Tuesday, 11/05/2010, 12:00

ینار بامەرنی ینار بامەرنی- دھوك

من عاشقی کچه‌که‌ی بارزانیم"

پێشنیار تێتە كرن، كو ھەمی مالپەرێن ئینتەرنەتان و روژنامەیێن بێ لایەنێن ھەرێما كوردستانێ گوشەیەكێ ب ناڤێ " من عاشفی كچی سەرۆكم" دروست بكن دا بو دەستھەلاتداری یا ئەشایری یا ھەرێما كوردستانێ دیار بیت، نەك تەنێ شەھید زەردەشت ئوسمان ئاشقێ كچا سەرۆكی یە، بەلكو ھەمی گەنجێن كوردستانێ ئەڤ ھەستە ھەنە. بلا سەرۆكایەتی یا ئەشایری و خێلەكی یا ھەرێمێ بزانیت، كو مرادا گەلەك گەنجان و بگرە ھەمی ھاولاتیێن ھەرێمێ یە كو وێنەیێ ژن وەیان كچێن بنەمالێ ببینن. بزانین كو ئەو كی نە، چاوانن و چ دكەن. خو ئەو نەك مەلایكە نە و چ جیاوازی د ناڤبەرا وان و كچ و ژنێن كورد دا نیننە.

كوشتنا خویندكار و روژنامەنڤیس " سەردەشت ئوسمان" جەرەسا ترس و خوڤیتی و پەیدابونا " جونتایەك ڤەشارتی" ل ھەرێما كوردستانێ ژ بوی رەخنەگر و نڤیسكاران لێددەت. ب رەنگەك ئاشكرە ل كوردستانێ جونتایەك ڤەشارتی ھەیە. ژ دەرڤەی قانون و ریسایێن ھەرێمێ بەردەوامە ل سەر چالاكیێن كوشتن و بێ سەروبن كرینا نڤیسكارێن رەخنەگر.

ژ مێژ ڤەیە جەرەسا كابوسەكێ لێددەت، بەس كێ ژ بلی شەھید زەردەشت ئوسمان ب وێرانە و بێ ترس شیا ب ئاشكراكرنا وێنەیێ خوە بو وان، ترس و خوڤێ بێخیتە دلێ جونتایێ ھەرێما كوردستانێ. شەھید زەردەشت، ژ كوشتن، تەئزیب و ئەشكەنجێ نەترسا، بەلكو وی ترس و كوشتن ب رەنگەك ڤەكری ھەمبێز كریبو، بەری كو جونتایا ھەرێما كوردستانێ دەستێ وان ب خوینا شەھید زەردەشت بێتە شویشتن.

ژ بوی رێزگرتنا ھەست و ھیوایەتێن شەھید زەردەشت ئوسمان، فەرە كو ھەمی مالپەر و روژنامەیێن ھەرێما كوردستانێ " گوشەیەكێ ب ناڤێ من عاشقی کچه‌که‌ی بارزانیم " ڤەكن. ئەڤ گوشەیە، پێویست كو ھەمی نڤیسكار و پێنوس بدەستێن كورد، بێ ترس بابەتەكێ بێ ترس وەكی شەھید زەردەشت ئوسمان بەلاڤ بكن. بلا جونتایا كوردستانێ ژی ھینی ھندێ ببیت، كو خەلكێ كوردستانێ ئێدای چوجاران ڤێ یەكێ ژ وان قەبل ناكت.

خەلكێ كوردستانێ ژی مافێ ھندێ ھەیە رەخنە ژ سەرۆك بارزانی بگرن، مادەم ئەو خوە وەكی سەرۆك ھەساب دكەت، باشترە ژی كو ژنا خو و كیژێن خو نیشانا خەلكێ كوردستانێ بدەت، دا خەلكێ كوردستان شانازی ب وان بكن. بەرێز مەسعود بارزانی نەشێت سەرۆكی ھەرێمێ بیت و خوە ل " سەرێ رەش" زیندانی بكەت و ھەلسوكەوتا سەرۆك ئەشیرەتی ھەبیت و بێژیت ئەو سەرۆكی ھەرێمێ یە.

دوایێن ریز بو سەرۆكێن ئەشایری و خێلەكیێ ھەرێما كوردستانێ بلا ئەڤ بیت، كو گەلێ رومانیا چ ل دیكتاتور چاوشێسكو، سەدام حوسێن، شاھی ئیران، و دیكتاتورێن دی كرن، دێ روژەك ژی بێت گەنج و لاوێن كوردستانێ دێ كوردستانێ بو وان بكەت گورستان. دێ كوردستانێ ل وان ھەرام بكت. دێ وەل وان بكت ھەتا ھەتا ئەو خێرێ ژ دەستھەلات و مالێ گەلێ كورد كو دزینە نەبینن.