نه‌توڕه‌بون نه‌تۆران، هه‌رتێکۆشان بۆگۆڕان
Sunday, 04/04/2010, 12:00
ئه‌مڕۆکه له‌کوردستان پۆستی دڵه له‌لێدان نه‌که‌وتوه‌که‌ی کوردانا، چه‌ند نوسینێکم له‌شێوه‌ی وتارو ڕه‌خنه‌دا، سه‌باره‌ت به‌بزوتنه‌وه‌ی گۆڕان، به‌رچاو که‌وت. که ئه‌مانه‌ن: (منیش له‌گۆڕان توڕه‌م، گه‌ر شیرم به به‌لاش ده‌ست که‌وێ مانگام بۆچیه!، گرده‌که ئاشبه‌تاڵی به‌گۆڕان کرد، تۆراو و توڕه...). به‌نده‌ش دوێنێ نوسراوێکی هه‌بو به‌ناوی: تکایه کاک نه‌وشیروان، گۆڕانیش به‌ده‌ردی کۆمه‌ڵه مه‌به.
ئێمه هه‌مو مافی سروشتی خۆمانه، له‌په‌رۆشیمانه‌وه بۆ ئه‌م بزوتنه‌وه نوێگه‌ره جه‌ماوه‌ریه، ڕه‌خنه بگرین، وتار بنوسین، قسان بێژین، پێشنیاروسه‌رنج بخه‌ینه ڕو. مه‌زنی گۆڕان له‌وه‌دایه بیروباوه‌ڕی جیای له‌خۆگرتوه، هه‌مو ئازادی بیرکردنه‌وه‌مان هه‌س، جوانیه‌که‌ی ئه‌وه‌یه براگه‌وره‌و براگچکه‌ی تیا نیه. به‌وه چوه‌ته خانه‌کانی مێشکمانه‌وه که دڕی به‌سیسته‌می قه‌پۆزی سلاک بوی حزبایه‌تی دا، په‌رده‌ی له‌سه‌ر ڕوی چڵکنی ده‌سه‌ڵاتی ته‌مه‌ڵ و مشه‌خۆری کوردستانی باشورهه‌ڵماڵی. هاوڵاتی کوردی فێرکرد به‌باش بڵی به‌ڵێ و به‌خراپیش بێژێ نه‌خێر. ئێمه‌ی ئاشناکرد به‌سندوقی ده‌نگدان، هه‌رچه‌ند خۆم وتارم هه‌یه به‌عه‌ره‌بی داوای چه‌ک ئه‌که‌م له‌کاتی بێ بایه‌خ بونی شێوازی ڕێگای دیموکراسیا. نیازم بو وتارێ نوێ بنوسم به‌سه‌ردێڕی: من سنادق الاقتراع الی سنادیق العتاد.
باشه کوردستانیانی خۆشه‌ویستم، گه‌ر بزوتنه‌وه‌یه ئه‌وه‌نده نوێکاری و دیاری جوانی بۆمان هاوردبێ، که‌هێشتا مۆمی یه‌ک ساڵه‌ی ته‌مه‌نی نه‌کوژاوه‌ته‌وه، که‌م ئه‌زمونه‌و له‌چه‌نده‌ها لاوه گورگانی دوژمنی باوه‌کوشته‌ی ئاوه‌دانی و پێشکه‌و‌تن شه‌ڕی ئه‌که‌ن و پیلانی لێئه‌گێڕن.... ئه‌کرێ هه‌ر تۆزێ پێی خواردانا، دی هه‌رچی هه‌ڵسێ توڕه‌بێ..بتۆرێ وازبێنی؟!. هه‌موان به‌شدارین له‌ڕێکخستنه‌وه‌ی ماڵی کورد، ئێ سه‌رله‌نوێ بنیاتنانیش هه‌روا ئاسان نیه ماندوبونی فره‌ی گه‌ره‌که. ئه‌وه ته‌نیا ڕوخانه که‌به‌چه‌قه‌نه‌یه ئه‌نجام ئه‌درێ؛ بنه‌ماڵه‌ی مه‌لا به‌زیو شۆڕشێکی چوارده‌ساڵیان به‌که‌متر له‌چوارده چرکه گۆڕونبو کرد. ئه‌توانی خانویه به‌ڕه‌نج و ئاره‌قه‌ی نێوچاوانی چه‌نده‌ها ساڵ پێکه‌وه بنێی، که‌چی تی ئێن تی یه به‌چاوتروکانێ ته‌ختی زه‌وی ئه‌کات.
هه‌ردوبنه‌ماڵه‌ی به‌سکێ له‌دایک بوی جه‌لالمه‌سعود کوردستانێکی وێران و گه‌لێکی که‌م ئه‌ندامیان خستوه‌ته‌وه، ئینجا وه‌ره ئاسمان دورو زه‌وی سه‌خت!، ئه‌بێ له‌ژێر سفره‌وه ده‌ست پێبکه‌ین. ئه‌رێ حزبه‌که‌ی مه‌لا مه‌سعود له‌شه‌ست و یه‌که‌وه چی بۆکورد کردوه؟ که‌ڵه‌گایی بنه‌ماڵه‌و قوتدانی سامانی وڵات. ئه‌ی ئه‌وه‌که‌ی حاجی جه‌لال له‌حه‌فتاو پێنجه‌وه؟ بون به‌دیوی یه‌ک دراو له‌کن ماڵی پس مام مه‌سعود. ئاده‌ی یه‌کگرتو له نه‌وه‌دو چواره‌وه؟ سه‌رپۆش و مزگه‌وت. ئه‌وه هیچ حشع له سی و چواره‌وه سێ ئه‌رکی سه‌ره‌کی هه‌بوه: فێربونی زمانی ڕوسی، فیتنه‌یی و سیخوڕی له‌نێوان لایه‌نه سیاسیه کوردستانیه‌کانا، ناساندنی حزبه‌که‌ی سه‌دام به‌بلۆکی خۆرهه‌ڵاتو ناوبردنی به‌کاسترۆی عێراق.
ده‌خه‌ڵکینه بوارێ به‌گۆڕان بده‌ن، تاکه‌چرای سه‌رڕێمانه، ته‌نیا قۆڵی تێکۆشان له‌ڕیزه‌کانیا ساڕێژی برینه‌کانمانه. باشه، هه‌ولێریانی خۆشه‌ویست و که‌سم واته‌نی: چما چ ڕژایه، چ شکایه؟!. بۆدنیاتان لێبوه به‌چه‌رمه چۆله‌که! بۆ سه‌ری دنیاتان لێهاتوه‌ته‌وه یه‌ک!. ئازیزانم، که‌تۆ ئیشت کرد هه‌ڵه‌ش ئه‌که‌ی، هه‌رخواروخێچیه‌کمان له‌گۆڕان دی ئه‌یخه‌ینه ڕو هه‌وڵی به‌کۆمه‌ڵ ئه‌ده‌ین چاره‌ی بۆ بدۆزینه‌ره، نه‌ک یا ببینه ته‌ماشاوان یا توڕه‌بین یا پشتی تێبکه‌ین. گۆڕان له‌خۆمانه‌و بۆخۆمانه.
له‌نده‌ن
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
