عێراق، لە خراپەوە بەرەو خراپتر...!

Friday, 13/01/2012, 12:00

بارودۆخی ئاڵۆزو قەیراناوی ئەمڕۆی عیراق، ئاکامێکی سروشتیی و چاوەڕوانکراوی ئەو دیرۆکە سیاسیە ساختەو ناسروشتیەی ئەم وڵاتەیە کە هەر لە سەرەتای درووستبوونییەوە تا ئەمڕۆ بەردەوامە. و عیراق کە هەر لە بناغەوە بە پێی پلان و بەرژەوەندی وڵاتانی زلهێزو کۆڵۆنیالیست پێکهات و بەدرێژایی دیرۆکی سیاسیی و کۆمەڵایەتی پڕلە ناکۆکی خۆی جێگایەک بۆ پێکهاتەی جیاوازو فرەیی مەزهەبی و ئەتنیکی دانەنرا، ئەمڕۆ باجە قورس و خوێناویەکەی دەدرێت.
ئەوەی ئەمڕۆ ڕوودەدات، ململانێ و کێشمەکێشی سەختی سیاسییە لە پێناوی بەدەستخستنی باڵادەستی و بچووککردنەوە و تەنانەت سڕینەوەی هەر لایەنێکی غەیرەخودی بەمەبەستی هەرچی زامنترکردنی داهاتوو، و زیندووکردنەوەی ئایدیۆلۆژیای فراوانخوازی و ئەو ئەفسانەو خەونە لەدەستچووانەی بەدرێژایی نزیک سەدەیەک مرۆڤی ئەم سەرزەمینەو تەواوی ڕۆژهەڵاتی ناوەڕاستی پێ پەروەردە دەکرێت. ئەفسانەیەک کەڕەوایی ژیان و شایستەیی دەسەڵاتداربوون تەنیا بەمن دەبەخشێت و ئەوی تری لێ بێ بەری دەکات. ئەفسانەیەک کە مافداری و چاکی و پاکی و زامنکردنی میهرو خۆشەویستی خوا، تەنیا لەخۆیدا دەبینێتەوەو مەودای نێوان خۆی و بەهەشت تەنیا بەهەنگاوێک دیاریی و تەواوی مرۆڤایەتیش ڕەوانەی دۆزەخ دەکات.
ئەم کێشەیەی ئەمڕۆش کە بەناوی کێشەی تاریق هاشمی سەرئاو کەوتووەو یەک دنیا کێشەی تری لەگەڵ خۆیدا سەرئاوخستووە، درکاندنی نیازە شاردراوەکانی چەندان ساڵەو سەرتای بەرنامەی کاری داهاتوویە..!
تاریق هاشمی بە پێی ئەزموونی بۆچوون و هەڵوێست و ڕەفتارەکانی ڕابردووی هەم خۆی و هەم زۆربەی هاوەڵانیشی لێیان دەوەشێتەوە دەستیان لەکاری پیلانگێری و تێرۆریستیدا هەبێت و پێشتر نموونەی ترمان لەم جۆرە لەبەرەی سووننەکاندا دیت. بەڵام سادەبینییە، هەرکەس پێی وابێ کێشەکە بەڕاستی لەسەر ئەوەیە داخوا تاریق هاشمی دەستی لە تێرۆردا هەیە یان نا..! و کێشەکەی لە دەزگای قەزاییدا یەکلا دەکرێتەوە. هەروا سادەبینییەکی لەڕادەبەدەرە هەرکەس پێێ وابێ دەکرێ لەعیراقدا دەزگایەکی قەزایی بێ لەیەن بوونی هەبێت.
ئەگەر قەزای عیراقی قەزایەکی بێلایەن و پیشەییە، ئەدی چما بەدوای ڕێبەرو ئەندامانی گروپە تێرۆریستییەکانی وەک گروپەکانی مەرگ (فرق الموت)، و (عێائب أهل الحق) ی سەر بە شیعەکان و تاوانبارانی تری سوپای مەهدیدا ناگەڕێت، کە بەسەدان و بەڵکو هەزاران خەڵکی گوناهبارو بێ گوناهیان تەنیا لەسەر ناسنامەی سوننی بوون ترۆرکردو بەهەزاران خانەوادەشیان دەربەدەرو بێ نان و جێگاوڕێگا کرد..؟
ئەوانە نەک تەنیا لەسەر کێشەی سیاسیی بەڵکو بەسەدان و هەزاران ژنیان لەسەر بێ حیجابی و سەدان و هەزاران پیاویان لەسەر مەشروبخۆری ترۆرو لەت وپەت کرد و لەبەر ئەوەی کێشەیەکی سیاسیی نەبوو، موویەکی لەجەستەی ڕێبەرانی شیعەو سووننەوو ئەو قازییە بەناو بێلایەن و پیشەییانە نەبزواند.
ئەدی مەگەر نەگوترا، بەفەرمانی موقتەداسەدر ئایەتوڵڵا خوئی ترۆرکرا، هەربەفەرمانی ئەو سەماحەتە پیرۆزو کۆڵەوارە گروپ گروپ لەگەنجان و پیرانی سووننە بەدەست وچاوبەستراوی ترۆرنەکران و فڕێدرانە ناو ئاوی دیجلەو فوراتەوە..؟ خۆئەو سەماحەتە چەندان داوای یاسایی لەسەر تۆمارکراوەو چما قەزای بێلایەنی عیراقی جورئەت ناکات تەنانەت پرسیارێکی شەرمێونانەی لێ بکات..؟
لەناو ئەم هەموو کێشمەکێشە ئاڵۆزو لەهەلومەرجێکی ئاوادا باس لەقەزایەکی بێلایەن و پیشەیی دەکرێت. جێگای سەرسووڕمانە..! دەزگایەکی وەک دەزگای قەزایی، یان هەردەزگاو دامەزراوەیەکی ناو سیستەمی دیموکراسی تەنیا کاتێک بێلایەن و پیشەیی دەبێت کە خەڵک پێی وابێت. دەنا لەواقیعدا ئەو دەزگایە وایە یان نا، هیچ گرنگ نییە. گرنگ متمانەو باوەڕی خەڵکە. کاتێک متمانەو باوەڕ بەیەکتر لەئارادا نەبێت، هەبوونی دەزگایەکی بێلایەن لە وەها کەش و هەوایەکدا مەحاڵە. ئەمە بەو واتایە نییە کە قازی و مرۆڤی پسپۆری بێلایەن و پیشەیی لەئارادا نین، نەخێر ئەم تاکانە گەلێکن بەڵام تاکێکی باش لەناو سیستەمێکی خراپدا هەمیشە بێ ڕۆڵ و تواوەیە. ولەمەگرنگتریش کێشەسیاسییەکانی ئەمڕۆی عێراق لە ئاستێکدان کە مرۆڤی یاساناس و دادوەرو قازی کە وەک هەر مرۆڤێکی تری ناوکۆمەڵگا، خاوەن ئینتیماو فکرو ئایدیۆلۆژیای خۆیەتی دەکەوێتە بەردەم هەڵبژاردنێکی سەخت. بۆ نموونە ئەگەر قازییەکی بێلایەنی کورد ناچار بێت لە نێوان بنپێکردنی یاساو بنپێکردنی چارەنووسی نەتەوەکەیدا یەکێکیان هەڵبژێرێت زۆربەئاسانی وبێ دوودڵی بنپێکردنی یاسا هەڵدەبژێرێت. و ئەگەر حاڵەتێکی پێچەوانەی ئەمە هەبێت ئەوە زۆرزۆر دەگمەنە. ونابێ چاوەڕوانییەکی تریشمان لەهەر قازییەکی تری سەر بە پێکهاتەکانی تری عێراق هەبێت.
لەهەموو ئەمانە بترازێت، کێشەو پرسی عیراق ئەوەنییە، داخوا خاوەنی دەزگایەکی قەزایی بێلایەنە یان نا، تا کێشەکان لەوێدا یەکلایی ببنەوە. بەڵکو کێشەکە گەلێک لەمە گەورەترو فراوانترە. و ئەمڕۆش دەستی پێ نەکردووە بەڵکو هەردوابەدوای ڕووخانی ڕژێمەکەی سەدام حوسێن کەوتەکار.
ئەوەی ئەمڕۆ شیعەو سوننە لەسەر یەکتر دەیڵێن نەک هەر ڕاستە بەڵکو کەمیشیان گووتووە.
سووننە هێشتا خەیاڵی وەرگرتنەوەی دەسەڵاتی لەدەستچووی، لە عیراقێکی یەکگرتوو کە بەشێک بێت لە نیشتمانی گەورەی عەرەب. و کوردیش لەوێدا برا بچووک و عەرەب براگەورەو شیعەش پەراوێزکراو، لەسەردا نەچۆتە دەرێ و بۆ بەدیهاتنی ئەم ئامانجە سووننیگەراو عروبییە باکێک نییە بەردو داری عیراق خوێن بیبات.
شیعەش کەتازە خەریکە تۆڵەی غەدری هەزاروچوارسەدساڵەی خۆی دەکاتەوە، بەدەستەوەگرتنی بەشێک لەدەسەڵاتی سیاسیی دڵی ڕێبەرانی پاراو ناکات و ناخوازێت شتێک خەون و ئەفسانەی فراوانخوازی و درێژبوونەوەی دەسەڵاتی حکومەتی حەزرەتی مەهدیان لێ بشێوێنێت.
سووننە و شیعە بەلای یەکترییەوە ئەو مێش و مەگەزانەن کە تەنیا دەبێ بە مێشکوژێکی پۆڵایین گروپ گروپ یەکتری پان کەنەوە. کەناڵە تەلەفزیۆنییە ئاینییەکانی سەر بەم دوو تایەفەیە شاهیدی ئەوەن کە چ کینەو دڵڕەشیەکیان لەسەر یەک خڕکردۆتەوەو چ پلان و پرۆژەیەکیان بۆ ئایندە لە مێشکدایە.
ئەگەر هەر بۆ نموونە سەیرێکی کەناڵی ئاسمانی (فدک) بکەین، دەبینین ڕۆژانە ٢٤ سەعاتە کێهە قسەی سوک و جنێو لە فەرهەنگی سووکایەتی پێکردندا هەیە بەکاری دەهێنن و عائشە بۆتە فاحیشەو ئەبوبەکرو عوسمان و عومەریش ئەو خائینانەن کە ڕۆژی سەدجار لەعنەتی خوایان بۆ دەچێت. و بانگهێشتی خەڵکی سووننە دەکەن کە عەقڵیان بەسەردا بێتەوەو بێنە سەر دینی خودا کە تەنیا شیعەی دوازدە ئیمامییە.. دەنا دۆزەخی دنیاو قیامەت چاوەڕوانییانە.
لەم ناوەدا کوردی بەزۆر عیراقی، لاقێک لەملاو ئەوی تر لەولا، و بە بەدوورکەوتنەوەی هەردوو بەرە لەیەکتر، وا خەریکە دوو لاقی لێکهەڵدەتڵیشێت. و ئەگەر فریا نەکەوێت و خۆی بەلای شیعەدا ساغ نەکاتەوە دەبێ چاوەڕوانی بڕینی بوجەو بەواتایەکی تریش بڕینی مووچەو نانی هاوڵاتیان بێت. کەواتە کورد یان دەبێت لەگەڵ شیعە بێت یانیش لەبرسان بمرێت. لەولاشەوە یان دەبێ لەگەڵ سووننە بێت یانیش خائین و نۆکەرو شایستەی کیمیاوی و مەرگ.
ئەمە هێشتا سەرەتایەو هەموو نیشانەکان دەری دەخەن کە ئایندەی ناوچەکە بەرەو ململانێیەکی توندی هەمەلایەنەی ساردوگەرم لە نێوان شیعەو سووننەدا دەچێت و سنوورەکانی ئەم ململانێیەش گەلێک لەعێراق فراوانترە. ئەمەش بۆخۆی بابەتێکە شرۆڤەو لێدوانی تایبەت دەخوازێت.
لەم ناوەدا ئایا هەلێک بۆ پێکەوە ژیان لەم وڵاتەدا ماوە..؟ ئایا عیراق جگە لە پارچەبوون. وبۆ ئێمەش جگە لە بوونی کورد بەدەوڵەت چارەیەکی تر هەیە..؟ ئایا ئیتر کاتی ئەمە نەهاتووە کورد بەرەو بەدەوڵەتبوون دەست بەکار بێت و هەموو توانایەکی مادی و مەعنەوی بخاتە کارو لەئاکامدا بیکاتە ئەمرێکی واقیع..؟ و ئایا جگە لەم ئامانجە هیچ شتێکی تر هەیە شایستەی ئەوە بێت دڵۆپێک خوێنی لە پێناودا بڕژێت..؟

[email protected]