له کوردستان ... کلاو چی و ساختهچی بگه‌نه یه‌ک چیان لێده‌رده‌چی ... .
Saturday, 03/11/2012, 12:00
نوسینێکه هه‌ر جاره‌و باسی شتیک یا له سه‌ر شتێک قسه ده‌که‌ین به زمانێکی زۆر ساده‌و ساکار ، ته‌نها عه‌یب و عاره‌کان باس ده‌که‌ین و ده‌خه‌ینه ڕوو ، ئه‌وه‌ی له بن به‌ڕه ده‌یخه‌ینه سه‌ر به‌ڕ.
لێره‌و له‌وێ ده‌مێکه گوی بیستی قه‌وانه‌ێکی شوختکراوی به‌رپرسانی هه‌رێمین له هه‌ر دوو حزب به پله‌ی که‌سایه‌تی دووه‌م له ئه‌ندامانی مه‌کته‌بی سیاسی و بریکاری وه‌زیر، هه‌مان بنێشته خۆشه‌که‌ی ناو ده‌میان که ده‌یجون جارو بار بۆ ئه‌وه‌ی سیاسه‌تی له بیر بردنه‌وه‌ی چاکسازی و گه‌نده‌ڵیه‌کانیان له‌لایه‌ن خه‌ڵکه‌وه و خۆ پیشاندان به شێوه‌ێک که‌وا هه‌ر ئه‌وانن پارێزه‌ران و ڕزگارکه‌رانی کوردستان.
بۆ نموونه، چه‌ند جارێکیان مه‌لا به‌ختیار له (ینک) هه‌ندێ جاریش ئه‌نوه‌ر حاجی عوسمان بریکاری وه‌زاره‌تی پێشمه‌رگه (پدک) جاروباریش مه‌حمود سه‌نگاوی، گڕێک ده‌یانگرێت و هه‌ر بڵێی ده‌بابه‌یان قوتدابێت و به دار لا‌ستیک فڕۆکه‌یان خستبێته خواره‌وه، هه‌ر ئێستاش له سه‌نگه‌ری هه‌ره پێشه‌وه به‌رامبه‌ر عاره‌بی داگیرکه‌ر وه‌ستابن، به جل و به‌رگێکی خۆڵاوی و چڵکن، پێڵاوه‌کانیان ئه‌دیداسه ، بیست و چوار ساڵه ئاو به جه‌سته‌یان نه که‌وتوه، خواردنیان نانی ڕه‌ق و ئاوه، خه‌وو نوستن چه‌ند چرکه‌ێکه له شه‌وو ڕۆژێکدا، باسی ئه‌وه ناکه‌ین که گه‌شت و ژن و ڕابواردنیان له بیر چۆته‌وه خه‌م و خه‌فه‌تی ڕزگارکردنی ناوچه دابڕاوه‌کان شیتی کردوون، دامه‌زراندنی هێزه‌کانی دیجله‌ی مالکی و عه‌بدولئه‌میر زه‌یدی زۆر هیلاکی کردوون بۆ یه‌ک چرکه سات ناتوانن به‌ره‌کانی جه‌نگ جێبهێلن.
لێدوانه‌کانی به‌رپرسانی ده‌سه‌ڵات بۆ ڕاگه‌ندن:
ئه‌نوه‌ر حاجی عوسمان بریکاری وه‌زاره‌تی پێشمه‌رگه 30/10/2012 : (من بۆ خۆم نه باوه‌ڕم به گفتوگۆ و نه به‌دانیشتن هه‌یه‌‌و هیچ هیوایه‌كیشم نییه له‌گه‌ڵ ئه‌واندا، ته‌نها باوه‌ڕم به‌وه هه‌یه جه‌به‌ل حه‌مرین بگرین و پێیان بڵێین هه‌ركه‌سه‌و ماڵی خۆی).
مه‌حمود سه‌نگاوی03/11/2012: (به‌پێویستی ده‌زانێت كورد ته‌ماشاكه‌ر نه‌بێت له‌م بارودۆخه‌و هه‌ڵوێسته‌كانی ئۆپه‌راسیۆنی دیجله، عه‌بدولئه‌میر زه‌یدیش كه فه‌رمانده‌ی ئۆپه‌راسیۆنه‌كانی دیجله‌یه، كه‌سێكی نه‌خوازراو و ناحه‌زه به‌رامبه‌ر به‌كورد و پێشتر هه‌رچی زه‌وی و موڵكی كورد هه‌بووه له كه‌ركوك و ناوچه دابرێنراوه‌كان داگیری كردبوو، بۆخۆی به‌كاری ده‌هێنا).
نازانم ئه‌و قسه زلانه ئاراسته‌ی کێ ده‌که‌ن، ئه‌ی هه‌ر ئه‌وان نین به‌رپرس و سه‌رکرده‌کانی هێزی چه‌کداری هه‌رێم، هه‌ر ئه‌وان نین ئه‌مڕۆ بڕیارده‌ر له هه‌موو مه‌یدان و بواره‌کاندا، هه‌ر ئه‌وان نین کلاو چی و ساختهچی.
ئه‌گه‌ر بۆ ململانی و موزایه‌ده‌کردنه له نێوان خۆتان ئه‌وا پێویست ناکات خۆتان زۆر چاک یه‌کتر ده‌ناسن، ئه‌گه‌ر ئاراسته‌یه‌ش بۆ خه‌ڵکی هه‌رێم، ئه‌وا ئه‌وان ڕاهاتوون له بیستنی ئه‌م جۆره لێدوانانه.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
