پێشمەرگایەتی و (فسبوك)

Sunday, 03/04/2011, 12:00

لە وتارێ پێشوماندا بەناونیشانی ((ئەفسانەی بارزانی وەهمێكە و هیچی تر)) ئاماژەمان بەوە كردبو كە قارەمانێتی گەنجانی نەوەی راپەرینی 17 ی شوبات زۆرجیاوازە لە قارەمانێتیەكانی نەوەكانی پێشو كە پێشمەرگایەتی لوتكەی كردەوەكانیان بو كاتێك كە وتمان ((ئەگەر ئازایەتی شەخسی و شەرەتفەنگ ئەو مافە دەدات بە مرۆڤ هەتاهەتایە بەروبومی كوردستان پاوان بكات بۆ خۆیی و نەوەكانی، ئەوا پێویستە رونبكرێتەوە كە خەبات وئازایەتی ئەو بەناو مەلایە نەگەیشتوە بەخەبات وئازایەتی سادەترین پێشمەرگەی پارتیزانی یەكێتی لە حەفتاكان و هەشتاكانی سەدەی رابوردودا، وناگات بە ئازایەتی و رۆڵی نوسەرە لاوەكانی رەهەند و رۆژنامە ئەهلیەكان كەبەرامبەر دەستگاكانی پاراستن و زانیاری و دژەتیرۆری بنەماڵە تەنیا چەكی دەستیان قەڵەمەكانیانە وناگات بە ئازایەتی ئەو گەنجانەی 17ی شوباتی ئەمسال ورۆژانی دواتر كە لەبەرامبەر هێرشی بی كەی سیدا لە بریتی راكردن دەگەران بۆ بەردی بەرەنگاری)) ئەمەش بەهیچ جۆرێك مانای بەكەم سەیر كردنی خەباتی پێشمەرگایەتی ناگەیەنێت، بە پێچەوانەوە وەك هەمو كوردێكی نیشتمان پەروەر شانازی دەكەین بە پێشمەرگەو پێشمەرگایەتی و خەباتی شاخ، دەبێت كێ بێت سەری رێزو خۆشەویستی بۆ ئەو مرۆڤە دانەنەوێنێت كە وازی لە ژیانی تایبەتی خۆی دەهێناو دەبو بە پێشمەرگەی چەكداری نەتەوایەتی پێشكەوتنخواز كە لەراستیدا هیچ تروسكاییەكی سەركەوتنیشی لێوە نە دەبینرا تا بڵێن بە تەماعی دەستكەوت و پلە وپایە ئەو ریگایەی هەڵبژاردوە .
لە كاتێكدا كە خەباتی ناو شارەكان ئاستەم دەبێت، ئەم ریگەچارەیە واتا پەنا بردن بۆ شاخەكان و شەری پارتیزانی دژی داگیركەرانی بێگانە یان زۆردارانی ناوخۆیی، زۆر سروشتی لەلایەن تێكۆشەرانی پێشەنگەوە بیری لێ دەكرێتەوە و نەخشەی بۆ دەكێشرێت و ئەنجام دەدرێت، ئەمە سەدان جار لە مێژوی مرۆڤایەتیدا رویداوە و تەنانەت ئێستاش كە تا رادەیەكی زۆر وەكو دەڵێن (باوی نەماوە) ، لەبارو دۆخێكی دیاریكراودا و لە وڵاتانی سیخناخ لە زۆرداری و گەندەڵی بۆی هەیە پێشەنگانی خەبات هەست بكەن رێگای شاخ و چەك باشترین رێگای سەركەوتنە، هەر وەگو ئێستا لە لیبیاو ئەفغانستان و تا ئەم نزیكانەش لە عێراقی عەرەبی بە رێوە دەچو.
مەبەستمان لە و وتارەی پێشو ئەوەبو كە ئەو سەروەریەی خەباتی شاخی نەوەی پێشو نابێت چیتر بكرێت بە سەرچاوەی شەرعیەتی داگیركردن و دزینی دەسەڵاتی سیاسی وسەروەت وسامانی كوردستان هەروەكو دو زلحیزبەكە 20 ساڵە بەكردەوە دەیكەن، كەچی دیسانەوە مەسعود بارزانی لە وتارەكەی نەورۆزی ئەمساڵیدا لە پاڵ گاڵتەكردن بە نەوەی ((فسبوك)) دا دەستی كردەوە بە لێدانەوەی قەوانە سواوەكەی بەیتو بالۆرەی پێشمەرگایەتی و هێنان و بردنی زاراوەكانی خەباتی چەكداری وەك ئەوەی قاڵبوی ئەو بوارە بێت، ئەم كابرایە لەهەمو بۆنەكاندا مزایەدەی راگرتنی قودسیەتی ((پیشمەرگە)) دەكات، بێ ئاگا لەوەی:
- نەوەی ((فسبوك)) كاری هەر یاریكردن بە ئینتەرنێت نیە، بەڵكو جگە لە خۆ رۆشنبیركردن، بەكاری دەهێنێت بۆ رێكخستنی خەباتی شار و ئاگاداربون لە هەواڵەكانی راپەرین و گەیاندنی پەیامە سیاسیەكان لە نێوان جەماوەر و پێشەنگانی خەباتدا رێك وەك ئەوەی كە كاتی خۆی لە شورشی ئەیلول و شورشی نوێدا بە ((نامە چكلێتیەكان)) دەكرا، ئەو نامە چكلێتیانەی كە دڵنیاین لە ژێر سێبەری ((بابت))دا، رۆژێك لەرۆژان شەرەفی هەڵگرتن و گواستنەوەیانت پێ نەبراوە، وە وەك ئەوەی رادیۆكەی یەكێتی لە رۆژانی شۆرشی نوێدا دەیكرد، هەر ئەو نەوەی ((فسبوك)) ە ، رۆژانە لە دوای خوێندنەوەی هەواڵەكان و نوسینی وتارەكانی، دەروات بە دەستی بەتاڵ بەرەو روی چەكدارە پیاو كوژەكانت دروشمی روخاندنت دەلێتەوە و دەیان جار دەتكات بە قوربانی هەركەسێك توانجێكت تێ بگرێت.
- هەر ئەم نەوەی ((فسبوك))ە بۆ رزگاركردنی راپەرین لە قەتیس بون لە سەرای ئازادی و گەیاندنی بە هەمو ناوچەكانی كوردستان و راكێشانی رۆشنبیران و مامۆستایانی ئایینی و پەرلەمانتاران و رێكخراوەكانی كۆمەڵگەی مەدەنی وسەرەنجام ئۆپۆزیسیۆن و تەنانەت ئەندام وكادرە بەشەرەفەكانی ناو دوزلحیزبەكەش و رزگاركردنی ئەنجومەنی كاتی لە سواڵی چاكسازی و شەرم كردن لە هەڵگرتنی دروشمی((بروخێ))، بۆ ئەنجامدانی هەمو ئەوانە بەردەوام سەرقاڵی نوسین و پەیوەندی و گفتو گۆیە و ئێمەش و ئێوەش دڵنیاین كە لەم رێگەیەوە سەر دەكەوین لە روخاندنی بنەماكانی دەسەڵاتتان و شاربەدەركردنی بنەماڵە دزو پیاوكوژەكانتان.
- سەرەرای ئەو هەمو فروفیشاڵەت بە شەرەفی پێشمەرگایەتیەوە، خەڵكی كوردستان بەهیچ جۆرێك تۆو بنەماڵە دەرەبەگەكەت و جامانە سورەكانت و حیزبە كارتۆنیەكەت بە هەڵگری شەرەفی ئەو خەباتە نازانن، ئێستا خەڵك دەزانێت تۆ بە پاڵتۆیەكی شاهانەی ئوتوكراوو برنەوێكەوە وێنەیەكت گرت و 45 ساڵە خۆت لێ كردوین بە پێشمەرگە، بەڵام لە راستیدا تۆ تەنیا كوری پیاوێكی خێڵەكی چەكدار بویت و ((بابت)) ئەو كاتە رابوردویەكی سەركەوتوی 30 ساڵی هەبو لە بەدەستهێنانی دەستكەوتی مادی گەورە بۆ خێزانەكەی و چەكدارە جامانە سورەكانی، لەبەر ئەوە زۆر سروشتیە كە لەبەرەی بابتدا بمێنیتەوە و یارمەتی دەری بیت لە پاراستنی بەرژەوەندیەكانی بنەماڵەت دژی باڵی مەكتەبی سیاسی كە باڵی راستەقینەی حیزب بون و لە روبەروبونەوەی هێزە خێڵكیەكانی بابت دا بە داخەوە سەركەوتنیان بەدەست نەهێنا، دەنا مام جەلال ئەو رۆژە بو بە جاش كە بو بە هاو پەیمانی ستراتیژیتان و لە هەڵگەرانەوە لە ((بابت)) پەشیمانی دەربری، نەك ئەو رۆژەی بەهەمان شێوەی بابت و دژی گەندەڵیەكانی بابت دەستی هاوكاری بۆ حكومەتی ناوەندی عێراق درێژكرد.
بۆ بابیشت سروشتی بو كە بۆ پاراستنی كۆنترۆڵی خۆی بەسەر بزوتنەوە چەكداریەكەدا كە وەكو كۆمپانیای(بلاك ۆتەر)ی ئەمریكی جارێك ((كرێی مفاوەزات))ی لە حكومەتی ناوەندی عێراق پێ پەیدا دەكردو جارێك ((یارمەتی شۆرش)) ی لە ئێران و ئەمریكاو ئیسرائیل و یەكێتی سۆڤیەت پێ پەیدا دەكرد، سروشتی بو كە وەكو دەستەراستی خۆی سود لە تۆو ئیدریسی برات ببینێت، هەمو سەرۆك خێلەكانیش هەر وەهابون كە دەبون بە پێشمەرگە یان موستەشاری فەوجی خەفیفە سروشتی كارەكە وابو كە كورەكانیشی بۆ پاراستنی خۆی و یارمەتیدانی لە كارەكانیدا یارمەتیدەری بن ئیتر پێشمەرگایەتی چی كاكی برا، هەر سەرۆك خێڵێكی یاخی لەناوچەی خۆی بەرەو روی هێرشی حكومەت ببێتەوە بێگومان خۆی و كورەكانیشی هیچ نەبێت وەك تۆو ئیدریس لە هەندرێن و خواكورك دوربەدور هەردەبێت ئاگایەكیان لە رەوتی شەرەكە بێت، دەنا لەو رۆژەوەی لوقمانی برات لە هاوینی 1964 دا بەسەركردایەتی هێزە خێڵەكیەكان باڵی مەكتەبی سیاسی پارتیان لە ماوەت بەرەو ئێران دەرپەراند، لەناو باڵەكەی ئێوەشدا شتێك نەما بەناوی حیزب و پێشمەرگایەتی تا بڵێین تۆ پێشمەرگە بویت، خۆ ئێوەش وەك باڵی مەكتەبی سیاسی لەو رۆژەوە تا 1974 هەر خەریكی مفاوەزات بون لە گەڵ حكومەتی عەبدولسەلام عارف، عەبدول رەحمان عارف، عەبدول رەحمان بەزاز و تاهیر یەحیاو ئەحمەد حەسەن بەكر...دوای ئاشبەتاڵەكەی 1975 یشتان لەكەرەج پاڵتان لێدایەوە و هەتا راپەرینی 1991 كە بە حساب پێشمەرگایەتی و شۆرشی گوڵانتان دەست پێ كردبوەوە، نەمان بیست داستانێكی وەك حەمك، بێتواتە، سەنگاو، قەیوان ماوەت، داستانی رزگاری و بەرگری دریّژخایەنی ئەنفالەكان... تۆمار بكەن، نەمان بیست ئاسۆی دەلاكێك، جەمال تاهیرێك، مامە ریشەیەك، مام رۆستەمێك، جەبار فەرمانێك، مەلابەختیارێك، ئاوات قارەمانیەك، ئازادێك، وەهابێك، جمالی عەلی باپیرێك، حەمە رەشێك، سامان گەرمیانیەك، سیروان تاڵبانیەك، مستەفا چاورەشێك، حەسەن خاوێیییەك... لە ئێوەدا هەڵكەوێت، نەمان بیست بە هاندان و پشتگیری و رێكخستنی ئێوە خەڵك خۆپیشاندانێكی وەك ئەوانەی سلێمانی و قەڵادزێ و هەڵبجە...بەرپا بكات، ئاخر ئەگەر لەشوێنێك خەباتی چەكداری لە ئارادابێت سروشتیە دەیان داستان و دەیان سەركردەی سیاسی و عەسكەری جیفارا ئاسا پەیدابێت، ئەی كوان ئەوانەی ئێوە و جامانەسورەكانتان و لقی یەك و شۆرشی گوڵانتان؟ ئەگەر ئێوە قاڵبوی كورەی خەبات و پێشمەرگایەتی بونایە بەشی ئەوەندە سەركردەی كارامە و جەنگاوەرتان دەبو كە هەمو جەولەكانی شەرتان لە گەڵ یەكیتیدا، هەرلە زەمانی بەرەی جود و هەشتاكانەوە تا 31 ی ئاب و نەوەدەكانەوە نەدۆرێنن، تكایە ئیتر ناوی پیرۆزی پێشمەرگەمان بە زمانە خوار و خێچەكەتان لەبەرچاو مەخەن.. بەراست ئەگەر سۆرانی فێرنابن بۆ بە لەهجەی شیرینی بادینانی قسە ناكەن؟ تاكەی بەو زمانە ناخۆشە و جلوبەرگە ناشیرینەكەتان زەوقی كوردەواری دەشێوێنن؟