پیرۆز بێت 15 ساڵەی دامەزراندنى پارتمان پارتی كرێكاران و رەنجدەرانی كوردستان كرێكاران و جوتیاران و زەحمەتكێشانی گەلەكەمان..

Sunday, 31/01/2010, 12:00

گەلی كوردستان وەك گەلێكی خاوەن مێژووی زیندوو و ناسراو لەناو گەلان و نەتەوەكانی تری جیهاندا پارێزگاری لە مانەوەی خۆی كردووە و بواری نەداوە سیاسەتی سەركوت كردن و شاڵاوی بەرفراوانی پاكتاو كردنی نەژادی لەلایەن داگیركەرانەوە كە لە مێژووی مرۆڤایەتی نموونەی كەم بێـت بیسڕێتەوە. ئەمەش لە ئەنجامی هۆشیاری نەتەوایەتی و ئیرادە و باوەڕ بوون بەخۆی و چۆنیەتی رێكخستن و ئاراستە كردنی تاك بەتاكی گەلەكەمان هەر لە مێژووی دوور و نزیكمانەوە تا بەئەمڕۆ دەگات بەدی هاتووە... بۆیە جێگای سەرنجە گەلی كوردستان ئیمڕۆ لە ئاست پێگەیەكی سیاسی وەها گراندایە كە لە بەرزترین ئاستی دیبلۆماسیەتی جیهاندا مامەڵەی لەگەڵدا دەكرێت، مایەی شانازیە پارتمان پارتی كرێكاران و رەنجدەرانی كوردستان وەك لایەنێك لەو پێكهاتە سیاسیەی كوردستان شەرەفی بەرپرسیاریەتی سیاسی بەقەدەر خۆی كەوتۆتە ئەستۆیی و وا پازدە ساڵ بەڕێ دەكات لە خەبات و تێكۆشانیدا و توانیویەتی لەگەڵ ئەو هەموو سەختی و دژواریەی كە بەرەو رووی بۆوە چۆك دانەدات و لە رێگای رێكخستنەكانی خۆیەوە لەناو خەڵكی كوردستاندا لەتەك لایەنەكانی تر رۆڵی پێشەنگ بگێڕێت.
بێگومان دەركەوتن و هاتنە مەیدانی پارتمان هەروا سانا و بەڕێكەوت نەبوو، بەڵكو لە ئاكامی ئەو هەلومەرجە ئابووری و كۆمەڵایەتی و سیاسیەى ئەو كاتەی كە گەلی كوردستان پێیدا تێدەپەڕی، وەك داخوازیەكی مێژویی بۆ وەڵام دانەوەی ئەركەكانی ئەو قۆناغە وەك پێداویستیەكی حەتمی خۆی سەپاند، چونكە بارودۆخە ئابوریەكە بەهۆی هەردوو گەمارۆی ئابووری نێودەوڵەتی و رژێمی رووخاوی بەعس لەسەر هەرێمی كوردستان ، گەیاندبوویە ئەوپەڕی سەختی و دەرئەنجامی ئەوەش مل ملانێ چینایەتیەكان و دابین كردنی قوتی رۆژانە و بارودۆخی سیاسی خراپی ئەو كاتە گەیشتبووە ئاستێكی مەترسیدار كە چەندین روو بەڕو بوونەوەی خوێناوی و راپەڕینی خەڵكی جوتیار و هەژاری لێ بەرپا بوو، لە ئاكامیدا بزوتنەوەی جوتیارانی كوردستان وەك داینەمۆو پێشڕەوایەتی كردنی ئەو قۆناغەی خەبات لە ناو خەڵكی راپەریو و دادپەروەرخواز لە 1/2/1995 وەك رێكخراوێكی سیاسی دامەزرا بەمەبەستی نوێنەرایەتی كردن و داكۆكی كردن لە مافە رەواكانی جوتیاران و زەحمەتكێشی گەلەكەمان، توانی لە بەرەنگار بوونەوەیەكی سەختدا بەگیانفیدایی و قوربانیدانی چەندین كەسانی سەركردە و هەڵكەوتوی گەلەكەمان، بوێرانە داكۆكی لە خەڵكی هەژار بكات و بۆ یەكجاری و هەتا هەتایە كۆتایی بە زوڵم و ستەمی پاشكۆی دەرەبەگایەتی بهێنێت و دەیان گوند لەناوچە جیا جیاكانی كوردستان لەدەست ئەو سیستەمە پاشڤەڕووە رزگار بكات. ئەوەش بەدەستكەوتێكی مەزن و پڕ بەها دادەنرێت بۆ خەڵكی كوردستان بەگشتی و بۆ چینی هەژار و جووتیار بە تایبەتی كە لەسەر دەستی بزووتنەوەی جووتیاران هاتەدی. بۆیە بە شانازیەوە دەڕوانینە ئەو مێژووە پڕ شكۆیە و هەموو ئەو هەوراز و نشێوەی كە بزووتنەوەكەمان توشی هات، لەگەڵ ئەوەشدا بەخۆڕاگری ئیرادەیەكی بەهێزەوە درێژەی بەخەباتی خۆی دا و وەك پارتێكی چینایەتی و نەتەوایەتی كە خۆی لە پارتی كرێكاران و رەنجدەرانی كوردستاندا دەبینێتەوە كە لەگۆڕەپانە سیاسیەكەدا دەركەوت. پارتمان بە پشت ئەستور بەو مێژووەی كە پەزەمەندەی كرد، لەهەر ئاستێكی رێكخراوەییدا پێشكەوت و بووە خاوەن پێگەیەكی جەماوەری و سیاسی خۆی، بۆیە بەپشت بەستن بەخۆی و بەتوانا و دەرامەتێكی كەمەوە بێ هیچ هاوكاریەكی ماددی و مەعنەوی، لە بارودۆخێكی سیاسی شڵەقاودا وەك پارتێكی سیاسی، بە تەنها و سەربەخۆ، هاتە مەیدانی ململانێی هەڵبژاردنەوە، كە لە 25/7/2009 بۆ پەرلەمانی كوردستان ئەنجام درا. پارتمان بەوپەڕی بوێریەوە لە پێشبركێیەكی سەختدا بەرەو رووی هێزە دەسەڵاتدارەكان و لایەنە دیارەكانی كوردستان بۆوە، ئەگەرچی نەى توانى نوێنەری خۆی بگەیەنێتە پەرلەمان، بەڵام لەگەڵ ئەوەشدا توانی پلەی شەشەم لەسەر ئاستی كوردستان لە بەرامبەر بە قەوارە و هاوپەیمان و لایەنەكانی ترى كوردستان بەدەست بهێنێت، كە بۆ ئەو بارودۆخەی هەڵبژاردنی پەرلەمانی كوردستان ئەنجامێكی گرنگ بوو.
خەڵكی كۆڵنەدەر و خەباتگێڕی كوردستان...
لەم ساتە مێژووییەدا كە ساڵیادی دامەزراندنی پارتمانە و هاوكاتە لەگەڵ وێستگەیەكی تری خەباتی نەتەوایەتی و نیشتیمانیمان كە بریتیە لە هەڵبژاردنی ئەنجومەنی نوێنەرانی عێراق و بڕیار وایە لە 7/3/2010 ئەنجام بدرێت، پارتمان لە ئامادەسازی دایە و بەگوڕ و هێزێكی ترەوە هاتۆتە مەیدان و لەناو لیستی هاوپەیمانی كوردستاندا كە زۆرینەی پارت و لایەنە تێكۆشەرەكانی كوردستانی لەخۆ گرتووە، لە هەوڵدایە بۆ بەدەستهێنانی زۆرترین نوێنەرایەتی كە بتوانێت رۆڵی كارا و سەرەكی بگێڕێت لە سەركردایەتی كردن و ئاراستە كردنی گەلەكەمان بۆ قۆناغی داهاتوو. ئەم هەڵبژاردنە گەلی كوردستانی خستۆتە بەردەم قۆناغێكی چارەنوسسازى لە راددە بەدەر هەستیار، كە بەهۆیەوە سەنگ و قورسایی لەناو پێكهاتەكانی عێراقی نوێدا دەردەخات و رووبەرووى بەرپرسیاریەتێكی مێژویی دەكاتەوە لە بەرامبەر گشت ئەو دەسكەوتانەی كە تا ئێستا بەدرێژایی مێژووی پڕ لە قوربانیدانی گەلەكەمان بەدەستی هێناون ، لە هەمان كاتدا ئەو داخوازی و مافە نەتەوەییانەی كە لە ئایندەدا ئامانجیەتی، بەتایبەتی گەڕانەوەی ناوچە دابڕاوەكان بۆ سەر هەرێمی كوردستان و گەڕانەوەی شاری كەركوك بۆ باوەشی نیشتیمان. بۆیە گەلی كوردستان لەبەردەم تاقی كردنەوەیەكی مێژوییدایە و شەڕێكی قورسی لەپێشە كەوا دەخوازێت هەر تاكێكی ئەم كۆمەڵگایە بەوپەڕی هەست كردن بە بەرپرسیاریەتی و هۆشیاری نەتەوایەتیەوە خۆ بۆ ئەم ململانێیە ئامادە بكات و گەل لە مەترسی و ئاسەوارە خراپەكانی لاواز بوون وریا بكاتەوە، چونكە هەموومان بە بیر و رای جیاواز و بە ئەندێشە و گرفت و ئازارەكانمانەوە لە كەشتیەكی ناو دەریاداین كە بەرەو تۆفان و شەپۆلی توند و بەهێز دەڕۆین، ئەوەش پێویستی بە هاتنە مەیدانی هێز و بازووی تەواوی خەڵكی كوردستان هەیە بەو پەڕی تواناوە و بەیەكگرتوویی بەرەنگاری هەموو ئەو هەوڵە دوژمنكاری و پیلانگێڕیە بێتەوە كە لەلایەن نەیارانیەوە دەخوازن لە رۆڵی گەلەكەمان كەم بكەنەوە و پێگەی لاواز بكەن. بێگومان ئەركی حكومەتی هەرێمی كوردستانیشە لێبڕاوانەتر و كاراتر بەئەركی سەرشانی خۆی هەستێت و هەوڵی چارەسەر كردنی كەموكورتیەكان بدات و زۆرترین خزمەتگوزاری كە شایستەی گەلە خۆڕاگرەكەمان بێت پێشكەش بكات، بەتایبەتی ئاوڕدانەوەیەكی جددی و دڵسۆزانە لە خەڵكی هەژار و كەم دەرامەت و چارەسە كردنی ئێش و ئازارەكانیان. پێمان وایە ئەگەر حكومەتی هەرێمی كوردستان دادپەروەرانەتر و بەنەخشە و پلانی تۆكمەترەوە ئەركەكانی سەر شانی راپەڕێنێت، ئەوا لە توانایدا هەیە باری قورسی سەر شانی هاووڵاتیانی نەدار سوك بكات و ژیان و گوزەرانێكی شایستەتریان بۆ فەراهەم بكات، بێگومان ئەوەش بەرنامەی حكومەتە و لەو پێناوەدا هەوڵی باشی داوە چاوەڕوانی هیممەت و هەنگاوی گەورەتری لێ دەكرێت، تاكو بیسەلمێنێت حكومەت لە گەل دروست بووە و بۆ خزمەت كردن و ئاسودە كردنی گەلە.
ئەندامان و دۆست و هەوادارانی پارتمان...
وا ساڵێكی تر تێدەپەڕێت بەسەر خەباتی چینایەتی و نەتەوایەتیمان 15 ساڵمان بەڕێكرد. كە ئەوە بەرپرسیاریەتیمان زیاتر دەكات و بەتێپەڕ بوونی رۆژگار ئەركمان قورستر دەبێت، بۆیە پێویستە زیاتر لە جاران و بەجۆش و خرۆشێكی زۆرترەوە لە هەوڵ و تێكۆشانی بێ وچاندا بین و لەژێر رۆشنایی بەرنامە و ئامانجە ستراتیژیەكانمان رۆڵی زیاتر بگێڕین، ئێمە ئەوپەڕی متمانەمان پێتان هەیە و دڵنیاین بەدڵسۆزیەوە ئەركەكانتان راپەڕاندووە و درێغیتان نەكردووە، بەڵام قۆناغی داهاتوو زیاتر لێمان دەخوازێت كە لێبڕاوانەتر لەناو كۆمەڵانی خەڵكی كوردستاندا هەڵسوڕێین و متمانەی زیاتر بەدەست بهێنین. لێرەوە دەستی ماندو نەناسیتان دەگوشین و پیرۆزبایی ساڵێكی تر لە خەبات و تێكۆشانتان لێ دەكەین، ئومێدەوارین بەبڕوا و متمانەیەكی یەكگرتوو و بەهێزەوە ئەركە رێكخراوەیەكانی سەر شانمان بەجێ بهێنین و لە هەوڵ و كۆششی بەردوامدا بین بۆ بەدیهێنانی سەربەخۆیی و ئازادی و دادپەروەری بۆ گەلەكەمان.
* نەمری و سەربەرزی بۆ شەهیدانی پارتمان و سەرجەم شەهیدانی رێگای رزگاری كوردستان.
* پیرۆز بێت یادی 15 ساڵەی دامەزراندنی پارتمان.
* سەركەوێ خەباتی چینایەتی و نەتەوییمان.

مەكتەبی سیاسی
پارتی كرێكاران رەنجدەرانی كوردستان
هەولێر/ پایتەختی هەرێمی كوردستان
1/2/2010