه‌كى پرشنگدارى بنه‌مالَه،جارێكى ديكه زۆر بێ ئابرِوانه هاته‌وه گۆرِه‌پان و بووه به‌حاكمى كوردستان وسه‌رجه‌م ده‌سه‌لاَته‌كانى قۆرخ كردوخۆي كرده گه‌وره و ده‌مرِاست و سه‌رۆكى هه‌رێم، كه هۆكارى بون به كوێخاو ده‌مرِاستى ميلله‌ت به‌پله‌ى يه‌كه‌م بێ هه‌لَويستى لايه‌نه‌سياسيه‌كان و چاوپۆشيكردن له‌و هه‌موو تاوان و خيانه‌ته و نه‌بوونى به‌ره‌يه‌كى هاوبه‌ش ويه‌كگرتو كه‌له‌ئاستى ئه‌و ناپاكيه‌دا بێته ده‌نگ زياتر مه‌يل و ئاره‌زوى پارتى بۆ كارى بێ شه‌رمانه‌تر هاندا و له‌جاران زياتر خيانه‌تى كرده نه‌ريتيكى بنه‌مالَه‌و بوو به جاش و ئه‌لَقه‌له‌گوێ و ده‌ربارى ته‌واوى دوژمنان،دووه‌ميش وه‌كو باسمكرد نه‌بوونى گوتارێكى هاوبه‌ش و هاوهه‌لَوێستى و كۆده‌نگى ميلله‌ت و جه‌ماوه‌ر له‌هه‌مبه‌ر هه‌ر خيانه‌تێكى هاوشێوه وزياتر ده‌رگاى بۆ والاَ كردن و گلۆپى سه‌وزى بۆ داگيرساندن. ئه‌گه‌ر بهاتايه ئه‌و خيانه‌ته له ولاَتێكى پاش كه‌وتوى وه‌كو سۆدان يان ئه‌سيوبيا يان هه‌رولاَتێكى ديكه بكرايه بۆهه‌تا هه‌تايه ئه‌و پارته ئه‌خرايه په‌راوێزه‌وه وبه‌چاوێكى تابلَێى سووك و كه‌م وبێ ئه‌رزش سه‌يرده‌كرا وبۆ هه‌تايه رێگه‌ى هه‌مو جموجولَ وكارێكى سياسى لێده‌گيرا، تاوانكارانيشى ده‌درانه دادگاو سزا ده‌دران،به‌لاَم به‌داخه‌وه لاى خۆمان ئه‌و كاره بووه به‌شتێكى رۆتين و سانا و بكه‌رانيشى موعه‌زه‌ز و موكه‌ره‌من و سياسى ورۆشن فكران يشمان له‌برى گه‌وره‌كردنى ئه‌و تاوانه‌و ناساندنى به‌هه‌موو جيهان و ده‌رخستنى رووى راستى پارتى و بنه‌مالَه‌ى ديكتاتۆرى و خۆ دورخستنه‌وه ليێان ،پێچه‌وانه‌كه‌يان هه‌لَبژاردو له‌به‌ر خاترى هه‌نێك به‌رژه‌وه‌ندى تايبه‌تى خۆيان زۆرێكيان خزانه‌وه ئامێزى پارتى و بوون به‌قه‌لَه‌م فرۆش و تووتى و ماستاوچي و ئه‌وتاوانه‌و سه‌دان تاوانى ديكه‌يان بۆكردن به‌شكۆمه‌ندى و پيرۆزييان پێ به‌خشى.ئێستاش كه‌سالَيادى دامه‌زراندنى پارتى نزيك بۆته‌وه و پارتى خۆى بۆ ئاماده ده‌كات وچه‌ند رۆژێكى ديكه‌ش سالَيادى تاوانى 31ى ئابه من وابه‌باشتر ئه‌زانم كه هه‌موو لايه‌ك هه‌لَمه‌تێكى چرِو پر ئه‌نجام بده‌ين و بۆ زياتر ريسواكردنى ئه‌و پارته وه‌كو ئێستا كه ده‌بينرێت له شارى سلێمانيدا دووچارى چ مه‌ينه‌تى و نه‌هامه‌تى ئه‌زمه‌ى ئه‌ندامان و لايه‌نگران بۆته‌وه، كارگه‌يشتۆته ئه‌وه‌ى دووئه‌ندام ولايه‌نگريان ده‌ست نه‌كه‌وێت ئه‌و پۆسته‌ر ولافيته زه‌ردانه‌يان بۆ هه‌لَواسێت ناچار هه‌نێك براى عه‌ره‌بى چاورِه‌شيان به‌كرێ گرتوه بۆ ئه‌و كاره ،كه‌ئه‌وه بۆخۆى گه‌وره‌ترين شكست و نابوتى پارتيه بۆيه ده‌بێت ئێمه‌ش به‌هه‌موو رێگاكان پارتى بنه‌مالَه بن پێ بخه‌ين و هه‌ريه‌كه‌مان به‌شێوازى خۆى به‌نوسين يان خۆپيشاندان يان په‌راوێز خستن و مامه‌لَه‌نه‌كردن له‌گه‌لێدا و گۆشه گيركردنى و لێ ته‌كينه‌وه و لێى وسه‌ندنه‌وه‌ى متمانه وه‌رگرتنه‌وه‌ى پۆسته‌كانى سه‌رۆكى حكومه‌ت و سه‌رۆكى هه‌رێم و سه‌رۆكى ئاسايشى نه‌ته‌وه‌يى له‌و ولاَت هه‌راج كه‌رانه‌و بيانخه‌ينه ليستى ره‌شى تاوانكارانه‌وه،هه‌قيشه ئه‌ندامانى په‌رله‌مان به‌تايبه‌ت لايه‌نى ئۆپۆزسيۆن له‌سه‌ر ئه‌و تاوانه مه‌سعود وسه‌رانى بانگهێشتى په‌رله‌مان بكه‌ن و لێپَچينه‌وه‌يان له‌گه‌لَدا بكه‌ن و بيان ده‌ن به‌دادگايه‌كى عادل و بێ لايه‌ن و ده‌رهه‌ق به‌وكاره‌ئابرِوبه‌رانه‌يان ، داواش له هاوپه‌يمان و دۆسته ئازيزه‌كه‌شى ده‌كه‌م نه‌كات بروسكه‌ى پيرۆزبايى يان بۆ بنێرێت چونكه بۆنه‌كه‌ى يادى66 سالَه‌ى دامه‌زراندێتى و ئه‌و ژماره‌يه‌ش بۆئه‌وانيش شوومه با دوو جار تووشى ئيحراجى نه‌بن وبرينى كۆنى ئێوه‌ش نه‌يه‌ته‌وه سوێ .
چه‌تۆ بينايى
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
