پارتی ده‌سته‌ڵاتداری تورکیاAKP ساخته له ههڵبژاردنی شاره‌وانییه‌کان ده‌کات
Friday, 27/03/2009, 12:00
لقی سویسرای رێکخراوی داکۆکی له گه‌له هه‌ره‌شه‌لێکراوه‌کان (GfbV) رۆژی 25/3 به‌یاننامه‌یه‌کی ده‌رکردوه، که ساخته‌کاری پارتی ده‌سته‌ڵاتداری تورکیا (ئاکه‌په) به‌رامبه‌ر گه‌لی کورد له هه‌ڵمه‌ت و ئاماده‌کارییه‌کانی ههڵبژاردنی شاره‌وانییه‌کان له‌قاو ده‌دات. شایه‌نی باسه ئه‌م رێکخراوه داکۆکی له‌گه‌لانی چه‌وساوه‌ی جیهان ده‌کات و له زۆر له وڵاتانی ئه‌وروپا لقی هه‌یه، له به‌ر گرنگی ناوه‌ڕۆکه‌که‌ی وا من لێره‌دا ده‌قی به‌یاننامه‌که‌یان به‌که‌مێک ده‌سکارییه‌وه وه‌رده‌گێڕمه سه‌ر کوردی:
پارتی ده‌سته‌ڵاتداری حکومه‌تی تورکیا (ئاکه‌په) ڕاشکاوانه هه‌وڵ ده‌دات که ههڵبژاردنی شاره‌وانییه‌کان، که یه‌کشه‌ممه‌ی داهاتوو ئه‌نجام ده‌درێت به قازانجی خۆی و به زه‌ره‌ری حزبه کوردییه‌کان ته‌واو ببێت. له‌م هه‌لبژاردنه‌دا کێبه‌رکێ له نێوان 19 پارتی سیاسیدایه بۆ پڕکردنه‌وه‌ی 81 سه‌رۆک و پۆسته‌کانی تری شاره‌وانیه‌کان، 200 هه‌زار کاندیدیش هه‌یه بۆ ئه‌و پۆستانه.
به پێی ڕاپۆرته‌کانی ڕێکخراوه‌کانی مافی مرۆڤ، پۆلیس و سوپا هه‌وڵ ده‌ده‌ن رێگرییه‌کی زۆر بۆ پارته‌کوردییه‌کانی به‌شدار له هه‌ڵبژاردنه‌که‌دا دروست بکه‌ن، سوپا و پۆلیس کۆبونه‌وه جه‌ماوه‌رییه‌کان به توندی قه‌ده‌غه دهکهن، پۆسته‌ر و وێنه‌کان ده‌دڕێنرێن، ئه‌و مێردمناڵانه‌ی که پروپاگه‌نده بۆ حزبه کوردییه‌کان دهکهن لێیان ده‌درێت و مامه‌ڵه‌ی خراپیان له‌گه‌ڵ ده‌کرێت. له بنکه‌کانی سه‌ر به حکومه‌ته‌وه واته‌وات و ده‌نگوباسی وا بڵاوده‌کرێته‌وه، که به‌زیانی ئه‌و پارتانه ته‌واو بێت، بۆ نمونه ده‌ڵێن (له‌و شارانه‌ی پارتی (ده‌ته‌په) بیباته‌وه ئه‌وا له هه‌موو یارمه‌تییه حکومییه‌کان و سه‌رمایه‌داری و پرۆژه‌کان ده‌وه‌ستێنرێت). جگه له‌مه ناکۆکی و گومانێکی زۆر له‌سه‌ر ژماره‌ی ده‌نگده‌رانیش هه‌یه، چونکه وه‌ک له کاتی هه‌ڵبژاردنه په‌رله‌مانییه‌که‌ی ساڵی 2007 ڕاگه‌یه‌ندرا، ئه‌وکات ژماره‌ی ده‌نگده‌ران 42 ملیۆن و شه‌شسه‌د هه‌زار که‌س بوون، که‌چی ئێستا کۆمیسیۆنی باڵای هه‌ڵبژاردنه‌کان رایگه‌یاندوه ژماره‌که گه‌یشتۆته 48 ملیۆن و دووسه‌د هه‌زار، ئه‌و جیاوازییه زۆره‌ی ژماره‌که 5 ملیۆن و شه‌شسه‌د هه‌زار که‌سه له لایه‌ن که‌سایه‌تییه سیاسییه کوردییه‌کانه‌وه ره‌خنه‌ی لێ ده‌گیرێت، که وه‌ک ده‌بیسترێت ساخته له لیستی ده‌نگده‌راندا کراوه و بۆ نمونه ناوی وه‌همییان بۆ زیادکراوه، ناوی سه‌ربازه‌کان له شاره‌وانی تریش تۆمارکراون بۆ ده‌نگدان.
له دوو پارته کوردییه‌که‌ی به‌شدارن، (ده‌ته‌په و هه‌ک پار) ن، ده‌ته‌په واته پارتی کۆمه‌ڵگای دیموکرات جه‌ماوه‌رێکی زۆرتری هه‌یه، دروشمه‌که‌ی بۆ ئه‌م هه‌ڵبژاردنه بریتییه له (لێمانگه‌ڕێن با 2009 بکه‌ینه ساڵی چاره‌سه‌ری ئاشتییانه‌ی کێشه‌ی کورد). له‌به‌رنامه‌ی خۆیدا ده‌یه‌وێت به رێبازێکی دیموکراتیییانه مافه‌کانی که‌مینه‌ی کورد به‌ده‌ست بهێنێت، ململانێی راستینه‌ی پارتی ده‌سته‌ڵاتدار (ئاکه‌په) له ناوچه کوردییه‌کاندا له‌گه‌ڵ ئه‌م پارته‌دایه.
پارتی ده‌سته‌ڵاتدار ده‌یه‌وێت به پشتیوانی سوپا و که‌ناڵه‌كانی میدیا، هه‌ڵبژاردنه‌که له ناوچه کوردییه‌کاندا به هه‌ر نرخێک بووه بباته‌وه. هه‌رچه‌نده توشی هاودژیی بووه له گوتاریدا، چونکه له لایه‌که‌وه قه‌یدوبه‌نده‌کان له‌سه‌ر کولتور و زمانی کوردی سوک ده‌کات، له لایه‌کی تره‌وه لێدوانه‌کانی ئاردۆگان سه‌رۆکی حزبه‌که خزمه‌ت به ناسیۆنالیسته توندره‌وه‌کان ده‌کات، بۆ نمونه کاتێک ده‌ڵێت (یه‌ک گه‌ل. یه‌ک زمان، یه‌ک ئاڵا)، ئه‌مه‌ش درێژه‌پێده‌ری سیاسه‌تی باوی چه‌وساندنه‌وه‌ی کورده.
له‌مه‌ش زیاتر ئاکه‌په دادگاش به‌کارده‌هێنی بۆ ململانێکه‌ی له‌گه‌ڵ کورده‌کاندا، کاتێک به لێشاو سکاڵا له‌سه‌ر که‌سایه‌تییه سیاسییه کوردییه‌کان تۆمار دهکهن، هه‌ر بۆ نمونه که‌سایه‌تییه‌کی دیار و به‌رچاو ی وه‌ك له‌یلا زانا، که چانسێکی باشی هه‌یه له هه‌ڵبژاردنه‌کاندا، که‌چی به سکاڵا تۆمارکردن له‌سه‌ری ڕێگیری خۆکاندیدکردنی لێده‌کرێت.
26/3/2009
و. له ئه‌ڵمانییه‌وه:
سه‌رچاوه/ http://www.gfbv.ch/index1.html
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
