سەرۆكێكى بێ راوێژكار و راوێژكارێكى بێ سەرۆك

Thursday, 29/09/2011, 12:00

لە هەموو دنیادا واباوە هەر سەرۆكێك چەند راوێژكارێكى هەبێت، كە پەیوەستن بە لایەنێك یان چەند لایەنێكى ئەركەكانى سەرۆك و راییكردنیان، بۆ ئەوەى پەیوەندییە سیاسى و كۆمەڵایەتییەكانى لە هەمبەر رەوشى ناوخۆو دەرەوە لەسەر هەموو ئاستەكان خوێندنەوەیەكى واقیعبینانە بۆ بارودۆخەكان ئاراستە بكەن. دیارە كاتێكیش پردی متمانە لەنێوان راوێژكار و سەرۆك لەسەر بۆچوون و پێشهاتەكانى رەوشى وڵات دروست دەبێت، راوێژكار وردەوردە دەبێتە دەمڕاستی سەرۆك.
ئەمە لە كاتێكدا ئەگەر راوێژكار پلە ی ئۆرگانیەكانى حزبی نەبڕیبێت بۆ ئەم پۆستە، بێگومان بەخشینی ئەو مەقامە بە هەركەسێك ماڵیكردنى ئیرادەكەیەتى بۆ ناو بازنەى حیزب وەك كارەكتەرێك (سمعا وگاعه) رۆڵدەبینێ نەك رەقیب و وشیار بەسەر ئەداى سەرۆك، بۆیە لەوێدا رێنماییەكانیشى بۆ سەرۆك لە دەلاقەى بەرژەوەندیەكانى حیزب تێپەڕدەبێت و هەمیشە ناشیرینییەكانى حیزب بە مكیاژكراوى دەبەنە بەردەم سەرۆك و ژمارە گەورەو نێگەتیڤەكان بەبچووكى پیشان دەدەن، بۆیە كاتێ موبارەك دەپرسێ لە ژمارەى ئەو كەسانەى رژاونەتە سەرشەقام راوێژكارى سەرۆك دەفەرمووێ: "سیادەتولرەئیس ئەوانە چەند سەد كەسێكن لە كۆى (80) ملیۆن كەسى میسر، ئەوانە (بلگجی)ـین، من پێمباشە تێیانكەوین"، لە كاتێكدا نیو ملیۆن كەس لە شەقام بوو دیارە بڕیارەكانى سەرۆك لەدەرەوەى ئیرادەى خۆى بۆ واقیعێك كە هەیە بەڕێوەدەچێ. كاتێك سەرۆك دەبێتە دیكتاتۆرێكى رەهاو هەموو شۆڕشگێڕانى وڵات لە بەهاى ئینسانیەوە دەكا بە (جرژان) راوێژكارانى سەرۆكیش وەكو توتى دەڵێن (جرژان)، كاتێك بەعسیەكان بۆ كوشتنى خەڵكى سڤیل و نارازى لەدەسەڵاتەكەى بە پاساوى (عێابات مسلحە) رەوایەتى پێ دەدەن بە تەدبیرى راوێژكارانیەوە، بۆیە كاتێك راوێژكار وەزیفەی خۆی لە دەست دەدات بۆ شیكردنەوەى هۆكارەكانی ئاریشەیەك و گەڕان بەدوای چارەسەرێك، ئەودەمە سەرۆك سەرپشك دەبێت لەنێوان دیكتاتۆرێكى رەهاو دەسەڵاتێكی كراوە. بۆیە ئێمە كاتێك كۆڕاین لە سەرئەوەى سیستەمی ئەو هەرێمە شەفاف و دیموكراسى بێت، دەبێ بەرگەى ناڕەزایەتی سەرشەقامیش بگرین، كاتێك میللەت لە دۆڵێك و دەسەڵات و حیزب لە دۆڵێكى دیكەدان، كاتێك هێمنترین خۆپیشاندان لەو هەرێمە بەڕێوەدەچێت لەدژى حكوومەتى هەردوو حیزب، لە جیاتى ئەوەى راوێژكارانى حكوومەت و سەرۆكى هەرێم لە هۆكارى هاتنە سەرشەقام بكۆڵنەوە كە خەڵك لەچى ناڕازییەو بۆچى هاتوونەتە سەرشەقام و داواكارییەكانیان جێبەجێ بكرێ، هاتن بەهێز وەڵامیان دانەوە، لە راگەیاندنەكانیاندا دەیانگووت ئیتر بەسە، وەك ئەوە وابوو دیموكراسیەكەى ئەوان 60 ئەمپێربێت و تەنیا بەشى 60 رۆژ بكات و دەسەڵاتیش هەر ئەوەندە تەحمولبكات , كاتێك لەناو پەرلەمانى ئەو هەرێمە زۆرینەى دوو حیزبى خاوەن حكوومەت ئیرادەیان كۆنترۆلی حیزب دەبێت و دەبنە نوێنەرى حیزب، لەوێوە یەكەم هەنگاوى زۆرینە سەرى دیموكراسى دەخواو شەرعیەت دەداتە ئەو دەسەڵاتەى هەرچى ئەوان بیانەوێ بە میزاجى حیزب دەبێتە بڕیارو یاسا، نەك ئەوەى میللەت دەیەوێت و بۆى دێتە سەرشەقام، كەچى كاكى راوێژكار لەبەر خاترى حیزب یەك قسەى نییە پێچەوانەى ئەو هەڵوێستە لەوێوە دیكتاتۆرى چەكەرە دەكات و سەر دەردێنێ. ئەودەمەى حكوومەت بە شەراكەتى دوو حزب پێكدێت و دوو ئیدارەش دەبێتە ئەمرى واقع نەك دیاردە سەرۆكى حكوومەت نەتوانێ لێپێچینەوە لەوەزیرێك بكات بە بێ ئەمرى حیزب و وەزیریش لە مەكتەبى سیاسیەوە رێنمایى وەربگرێ، دەبێ حاڵی ئەو حكوومەتە لەسەر ئەرزى واقع ئەداى چۆن بێت؟! ئەى باشە لەو هەموو كێشەو رەوشى جەنجاڵە دەپرسین پیشەى راوێژكار باروودە یان حەریق؟ ئەگەر تا 25/7 ئیتیفاقى ستراتیژى هەردوو حیزب بەدیوێك ئارامى بۆ كوردستان و ئیدارەیەكى خۆماڵى بێت، بە دیوەكەى تری رێكەوتن بوو لەسەر ئەوەى چۆن كوێخایەتى بەسەر ئەو هەرێمەوە بكەن لەسەر خۆیان تاپۆ بكەن لەو ریزبەندیەى كە دەوڵەتى عیراق دووەم دەوڵەت بێت لەگەندەڵی، دەبێ ئەو هەرێمەى ئێمە لەكوێوەى ئەو هاوكێشەیەوە بێت لەژێر ئیتفاقى ستراتیژى؟! هەرچى بەهاو جوانى شۆڕش و كوردایەتى بوو خرایە تایەكى تەرازووى بەرژەوەندى دەسەڵاتى كوردى و دۆلار، ئیتیفاقى ستراتیژى مەهامى گۆڕا لە شەڕ بۆ ئاشتى و بووە بەشبەشێنە بەغدا بۆ تۆ هەرێم بۆ من، فلان وەزارەت بۆ تۆ ئەو بۆ من.
ئێمە سەرۆكى هەرێممان هەیە، ئەرێ رۆژێك راوێژكارێكت نەیفەرموو جەنابى سەرۆك با لەبەرامبەر پەرلەمان باڵەخانەیەك بەناوى سەرۆكایەتى هەرێم هەبێت و ئەگەر لە هەفتەیەك دوو رۆژى بۆ تەرخان بكەیت كاتێ هاووڵاتى لەداخى حكوومەتى حیزبى هانا بۆ جەنابت دێنێ كە گەورەترین مەرجەعى دەسەڵاتی؟! ئەرێ راوێژكارانى سەرۆك ئێوە بەسەرۆكتان گووتوە ئەوەى لەسەرى رەش تۆ دەبینێت یان دەبێ كەسێكى زۆر تۆخى پارتى بێت یان دەبێت ئەوەى خۆت بڕیارت داوە بیبنى، نەك وەك ئەوەى خەڵك بیەوێ دەنا كەسى ئاسایى ئەو هەرێمە نین دەپرسین بۆ دەبێ دیتنى سەرۆكى هەرێم بۆ خەڵكى خاكى قەدەغە بێت؟! ئەرێ سەرۆك چ پێویستى بەستایش و خۆشەویستى ئێوە هەیە سەرۆك دەبێ لاى خەڵك خۆشەویست و گەورەورەبێ , راوێژكارانی سەرۆك نەتانتوانی لەگەرمیان پێشنیاری كردنەوەی ئۆفیسێك بۆ سەرۆك بكەن و تەنیا یەك رۆژ لە مانگێكدا ئەو خەڵكە داماوە چاویان بەسەرۆكی خۆیان بكەوتایە تا لە نزیكەوە بەسەرۆك بڵێن گەورەم ئەو موستەشارە ئەنفالچیانەی لە بن باڵی حیزب حەشاردراون و خەڵات كراون رادەستی دادگایان بكە خەریكە جیاوازی نامێنێ لە نێوان خەباتی پێشمەرگەیەك و جاشێك, نەك لەو دیوی دێگەڵە باسكردنی سەرۆكی هەرێم قەدەغە بێت و هەموو كەس بە سەرۆكی خۆی نەزا نێ, ئەرێ راوێژكارە شارەزكان ئێوە كە هاو سەفەرى سەرۆك بوون بۆ ئیتاڵیا بۆچی ئەوقیامەت هەڵسانەی سلێمانیتان بە كێشەى نێوان گۆران و یەكێتی لە سەرۆك گەیاند و سەرای ئازادیتان بە فیت و ئیعازی ئۆپۆزسیۆن لە قەڵەم دا لە كاتێكدا ئەوە نارەزا یی خەڵك بوو ئێوە خەملاندنی ژمارەكانی سەر شەقامتان بە ژمارەی دانیشتوان پێوانەكرد لە بیرتان كرد لەكۆی 80 ملیۆن كەس یەك ملیۆن مووبارەكی روخاند؟ ئەرێ لەكۆى پلانەكانتان بۆ سەرۆك لەهەمبەر رەوشى خۆپیشاندەران جگە لەهێنانی هێز و بە سەربازگە كردنی شارەكان و تەخت كردنی كەناڵ و گردەكان , بۆچی یەكێك لە پێشنیارەكانتان ئەوە نەبوو بلێن سەرۆك لە گەرا نەوەی ئەو سەفەرە لە سەرای ئازدی دابەزەو لەنزیكەوە لەگەڵ داخوازیەكانى شەقام گفتوو گۆ بكە , وەك سەرۆك هەرێم بریار بدە ئەو بارەگا یە دا بخە كەتەقە لە هاوڵاتى ئەو هەرێمە دەكەن كە تۆ سەرۆكیانی , بۆ دەبێ بارەگایەكی حیزبی موقەدەستربێ لە خوێنی سوركێو ورێژوان گەرمیان و هاورێكانی ؟ من لەجێی ئێوە بام پێشنیارم دەكرد سەرۆك دەست لە پۆستى حیزبی هەلبگرێ و با مۆركی حیزبی پێوە نەبێ چونكە سەرۆكی هەرێم گەورەترە لە سەرۆكی حیزبێك هەر هەڵەو تاوانێكی حێزب كە دەیكا لێی بەرپرسە . بۆ ئەوەی سەرۆكی هەمووان بێت نەك بە تەنیا لە راگەیاندنەكانی حیزبەكەى بە سەرۆكی كوردستان ناوی ببەن شەرەفی سەرۆكى كوردستان بەر لەوەى مەقامێكی گەورە بێت بەر پرسیارییەتیەكی میژووییشە , بەڵام دەبێ ئەو رەوایەتیە متمانەی خەلكی لە كوردستانی گەورە هێنابێت و بازنەی حیزبی تێپەراندبێ , دەبێ چ شەرەفێكی گەورە بێت سەرۆكی هەرێمی من سەرۆكی هەموو كوردستان بێت لە سەر دەستی ئەو دەوڵەتی كوردی راگەیەنرا بێ بەڵام پێمان نەڵێ ئەگەر میللەت بەرگەى برسێتی ساڵێك بگرێ . مەگەر حیزبەكەی ئەو دەوڵەمەندترین حیزبی ئەو كێشوەرە نیە , چی دەبێ ئەگەر بودجەی ساڵێكی ئەو هەرێمە دابین بكات ؟ دەزانی ئێمە چەند گرفتی سەرۆكێكی بە جورئەتمان هەیە پشت بە شەقام بێتە مەیدان وەك و غاندی خاكی بێت و وەك ما ندێلاش لەجیاتی خەڵك بچێتە زیندان . چونكە هەشت ساڵە بە دوو سەرۆكی هەرێم و عیراق نە تا نتوانی كێشەی ئەو هەرێمە لەگەڵ ناوەند چارە سەر بكەن لە رۆژگارێكدا كورد چ رۆڵێكی هەبوو لە بیناكردنی ئەو دەوڵە تە نە تا نزانی شیردانی فەرخەی گورگ بوو وا ئەمرۆ پەلامارمان دەدات ؟ نە تانتوانی ئەو ماددەیەی چارەنووسی كێشەكانی پێوە بەند بوو بە ناوەندی جێبەجێ بكەن , ئەوەندە شەری پۆست و ئیمتیازات و وەزارەتتان كرد , ئەوەندە شەرتان لەسەر ماددەی 140 بكردایە ئێستا سنووری كوردستان حەمرین بوو ! رۆژێك كارتی فشاری ئێوە مان نەدی ئەگەرچی سەردەمانێك ئەگەر كورد نە بایە حكومەتی مالیكی روخا بوو , كەچی ئەمرۆ لە سەر یاسا یی نەوت وغازدا بایكۆتی حكومەت دەكەن , بۆیە مافی خۆمانە بپرسین لە راوێژكاری سەرۆكەكان كام شەر پێویست و پیرۆز بوو بیكە ین شەرێك لەسەر جەستەی دابراوو داگیر كراوی نەتەوە یان شەر لەسەر یاسای ئەو نەوت و غازەی جگە لە جانتایەكی دبلۆماسی پر نهێنی دەست وەزیرێك و دوو سێ كەسی هەردوو حیزب كەس تر سری گرێبەست و پشكی تاك وحیزب و حكومەت نازانێ و بریاریشیان داوە نابێ كەس بیزانێ ! دەبێ میللەت شەرمەزاری نرخی چ سووتەمەنیەكی ئەو هەرێمە بێت كە دوو قا تی نرخی حكوومەتی ناوەندە و چ خێرێكى لە داهاتی ئەو نەوتە دەبیتێ كەرۆژانە تانكەر قەتارەو كاروانی بەستووە , بەڵام ئەگەر لا فاوی نەوتیش بمانبات جگە لەخنكانی میللەت سوودێكی تری نیە . لە دوا وێستگە قسەكانمدا دەڵێم راوێژكانی سەرۆك ئەگەر دەتانەوێ بە نەوت و غاز بایكۆتی حكومەت بكەن و شەقام بجولێنن , ئەوە ئەو شەقامەتان چوو جارێكى تر بیبیننەوە ! كێ نەوت دەبا و داهاتى دەخوا با ئەو بجەكەی بدات .