له مه‌راسیمێكی شایسته‌دا په‌رده له‌سه‌ر گڵكۆی شه‌هید عادیل رۆژهه‌ڵاتی لاده‌درێت
Tuesday, 26/10/2010, 12:00
عادیل رۆژهه‌ڵاتی، یان شه‌هید (عادیل توركه) ئه‌و شه‌هیده قاره‌مانه رۆژهه‌ڵاتییه‌ی كه له (19/3/1991) له ده‌سپێكی رزگاركردنی شاری كه‌ركوكدا له گه‌ڕه‌كی ره‌حیماواو له هه‌ڵمه‌تی سه‌ر مونه‌زه‌مه‌كه‌ی به‌عس شه‌هید بووه‌و گڵكۆكه‌ی له گۆڕستانی گه‌وره‌ی شارۆچكه‌ی پردێیه. ماوه‌یه‌ك به‌ر له ئێستا له بانگه‌وازێكدا داوامان له خه‌ڵكی كوردستان كرد كه هه‌ر كه‌سێك شه‌هید (عادیل) ده‌ناسێت، با كه‌سوكاره‌كه‌ی ئاگادار بكاته‌وه كه گۆڕه‌كه‌ی له شارۆچكه‌ی پردێیه‌و ئێمه ئاماده‌ی هاوكاریكردنین، به‌ڵام به‌داخه‌وه وێڕای خه‌مخۆری چه‌ندان براو هاوڕێی دڵسۆز له رۆژهه‌ڵاتی كوردستانه‌وه، له‌وانه‌ش دوو برای به‌ڕێز به‌ناوی ره‌زا مه‌نوچه‌هری‌و ره‌زا شه‌مێرانی هاوده‌نگی خۆیان بۆ ده‌ربڕین و له‌گه‌ڵمان هاتنه سه‌ر خه‌ت،
لێ دیسانه‌وه به‌داخه‌وه هیچمان بۆ نه‌كرا، بۆیه له‌گه‌ڵ پێشمه‌رگه‌ی دێرینی حزبی شیوعی كوردستان (هاوڕێ حه‌مه‌ڕه‌شاش) زیاتر كه‌وتینه‌خۆو به كۆمیته‌ی پارێزگای كه‌ركوكی حزبی شیوعی كوردستانمان راگه‌یاند كه ئێمه به‌نیازین گۆڕه‌كه‌ی شه‌هید عادیل رێكبخه‌ینه‌وه‌و ئه‌گه‌ر هاوكاریمان بكه‌ن، ئه‌وا جێگای سوپاسن، سه‌ره‌تا هاوڕێی به‌ڕێزو رۆژنامه‌نووس (شێخ سدیق) ئاماده‌یی خۆی ده‌ربڕی و به‌ڵێنی ئه‌وه‌ی پێداین كه له‌گه‌ڵ كۆمیته‌ی پارێزگای كه‌ركوك حزب قسه ده‌كات، ئه‌وه‌بوو یه‌كسه‌ر هاوڕێ ئه‌بوكاروان سكرتێری كۆمیته‌ی پارێزگای كه‌ركوكیش هاوده‌نگی خۆی ده‌ربڕی و تێكڕای تێچوونی هه‌ڵگرتنه‌وه‌ی گۆڕه‌كه‌و كاشی كردنی چوارده‌وری له ئه‌ستۆ ده‌گرن.
رۆژی دووشه‌ممه رێكه‌وتی 25/10/2010 له مه‌راسیمێكی شایسته‌دا له گۆڕستانی گه‌وره‌ی شارۆچكه‌ی پردێ و به ئاماده‌بوونی به‌ڕێوه‌به‌ری ناحیه‌و سه‌رۆك و ئه‌ندامانی ئه‌نجومه‌ن و نوێنه‌ری فه‌رمانگه حكومی و باره‌گا حزبییه‌كانی شارۆچكه‌كه‌‌و نوێنه‌ری لێژنه‌ی پردێی یه‌كێتی ژنانی كوردستان و كۆمه‌ڵه‌ی ئافره‌تانی كوردستان و رێكخراوه‌كانی كۆمه‌ڵگای مه‌ده‌نی، كاتژمێر (30و10) ده‌ونیوی پێشنیوه‌ڕۆ په‌رده له‌سه‌ر گڵكۆی شه‌هید عادیل لادرا.
سه‌ره‌تا دوای به‌خێرهێنانی میوانه‌كان و چه‌ند ساتێك به بێده‌نگی وه‌ستان، ئینجا چۆنیه‌تی شه‌هید بوونی شه‌هید عادیل خوێنرایه‌وه‌و دواتر هاوڕێ ئه‌بوكاروان وتارێكی پێشكه‌ش كردو له كۆتایی مه‌راسیمه‌كه‌شدا هاوڕێ حه‌مه‌ڕه‌شاش سوپاسی ئاماده‌بوونی جه‌ماوه‌ری شارۆچكه‌ی پردێ و تێكڕای ئه‌و كه‌سانه كرد كه به‌شدارییان له مه‌راسیمه‌كه كردو له هه‌ڵگرتنه‌وه‌ی گڵكۆی شه‌هید عادیل به‌شدارییان كرد. مه‌راسیمه‌كه‌ش له‌لایه‌ن نووسه‌ری ئه‌م چه‌ند دێڕه‌وه به‌ڕێوه‌چوو.
جارێكی دیكه‌ش داوا له دڵسۆزانی گه‌له‌كه‌مان ده‌كه‌ین كه هه‌ر كه‌سێك شه‌هید عادیل ده‌ناسێت، با كه‌سوكاره‌كه‌ی له‌وه ئاگادار بكاته‌وه كه گڵكۆكه‌ی له شارۆچكه‌ی پردێیه.
پردێ
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
