گەل و گەریلا

Monday, 16/01/2012, 12:00

لەژێر ناوی کرانەوە بەڕووی کوردا، تاکە ئامانجی ئەردۆغان و پارتەکەی دابڕاندنی گەل و گەریلایە لە یەکتری، نەک چارەسەری پرسی کورد.
گەل: بەو کۆمەڵە خەڵکە دەگوترێت کە پەیوەندی، زمان، خاک، کلتور، مێژووی هاوبەش بەیەکتریانەوە دەبەستێتەوە؛ ئەمانە بنەماوڕەگەزی ڕەسەنایەتی هەر گەلێکن کە تاکەکانی بەهۆیەوە هەست بە هاوبەشی دەکەن، کەواتا لەبەر ڕۆشنایی ئەم پێناسەیەدا دەتوانین بڵێین کە گەلی کورد گەلێکە خاوەنی هەموو ئەو ڕەگەزانەیە، کە پێویستە هەرگەلێک خاوەنی بێت. گەلی کورد بەدرێژای هەزاران ساڵە خاوەن زمان و خاک وکلتور ومێژووی خۆیەتی لە ناوچەی ڕۆژهەڵاتی ناوەڕاست، گەلی کورد بەدرێژای مێژووی دوای شەڕی چاڵدێرانی ١٥١٤ز و تایبەت تریش دوای پەیمانی لۆزانی ١٩٢٣ز و دابەشکردنی خاک و گەلەکەی بەسەر چەند دەوڵەتیکدا، کە هەریەکە لەو دەوڵەتانە هەموو هەوڵێکی خۆیان خستەگەڕ بۆ تواندنەوەی زمان و کلتور و مێژووی گەلی کورد، بەڵام گەلی کورد توانی بەرگری بکات لە زمان وخاک وکلتور و میژووەکەی.
باکوری کوردستان وەکو بەشێکی هەرە گەورەی کوردستان چ لە ڕووبەر و چ لە دانیشوانەکەی، لەلایەن دەوڵەتی تورکیای کەمالی کەوتەبەرسیاسەتی تواندنەوەی نەتەوەیی و دەکرێت بگوترێت کە سەخترین هەڵمەتی تواندنەوەو لەناوبردنی گەلی کورد لەوبەشەی کوردستان پیادەکراوە، بۆ نمونە: زمان کە ڕەگەزی هەرە سەرەکی بوونی هەر گەلێکە، لەو بەشەی کوردستاندا بەپێی یاسای دەوڵەتی تورکیایی کەمالی قەدەغەکرا و تاکو ئەمڕۆش هەرقەدەغەیە، ئەمە جگە لە شیواندنی خاک و کلتور و مێژوو. ئەگەرچی ئەم سیاسەتەی دەوڵەتانی داگیرکەری کوردستان تا ڕادەێکی زۆر کاریگەریان دانا لەسەر تاکی کورد، بەڵام هێشتاش گەلی کورد خاوەنی زمان و خاک وکلتور و مێژووی خۆیەتی.
گەریلا: بەو کەسە دەگوترێت گەریلا، کە ئەندامی هێزێکی چەکداری نا دەستوریە و بەشێوەی گروپی بچوک بچوک ‌هێرشی لە ناکاو دەکەنە سەر بەرژەوەندیەکانی دوژمن، بەتایبەتیش لەو شوێنانەی کە خاڵی لاوزی دوژمن دەدۆزنەوە. هەرچی شەڕی گەریلایشە ئەوا: بریتیە لەو شەڕەی کە گروپێکی بچوکی چەکدار ئەنجامی دەدات و هەموو جۆرەکانی پلانی جەنگی بەکار دەهێنێت، وەکو: بۆسە نانەوە، جوڵانەوەی بەردەوام لەناوچەێکەوە بۆ ناوچەێکی تر بۆ هەراسان کردنی هێزی گەورەی دوژمن، هێرشی لەناکاو و سەرسوڕهێنەر بۆ سەر خاڵی لاوازی دوژمن و پاشەکشێی خێرا لەو ناوچەیە، ئەمەش بەمەبەستی کەمترین زیان و زۆرترین دەستکەوت، بەدرێژای مێژووی گەلی کورد خاوەنی چەندین جۆر گروپی چەکداری گەریلاو خاووەنی چەندین شەڕی گەریلایی بووە، کە تاکو ئەمڕۆش درێژەی هەیە، نمونەی گەریلاکانی PKK و PJAK لە چیاکانی کوردستان و هەموو شەڕە گەریلاییەکانیان کە دواترینیان شەڕی (چیای جود)ە لە ٩و١٠مانگی کانوونی دووەمی ئەم ساڵ.
بەڕێزان:
ئەمە تەنها دەروازەێک بوو بۆ چوونە ناو بابەتێک کە ئەمڕۆ لە ڕۆژەڤدایە، ئەویش پرسی کوردە لە ناوچەکەو بەتایبەتیش لە تورکیای سەردەمی ئەردۆغان و پارتی دادوگەشەپێدان، کە هاوکاتە لەگەڵ بەهاری گەلانی ناوچەکە.
پارتی دادوگەشەپێدان، کە بە تورکیەکەی پێی دەگوترێت: Adalet ve Kalkınma Partisi و کورتکراوەکەی AKP، لە١٤ی ئابی ساڵی ٢٠٠١زدا دامەزرا لەلایەن ژمارەێک لە کۆنە سیاسەتمەدارانی پارتە جیاوازەکانی گۆڕەپانی سیاسی تورکیا و ژمارەێکیش لەکەسایەتی سیاسی تازە. مرۆڤ کاتێک سەیری پێکهاتەی دەستەی دەمەزرێنەرانی ئەم پارتە دەکات، دەبینێت کە پێکهاتەی ئەم پارتە زۆر ئالۆزە، بۆ نمونە: یەکەم گروپی پێکهێنەری AKP، ئەو کەسانەن کە لەناو پارتی فەزیلەوە هاتوون کە پارتێکی ئیسلامی ڕیفۆڕمخوازبوو، لەوانەش: عبدالڵە گویل و بوڵاندئارچ. دووەم گروپی پێکهێنەری AKP بریتین لەو کەسانەی کە لە پارتی دایکی نیشتیمانەوە هاتبوون کەئەویش پارتێکی پاریزگار بوو، لەوانە: جەمیل چیچەک وعبدالقادر ئاکسو. سێهەم گروپ بریتین لە چەند ئەندامێکی پارتی دیموکرات، ناسراو بە،DP وەکو حسێن چەلیک وکۆکسال تۆپتان، هەرچی کورشاد توزمینیشە پێشتر نەتەوەپەرست بووە. لەگەڵ ئەمانەدا چەند ئەندامێکی تری تازەی وەکو: علی باباجان و سەلما علیا کاڤاف و ئەگمەن باغیش و مەولود چاڤوش ئۆغڵو پەیوەندیان کرد بەم پارتە تازەوە. ئەم پارتە تازەیە لە یەکەم بەشداریکردنی هەڵبژاردنی پەرلەمانیدا، کە لە ٣ی تشرینی دووەمی ٢٠٠٢زدا ئەنجامدرا، سەرکەوتنی گەورەی بەدەست هێنا و توانی لە کۆی ٥٥٠ کورسی پەرلەمانی تورکیا ٣٦٣ کورسی بەدەست بهێنێت، کە دەکاتە ڕێژەی %٣٤.٢٨هەموو دەنگدەرانی تورکیا، ئەوبوو لەو هەڵبژاردنەدا تاکە پارتێکی تر توانی بەپێی ڕێژەی دەنگەدەرانی بگاتە پەرلەمان، پارتی گەلی کۆماربوو، کە ناوە تورکیەکەی:Cumhuriyet Halk Partisi, CHP بە سەرۆکایەتی دەنیزبایکاڵ.
بەڵێ بەپێی ئەنجامەکانی هەڵبژاردن، AKP توانی حکومەتی زۆرینە پێک بهێنێت و لەوکاتە بەدواوە گۆڕەپانی سیاسی تورکیا بۆ ئەردۆغان وپارتەکەی واڵا بوو و توانیان دەسەڵات بەسەر هەموو جومگەکانی حکومەت وپەرلەماندا بگرن بە هۆی ئەو زۆرینەیەی کە لە هەڵبژاردندا بەدەستیان هێنا بوو، لە دووەم هەڵبژاردنی پەرلەمانیشدا کە لە٢٢ی تەمووزی ٢٠٠٧دا ئەنجامدرا جارێکی تر توانی زۆرینەی کورسیەکانی پەرلەمان بۆخۆی دەستەبەر بکاتەوە وحکومەتی زۆرینەی پێکهێنایەوە، هاوکات لەهەمان ساڵداو لە هەڵبژاردنی سەرۆک کۆماریدا هەمان شێوە دەنگی زۆرینەی دەنگدەرانی بەدەست هێنا و (عبدالڵە گویل) بوو بە سەرۆک کۆمار، لە دواهەمین هەڵبژاردنی پەرلەمانیشدا کە لە ١٢حوزەیرانی ٢٠١١دا ئەنجام درا، جارێکی ترو بۆ سێهەم جار توانی زۆرینەی دەنگەکان کۆبکاتەوەو جارێکی تر حکومەتی زۆرینە پێکبهێنێت.
پارتی دادوگەشەپێدان بەهۆی ئەو ڕێژەی زۆرەی کە لە هەڵبژاردنەکانی پەرلەمانی و سەرۆک کۆماریدا بەدەستی هێناوە، توشی جۆرێک لە لەخۆبایی بوونی سیاسی بووە، بەجۆرێک کە وای لە سەرانی ئەو پارتەکردوە بەشێوازێکی ڕە‌ها سیاسەت بکەن ولە گۆڕەپانی سیاسی تورکیا و ناوچەکەدا هەڵوێستی پێچەوانە ئەنجام دەدەن؛ بەڵێ بەدرێژای ئەو چەند ساڵەی دەسەڵاتدارێتی پارتی دادوگەشەپێداندا بینەری چەندین هەڵوێستی سەیر بووین لەسەرئاستی جیهانی و ناوچەیی کە بەئاشکرا دووڕووی ئەم سوڵتانە عوسمانیانە دەبینرێت لە هەڵوێستەکانیاندا.
لەسەرئاستی ناوچەکە و دەرەوە: دەبینین کە ئەردۆغان خۆی بە بەریگارێکی سەرسەختی گەلی فەلستین دەزانێت و بەردەوام دژایەتی ئیسرائیل و سیاسەتەکانی دەکات لە ناوچەکەدا، کەچی لەهەمان کاتدا دەیەوێت هاوپەیمانی ستراتیژی ئەمریکا بێت لەناوچەکەدا، ئەمە لە کاتێکدایە کە ئیسرائیل کۆرپەی ئەمریکاوڕۆژئاوایە لەڕۆژهەڵاتی ناوەڕاستدا، ئەردۆغان پشتیوانی گەلی سوریا دەکات دژی ڕژێمەکەی بەشار ئەسەد، بەڵام هەوڵ دەدات لەگەڵ ئێرانیشدا دۆستایەتی پتەوی هەبێت، لە کاتێکدا هەموومان دەزانین کە بەشار ئەسەد و ڕژێمەکەی، دوژمنی سەرسەختی ئیسرائیل و هاوپەیمانی ستراتیژی ئێرانە لە ناوچەکدا!. دەوڵەتی تورک لەلاێکەوە لە هەوڵدانی بەردەوامدایە بۆ نزیک بوونەوە لە دەوڵەتانی ئیسلامی بەتایبەتیش جیهانی عەرەبی، بەڵام لە هەمان کاتدا هەوڵی نزیک بوونەوەی زیاتر دەدات لە دەوڵەتانی ڕۆژئاوا و سیاسەتەکانیان، بەتایبەتیش ویلایەتە یەکگرتووەکانی ئەمریکا!. لەلاێکی ترەوە دەبینین کە بە شێوەێکی ئاشکرا دەستی خستۆتە ناو هەریەکە لە دەوڵەتانی سوریا و عێڕاق لە ناویشدا هەرێمی کوردستان، لێرەدا بەتەواوی دوو ڕووی ئەردۆغان و پارتەکەیمان بۆ دەردەکەوێت، ئەردۆغان حەزدەکات گەلی سوریا ئازاد بێت لە دەستی بەشار ئەسەد و ڕژێمەکەی، بەڵام حەزناکات کورد لە ڕۆژئاوای کوردستان ئازاد بن!. دەوڵەتی تورک حەزدەکات عێڕاق ببێتە دەوڵەتێکی دیموکراسی بەڵام حەز ناکات باشوری کوردستان سەربەخۆ بێت!. دەوڵەتی تورک حەزدەکات دژی ئیسرائیل بێت و دۆستی ئەمریکا و ڕۆژئاوا بێت!. دەوڵەتی تورک حەز دەکات نزیک بێتەوە لە دەوڵەتانی ئیسلامی بەتایبەتیش دەوڵەتانی عەرەبی، لە هەمان کاتیشدا حەز دەکات لە یەکێتی ئەوروپاشدا ئەندام بێت!. دەوڵەتی تورک دەیەوێت ئیمزای وڵاتەکەی لە یەکێتی ئەوروپادا وەکو دیموکراسیترین وڵاتی جیهان (سوید) بێت، بەڵام نایەوێت گەلی کورد لە باکوری کوردستاندا خاوەنی کەمترین ئازادی بێت!، ئەمە جگە لەوەی هەزاران منداڵ و چالاکوان و پارێزەر و سیاسەتمەداری کوردی لە زیندانەکاندا بەند کردوە.
لە بابەتی پرسی کوردیشدا: کە من مەبەستمە لەم بابەتەمدا زیاتر تیشکی بخەمە سەر، ئەوەیە کە ئەدۆغان و پارتەکەی لەوەتای دەسەڵاتیان گرتۆتە دەست، وا خۆیان پیشانی گەلی کورد دەدەن، کە ئەوان جیاوازتر لە پارتە فەرمانڕەواکانی تری پێش خۆیان مەبەستیانە پرسی کورد چارەسەر بکەن؛ بەڵام ئەوەی لە کرداروگوفتاری ئەردۆغان و پارتەکەی بەدی دەکرێت لە ماوەی تەمەنی دەسەڵاتیدا، ئەو ڕاستییە بەڵگە نەویستە دووپات دەکاتەوە، کە ئەم سیاسەتی بە ناو کرانەوە بە ڕووی کوردا، زۆر مەترسیدار ترە لە سیاسەتی پارتە فرمانڕەواکانی پێش خۆی، چونکە ئەوان بە ئاشکراو بێ پەردە دژیاتی خۆیان دەردەبڕی بەرامبەر هەموو شتێک کە ناوی کورد و کوردستان بێت، بەڵام ئەردۆغان و پارتەکەی لەلاێکەوە لەبەردەم میدیاکاندا باس لە کرانەوە و چارەسەری پرسی کورد دەکەن، لە لاێکی تریشەوە لە ژێرەوە درێژە بە سیاسەتی قڕکردنی گەلی کورد دەدەن، ئەمە ئەو سیاسەتەیە کە پێی دەگوترێت سیاسەتی دووڕووی، لێرەدا دەمەوێت چەند ووتەێکی سەرۆک کۆمار و سەرۆک وەزیرانی تورکیا لەم بابەتەدا بخەمە بەر باس، وەکو:
عبدالڵە گویل سەرۆك كۆماری توركیا لەفڕوكەخانەی ئەنقەرە، پێش ئەوەی بەرێ بكەوێت بۆ لەندەن وەڵامی پرسیاری رۆژنامەنووسانی دایەوە‌و ووتی: ئێمە دەمانەویست كارو خزمەتگەلێكی بەرفراوان بۆ كوردانی توركیا ئەنجامبدەین بەڵام پەكەكە نەیهێشت ئەوان بەگرتنەبەری توندوتیژی هەموو شتێكیان تێكدا
وتیشی:ئەوان شۆڕشگێڕنین، بەڵكو تاقمێكی تیرۆریستین كەلەبارودۆخی عێراق كەڵك وەردەگرن.
راشیگەیاند "خۆزگە چالاكانی سیاسی كورد لەتوركیا لەبەرانبەر پەكەكە هەڵوێستی روونیان بنواندبایەو لەوان دوورییان بگرتایە، چونكە لەم حاڵەتەدا ئەنجامی باشتر دەهاتەدی.
ئەردۆغان لە کۆبوونەوەی پارتەکەیدا لە شاری (بەدلیس) ڕۆژی ١٨/١١/٢٠١١ دەڵێت: BDP وPKK ئیسلام نین، ئایینی ئەوان زەردەشتە.!
هەرەوها لەبەرامبەر لێدوانی لەیلا زانادا کە ووتبووی باسی پرسی چەک دانانی PKK ناکەم، ئەردۆغانی ووتی: تۆ پەرلەمان جێبھێڵە و بڕۆ بۆ چیاکان و ببە گەریلای پەکەکە!.
بە سەرنجدان لەم ووتانەی عبدالڵە گویل وئەردۆغان، دەبینین کە پارتی داد و گەشەپێدان وای خۆی نمایش دەکات کە ئەوان دوژمنی گەلی کورد نین، بەڵکو ئەوان دوژمنی گەریلاکانی PKKن، ووشەی ئەوان تیرۆرستن؛ واتا ئێوە وەکو گەلی کورد تیرۆرست نین، بەڵکو ئەوان واتا گەریلاکان تیرۆرستن، لە ووشەگەلی خۆزگە چالاکانی سیاسی کورد لە تورکیا بەرامبەر بە PKK هەڵوێستی ڕوونیان بنواندایە و لەوان خۆیان دوور بگرتایە؛ ئەوەمان بۆ ڕوون دەبێتەوە کە سیاسەتی AKP، سیاسەتی دابڕاندنی گەل و گەریلایە لە یەکتری نەک چارەسەری ڕاستەقینەی پرسی کورد لە تورکیا.
هاوکات لەگەڵ ئەم لێدوانانەی سەرۆک کۆمار، لەولاشەوە سەرۆک وەزیران، بە ووشە گەلی BDP وPKK ئیسلام نین، ئایینی ئەوان زەردەشتە، هەوڵی ناشیرین کردنی گەریلاکان دەدات لەبەرچاوی گەلی کورد لە باکوری کوردستان، بەوەی کە ئەوان موسڵمان نین و زەردەشتین. ئەو بە بۆچونی خۆی وا دەزانێت گەلی کورد هەمان ئەو گەلەیە کە لەژێر بیروباوەڕی ئایینیدا، دۆزی ڕەوای خۆی لەبیردەکات، هەروەها لە ووشەگەلی با لەیلا زانا پەرلەمان جێبهێڵێت و بڕوا بۆ چیاکان و ببێتە گەریلای PKK، جارێکی تر سیاسەتی دووڕووی و هەوڵی دابڕاندنی گەل و گەریلا لەیەکتری بە ڕوونی دەردەکەوێت کە ئەردۆغان و پارتەکەی بەدرێژای وادەی دەسەڵاتیان کاری لەسەر دەکەن لەژێر ناوی کرانەوە بەڕووی کورد و چارەسەری پرسی کورد، کە لە ڕاستیدا مەترسی ئەم سیاسەتە زۆرزیاترە لە سیاسەتی پارتەکانی بەر لەئەردۆغان، چونکە ئەم (موسڵمانە دوژمنە دۆستەی) گەلی کوردو پرسەکەی وەکو مار بەهێمنی دەخشێت نەك بەسنگ دەڕپەراندن و هەڕەشە، لەبەرئەوە پێویستە گەلی کورد زۆر ژیرانەتر لەم دوژمەنە دۆستە موسڵمانە نزیک بێتەوە، بۆ ئەوەی چیترمێژووی خۆی لەسەر گەلی کورد دووبارە نەکاتەوە.
لە مێژووی دوای جەنگی یەکەمی جیهانی گەلی کوردا دەبینین کە دەوڵەتانی داگیرکەری کوردستان، بەهەموو شێوەێک هەوڵی لە ناوبردنی گەلی کوردیان داوە و لەو پێناوەشدا هەموو پیلانێکیان خستۆتەکار، لەئێران فتوای (جیهاد) دژی گەلی کورد لەسەرزمانی(خومەینی) جاڕی بۆ درا و خەباتکارانی کوردیش بە(نەیارانی خودا) ناسێنران، لەعێڕاقی سەردەمی ێدامدا لەژێرناوی (ئەنفال)دا جاڕی کۆمەڵکوژی گەلی کورد درا و پێشمەرگە وەکو تێکدەر لە قەڵەمدرا، لە مێژووی دەوڵەتی تورکیشدا، هەر لە ١٩٢٣ز وە بگرە تا دەگاتە ئەمڕۆ، لەبەرامبە پرسی کوردا یەک ستراتیژیان هەبووەو هەیە ئەویش؛ لەناوبردنی گەلی کورد و خاکی کوردستانە، لەم پێناوەشدا هەموو ڕێگەکانیان گرتۆتە بەر، ناساندنی گەریلاکان وەکو تیرۆریست و ئەژمار کردنی PKKو BDP ناموسڵمان، کە ئەمەیان هەمان ئەو سیناریۆیەی خومەینی و ێدامە، ئەمڕۆ ئەردۆغان کاری لەسەردەکات و دەیەوێت بەم هۆکارەوە درێژە بە لەناوبردنی گەلی کورد بدات.
خوێنەری ئەزیز: کاتێک کە دەڵێم ئەم سیاسەتەی ئەردۆغان زۆر مەتریسیدار ترە لە سیاسەتی پێش خۆی بێ هۆکار نییە، چونکە تا دوێنێ بوو زۆرێک لە سیاسییە بە ناو سەرۆکەکانی کورد و خوێندەوارە بەناو ڕۆشنبیرەکانی کورد و ئیسلامیە بەناو کوردپەروەرکانی کورد و تەنانەت بەشێکی زۆریش لە خەڵکی سادەی کورد، بڕاوایان وابوو کە ئەردۆغان و پارتەکەی بە ڕاستی دەیانەوێت پرسی کورد چارەسەر بکەن.! بۆ نمونە: لە باشووری کوردستان بینیمان کە چۆن سەرۆکی هەرێم لەبەردەم میدیاکاندا و لە کاتی کردنەوەی فڕۆکەخانەی هەولێر جارێکی تر پشتیوانی خۆی بۆ سیاسەتەکانی ئەردۆغان دەربڕی و هیوای خواست لە خولی داهاتووی پەرلەمانی وڵاتەکەی جارێکی تر سەرکەوتن بەدەست بهێنێت لەپێناو چارەسەرکردنی پرسی کورد لە باکوری کوردستان!، ئەمە جگە لەوەی کە لەم دوایەدا لەبەرامبەر داننانی ئەردۆغان بە کۆمەڵکوژی دەرسیم، سەرۆکایەتی هەرێمی کوردستان ئەردۆغانیان وەکو کەسێکی بوێر و ئازا ئەژمار کرد، لە کاتێکدایە هەموومان دەزانین کە ئەردۆغان ئەم کارەی لە بەرژەوەندی گەلی کورد نەکردووە، بەڵکو ئەم کارەی ئەردۆغان سیاسەتی پارتەکەیەتی بۆ یەکلاکردنەوەی کێشە سیاسیە ناوخۆیەکانی وڵاتەکی لەگەڵ پارتی گەلی کۆماری (CHP)، چونکە ئەم تاوانە لەو سەردەمەدا ڕوویداوە کە پارتی گەلی کۆمار لەسەر کورسی دەسەڵات بووەو ئەمڕۆ دووەم گەورە پارتی تورکیایە دوای پارتەکەی ئەردۆغان.
بەڵی ئەردۆغان بەم کارەی مەبەستی بوو بە بەردێک دوو چۆلەکە بکوژێت، یەکەمیان ئەوەیە کە بە تورکەکان بلێت: ئەها ئەوە من و پارتەکەمم خاوەن مێژووێکی پاک و ئەوە پارتی گەلی کۆمارە میژووێکی ڕەشی هەیە لە ڕابردووی تورکیادا و بەم هۆیەشەوە جەماوەریەتی ئەو پارتە کەم بکاتەوە، لەو لاشەوە بە گەلی کورد بڵێت ؛ ئەها ئەوە منم موسڵمان و پاک و بوێر و ئازایانە باس لە ئازارەکانی ڕابردووی ئێوە دەکەم، ئەوە منم دەمەوێت پرسی ئێوە چارەسەر بکەم و پێویستە ئێوەش پشتگیری من و سیاستەکانم بکەن و پشت بکەنە گەریلاکانی PKK و سیاسەتمەدارانی BDP و لەو ڕێگەیەوە شەرعیەت بەو سیاستە بدات کە خۆی بەتەنها پرسی کورد چارەسەر بکات بەبێ بوونی نوێنەرانی گەلی کورد!، بەڵام ئەوەی لەسەر هەموو تاکێکی کورد پێویستە درک بەو راستیە تاڵە بکات، کە تورک هەرگیز ئەو فریشتەیە نییە پرسی کورد چارەسەر بکات، ئەویش چارەەسەری تاک لایەنە!. ئاخر لە کوێی مێژووی مرۆڤایەتیدا هەبووە چارەسەری پرسی گەلێک بە دەستی دوژمنەکەی کرا بێت؟! چ لۆژیکێک ڕێگە بەوە دەدات چارەسەری تاک لایەنە بتوانێت پرسی کورد چارەسەر بکات؟. ئاخر ئەم پرسە پرسی دوو نەتەوە، دوو زمان، دوو خاکە،و چۆن دەکرێت بە تەنها لەلایەن نەتەوەی سەردەستەوە چارەسەر بکرێت؟
بەڕێزان: ئەگەر شۆڕ بینەوە بۆ سەرانی تری کورد لە باشوری کوردستان هەمان شت دەبینین، بۆ نمونە لە ماوەی ئەم چەند ساڵەی تەمەنی حکومڕانی ئەردۆغان و پارتەکەیدا چەندین جار نێچیرڤان بارزانی لێدوانی دژ بە پارتی کرێکارانی کوردستانی داوە و چەندین جاریش داوای چەک دانانی لە PKK کردووە، وەکو ئەوەی بلێیت ئەوە ئەردۆغان و پارتەکەی پرسی کوردیان لە باکوری کوردستان چارەسەر کردوەو ئیتر هیچ نەماوە گەریلاکان خەباتی بۆ بکەن، بەڵام ئایە ئەمە ڕاستە؟، بێگومان پرسی چەکدانانی گەریلاکان هەرگیز دروست نییە لە قۆناغی ئەمڕۆی خەباتدا. هەرگیز ئەمە لۆژیک نییە پارتێکی وەکو PKK لەماوەی نزیکەی ٣٤ی تەمەنیدا زیاتر لە ٣٠ هەزار گەریلای کردبێتە قوربانی بۆ ئازادکردنی کوردستان، کەچی ئەمڕۆ چەک دابنێت بێ ئەوەی ئەوئامانجەی هێنابێتە دی کە لە پێناویا دەمەزراوە، گەلۆ ماڵباتی شەهیدان و گەلی کورد چی دەڵێن لەوکاتەدا؟ چی بە ماڵباتی ئەو ٣٠هەزار شەهیدە دەڵێن؟ ئەی گەلی کورد چ لە سەرۆک و سەرانی ئەو پارتەدەپرسێت؟ ، ئەی ئەو گەریلایانە چ بکەن؟ بچنەوە ژێر دەستی ئەو دوژمنەی کە ساڵانێک دژی چەکیان هەڵگرتبوو و پاشانیش دەوڵەت بە یاسای دژە تیرۆر دەستگیرو دادگاییان بکات؟؟، یان بچنەوە ژێر دەستی ئەو دەوڵەتەی هەزاران منداڵ و کەسایەتی چالاکوانی سیاسی و ڕێکخراوی کۆمەڵی مەدەنی و پارێزەر و تەنانەت ڕۆژنامەنووس و پەرلەمانتاریش زیندانی کردوە؟،،، یان وەکو پارتەکانی ڕۆژهەڵات ببن بە کۆیلەی دەستی یەکێتی و پارتی و لە کۆیە و دێگەڵە و چەند شوێێکی تری باشور دابنیشن و بینەری کوشتن و گرتن و ئازاردانی خوشک و براکانیان بن لە باکوری کوردستان؟؟.
ئەگەر زیاتر شۆڕ بینەوە ئەوا دەبینین کە هەریەکە لە هۆشیاری زێباری و جەلال تالەبانی چەندین سەرانی کورد لە باشور بە خەستی کەوتونەتە ژێر گەریکەری ووتەکانی ئەردۆغان و هەمیشە لێدوان دژی پەکەکە دەدەن و بە تیرۆرست ناویان دەبەن، ئەوەتا جەلال تاڵەبانی دەڵێت: ئەگەر پە کە کە شەڕ ڕانەگرێت ئەوا پێویستە خاکی عێراق چۆڵ بکەن.! سەیر بکەن ئەم بەناو کوردە چۆن باشوری کوردستان بەعێڕاق ناو دەبات.! ئاخر گەلی کورد ئەم هەموو شەهیدەی کردە قوربانی لە پێناو ئەوەی ئەمڕۆ جەلال تاڵەبانی بە عێڕاق .ناوی ببات یان کوردستان؟!
باسەرقەڵێمیکیش دەربارەی خوێندەوارە بەناو ڕۆشنبیرەکانمان بنوسین، من نامەوێت ناوی هیچ کامێکان بهێنم، تەنها ئاماژە دەکەم بەوەی کە لە ماوەی تەمەنی دەسەڵاتی ئەردۆغان و پارتەکەیدا، چەندین جار بینیمان کە لە ڕێگەی میدیای بینراو و نوسراو بیستراودا، ئەردۆغان و پارتەکەیان وەکو پیاوی چارەسەرکەری پرسی کورد ئەژماردەکرد، ئێستاش لە یادمە کاتێک یەکێک لە هاوڕی خۆشەویستەکانم تەلەفۆنی بۆ کردم و ووتی: لە یەکێک لە بەرنامەکانی تەلەفیزۆنی ئاسمانی کوردی هێرش کراوەتە سەرPKK و ئەردۆغانیان وەکو فریشتەی چارەسەری پرسی کورد پێشان داوە و تەنانەت ووتویانە کە ئەوە PKKیە ڕێگرە لەبەردەم چارەسەری پرسی کورد، ئەگەرنا پرسی کورد لەلایەن ئەردۆغانەوە چارەسەر دەکرێت!، ئەمە بۆ بەشێکی زۆری میدیای کوردی لە باشوری کوردستان ڕاستە، کە تاکو ئێستاش کاری لەسەر دەکەن، بەتایبەتیش ڕاگەیاندنی دەسەڵات و ئیسلامیە میانڕەوەکانی کوردستان.
ئەوەی جێگەی داخە ئەوەیە کە بەشێکیش لە میدیای ئەهلی لەم دوایانەدا کەوتوونەتە جۆرێک لەم هەڵانەوە و بەشێک لە هەواڵە چەواشەکاریەکانی میدیای تورک دەگوازنەوە بۆ گوێچکەو دیدی مرۆڤی کورد، کە ئەمەش جارێکی تر خزمەت بە سیاسەتی تورک دەکات دژبە گەلی کورد، وەکو ئەوەی لە ماوەی ڕابردوودا بینیمان کە لە یەکێک لە ماڵپەڕەکاندا نوسرابوو، ئۆجەلان بۆ ئەسەد : سوپاسی هەڵوێستت دەكەم زۆر لەهی باوكت دەچێت !، ئاخر کێ هەیە ئەو ڕاستیە نەزانێت کە ئۆجەلان هەرگیز پشتگیری لە دیکتاتۆریەت ناکات؟، کێ هەیە ئەوە نەزانێت ئەم هەواڵە ناوەرۆکێکی دوژمنکارانەی هەیە کە ڕۆژنامە نەتەوەپەرستەکانی تورک بڵاوی دەکەنەوە بۆ دابڕاندنی گەل و گەریلا و سەرۆک لەیەکتری؟، کێ هەیە نەزانێت ڕاگەیاندنی تورکیا زۆربەی هەرەزۆری بەشێکە لە سیاسەتی دوژمنکارانەی دەوڵەتی تورک بەرامبەر بە گەلی کورد و پرسەکەی؟.
دەبێت لێرەدا ئاماژە بەو ڕاستیە تاڵەش بکەم کە بەشێکی زۆری گەلی کورد لە باکوری کوردستان، جگەلەوەی کە بەدرێژای تەمەنی کۆماری تورکیا کەوتۆنەتە ژێر کاریگەری سیاسەتی توانەوە و بە تورک کردن و دابڕان لە هەستی نەتەوایەتی، لەهەمان کاتیشدا ئەمڕۆش کەوتۆتە ژێرکاریگەگەری سیاسەتەکانی ئەردۆغان وپارتەکەی، هۆکاری سەرەکی ئەمەش ناسنامەی ئیسلام بوونی ئەردۆغان و پارتەکەیەتی کە تاڕادەێک زۆر کاریگەری نەرێنی دروست کردوە لەسەرهەستی نەتەوەی تاکی کورد، بەڵگەش بۆ ئەمە ئەوەیە کە ئەردۆغان و پارتەکەی لە ناوچە کوردنشینەکان دەنگی زۆر کۆدەکاتەوە لە هەڵبژاردنەکاندا، هاوکات لەگەڵ ئەوەشدا دەبینین گەلی کورد لە باکوری کوردستان لەئاست کۆمەڵکوژی براکانیان چ لە کوژرانی خێزانێکی تەواو لە لۆفەکانی (چیای کورتەک)و چ لە ئاست کوشتنی پۆلێک گەریلا بەچەکی کیمایی و چ لە ئاست کۆمەڵکوژیەکەی (ڕۆبۆسکێ) کەمترین کاردانەوەیان پێشاندا لەسەرئاستی جەماوەری، ئەمە لەکاتێکدا کەچاوەڕوانی ئەوە دەکرا کە ڕاپەڕینی سەرتاسەری هەموو شار و شارۆچکەکانی باکوری کوردستان دەەست پێ بکات، چونکە ناوچەکە لەبارە بوو بۆ ڕاپەڕینێکی لەو جۆرە، بەتایبەتیش چونکە کاتەکە هاوزەمانە لەگەڵ بەهاری گەلانی ناوچەکە، بەڵام بە داخەوە شتێکی ئەوتۆمان نەبینی ئەگەرچی (ێلاح الدین دەمیرتاش) بانگەوازی ڕاپەڕینی کرد و ووتی: کاتی دانیشتین نییە لە ماڵەوە و کات کاتی ڕاپەڕینە، بەڵام گەل ئامادەی ڕاپەڕین و سەرهەڵدان نەبوو!
لەکۆتایدا: ماوەتەوە بڵێم، ئەگەرچی سیاسەتە دووڕوویەکانی ئەردۆغان و پارتەکەی کاریگەری نەرێنی لەسەر بەشێک لەهەستی تاکی کورد دروست کردوە، بەڵام هێستاش ناگاتە ئەو ئاستەی کە بتوانێت گەل و گەریلا لەیەکتر داببڕێت.
[email protected]