"من" و ئەوەى دەنگم پێدا.. "ویستمان بگۆڕێین، بەڵام تووشى هەر هەمان شت بویینەوە"

Thursday, 15/03/2012, 12:00

"من" و ئەوەى دەنگم پێدا..
"ویستمان بگۆڕێین، بەڵام تووشى هەر هەمان شت بویینەوە"
"هایدگر"


لەگەرمەى نووسینى ئەم بابەتەدابووم، دەموویست بڵێم، ئەو ئیمتیازات و جیاوازى و نا دادپەروەرییەى لە هەرێمى كوردستاندا بەدى دەكرێت، هەمووى لەبەرەنجامى دەنگى خەڵكە رەشوروتەكەى ئەم هەرێمەوە پێى گەیشتون كەبەشێوەیەكى نەشارەزایانەو بە ناهۆشیارانە لەهەڵبژاردنەكاندا دەنگ دەدەن بە لایەنە سیاسییەكان، ئەوانیش لەگەڵ بەجێگەیاندنى ئەوئەركانەى هەردەبێت بیكەن، زیاتر لە خەڵكى ئاسایى سودمەند بوون، لەڕێگەى ئەو پلەو پۆستانەى بەدەنگى خەڵكى بەدەستیان هێناوە، بەئاشكراو زۆرجاریش بەنهێنى داواى زیادكردنى ئیمتیازات و پارەیان كردوە.
ئەم بێ هەڵوێستیە، من و هەزارانى وەك منیان گەیاندۆتە نائومێدى، بەجۆرێك گەیشتمە ئەو باوەرەى پێویستە وەك دەنگێكى نارازى و گێرانەوەى ماف بۆ خەڵكى و وەك هەستكردن بەبەرپرسیارێتى لەڕێگایەكى نوێوو مەدنیانەوە، مانگرتن لەدەنگدان ڕابگەیەنم و لە ڕێگەى ئەم نووسینەوە داوا لەهەموو خەڵكى بكەم لەمەودوا بایكۆتى هەڵبژاردنەكان بكەن و دەنگ نەدەن بە هیچ لایەنێك بە ئۆپۆزسیۆنیشەوە، هەتا ئەوكاتەى هەموو لایەنەكان بەرلە هەمووشتێك و پێش هەڵبژاردنەكان، بە بڕیارێك كۆتایى بەم هەموو نا عەدالەتى و جیاوازییەى كەتائێستا هەبووە دەهێنن.
لەساتەوەختى نووسینى ئەم بابەتەدا بووم، ئەو نامەیەم بەرگوێكەوت كە ڕێخەرى گشتى بزوتنەوەى گۆڕان ئاراستەى فراكسیۆنەكەى خۆیانیكرد سەبارەت بە داواى تاپۆكردنى شوقەكانى پەرلەمان و گەلێك خاڵى تر، ئەم نامەیە شتێك هیواى گێرایەوە، بەڵام ئەمەش هەر واى لینەكردم پاشگەز ببمەوە لە نووسینى بابەتەكەم.
چونكە ئەو جیاوازیى و ناعەدالەتییە زۆرەى بەم رۆژگارە وەك دەنگدەرێك دەیبینم، پێم وایە بێدەنگبوون لێى نزمترین ئاستى هۆشیارییە.
مەبستم لە "من" تاكى دەنگدەرى كوردە، نەك بەتەنها زاتى خۆم، كارەكتەرەكانى ناو ئەم نووسینەش هەموو ئەوانەن كەوەك من لەناو ئەم جیاوازیە ژیان بەسەر دەبەن.

هیچ عەقلانییەتێك لەوەدانابینم كە "من" دەنگ بدەم بە "تۆ"، بەڵام تۆش بەدەنگى من هایلایڤ بژیت، سەرە راى ئەمەش بەخۆشگوزارنییەكەت، ئاگر لەبازار بەربدەیت بەشێوەیەك نەتوانم دەستى بۆ بەرم و بەژیانێكى ئاساى ژیان بگوزەرێنم.
"من" كە لەگەڵ "تۆ"دا دەچمە سۆپەرماركێتێك، كە دڵنیام ئەویش بەپارەى گشتى "من" دروستكراوە یان بەلایەنى كەمەوە بەشێكى ئێوەى تێدایە، من تەنها لە نهۆمى خۆاردەمەنیەكاندا ئەوەندە شتبكڕم كە پێویست بەسەلەیەكیش نەكات بگرم بەدەستمەوە، بەڵام "تۆ" لەسۆپەرماركێتێكى گرانتر پێداویستیەكانت لە هەرچوار نهۆمەكەى بكڕیت، بەشێوەیەك نەك یەك عەرەبانە بگرە چەند عەرەبانەیك وەك شەمندەنەفەر بەدواى خۆتا رابكێشیت و بخەیتە سندوقى سەیارەى خۆت و خێزانەكەتەوە.
ئەوە مێگەلى پێدەوتریت بەناوى خۆشیەكانى بەهەشتەوە "من" لەخانووى كرێدا بژیم و بە فەلاكەت ئەگەر بشتوانم كرێكەى بدەم.. بەڵام "تۆ"ى پلە باڵا و ئەندام پەرلەمان لە دوو خانودا ژیانێكى فرعەونیانە بژیت كەنرخى تەنها یەك ڤێلایان 30 دەفتەر دۆلارە. من تەنها یەك هۆدەم دەستنەكەوێت، بەڵام تۆ چەندان هۆدە بەبەتاڵى و سادو سڕ بەجێبهێڵى تا ئەو كاتەى دەشمریت لەوانەیە رێت نەكەوێت هەندێك لەو هۆدە بەتاڵانەوە.
ئەمە كوێى بۆخوایە "من"ێكى گەنجى بێكارى دەرچووى زانكۆ، نەتوانم بژێوى رۆژانەم پەیدابكەم و هاوكارى باوكم بكەم كە تواناى كاركردنى نەماوە، بەڵام كورەكەى "تۆ" لە زانكۆى ئەهلى و لە وڵاتانى ئەوروپاو ئەمەریكا خوێندن تەواو بكات.
"من"ێك كە توانام نییە خەرجى تەنها یەك ژن هینان پەیدا بكەم، نەك بەخێوكردنیشى، بەڵام "تۆ" كە خوا لێت رازى بووە، لەتواناتدابێت دوو ژن بهێنیت و خەرجى ژیانێكى پڕلە رەفاهییەتى دوو ماڵ و منداڵ لە ئەستۆبگرى.
ژیرێتى كەى لەوەدایە "من"ێك خزمەتى چەندین ساڵەم لە حزبێكدا كە"تۆ"ش وەك من ئەندامبیت تیایا موچەكەم ببڕیى، بەڵام "تۆ" بەدەنگى من تاقامى قیامەت مووچەى خانەنشینى ئەندام پەرلەمانى بۆ خۆت و حەوت پشتیشت ببڕیتەوە؟
ئەبێت ئەو "من"ە دڵى بەكوێى ئەم دەنگدانە خۆشبێت كە بەراكێشانى ژیانێكى كولەمەرگى سەیارەیەك بە قەرزوو قۆڵە بكرێت، لەكاتێكدا "تۆ"ى دەنگ پێدراو نەك سەیارە بۆخۆت بەڵكو بۆ خێزان و كورەكانیشت بەپارەى حازرى بكرى.
من ێك كە بەهۆى قەرزوو سلفەى خانوو یان چەند پێداویستیەكى ناوماڵ لەو مووچەكەمەى وەریدەگرم تەنها "150" هەزار دینارم بۆ بمێنێتەوە تاكوو لەم سەردەمەى گرانییەدا خەرجى مانگى دووروو درێژى پێ بەڕێبكەم، برواناكەم بتەوێت هەرگیز بیر لەوە بكەیتەوە كەدەبێت ئەو كەسە لەم سەردەمى مۆدێرنەدا لەژێر چ پاڵپەستۆیەكى دەرونیدا ژیان بەسەر بەرێت، بەڵام لەلایەكیترەوە هاورێباز و هاوشانەكەم لەحزبدا كەبەدەنگى من چۆتە پلەو پۆستێكى حكومییەوە تازە بەدۆنم زەوى دەكرێت لە ناوچە گەشتیاریەكاندا بۆ دروستكردنى ڤێلاو باخ، تا لەبەهاراندا بیكاتە هاوینەهەوار و لەكاتى پشوە مانگانەییەكانیدا تیایدا بحەوێتەوە.
قبوڵكردنى ئەم دۆخە ناداد پەروەرانەیە لە موچەى پلە باڵاكان و فەرمانبەرانى ئاسایدا لە ئێستاو لە داهاتوشدا بەتایبەت لەلایەن لایەنەكانى ئۆپۆزسیۆنەوە گەورەترین خاڵى ڕەشە بەناوچەوانى پرۆسەى حوكمرانى و سیستمى فەرمانڕەوایەتییەوە، كەپێویستە كەسە زیندو بەئاگاكانى كۆمەڵگا لەڕێگەى نارەزایەتیەكى مەدەنیانە و بە بایكۆتكردنى دەنگدان، ئەم خاڵە رەشە بكوژێنەوە و كۆى سیستمە سیاسیەكە لەم قەیرانە قوڵە بەئاگابێننەوە.
چونكە پێدەچێت سیستمەكە لە گوێى گادا خەوتبێت و لەبەر خۆشى خەون و خەیاڵەكانى، بەنیازنەبێت بەم زوانە بەخەبەربێتەوە.
هەر ئەمەشە وایكردوە رۆژانە گوێبیستى چەندین خەڵكى نارازى ببین كە دەڵێن، پەنجەى خۆمان دەبڕینەوە جاریكیتر بیكەین بەمرەكەبى دەنگدانادا، هاوشێوەى ئەم وتەیە زۆرە كە ڕۆژانە بەرگوێمان دەكەوێت، ئەمە حاڵى رۆژانەى ئەو چینە زۆرەى خەڵكییە كەبێدەرەتانن و رۆژ بەرۆژ گرانى بازار كەرامەتیان لێدەسەنێتەوە و ئەیدا بەدەم باى باڵى فرۆكەى گەشتەكانى بەرپرسانى بەناو هەڵبژێردراوى وڵاتەكەمەوە.
لە كۆتایدا گەیشتمە ئەوەى " تا ئاستى هۆشیارى خەڵكى زیاد بێت، رێگەو شێوازى فریودان نوێش دێتە ئاراوە بۆ بەمێگەل كردنى كۆمەڵگا" چونكە ئەگەر بەراوردێك بكەین لە نیوان ئەم سەردەمەو سەردەمى دەرەبەگ و ئاغاكانى جاراندا لە روى ناوەرۆكەوە، من وەك خۆم هیچ جیاوازیك بەدى ناكەم.
لەبەر ئەوەى خەڵكى ئەوسەردەمەش وەك ئێستا بەدەستى خۆى بەرى رەنج و ماندوبوونى هەموو ژیانى دەكردە تورەكەى هەڵبژاردنى ئاغاو دەرەبەگەكانەوە، بەبێ ئەوەى بپرسێت بۆ؟ دەرەبەگانى ئەوكاتەش بەمنەت و لە پیاوەتى خۆیان هەندێكیان پێدەدانەوە تاكو پێى بژین، ئەمەش لە پێناو ئەوەى بتوانێت بەردەوامبیت لە بەرهەم هێنان، ئێستاش هەر ئەو خەڵكە لەڕیگەى سندوقەكانى دەنگدانەوە هەرچى خیرو بێرو رەنجى خۆى هەیە، دەیبەخشێتە ئاغاو دەرەبەگەكانى ئەم سەردەمەو ئەوانیش بەمنەت و خێرى خۆیان هێندەى ژیانێكى مەمرەو مەژیان پێدەدەنەوە، ئەمەش تەنها لەپێناوى ئەوەى ببنە قەڵغانێك بۆ پاراستنى بەرژەوەندیەكانى خۆیان، نەك لەبەر خاتر بەرژەوەندیەكانى ئەو خەڵكە كەمدەرامەتە.