کۆبانی و غه‌زه.. دوانه‌یه‌کی جیاواز
Tuesday, 10/02/2015, 12:00
له رۆژهه‌ڵاتی ناویندا دوو کێشه‌ی ئاڵۆزی هاوشێوه‌ی یه‌کتر بوونیان هه‌یه و زلهێزان به درێژایی مێژوو به‌پێی به‌رژه‌وه‌ندی خۆیان ئیداره‌یان کردووه، دواتر وه‌کو کارتی فشاریش به‌کاریان هێناون به‌رامبه‌ر وڵاتانی ناوچه‌که، ئه‌و دوو کێشه‌یه‌ش (کوردستان و فه‌له‌ستین)ه،هه‌ردوو لایه‌نی هاوکێشه‌که‌ش به‌هاوته‌ریبی به‌ڕێوه ده‌برێن بۆ ئه‌وه‌ی به‌رژه‌وه‌ندی زلهێزان پارێزراو بێت، با پێشه‌کی باسی فه‌له‌ستین بکه‌ین و له‌ناو فه‌له‌ستینیش که‌رتی (غه‌زه) چونکه مه‌ڵبه‌ندی سه‌رهه‌ڵدان و به‌رخودانه به‌رامبه‌ر به (ئیسرائیل) له‌دوای داگیرکردنی ئیسرائیله‌وه جیاواز له شار و شوێنه‌کانی تری ده‌وڵه‌تی فه‌له‌ستینی، بۆیه به‌هه‌موو شێوه‌یه‌ک دژایه‌تی ده‌کرێت (له‌سه‌ر ئاستی ناوچه‌ی و نێوده‌وڵه‌تی و نێوخۆی (خودی ده‌سه‌ڵاتی فه‌له‌ستین)ی دژوه‌ستانه‌وه‌ی خودی ئیسرائیل هه‌موو ئه‌م دژایه‌تی کردنه‌ش له‌به‌ر ئه‌وه‌یه (غه‌زه) رێباز و رێچکه‌ی به‌رخودانی به‌رامبه‌ر به ئیسرائیل هه‌ڵبژاردووه و دواتر سازش له‌سه‌ر ئه‌رزی فه‌له‌ستینی داگیرکراو ناکات، ئه‌وانه‌شی که‌رتی غه‌زه به‌ڕێوه‌ده‌به‌ن که‌سانێکن خۆیان شه‌هیدیان داوه و زیندانی کراون له‌سه‌ر ئاستی سه‌رکرده‌کانیان له‌پێناو فه‌له‌ستیندا، گوزه‌ران و ژیانیان هیچ جیاوازیه‌کی نیه له‌گه‌ڵ گوزه‌رانی هاوڵاتیانی ئاسایی غه‌زه، ته‌نها دروشمیان شه‌هید بوونه له‌پێناو سه‌ربه‌ستی گه‌لی فه‌له‌ستینیدا، هه‌رچی ئه‌و شارانه‌ی که له‌لایه‌ن (ده‌سه‌ڵاتی رزگاریخوازی فه‌له‌ستینی) به سه‌رۆکایه‌تی (مه‌حمود عه‌باس) به‌ڕێوه‌ده‌برێت له که‌ناری خۆرئاوا، رامه‌ڵا، قودس، خلیل، به هیچ شێوه‌یه‌ک پارێزراونین له‌هێرشی ئیسرائیلی و ده‌ست درێژیه‌کانی بۆیه هه‌رکات سوپای ئیسرائیلی بیه‌وێت هه‌ڵده‌کوتێته سه‌ریان و چالاکی تیا ئه‌نجام ده‌دات بۆ ده‌ستگیرکردنی چالاکوانانی سیاسی و مه‌ده‌نی تا ده‌گاته هاوڵاتی سڤیل، له‌کاتێکدا مه‌حمود عه‌باس و به‌رپرسه‌کانی ده‌وری خه‌ریکی سازشێکی مێژووین به‌ناوی (دانوستانی عه‌ره‌ب ئیسرائیل) بۆ زیاتر له‌چوار ده‌یه، دواتریش هه‌موو به‌رپرسه‌کانی گروپی مه‌حمود عه‌باس خه‌ریکی بزنسن به‌ناوی گه‌لی فه‌له‌ستینیه‌وه و منداڵه‌کانیان له زانکۆکانی ده‌ره‌وه‌دا ده‌خوێنن له‌سه‌ر گیرفانی هاوڵاتیانه‌که‌ی، بۆیه رێگه‌ی به‌رخودان به (گێره‌شێوێنی) ناوزه‌د ده‌که‌ن و خۆیانی لێ ده‌بوێرن، تا ئێره به‌رچاوڕوونی بوو بۆ خوێنه‌ری ئازیز بۆ ناسینێکی سه‌رپێی فه‌له‌ستین، له‌ڕووی ئیداری و سیاسیه‌وه، ئێستا.
با بێینه سه‌ر کوردستانی خۆشه‌ویست، له‌ناو کوردستانیشدا رۆژئاوا و له ناو ڕۆژئاواشدا دڵی کوردان (کۆبانی)، چونکه ته‌نها دروشمێک له‌وشاره به‌رزکرایه‌وه بری تی بووه له (به‌رخودان.. به‌رخودان.. ژیانه) له‌لایه‌ن به‌رپرسی ئیداری و سه‌رکرده‌کانیه‌وه پێش هاوڵاتیان، بۆیه ئه‌و شێوازه جوانه‌ی به‌رخودان به‌بێ چاوه‌ڕوانی ده‌ستخۆشی به‌ڕێ خرا تا چۆکیان به تیرۆری داعش هێنا له‌داستانی سه‌ده‌ی بیست ویه‌کدا، و به‌رخودانی 135 ڕۆژی، بۆیه پێویسته بزانین که کۆبانی هه‌موو شته جوانه‌کانی خۆی کرده قوربانی سه‌ربه‌رزی نه‌ته‌وه‌که‌ی پێویست ده‌کات له‌سه‌ر کوردان به‌هه‌موویانه‌وه ببنه (گیرفانی) کۆبانی بۆ ئاوه‌دان کردنه‌وه‌ی چونکه کۆبانی خۆی گیرفانی نیه، پێویسته (سه‌رکرده و لایه‌نه سیاسیه‌کان، سه‌رمایه‌داران، بازرگانان، خاوه‌ن پیشه‌کان، هاووڵاتیان) هه‌ڵمه‌تێکی نه‌ته‌وه‌ی رابگه‌ێنن له‌خزمه‌ت ئاوه‌دانکردنه‌وه‌ی کۆبانیدا، ته‌نانه‌ت ڕێگه به رێکخراوه مه‌ده‌نیه‌کان بدرێت بۆ راگه‌یاندنی که‌مپین و هه‌ڵمه‌تی نشتیمانی بۆ ئاوه‌دانی کۆبانی دوور له هه‌یمه‌نه‌ی حزبی هه‌روه‌ها نوێنه‌رایه‌تی هه‌رێم له‌ده‌ره‌وه، پێویسته بخرێنه خزمه‌ت دۆسیه‌ی ئاوه‌دانکردنه‌وه‌ی کۆبانی به خستنه‌ڕووی راستیه‌کان به کۆمه‌ڵگه‌ی نێوده‌وڵه‌تی له‌پێناو گێڕانه‌وه‌ی بزه‌و خه‌نده‌ی تۆراو له‌سه‌ر روومه‌تی منداڵه بێنازه‌کانی ئه‌و شاره، وڵاتانی عه‌ره‌بی زۆر بێ هه‌ڵوێستن به‌رامبه‌ر به‌غه‌زه له‌ڕووی بڕیاری سیاسی چاره‌نوس سازه‌وه، به‌ڵام (دوای هه‌موو ده‌ست درێژیه‌کی ئیسرائیل زۆر سه‌خاوه‌ت مه‌ندن له‌به‌خشینی هاوکاریه‌کانیان بۆ غه‌زه له‌پێناو دووبار ژیانه‌وه‌ی ئه‌و شاره، له رێگه‌ی هاوکاریه مادی و لۆجستیه‌کانیانه‌وه) چونکه ده‌زانن به‌رخودانی (غه‌زاویه‌کان) له‌بری هه‌موو جیهانی عه‌ره‌بی و ئیسلامیه، لێره‌ش کۆبانی له‌بری هه‌موو کوردان به‌تایبه‌تی و مرۆڤایه‌تی به‌گشتی به‌رخودانی به‌رامبه‌ر به تیرۆری داعش کرد به‌بێ دابڕان، بۆ چرکه ساتێکیش بۆیه ئێستا کاتی ئێمه‌یه ئه‌و به‌رخودانه پیرۆز بکه‌ین به ئاوڕدانه‌وه له دووباره بنیاتنانه‌وه‌ی ئه‌و شاره جوانه و دووباره هه‌ڵسانه‌وه‌ی بۆ ژیانێکی نوێ، هه‌تا هه‌موو جیهان بزانێت که کورد یه‌ک نه‌ته‌وه‌یه، وه‌ک وه‌بیر هێنانه‌وه‌یه‌ک بۆخۆم و ئێوه‌ی ئازیز (کاتێک کۆبانی ته‌نها له 30% به‌ده‌ست شه‌ڕڤانانه‌وه بوو سه‌رکرده و به‌رپرسه ئیدارییه‌کان و سه‌رۆکی کانتۆنی ئه‌و شاره به‌ڵێنیاندا به‌هه‌موو کوردان که کوچه و کۆڵانه‌کانی کۆبانی ده‌که‌نه گۆڕستان بۆ چه‌ته‌کانی داعش) به‌ڕاستی ئه‌وان خاوه‌نی به‌ڵێنی خۆیان بوون، با ئێمه‌ش وه‌فاداربین به‌رامبه‌ر به‌وان له رووی نازهه‌ڵگرتنیان و چونه ژێرباری دووباره هه‌ستانه‌وه و گێڕانه‌وه‌ی ژیان بۆ ئه‌وشاره قاره‌مانه، که داستانی نه‌ته‌وه‌یه‌کی تۆمارکرد، لێره‌وه هه‌نگاوی پراکتیکی ده‌ست پێده‌کات بۆ سه‌لماندنی وتاری سه‌ر شاشه‌ی تیڤیه‌کان و گۆڕینی هاوار و سه‌داکانمان به هاواری نه‌ته‌وه‌ی.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
