(نا بۆسوكایەتی بەكورد و رۆژنامەنوسە ئازاكانی) بۆ فازڵ نەجیب !

Saturday, 17/07/2010, 12:00

فازڵ نەجیبی كۆنە یەكگرتوو و پارتی و تازە گۆڕان، لەرۆژنامە روو زەردەكەی پاراستن (رووداو) لەرۆژی 12-7 وتارێكی نوسیوە بەناونیشانی (رۆژنامەنوسانی كورد لەهەمووی سەقەتترن) سوكایەتییەكی زۆری كردووە بە رۆژنامەنوسان و تەنانەت كار گەشتۆتە ئەوەی سوكایەتی بە هەموو كورد بكات و بەو پەڕی بی شەرمی بنوسێت (ئەم كوردی عیراقە كە كبریا و خۆبەزلزانینیان هێندەی هەموو خەڵكی هندستان دەبێت لەكاتێكا وەك گۆران محمد دەڵێت ئەوەندە بێ بەهرەن تەنانەت ناتوانن مەسینەیەكیش دروستبكەن خۆیانی پێ پاكبكەنەوە).
من هەرگیز شتی ئەم رۆژنامەنوسە سەقەتە ناخوێنمەوە ، چونكە ساڵانێك بەر لەئێستا كە خوێندكاری زانكۆ بوم لەهەولێر دەمناسی و دەزانم چ مەعدەنێكە، ساڵانی هەولێر كە زۆر نەبوو پارتی دەبابەكانی بەعسی هێنابویەوە ئەم كەڵە رۆژنامەنوسە لەهەولێر دەیخوێند، جار هەرچی كەسێك ئەو ساڵانە خوێندكار نەبوبێت نازانێت زوڵم و زۆر پارتی چۆن بوە، چۆن چۆنی قوتابییەكانیان بەعس ئاسا لەكۆلیژو پەیمانگاكاندا چاویان لە خوێندكارە بێ لایەن و لایەندارەكانی دیكە سوردەكردەوە و راپۆرتی دورودرێژیان لەسەر دەنوسین.
بەڵام ئەو رۆژە ویستم بزانم پاراستن چی لەسەر لڤین دەڵێت وتاری ئەم كەڵە رۆژنامەنوسەم بینی و پاش خوێندنەوەی بەزەیم بە عەقڵی گۆڕان و كەی ئێن ئێن دا هات كە مرۆڤی وەها بەرنامەی تیادا پێش كەشدەكات و بانگەوازی گۆڕانخوازی دەكات.
ئەو ساڵانەی هەولێر كە فازڵ لەرۆژنامەی برایەتی پارتی كاری دەكرد و خۆشی بە ئیسلامی دەزانی ئێمەی دژە پارتی و ناڕەزا لەدۆخی دوای 31ی ئاب لەزانكۆ
گیرفانەكانمان خاڵی بوو لە دینارێك كەچی ئەم برا دیندارە پارەی مفتی پارتی و یەكگرتوی قوتابیانی دەخستە گیرفانییەوە و لەبەشە ناوخۆییەكاندا پۆزی لێدەدا، ئەوەتا دوای ئەو هەموو ساڵە خۆی بەزمانی خۆی دانی پێدا دەنێت و دەنوسێت :(خوێندكاری زانكۆی سەلاحەدین بوم و هاوكات بەرپرسی لاپەڕەی لاوان بوم لەرۆژنامەی(برایەتی) كە ئێستا ناوی (خەبات)ە و ئۆرگانی رەسمی پارتی یە، بانگهێشتكرامەوە بۆ سلێمانی بۆ دەركردنی گۆڤارێكی گەنجانە ...بریارماندا كەگۆڤارێك بەناوی لڤین دەربكەین و لەگەڵ یەكەم ژمارەیدا من دەستەی نوسەرانی بوم، ئەو كات گۆڤارەكە سەر بەسەنتەری گەشەپێدانی چالاكی لاوان بوو(یەگرتوو) كە بەرێز مام جەلال لەسەرەتاوە برێك كۆمەكی كردبوو، بەڵام لەلایەن یەكگرتوی ئیسلامییە بەرێوەدەبرا).
ئەم خوێندكارەی رۆژنامەكانی پاراستن زۆر بێ شەرمانە لە نوسینەكەیدا دەیەوێت ئەوەمان بە شانازی پێبفرۆشێتەوە كە رۆژانێك لە رۆژنامەی (میدیا) كاری كردووە و دەستەی نوسەرانی بوە تیراژی ئەم رۆژنامە سوكەی بەرزكردۆتەوە وەك ئەوەی خوێنەران و خەڵكی گێل بن نەزانن (میدیا) سەر بەچی حزبێكی كارتۆنی پارتی بووە و (غەفور مەخموری) سەرۆكی نەبوبێت.
بەدرێژایی تەمەنی ئەم رۆژنامە كاری لەسەر ناوچەكانی سلێمانی كردووە ولەساڵانی شەڕی ناوخۆشدا لایەنگری پارتی بووە، بەر لەرووداو ئەم رۆژنامەیە (میدیا) زمانحاڵی پاراستن بوە، بەڵام لەگەڵ روخانی سەدام و هاتنی زەمەنێكی نوێ پاراستن پێویستی بە ناوێكی تازە و رۆژنامەیەكی تازەبوو هەربۆیە (ئاكۆ محمد)یان راسپارد و روداوییان دەركرد.
فازڵی كەڵە رۆژنامەنوس بەردەوام دەبێت و دەنوسێـت (ئەم كوردە بەهیچ نابێت، چون
(نكە تا ئێستا تێَنەگەشتوە كە هیچ سەرنوسەر و رۆژنامەنوسێك ئازاد نیە لەوەی بە ئارەزووی خۆی پەلاماری ئەم وئەو بدات وهیچ حسابێك بۆ ئەوە نەكات كە هاوڵاتیان خاوەنی ئەو داوودەزگایەن).
خوێنەری خۆشەویست نازانم تۆ كە ئەو رستەیە دەخوێنیتەوە بەزەییت بەحاڵی كاك فازڵدا نایەتەوە، ئاخر من تێناگەم كورد چی پەیوەندییەكی بە سەرنوسەر و رۆژنامەنوسەوە هەیە كە ئازاد نیە بە ئارەزویی خۆی پەلاماری ئەم و ئەو بدات، ئەی ئەوەنیە هەر هاوڵاتیان (كورد) خۆیان خاوەنی ئەو داوو دەزگایەن (نەیزانیوە بنوسێت دام و دەزگا).من تێنەگەشتم خۆزگە ئەگەر كەسێك لە ئێوە لەم رستەیە تێدەگات ئیمێڵێكم بۆ بكات .
بەرێز كاك فازڵَ لە وتارەكەیدا باس لەوەدەكات كە ئەو لەسەرەتاكانی كۆمپانیای وشەدا دەستی هەبووە و دەیەوێت واى خۆی نیشانبدات كە دوای نەوشیراون مستەفا ئەم خۆیەتی، من نازانم ئەم برادەرە چییە و مەوقعی ئیعرابی چیە لەناو گۆڕاندا، بەڵام ئەوەدەزانم كەهەرچی كەسێك پارەیەكی باشتر و چەورتری بداتێ دەبێتە پیاوی و بەشان و باڵایدا هەڵدەدات ، ئەی ئەوەنیە ساڵانێكە پارەی پارتی و یەكگرتو دەخوات تاوەكو ئێستاش خۆی بەهاوڕێیان دەزانێ و دەیەوێت پێمان بڵێت لڤین درۆدەكات روداو پاراستن ئاراستەی ناكات.
من حەزناكەم زۆرتر كاتی خۆم بەم رۆژنامەنوسە سەقەتە بەفیرۆ بدەم ، بەڵام حەزەكەم رۆژنامەنوسان و نوسەرانی كورد دوای خوێندنەوەی نوسینەكەی ناوبراو بێدەنگ نەبن و ئەم رۆژنامەنوسەی پاراستن سوك و ریسوا بكەن.
سەنا سۆما
[email protected]


بفەرمون بۆ خوێندنەوە ی وتارەكەی (فازڵ نەجیب) كە لەرووداو نێت وەرگیراوە:
2-07-20101
رۆژنامەنووسانی كورد لە هەمووان سەقەترن
فازڵ نەجیب..


وابزانم مەولانا خالیدی نەقشبەندییە كە فەرموویەتی"ئەی تریفەی مانگەشەوی بەر دەركی دەلاقە..با پیس نەبیت، خۆت مەدە لەو كوردی عێراقە"، ئەم كوردی عێراقە كە كبریا و خۆبەزلزانییان هێندەی هەموو خەڵكی هندستان دەبێت، لەكاتێكدا وەك گۆران محەممەد دەڵێت، ئەوەندە بێ بەهرەن، تەنانەت ناتوانن مەسینەیەكیش دروستبكەن خۆیانی پێ پاك بكەنەوە.
چەند هەفتەیەكە شەڕێكی ناڕەوا بەردەرگای میدیای"كوردی ئەم عێراقە"ی گرتووە، كە میدیاكەمان بە ئاوێنەی راستەقینەی عەقڵ و ویژدانی نەخۆشی ئەم میللەتەی دەزانم كە خۆیشم بەشێكم لێی.
ئالێرەدا باسی تەنها ئەو شوێنانە دەكەم كە خۆم بەشێكبووم لێی و ئاگاداری وردەكارییەكانیم هەم وەك دەروازەیەك بۆ ئەنجامگیریەك.
*كاتی خۆی كە بوومە دەستەی نووسەرانی رۆژنامەی میدیا و پەیامنێری لە سلێمانی، دوو هەفتە جارێك چاپدەكرا و چەند سەت دانەیەكی لێدەفرۆشرا، لەگەڵ سەرنووسەر بە هاوكاری تەواوی ستافەكە، تیراژی ئەو رۆژنانە حیزبیەمان گەیاندە 8000 دانە، رۆژنامەی میدیا تەنها بڵاوكراوەیەك بوو كە لە هەولێر چاپدەكراو لەسلێمانی خوێنەری زۆر و بەردەوامی هەبوو. هەر ئەوكات نەك سەد جار، هەزار جار پێم دەوترا بۆچی لە رۆژنامەی "دەزگای پاراستنی پارتی" ئیش دەكەی. دەمزانی (میدیا) پارە لە حكومەت وەردەگرێ، حكومەت هی پارتی بوو، ئەو رۆژنامە نەیدەتوانی دژایەتی پارتی بكات، هەر ئەو كارەشی نەدەكردو..هتد، بەڵام لەو كاتەوەی من چوومە ئەو رۆژنامەیە، رۆژێك لەڕۆژان لەلایەن پاراستنەوە ئاراستە نەكراوە ئەگەرچی خەڵكانێكی گومانلێكراو لەو دەوروبەرە هەبوون. هاتنی رۆژنامەیەكی باش لە هەولێرەوە بۆ سلێمانی كە خەڵكی حەز لە خوێندنەوەی بكات، هەر ئەو "تاوان"ە بەسە بۆ ئەوەی باز هەڵدرێت بەسەر نێوەڕۆك و بابەتەكانی رۆژنامەكە و هیچ خوێندنەوەیەكیان بۆ نەكەی و بە ئاسانی ناوبنرێت "رۆژنامەی دەزگای پاراستن".
*خوێندكاری زانكۆی سەلاحەدین بووم و هاوكات بەرپرسی لاپەڕەی"لاوان" بووم لە رۆژنامەی (برایەتی) كە ئێستا ناوی (خەبات)ە و ئۆرگانی رەسمی پارتییە، بانگهێشتكرامەوە بۆ سلێمانی بۆ دەركردنی گۆڤارێكی گەنجانە كە بایەخ بە ژیانی مەدەنی و رۆشنبیری و سیاسی گەنج بدات. ئەوكات بڕیارماندا كە گۆڤارێك بەناوی (لڤین) دەربكەین و لەگەڵ یەكەم ژمارەیدا من دەستەی نووسەرانی بووم. ئەوكات گۆڤارەكە سەر بە سەنتەری گەشەپێدانی چالاكی لاوان بوو كە بەڕێز مام جەلال لە سەرەتاوە بڕێك كۆمەكی كردبوو، بەڵام لەلایەن یەكگرتووی ئیسلامییەوە بەڕێوەدەبرا. من ئەوكات تازە بەتازە وازم لە كاری حیزبایەتی هێنابوو، بەڵام ئەوساو ئێستاش، دۆست و هاوڕێی یەكگرتووەكان بووم.
ئەو گۆڤارە رۆژێك لە رۆژان لەلایەن یەكگرتووی ئیسلامییەوە هێڵی گشتی بۆ دانەنراوەو ئەوەی بەڕێوەی دەبرد ئەو گەنجانە بوون كە ئێستاشی لەسەربێت، ئەمبەر و ئەوبەری فكری و سیاسیان(نەك حیزبی) نەكردووەو رۆژێك لە رۆژان زوڕناژەنی هیچ لایەنێك نەبوون بە یەكگرتووی ئیسلامیشەوە، بەڵام لەگەڵ ئەوەشدا هەریەك لە ئەندامانی ستافی ئەو گۆڤارە جگە لە پاداشتی كارەكانیان، مانگانەیەكی 20$ هەبوو كە راستەوخۆ لە مەڵبەندی یەكگرتووی ئیسلامییەوە بۆمان دەهات . دوای ئەوەی كە ئێمە وازمان هێنا، ئەو گۆڤارە كەوتە بڵاوكردنەوەی زۆر شت"رەوایە یان ناڕەوا، ئەوە پەیوەندی بە منەوە نییە و ئەو هەڵسەنگاندنە ناكەم"، خوێنەرێكی زۆری بۆخۆی پەیدا دەكرد و چەند جارێك ستافی گۆڤارەكە تووشی ئینشیقاق دەبوون و لە دواجاردا هەر بەڕێزان خاوەنی ئیمتیاز كە سەرنووسەرە لەگەڵ جێگرەكەی دەمانەوە. من چەند دووربم لەو گۆڤارە، بەڵام ئەوەندە دەزانم كە ئاراستەكردنی لڤین، دوور و نزیك پەیوەندی بە یەكگرتووی ئیسلامییەوە نییە، بەڵام ئەوە شتێكی حاشا هەڵنەگرە كە سوودمەندی یەكەم لە (لڤین) تا بەرواری پێش دەركەوتنی گۆڕان، هەر یەكگرتووی ئیسلامیی بووە، چونكە ئەوان واجیهەی موعارەزە بوون لە كوردستاندا. وەك چۆن ئێستا كارەكانی هەر یەك لە هاوڵاتی و ئاوێنە بە قازانجی لایەنی موعارەزەیە و لەگەڵ ئەوەشدا ئەوان بۆ خۆیان خاوەنی بڕیار و ئاراستەی خۆیانن.
*لە كۆتایی مانگی 11ی ساڵی 2006 كە بۆ یەكەمجار كۆبوونەوەمان لە ماڵی بەڕێز نەوشیروان مستەفا ئەنجامدا بۆ ئیشكردن لە كۆمپانیای وشە، تائێستاشی لەسەربێت، هەمیشە رۆڵی "نووكی رم"م بۆ خۆم هەڵبژاردووە، ئەویش لەبەرئەوەی بڕوای تەواوم بە فكرەی مەشروعەكە و داخوازییەكانی هەیە. سەرەڕای ئەوەش هیچ كات لە مەركەزی بڕیاردانی كۆمپانیای وشەوە دوور نەبووم و لەبەشی زۆری بڕیارەكانیش بە حەجم و ئاستی بەرپرسیارێتیم، بەشدار بووم. من تائێستاش لەناو كۆمپانیای وشەدام بەئاگاداربوون لە هێڵی گشتی كاركردن و موعانات و كەموكورتییەكانیشیەوە. ئەوەی لە ماوەی رابردوودا بەو دەزگایە وتراوەو ئەو تۆمەتانەی بۆی هەڵدەبەستران بەتایبەت لەلایەن رۆژنامەنووسانی نزیك لە پارتی و یەكێتی، ئەوەندە دوور بوون لە راستییەوە كە مرۆڤ حەز ناكات بیشوبهێنێ بە شتێك كە زەوقی خوێنەر تێكبدات.
*چەند مانگێك پێش ئەوەی ستافی رۆژنامەی میدیا وازبهێنن و كۆمپانیای رووداو، دابمەزرێنن، ئاگاداری وردو درشتی هەموو هەنگاوەكان و ئاراستەی كاركردن و پێكهێنانی ستاف و مووچەو پەیوەندییە سیاسیەكان بووم. ئەگەر دەستەی نووسەرانیان نیگەران نەبن، لەوەیە زیاتر لەوان ئاگادار بم ئەویش بە حوكمی پەیوەندی نێوان من و ئاكۆ محەممەد و سەلام سەعدی و رێبوار كەریم، جگە لەوەش هەمیشە رۆژنامەكەم خوێندووەتەوەو بۆ هەموو ژمارەیەك ئەگەر زیاتر لە یەكێك لە ستافەكان قسەم لەسەر نەكردبێت، كەمتر نەبووە "ئەمە وەك بەشێك لە دۆستایەتی،چونكە من تەنها لە كۆمپانیای وشە مووچە وەردەگرم".
ئێستا
*(لڤین) و (رووداو) كەوتوونەتە تەقەكردن لە یەكتری.
*چەند جارێك پەلاماری كەناڵی KNN دراوەو سووكایەتی بە لۆگۆكەی كراوە ئەوە لەكاتێكدایە كە ئێستا شوێنی كاركردنی من لە كۆمپانیای وشەیە.
*شەڕێكی دۆڕاو بەناوی حیزبی بوون و حیزبی نەبوون كەوتووەتە نێوان رۆژنامەنووسانی كوردستان و دەسەڵاتیش وەك مەلای مەشهور لە پێینەوە بە نەخوێنەكەی كردووەتەوە تا بزانێت كێ دەیدۆڕێنێت.
* خودی رۆژنامەنووسان جەهل و غەدرێكی گەورەیان بەرپاكردووە لە بەخشینەوەی تۆمەت و ناسنامە بەمیدیاكان و هەر رۆژەو ناو و ناتۆرەیەكیان دەخرێتە پاڵ بەتایبەت ئەو میدیایانەی خەڵكی دەیانخوێنێتەوە وەك : هاوڵاتی، ئاوێنە، لڤین، رووداو. بۆ نموونە ئەم رۆژنامەی رووداوەی كە ئەم وتارەی منی تێدا بڵاوكراوەتەوە، لە سلێمانی و لەنێو هەندێك حیزب و رێكخستندا بە رۆژنامەی رەسمی دەزگای پاراستن وەسفدەكرێت و كاتێك كە دەبینن رۆژنامەكە جوان و باشە، دەڵێن بەخوا پاراستن بەقوەتە لەدەركردنی رۆژنامەدا كە دڵنیام بەشی هەرە زۆری ئەو شەڕە، شەڕفرۆشتنە بە باشی رۆژنامەكە.
غەدرە گەورەكە:
كوردی ئەم عێراقە وەك چۆن خاوەنی داهێنانی بەسوودی گەورە نییە بەتایبەت لە دوای 1991، لە بواری مامەڵەكردن لەگەڵ دامەزراوەو بەرپرسیارێتی گشتیشدا كڵۆڵ و ویژدان بیمارن. نمونەی ئەو شتانەی لە دوو هەفتەی رابردوودا بینیمان بەڵگەی حاشاهەڵنەگرن.
ئەگەر خوێنەری ئێمە دیقەت بدات، هەموو ئەو رۆژنامەنووسانەی كەوتنە بەرەكانی ئەم شەڕە دۆڕاوەوە، بە نەفەسی حیزبییە شەڕكەرە كوردفرۆشەكان قسەیان كرد، كەسێكت دەستنەكەوت بە نەفەسێكی مەدەنی و هەست بە بەرپرسیارێتییەوە قسە بكات و راستی شتەكان ئاشكرا بكات. هەموو رۆژنامەنووسەكان وەك چەك بەشانەكانی شەڕی ناوخۆ، هەوڵی كوشتنی بەرامبەر و فەرهوودكردنی ئیعتباری مەعنەوی دەزگای بەرامبەریان دا. هەموو رۆژنامەنووسە شەڕكەرەكان بیریان چووەوە كە ئیشی ئەوان نییە شەڕی یەكتری بكەن، بەڵكو ئیشی ئەوانە چاودێری حكومەت و داوودەزگاكان بكەن، نەك وەك ئەوەی لەم یەك دوو مانگەدا بینیمان كە بەپرسانی حكومەت و حیزب بە كۆمەڵێك زانیاری كە جێی گۆمانن، چۆن ئەو كارە گرنگە دەكەن كە خۆیان بە ملیۆنان دۆلار ناتوانن ئەنجامی بدەن.
لە ماوەی رابردوودا بینیمان كە كارمەندەكانی ئێمەش لە كەناڵی KNN كە لەسەر ئەساسی شەخسیبوون كێشە دەكەوتە نێوانیان و كەچی لەدواجاردا لەلایەن هەندێ داوودەزگاوە هەوڵی شكاندنی سومعەو ئیعتباری كەناڵەكە دەدرا.
ئەم كوردە بەهیچ نابێت، چونكە هەمووی خەریكی شەڕی بەوەكالەتە. ئازایە لە بەخشینەوەی تۆمەتی بێ بنەما. شەڕی ئەوەت پێ دەفرۆشن كە تۆ باشیت و دەتوانی ئیشی باش بكەی. خۆی حیزبییە و پێی عەیب نییە، كەچی حیزبی بوونی تۆ بە عەیب دەزانێت. ئەم كوردە بەهیچ نابێت، چونكە تائێستا تێنەگەیشتووە كە هیچ سەرنووسەر و رۆژنامەنووسێك ئازاد نییە لەوەی بە ئارەزووی خۆی پەلاماری ئەم و ئەو بدات و هیچ حسابێك بۆ ئەوە نەكات كە هاووڵاتیان خاوەنی ئەو داوودەزگایانەن.
لەم كوردستانە بەدەگمەن رۆژنامەنووسێك دەبینی كە لەسەر سیاسەتی هەڵەی دەزگاكەی، یان پێكهاتەی سەقەتی ئیداری وازبێنێت، بەڵكو هەمووی لەسەر ئەساسی بوغزاندنی یەكتری و ملشكاندن و چاڵ هەڵكەندن و ئیستغلالكردنی دەزگاكان بۆ هەواو هەوەسی تاكەكەسە. ئەوەش دەلیلی ئەوەیە كە كورد داوودەزگاو عەقڵی دامەزراندنی داوودەزگای نییەو ئیشەكانیش لەسەر ئەساسی كەڵەگایی بەڕێوەدەڕۆن، لە بازاڕی كەڵەگاشدا هەمیشە مانەوە بۆ بەقوەتەكانە و لاوازەكانیش دەبنە قوربانی.