هەر نەورۆز ما بوو ئەویش دابەشكرا بە دوو

Monday, 21/03/2011, 12:00

جوانی نەورۆز لە مۆركە نا سیاسیەكەیدایە. ئەو دەمەی دیهاتەكانمان، لە ئیوارەیەكی سەوزو تەڕی بەهاردا، هەر بە شیوەیەكی سروشتی و وەك نەریتی كۆن، بە بێ هیچ مەبەستیكی سیاسی، هەر یەكە بە لاپاڵ و گردێكەوە، رووناكییان دەخستە دەوروبەری دێ و ریزی سێپێییان بە دەوردا دەبەست، ئەو دەمە نەورۆز مانایەكی تری هەبوو. ئەو دەمە نەورۆز بەڕێ خستنی سەرماو سۆڵەی زستانیكی سەختی ناو شاخ و داخەكانی كوردستان بوو، ئەو دەمە نەورۆز نێرگزی بەهار بوو بە یەخەی هەموومانەوە.
ئەمرۆ 21/3/ 2011 نەورۆز بەرگیكی سیاسی پۆشیوەو چیتر لەخۆی ناچێت. ئەمرۆ نەورۆز نەورۆزی دوو حیزبە نەك جەماوەر. ئەمرۆ نەورۆز نەورۆزی خەلكی نیە، خەلكی ریكخەری نین، خەلكی خۆرسكانە، بە چیلكەوداری مالەكانیانەوە، نارژینە دەورو بەری شار بۆ ئاگری نەورۆز. ئەوان دێن بۆ كۆبوونەوەی سیاسی لە دوو شەقامی شاری سلیمانیدا: سەراو سەهۆلەكە! ئەوان دین بۆ سەراو سەهۆلەكە بۆ ئەوەی دوو حیزب لە پشتیانەوە خۆنواندنی سیاسی ئەنجام بدەن. ئەمرۆ خەلكی نەرێتە دێرینەكەی خۆیان یاد ناكەنەوە، بەلكو دوو حیزب هیز دەخەنە روو، دوو حیزب هەموو مۆركیكی خۆرسكی تەنانەت لە نەرێتە میژووییەكانیش دادەمالن بە مەبەستی دامالینی بزووتنەوەی جەماوەری لە مۆركە خۆرسكیەكەی خۆی. ئەوان بریاری یادێكی مێژووییش دەخەنە دەستی خۆیان بۆ ئەوەی دواجار هەموو بریاریكی سیاسییش گرێبەستیكی سیاسی بێت و جەماوەر بۆی نەبیت رۆلی بە هیچ شتیكەوە دیار بێت، جەماوەریك كە هەر ئیستا خاوەنی راپەرینەكەی خۆی نیەو ریكخەری خۆپیشاندانەكانیشی نیە. ئەوەتا هەر ئیستا لیژنەیەكی هەلنەبژێردراو سەرا دەبات بەرێوە، ئەمە لە كاتیكا كە نوینەرانی جەماوەر بەو كەسانە دەوترێت كە هەلبژێردراوی جەماوەرن. كۆمەلیك لە نیوان خۆیان و چەند حیزبیكدا لیژنەیەكیان پیكهێناوەو ناویان ناوە نوینەری جەماوەر. ئەوان یادی سیاسی نەورۆز دەكەنەوە نەك نەریتیكی مێژوویی نەتەوەیەك.

نوینەرانی جەماوەر لیژنەی (ئازاد) و (سەربەخۆ) و (هەلبژیردراو) پیكدینن، یادی نەورۆزیش جێدێلن بۆ خەلكی خۆی، سەرای ئازادییش ناخەنە ژێر ركێفی خۆیان، مۆری (گۆران) و(یەكیتی و پارتی) نانێن بە سەراو سەهۆلەكەوە بە ناوی نەورۆزەوە.

دوێنێ دوو حیزب، دوو سیاسەت نەك خەلكی، یادی نەورۆزیان لە دوو شەقامی شاری سلیمانیدا كردەوە. ئەوان خەلكیكی خۆ ئامادە كردوویان بۆ نەورۆزیكی نا سیاسی، لە دوو كۆبوونەوەی سیاسیدا كۆ كردەوە. وە هیچیشیان نەیان سەلماند نەورۆز جەژنی ئەوانە، وە یان جەماوەر مولكی ئەوانە. هەردوو لاشیان دەیانەویت دەری بخەن هەموو جەماوەر، بە هەموو چینە جیاوازەكانیەوە، بەدووی ئەوان كەوتوون. ئەوان هەرگیز ناتوانن مۆرێكی تایبەتی بە خۆیانەوە بنێن وەك نوینەری كۆمەلیك لە خەلكی. ئەوان دەبیت نوینەری جووتیاران و رۆشنبیران و برجوازیەكان و كارمەندان و كریكاران و خویندكارانیش بن لە یەك كاتدا. بەرنامەكەشیان بەرنامەیەكی سیحریە و بەرژەوەندیی ئەم هەموو چینە جیاوازانە لە خۆیدا كۆ دەكاتەوە.
بەلام واقیع شتیكی ترمان پێ دەلیت: واقیع وا نیشان نادات كە ئەمانەی لە شەقامەكاندا كۆبوونەتەوە یەك بەرژەوەندیی كۆیان بكاتەوە لەگەل ئەو خاوەن مولك و سامان و سەرمایانەی لەوە ناچیت گرفتی ژیان رووبەروویان ببیتەوەو بیانخاتە سەرشەقامەكان بۆ رووبەروو بوونەوە لەگەل دەستەلاتدا. هەر 4 رۆژ لەمەوبەر لاوانی سەرا دەیانگووت: دیناریك لە باخەلماندا نیە، چیتر ناتوانین لێرە بمینینەوەو چاوەروانی هیچ بین. دەبیت ریگایەكی تر بگرینە بەر. دواتریش لیژنەی سەرا لە بڵند گۆكەیانەوە گووتیان: ئەوانەی جەماوەر بەو ئاراستەیەدا دەبەن، ئەوانە دەستی دەستەلاتیان لە پشتەوەیە.

هەر بەم نزیكانە ژیان دەرئەنجامی هەموو شتیكمان دەداتەوە دەست. ئەمانەی ئیستا خەریكی كۆبوونەوەی ژێر بەژێرن هیچ وەگیر ناخەن بەرژەوەندیەكانی خۆیان و پاراستنی دەستەلات نەبیت، دەمیشكیە دەلیین و دەلیینەوە: دەبیت خەلكی خۆی لە دەرەوەی هەموو حیزبە سیاسیەكان ریكبخات، دەنا تیشكانمان نزیكە ئەگەر چارەنووسی خۆمان ببەستیت بە چارەنووسی ئەم یان ئەو هیزەوە.
بەرەو خۆریكخستن لە لیژنە ئازادو سەربەخۆو هەلبژیردراوەكاندا لە دەرەوەی هەموو حیزبیكی سیاسیدا!