بۆچى گرنگە كۆبانێ نەكەوێت ...!؟

Friday, 17/10/2014, 12:00

ئاكۆ ئاكۆیى

كۆبانێ ئێستا تەنیا شارێكى گەمارۆدراو نیە ، ناشبێ تەنیا لە رووى سەربازى تەماشا بكرێت بەڵكو بەهۆى شوێنە جوگرافی و بارودۆخە سیاسیەكەو خۆراگرى دانیشتوانیەكەى لە بەرامبەر گەورەترین هێزى وەحشیەتگەرى تیرۆرست رەهەندى ترى وەرگرتووە و گرنگى و بایەخى خۆیى هەیە بە تایبەتى بۆ كورد بۆیە ئێستا هەموو دەنگەكانى خۆمان و دۆستەكانمان هاوار دەكەین (كەوتنى كۆبانێ كەوتنى كوردە) و (كەوتنى كۆبانێ كەوتنى مرۆڤایەتیە) بەڵێ كەوتنى كۆبانێ كەوتنى كوردو مرۆڤایەتییە ! هەڵبەتە ئەمە لە دوو روانگەوە سەیر دەكرێت یەكەمیان هاوارى كوردە كە لە ناخى كوردایەتى و نیشتمانى دەردەبرێت ، دووەمیان هاوارى دۆستەكانمانە كە لە ناخى مرۆڤایەتییەوە دەریدەبڕن .
بە داخەوە هەندێ دەنگى ئێرەو ئەوێ لە سەر ئاستى تاكە كەس كە رێژەیەكى كەمن گوێمان لە هەندێ بۆچوون و دەربڕین دەبێت دەڵێن (كەوتنى كۆبانێ بۆچ كەوتنى كوردە ،ئەمە شەڕەو سەركەوتن و دۆڕاندنى تیایە ... !؟) ئێوە لە روانگەى سەربازى سەیرى دۆخەكە مەكەن ئێمەش دەڵێین بە داگیركردنى كۆبانێ كورد لە ناو ناچێ و ناسنامەى ناسرێتەوە ،بەڵام دەبێت ئێوە دوور بڕوانن و ورد بیر بكەنەوە .
دەركەوتنى داعش و شەڕكردنى ئێستا بووە بە بابەتى رۆژانەى هەموو میدییاكانى جیهانى و ناوەندە سیاسیە بڕیار بە دەستەكانى نێو دەولەتى بەگشتى و ناوچەكە بە تایبەتى ، باروودۆخى كۆبانێش بەشێكى گرنگى ناو ئەم پرسەیە تەنانەت بووە بە كێشەیەك وا خەریكە سەرووى كێشەكانى جیهان دەگرێت بە پرسى فەلەستینیشەوە ، بۆیە گەر كۆبانێ بكەوێت (كە ئەمە دوورە رووبدات) ئەم گۆڕان و كاریگەریانە بە دوواى خۆى دا دەهێنێت .
1 - ئەو گرنگیە سیاسیەى ئێستا بە كورد دەدرێت كە تاكە هێزى ناوچەكەیە لە بڕى هەموو جیهان توانیویەتى شەڕى گەورەترین رێكخراوى تیرۆرست بكات كە شەڕى تیرۆر شەرێكى نێو دەولەتیە پێم وایە ئەم گرنگیە بە شێوەیەك لە شێوەكان كال دەبێتەوە .
2- رێكخراوى تیرۆرستى داعش زۆر مەبەستیەتى كۆبانێ داگیر بكات چوونكە بۆ ئەوان شوێنێكى ستراتیژییە لە رووى سەربازى و ئابوورى و پەیوەندیەوە بە تایبەتیش ئابوورى لەم رێگایەوە دەتوانێت بە رێژەیەكى زۆر نەوت بفرۆشێت لە هەمان كاتیشدا دەروازەیەكە بۆ پەیوەندى و بە دەست هێنانى پێداویستیەكانیان و هێزى مرۆیى لە رێگاى توركیاوە كە هەموو بەلگەكان دەریدەخەن توركیا هاوكاریەتى .
3 - كۆبانى بۆ رۆژئاواى كوردستان شادەمارێكى گرنكە بە كەوتنى كاریگەرى خرابى دەبێت بۆ سەر كانتۆنەكانى تر ، بە داگیركردنى كۆبانێ سەركەوتنێكى گەورەیە بۆ داعش لە رووى سەربازییەوە غرور دیگرێ و هەنگاو بەرەو فرەوانكردنى دەسەڵاتى دەدات لە رۆژئاواو باشورى كوردستان و عێراق و سوریا ئەو كات مەترسى دەكەوێتە سەر كانتۆنى جەزیرەو عفرین لە رۆژئاواو ئەو شارو شارۆچكانەى كە نزیكن لە بەرەكانى شەڕ لە هەرێمى كوردستان .
4 - كە جوگرافیاى زیاترى كۆنترۆل كردو دەسەڵاتى فرەوانتر كرد كێرڤى دۆست و لاینگرانى لە جیهان و بە تایبەتیش لە وڵاتانى عەرەبى و ئیسلامى بەرز دەبێتەوە ئەمەش دەبێتە پاڵپشتیێكى گەورەى مادیى و مەعنەویى بۆیان گەشەى زیاتر دەكەن لە رووى سەربازیى و ئابووریى لە وانەیە رێكخراوەكانى ترى هاوشێوەى خۆیان لە وڵاتانى تر بكەونە ژێر هەژموونیان و بەیعەت بە بەناو دەولەت و خەلیفەكەى بكەن و هەندێ لە لە وڵاتانى ناوچەكە لە روانگەى بەرژەوەندیەكانیان ژێر بە ژێر هاوكار یان بكەن یا خود ژمارەى ئەو وڵاتانەى كە ژێر بە ژێر هاوكارن زیاد بكات .
5 -لە رووى مرۆڤایەتییەوە كارەساتێك بەرپا دەبێت كەم وێنە دەبێت لە جیهاندا كە هەموومان دەزانین ماهیەتى ئەم رێكخراوە چۆنە بە تایبەتیش لە بەرامبەر كۆبانێ كە رقێكى زۆریان بەرامبەر ئەم شارەو دانیشتوانەكەى هەیە و بۆتە گرێیێكى كوێرەو كوشندەى سەردڵیان ، زۆر لە كارەساتى شنگال گەورەتر دەبێت كردەوە وەحشیەتگەرانەیان دەگەینە لوتكە .
6 ئەو پیلانە هەرێمایەتى و ناوچەیەیى كە بۆ سەر كوردو دەسكەوتەكانى لە ئارا دایە تا دۆزە رەوایەكەى و دەسكەوتەكانى بە تایبەتیش لە باشورو رۆژئاواى كوردستان لە بەین بەرن یا خود بچوكى بكەنەوە , ئەم پیلانە لە جێبەجێكردن بەرەو نزیكبوونە دەچێت .
7 بەرفرەوانبوونى دەسەڵاتى داعش بە شێوەیەك لە شێوەكان بەرەى سوننە مەزهەبى عەرەب لە عێراق بە هێز دەكات ئەمەش بۆ هاوكێشە سیاسیەكان لە داهاتوو بۆ هەرێمى كوردستان كێشە دەنێتەوە .
8 هەندێ لایەنى هەرێمایەتى دەیانەوێت لە رێگاى كەوتنى كۆبانێ لە ئیرادەو هێزو كاریگەریەكانى بزاڤى رزگاریخوازى كورد بدەن بە گشتى و بە تایبەتیش لە باكورو رۆژئاواى كوردستان.
9 هەلێكەو دەرفەتێكە بۆ كورد بە ئاسانى جارێكى تر هەڵناكەوێت تا پێگەى خواستەكانى بە هێز بكات بۆ ئەو گۆرانكاریانەى كە لە دواى ئەم بارودۆخەو هاوكێشە سیاسیەكان لە ناوچەكە دێتە گۆر بە مەرجێك كورد لە رووى سیاسى و سەربازى بە سەركەوتوویى لێیدەرچێت ، هەلبەتە گەر كۆبانێ بكەوێت كاریگەرى نەگەتیفى دەبێت.
بەڵام گەر رێكخراوى تیرۆرستى داعش لە كۆبانێ تێك بشكێت ئەو خاڵانەى ئاماژە پێكراون
بە شێوەیەك لە شێوەكان پێچەوانە دەبنەوە و ئەم رێكخراوە توشى شكست و داڕمانى دەرونى و مۆڕال داتەپیوى دەبێت .
ئەو پیلانە هەرێمایەتى و ناوچەییەى كە بۆ سەر كوردو دەسكەوتەكانى لە ئارا دایە پوچەڵ دەبێتەوە ، كاریگەرى لە سەر دۆزى كورد لە هەموو بەشەكانى كوردستان دەبێت لە هەموو روێكەوە بەرەو پێش دەچێت و دەبێتە جێگاى گرنگى و بایەخپێدانى زیاتر لە لایەن كۆمەڵگاى نێو دەولەتیەوە ، بە تایبەتیش لە رۆژئاواو ئەو پرۆسە ئاشتیەیى كە لەنێوان بزاڤى رزگاریخواز لە باكورى كوردستان و دەولەتى توركیادا هەیە ، هەروەها كاریگەرى دەبێت لەسەر ئەو مامەڵە سیاسیە ساردەى كە بەغدا لە بەرامبەر هەرێمى كوردستان هەیەتى ، ئەوەى زۆر گرنگیشە ئەمریكا و وڵاتانى ئەوروپى ئەو سۆزەو مامەڵەیەیى ئێستا لە بەرامبەر كورد هەیانە گۆڕانى بەسەر دادێت و زیاتر بۆ كورد دێنە سەر هێڵ و گرنگى و بایەخیان زیاتر دەبێت .
بایەخى مرۆڤى كورد بە تایبەتیش ژنان بۆ كۆمەلگاى نێو دەوڵەتى دەبێتە جێگاى بایەخ نەك بۆ ئێستا بەڵكو بۆ داهاتوێكى دوریش ، سەیر كە ئەو خۆراگریەو قوربانیدانەى ژنان و كچان و پیاوانى كورد لە كۆبانێ كەم وێنەیە لە مێژووى خەبات و تێكۆشانى گەلان بەرخۆدان و خۆراگرى دانیشتوانى كۆبانێ ڵوتكەى قارەمانیەتیە لە بەرامبەر هێزێك كە نامۆیە بە لاى كۆمەڵگاى نێودەوڵەتى و بە تایبەتیش كۆمەلگاى مەدەنى بۆیە ئەم قارەمانیەتیە بۆتە جێگاى سەرەنجى تەواوى جیهان و سەرسام بووینە لە بەرامبەر ئەم بەرخۆدانە ، كۆبانێ ئێستا بۆتە سیمبول هەر ئەم خۆراگرى و قارەمانیەتیەى خەڵكى كۆبانێیە كۆبانێى كردووە بە جێگاى بایەخ پێدانى لە لایەن كۆمەڵگاى نێودەولەتیەوە ، ئێستا ناو و بەرگى شەرڤانانى یەپەگەو یەپەژە چویتە سەر ناو و بەرگى ماركە جیهانیەكان و كۆمپانیەكانى چەك بیر لەوە دەكەنەوە چەكە كاریگەریەكانى لەمەو دووا بەرهەم دەهێنن ناوى (یەپەگەو یەپەژەو گەریلاو پێشمەرگە) بخەنە سەرى تەنانەت واخەریكە فیلمى سینەمایى لەسەر ئەم خۆراگریە بەرهەم دەهێنرێت ، ئەم بەرخۆدان و قارەمانیەتیە ناوەندە سەربازیەكانى سەرسام كردووە بە تایبەتیش تواناكانى ژنان و كچان وا توێژینەوەى لە سەر دەكەن ، ئیرادەو باوڕبەخۆبوونى داوەتە تەواوى ژنان ، ئەوەندەى لەو ماوە ى شەڕو خۆراگرى كۆبانێ باس لە كورد و دۆزەكەى كراوە لە ناوەندو كەناڵە جۆراو جۆرەكانى راگەیاندنى جیهانى بە درێژایى چەندین ساڵى رابردوو باس نەكراوە ، بۆیە گرنگە نەهێلین كۆبانێ بكەوێت هەر واش دەبێت لە سایەى خۆراگریى قارەمانیەتى كۆبانیەكان .
پێم وایە ئێستا لەبەر ئەو بارودۆخەى ناوچەكە وا خەریكە كێشەى كورد بە گشتى ببێتە یەك كێشەى هەمەلایەنە لە جەوهەردا بە تایبەتیش لە رۆژئاواو باكورى كوردستان ، بۆیە دەبێت هەموو كوردێك و رێكخراوە سیاسیەكانیش وا بیر بكەنەوەو هەنگاوى بۆ بهاوێن و لە هەر شوێنێكى كوردستان مەترسى دروست بوو هەموومان خۆمان بە خاوەنى بزانین و بە هەر شێوەیەك و رێگایەك بێت هاوكاری یەكتر بكەین خۆشبەختانە كەم و زۆر ئێستا ئەم هاوكاریە هەیە بەڵام پێویستە پەرەى زیاترى پێبدەین ، ئەوى ئێستا زۆر پێویستەوگرنگە نەهێلین كۆبانێ بكەوێت .