ئایا ئەمجارەش براکان یوسف ئەخەنەوە چاڵ؟

کە لە ئیمامی عەلیان پرسی لە نێوان ئیماندارێکی ترسنۆک و بە غیرەتێکی بێدین کامیان هەڵدەبژێریت خێرا وتی بەغیرەتەکە، چونکە غیرەتەکەی بەر حوکمرانیەکەی ئێمە ئەکەوێت و بێدینیەکەشی بۆ خۆی، بەڵام ئەویان ترسنۆکیەکەی بۆ خەلافەتەو ئیمانەکەشی بۆ خۆی.

کاری پەرلەمانی و وەزیفەی پەرلەمانتاریی بۆ ئێستای کوردستان پێویستی بە غیرەت و جەسارەتە، نەک ترس و ئیمان و شەرم و خۆ بچوککردنەوە، ئەگەر غیرەتی دەرکردنی یاسات هەبوو پێشدەکەویت ئەگەر شەرمنیش بیت هەمیشە وەک دەوڵەتانی دواکەوتوو دەمێنیتەوە.

 پەرلەمانی کوردستان مێژوەکەی دەگەرێتەوە بۆ 19/5/1992، جەسارەت و غیرەتێک بوو پەرلەمانی دروستکرد، ئێستا خەریکە شەرم و ترس ئەیکوژێت، ئەوکات هەڵەو شکستی سەددام هاوکێشەی بە دڵی کورد گۆری، کوردەکان لە باشوری کوردستان و باکوری عێراق توانیان بۆ یەکەمجار یاساو تەشریع بکەنە ئەڵتەرتاتیڤی چەک و توندوتیژی و یاساکان دارێژن بە زمانی کوردی دوور لە یاسا کۆنەکانی عێراق و  یاسای کۆنی حەمورابی (1850 پ ز)

 بۆ کوردو نەیارانی بزوتنەوەی رزگاریخوازی کورد مایەی لەسەر وەستان بوو، کورد بتوانێت خۆی یاسا دارێژێت و بنەمای دەستوری چێ بکات، لێ ئێستا مایەی رەخنەو خەجاڵەتیە، چونکە بە درێژایی ئەو ماوەیە هێشتا ئەم دەزگایە نەبۆتە دەزگای یاسادانان و چاودێری و بەدواداچونی جددی، کورد توانستی نیە فەزای ئایدۆلۆژی و سیاسی حیزبی تێپەرێنێت و جیهانبینی خۆی بگۆرێ و قورسایی بخاتە سەر ئەم دەزگا گرنگە، بۆیە هەر بە وابەستەیی ماوەتەوە، دەزگایەکی لەم شێوەیە کە هەڵگری خەسڵەتەکانی دەوڵەت بوو هەرس نەدەکرا لەلایەن ئێران و تورکیاو وڵاتە عەرەبیەکانەوە، وەک دەستکەوتێک تەماشا دەکرا دەلاقەیەک بێت بەرووی دەوڵەتی کوردیدا، بەعسیش وەک ئیمتیدادی ناسیۆنالیزمێکی بان عەرەبی بەو ماشێنە جەنگی و ئابووریە زەبەلاح و ماکینە ئیعلامی و ئیستیخباراتیەی خۆی بەتەواوی هەوڵی ئەوەی ئەدا ئەم خەونە لەبار ببات، بۆیە شەری ناوخۆیان لە سەرەتای نەوەدەکان بۆ ئەم هەرێمە هەڵگیرساند تا رادەی ئەوەی ئەم پەرلەمانە لە رووی سیمبولیک و مەعنەویەوە هەڵبوەشێننەوەو خاڵی بکەنەوە لەهەر بەهایەکی یاسایی و دەستوری، تا رادەیەکیش کردیان و پەرلەمانیان بێ بەهاکرد لە ئاست پرسە چارەنوسسازەکانداو کوردیش خۆی کردی بە بەشێک لە کەلەپوری شەری ناوخۆ.

 پەرلەمان وەک ئەو تەلارەی کە ئێستا هەیە لە هەولێر، نزیکەی 650 کارمەندی کۆن و نوێی هەیە بە 60 راوێژکارو 101 پەرلەمانتارەوە، 36 ساڵ بەر لە ئێستا بەعس بۆ دەزگا کارتۆنیەکەی خۆی کە مەجلیسی تەشریعی و تەنفیزی شیمال بوو دروستی کرد کە چوار ساڵی خایاند، تەنانەت هەندێ کارمەندی ئەوکات تا ئێستاش بە فەرمانبەری ماونەتەوە، هەندێک دەڵێن کورد چۆن دەتوانێت یاسا دارێژێت لەناو بینایەکدا کە بەعس دروستی کردووە بۆ هەڵتەکاندنی کورد، ئایا دەکرێت ئەو هەموو بینا بازرگانی و تەلارە بایەخدارانە دروست بکرێن بەڵام پەرلەمانی کوردستان بێ جێگا بێت، بەعس بتوانێت بە 5 ساڵ ئەم تەلارە دروست بکات بەڵام کورد بە 23 ساڵ نەتوانێت تەلارێکی بۆ دروست بکات مایەی نەنگیە، ئەمە حیکایەتێکی تراژیدیە بۆ گەلێک کە خواستی ئەوەی هەیە حیکایەتە تراژیدیەکانی یاسارێژ بکات.

 پەرلەمانتارێک دەڵێت: "بیرۆکەیەک هەیە بۆ گواستنەوەی ئەم تەلارەی ئێستا نەک لەبەر ئەوەی کە کاتی خۆی بۆ مەبەستێکی سیاسی و نەشیاوی دژ بە کورد دروستکرا بەڵکو لەبەر ئەوەی بیناکە بچوکەو زۆرترین بێ کاری تێدا کۆبۆتەوە کە خەریکی چات و فەیسبوکن و لە ئێستادا بێکاریگەرترین خول بەرێدەکەین وا هەست دەکەین لە فەرمانگەیەکی ئاساییداین"

 تەنها ئەو ئامێرو سپیکەرو مایکە دەنگهەڵگرانەی بەردەم پەرلەمانتاران بە تێچووی زیاتر لە 5 ملیۆن دۆلار دانراوە لەلایەن کۆمپانیایەکی بیانیەوە، کەچی کارناکات و کەسیش نیە لێپرسینەوە بکات لەم دۆخە، ئەو پەرلەمانتارە دەڵێت پەرلەمان لەمە نەپرسێتەوە ئەبێت چۆن بتوانێت سەحبی سیقە لە وەزیرێک بکات، لە داهات بکۆڵێتەوە، بزانێت نەوت چی لێدێت، ئەوە باسی دەرماڵەو سولفەکان ناکەین لەناو ئەم پەرلەمانەداو بۆ سەرۆکە گەنجەکەی بە جێدێڵین !

 خەونی پەرلەمان

پەرلەمان وێسگەی پێکبەستنەوەی چەمکی شاخ و شارو تێکەڵکردنی خواستێکی جەنگاوەری بو بە خواستێکی مەدەنیانە، پەرینەوە بوو لە دۆخی بەرەی کوردستانیەوە بۆ دەزگاو شارو خەباتی سەندیکایی، جگە لەوەی ناوەندێک بوو بۆ بە یاساییکردنی  ژیانی کورد، هەمانکات پەرینەوە بوو لە دۆخی گوتاری شاخ و شۆرشگێری و بارەگای حیزبیەوە بۆ سەردەمی جێگیربوونی سیاسی و ئازادی و پلورالیزمی حیزبی و کرانەوەو فەرمانگەی حکومی و دەست و پەنجە نەرمکردن لەگەڵ یاساکانی شاردا، بەتایبەتی دەرکردنی یاسای پارتەکان و رێکخراوەکان و چاپەمەنی و میدیاو سەندیکاکان، کە کوردی هێنایە سەر دۆخی کەشێکی مەدەنی و ئارام وەک گەلانی ناوچەکەو ئەو تێڕوانینەشی کاڵ کردەوە لای نەیاران، کە پێیان وابوو کورد ناتوانێت بە یاساکانی شار بژی و هەمیشە خواستی جەنگ و تفەنگی هەیە، بەڵام لەوساوە تا ئێستا پەرلەمان لەم وەزیفە کلاسیکیە لاینەداوە، بۆ ناتوانێت لا بدات، جاران دەیانوت سەرۆکەکەی پیرەو گوێرایەڵی حیزبە و قورمیشکراوە، خۆ ئێستا سەرۆکەکەی گەنجەو ئەکادیمیشە ئەی بۆ ناتوانێت؟

هەموو ئەم خەونە گەورانە کە پەرلەمان هەیبوو دەسەڵاتی حیزبی کاڵیکردەوەو نەیتوانی بەهای زیاتر ببەخشێت بەم دەزگایەو تەنانەت لەم خولەشدا کە سەرۆکایەتیەکەی دراوە بە هێزێکی ئۆپۆزسیۆن، ئەم ئۆپۆزسیۆنەش زۆر هەوڵی ئەدات کە تارمایی و سێبەری حیزب نەهێڵێت بەسەر ئەم دەزگایەوە کەچی خۆی رۆشتە ناو هەمان مۆدێل، ئێستا راستە جۆرێک لە موزائیک و جیاوازی دەبینرێت بەسەر کەش و هەوای پەرلەمانەوەو ئۆپۆزسیۆن تا رادەیەک بریاربەدەستە بە ڵام ئەوەندەی تر ئەم دەزگایە ئیفلیج کراوە لە بەردەم بریارو ئیتیفاقاتە حیزبیەکاندا و بچوکترین تا گەورەترین یاساو بریار نەک لای ئەم دەزگایە نیە بەڵکو لە هەندێ باردا پرسیشیان پێناکرێ و حیزب خۆی بریاری لەسەر ئەدات و سکێچی بۆ دادەنێت، بۆ نمونە تا حیزب بریاری نەدا هێزی پێشمەرگە رەوانەی کۆبانێ بکرێت ئەم دەزگایە هیچی پێنەکرا، وە هیچی پێنەکرا لە ئاست بێحورمەتیەکان بە تاکی کوردی لەلایەن دەوڵەتی مەرکەزیەوە، هیچ پێنەکرا لە ئاست لێدان لە شکۆمەندی ئەم هەرێمە لەلایەن تورکیاو ئێران و تەدەخولە عەسکەری و ئەمنیەکانیانەوە، بەیاننامەیەک ئەگەر بە فلتەری ئایدۆلۆژی و حیزبیدا نەروات گومان هەیە بە ئاسانی لەم دەزگایەوە بڵاو نەبێتەوە، تەعتیم و داخرانێکی گەورە روی کردۆتە ئەم دەزگایەوە، وا بڕوات خولی ئەم سەرۆکە گەنجە ئەبێتە عەیبە بەسەر بزوتنەوەکەشیەوە کە بانگی ریفۆرم و شەفافیەت و زانین و ئازادی بیرورا ئەکات، ئەم دەزگایە ئەوەندەی نزیکە لە حیزبەوە ئەوەندە نزیک نیە لە ئازارەکانی خەڵکەوە، ئەوەندەی بۆ وروژاندن و قەبەکردنی پرسە سیاسیەکانە ئەوەندە نەبۆتە جیهازی رەقابی و پرسینەوەو بانگێشتکردنی حکومەت و لێپرسینەوە، ئەم سەرۆکە گەنجەی پەرلەمان وابەستەی هەمان ئەتمۆسفیری حیزبی و ئیتیفاقە سیاسیەکانەو لە ژێر ئەو رەشماڵەدا دێت و ئەچێ و ناتوانێت بێتە دەرەوە، لەکاتێکدا ئەیتوانی زۆر چالاکی ئەنجام بدات و بە ئاسانی لەو مەسجە تێبگات کە سەرۆکی پەرلەمانی سوید کەللە شێرە بچوکەکەی لەناو تورەکە رەشەکەدا پێدا !

پەرلەمان و رەشماڵ 

بێگومان پەرلەمان هەرکات دوورکەوتەوە لە ئازارەکانی خەڵًک ئەوا بەدڵنیاییەوە نزیک بۆتەوە لە مەرگی حەتمی خۆی و گوتارو پرەنسیپەکانی ئەکەونە ژێر پرسیار، دەبوو ئەم دەزگایە گوتاری کارکردن و ستراتیجی خۆی لەم خولەدا بە تەواوی بگۆرایە بە ئاراستەیەک لە هۆڵی پەرلەماندا زۆرترین وتووێژ لەسەر پرسە هەستیارە نیشتیمانیەکان و داخوازیەکانی خەڵک و تەنگژەکان بکرایە و کەمترین روبەر بهێڵنەوە بۆ دیالۆگ لەسەر کەیسە بەرتەسکەکان، نەک ئەم دەزگایە بارگاوی بکرێتەوە بە حیزب و سەردانە حیزبی و کۆمەڵایەتیەکان، ئەگەرچی ئەوەی چۆتە ئەم دەزگایەوە بە ئۆپۆزسیۆنیشەوە پیاوی حیزب و ئایدۆلۆژیان و ناتوانن تابۆ حیزبیەکان ببڕن و قسە لەسەر دەرەوەی رەشماڵەکە بکەن، رەشماڵ وەک رەمزی مۆدێلێکی کۆن لە ماڵباتی کوردی بۆ گەلێکی کۆچەری، هۆگری هیچ نین جگە لە ژیانکردنێکی سەرەتایی و بەرگریەک لە مانەوە، هاتنە دەرەوە لەم رەشماڵە جۆرێکە لە دەرچون لە نەریتی باوی سەرۆک هۆزو هەرەشەی گورگەکان، رێک وەک ئەرکی ئێستای پەرلەمان دێتە بەرچاوان، بەڵام جیاوازیەکە ئەوەیە لە نەریتی باوی رەشماڵدا هەموو فەرمانبەرداری سەرۆک هۆزن و لە رێنماییەکانی دەرناچن کە بێگومان لە پەرلەمان ئەمە نیە و بگرە جۆرێک لە فەوزاش دەبینرێت.

لە رابردوودا پەرلەمان کە بە دەست دەسەڵاتی زاڵەوە بوو بە خواستی خۆیان بەکاریان هێنا لە رووی ئایدۆلۆژی و بەرژەوەندی حیزبیەوە، یەکێک بوو لە ئامرازو فاکتەرە هەرە کاریگەرەکانی ئۆپۆزسیۆن بۆ جوڵاندنی شەقام و ناوەندێک بوو بۆ ئاراستەکردنی رەخنەو چالاکیەکانیان، زۆر قسەیان بەم دەزگایە ووت و رەخنەبارانیانکردو سوکیانکرد لەبەرچاوی خەڵکی تا ئەو ئاستەی خەڵکی لەسەر شەقامەوە وتیان " نامانەوێت پەرلەمان بمانخەنە سەر ئێران" 

ئەگەر نەڵێن بەشێکی سەرەکی کورسیەکانی ئۆپۆزسیۆنی ئێستا لە پەرلەمان زادەی ئەم ئەدائە لاوازەی پەرلەمان بوو بەدەست یەکێتی و پارتیەوە کاتی خۆی، کەچی هەمان ئۆپۆزسیۆن پەرلەمانی کردۆتە ئامرازو فاکتەرێک بۆ چوار ساڵ ئارامی و سەقامگیری و بێدەنگردنی خەڵکی لەسەر حسابی پۆستەکانی ئەوان و کەس نیە بڵێت ئەم بێدەنگیە بۆ، پەرلەمانتار هەبوو لە سەروەختی هەڵمەتەکانی هەڵبژاردن دەیگوت نارەزایەتیەکانی خەڵک و شەقام و داواکاریەکانی 17 ی شوبات ئەبەمە هۆڵی پەرلەمان و نیقمەتی نەوت ئەگۆرم بە نیعمەت و گوزارەن باش دەکەم و بێکاری ناهێڵم و هێزی پێشمەرگە یەک ئەخەمەوەو گەندەڵی بنەبڕ ئەکەم، ئێستا دەست و پێ بەستراوە، تەنانەت ناتوانن چاودێریش بن بەسەر دەسەڵاتەکانی ترەوەو وەزیرێک بانگێشت بکەنە پەرلەمان بۆ لێپرسینەوە، کاتێک ناتوانن ئەمە بکەن، بێگومان ئەبێت پەنا ببەن بۆ میدیاکان و ببنە رۆژنامەنوس بۆ نمایشی هێزی لە دەستچوی خۆیان، چونکە هۆڵی پەرلەمان کش و ماتە و مەلیک ناهێڵێت جوڵە بکەن، ناچار ئەو پەرلەمانتارانە هەمویان دەبنە رۆژنامەنوس و موحەلیلی سیاسی و ئەوەی لە دڵیاندایەو ناتوانن لە ناو پەرلەمان دەری ببڕن دێن و لەسەر شاشەکان ئەیفرۆشنەوە بە خەڵکی گوایە بێدەنگ نابن، تەنانەت سەرۆکی پەرلەمانیش ئەوەندەی لە پانێل و میدیاکان و پرسەکاندا بە دڵی خۆی و بە ئازادی باسی دەوڵەتی کوردی و دژی دەوڵەتی سێنتراڵی عێراقی و ئازارەکانی خەڵک قسە ئەکات، ناتوانێت لە چوارچێوەی پرۆتۆکۆلە پەرلەمانیەکەی خۆی و رەشماڵەکەدا ئەو قسانە بکات، ئەمە دەرخەری ئەوەیە ئەم پەرلەمانە لەم خولەشدا بە قۆناغێکی مەترسیداری بێدەنگیدا دەروات و ناخوازێت رێککارە یاسایی و شەرعیەکەی خۆی وەربگرێت.

 خولی نوێ کە لە 21/9/2013 ەوە شەرعیەتیان پێدراوە، ئەوە دوو ساڵە تازە بە تازە باسی سندوقی داهاتە نەوتیەکان ئەکەن، کە دەبوو بیست ساڵ پێش ئێستا ئەمە بکرایە کە هەرچی شتی بەنرخی ئەم وڵاتە هەبوو ئاودیوکرا، پەرلەمانتارێک وتی " پارە هەبوو سندوق و دەغیلە نەبوو، ئێستا بێموچەییەو پارە نیە تازە سندوق و دەغیلە دادەنێن بۆ خەڵکی" 

ئەم ماوەیەش وەک ساڵەکانی تر یەک یاسا بە دڵی خەڵک دەرنەچووە، ئەوەی کراوە تەنها نمایشی میدیایی بووە، تەرجومەی دروشمی هێزێک بوو کە دروشمی زۆری دا بە گوێی خەڵکی دەنگدەرداو هیچی بۆ جێبەجێنەکرا بە ئیسلامیەکانیشەوە، کاتی خۆی وتمان ئەرکی ئەمجارەی پەرلەمان قورس و گرانترە و جیاوازە لە خولەکانی پێشوو، فەزای یەکێتی و پارتی تێئەپەرێنن، لێ ئەم برادەرانەی کە ئێستا چونەتە پەرلەمان گوتارو ئەجێنداشیان دیار نیە، کە چی ئەکەن و چی ناکەن، هەمان پەرلەمانتاری ئۆپۆزسیۆن کە 4 ساڵ نەفی دەسەڵاتی رابردوی ئەکرد ئێستا لە شاشەیەکەوە لەگەڵ هەمان ئەو پەرلەمانتارەی دەسەڵاتی پێشوو بە یەک ئاواز ئەخوێنن و باس لە کێشەکانی نیشتەجێبوون و وەبەرهێنان و شەفافیەت و موڵکی گشتی ئەکەن.

 باشە کە پەرلەمان و سەرۆکایەتیەکەی بەدەست ئۆپۆزسیۆنەوەیە بۆچی یەک یاسا بە دڵی خەڵک دەرناکەن و بۆچی چاودێری حەقیقی نین بەسەر دەسەڵاتەکانی ترەوە، دەبێت ئەوە بوترێت خراپتری تەقسیمی سیاسی ئەوە بوو پەرلەمان وەک پۆست و رازیکردن درایە ئۆپۆزسیۆن نەک وەک مومارەسەی دەزگایەکی چاودێری و یاسایی، بە واتایەکی تر کارەکتەرەکانی ئۆپۆزسیۆن نەیانتوانی نەخش و کاریگەری و زیهنیەت و جیهانبینی خۆیان لەم خولەدا مانیفێست بکەن، کە دەیانتوانی بیکەن، کەوتنە هەمان سیستمی شەرمهاوەرو جوینەوەی یاسا کۆنەکان و ژێرباری دیفاکتۆی سیاسی پارتەکانەوە، نەیانزانی چی بڵێن و شەن و کەوی چی بکەن و  رێککەوتن و پرۆتۆکۆلی سیاسی نوێ بۆ ئەم قۆناغە هەستیارە دابرێژن، بۆیە پەرلەمان لەم قۆناغەشدا لە غیابی گوتاردا دەژی و ناشتوانێت لێی دەرباز بێت بە حوکمی ئەوەی چەند یاسایەکی هەستیاری لە پێشە کە مەرجەعیەتە حیزبیەکان خۆیان بریاری لەسەر ئەدەن و یەکلایی ئەکەنەوە و ئەینێرنەوە بۆ پەرلەمان و  دواتر پەرلەمان کەرنەڤاڵی بۆ ساز ئەکەن و هەندێ پەرلەمانتاری بێئاگاش دەست بەرز ئەکەنەوە گوایە نارازین و بۆ شەوەکەی ئەیکەنە هەڵای میدیایی و موزایەداتی سەر شاشە. 

دو ساڵ تێئەپەرێت بەسەر ئەم خولەدا بەرهەمێکی ئەوتۆی سیاسی و یاسایی و گۆرانکاریەکی نەوعیمان نەبینی، ئەمە پەیوەندی بە گەلێک هۆکارەوە هەیە کە پەرلەمان نەیتوانیوە ئیحتیوای بکات و چارەسەریان بۆ دابنێت، پرسی دەستورو گەراندنەوەی پۆ پەرلەمان، یاسای درێژکردنەوەی ویلایەتی سەرۆک، پرسی نەوت و غازو سامانە سروشتیەکان، بەغدادو بڕینی بەشە بودجە و نەناردنی موچە کە پەرلەمان هیچ قسەیەکی نیە لەم بارەیەوە، کەواتە هەموو ئەو کێشەو قەیرانگەلەی کە هەیە لە هەناوی کۆمەڵگای کوردیدا پەرلەمان نەیتوانیوە قسەیان لەبارەوە بکات، بەڵام سەرۆکە گەنجەکە وەک سەرۆک هۆزی رەشکماڵەکە ئەچێتە ڤاتیکان و گەشت ئەکات و ئەم هەموو جوانی و ئەزمونە دیموکراسیەی دونیا ئەبینێت بەبێ ئەوەی ئەم بیماری و قەیرانە گەورانەی هەناوی کۆمەڵگا کۆچەریەکەی خۆی ببینێت.

 کەواتە پەرلەمان لە بنەرەتدا دەزگایەکە لە خواری خوارەوە کاردەکات و ئەوەتا لە پەراوێزی روداوەکاندا، ئەگەر گونجاو بێت ئەوە بڵێین بۆ پینەو پەرۆی هەندێ یاساو رێسا بە دڵی پارتە دەسەڵاتدارەکان کاردەکات، دوور لە ئەرکە گرنگەکەی خۆی کە یاسادانان و بەدواداچوونە، ئەپرسین سەرۆکی پەرلەمان نەزانێت نەوت چەندی چۆتە دەرەوەی وڵات و پارەو داهاتەکەی چەندە و لە چ سندوقێکدایە، داهاتی ناوخۆیی پارەکەی کواو چی لێدێت، داهاتەکانی رابردوو چیان لێهات و چونە کوێ، موڵکی گشتی بۆ هەراج دەکرێت و ئاوا حیزب دەستی بەسەردا دەگرێت؟ ئەم سەرۆکە گەر نەزانێت ئەرکەکەی چیەو چۆن مومارەسەی دەکات ئیتر چۆن دەتوانێت گۆرانکاری بکات، من چی لە ئەدەب و مۆراڵ و نەرم و نیانی سەرۆکی پەرلەمان بکەم لەکاتێکدا نەتوانێت لەو هەموو بێ مۆراڵی و بێ ئەدەبی و پارەخۆری و  ئانارشیزمانەی دنیای ئێمە بپرسێتەوە؟ 

لە ئیمامی عەلیان پرسی لە نێوان ئیماندارێکی ترسنۆک و بە غیرەتێکی بێدیندا کامیان هەڵدەبژێریت بۆ خەلافەت، لە وەڵامدا ووتی:  " بێگومان بەغیرەتەکە، چونکە غیرەتەکەی بەر حوکمرانیەکەی ئێمە ئەکەوێت و بێدینیەکەشی زاتیەو بۆ خۆیەتی، بەڵام ئیماندارەکە ترسنۆکیەکەی بۆ خەلافەتەو ئیمانەکەشی بۆ خۆیەتی کە سودی نیە"

 کاتێک ئیشی سەرۆک کورت بوبێتەوە لە گەشت و دیمانەی رۆژنامەنوسی و بەخێوکردنی دنیایەک راوێژکارو پلە تایبەت و ئەرکە گرنگە تەشریعیەکەی بیرچوبێتەوە، بێگومان ئیشی پەرلەمانتارانیش لەو ئەرکە گرنگانەوە دێتە سەر ئەوەی بەسەربانی پەرلەماندا بفرن و بەدواداچوون بکەن بۆ شوێنێک قسەی تێدا بکەن، بەدواداچون بکەن کەناڵ و میدیایەک بدۆزنەوە تا نمایشی هێزی مەعنەوی خۆیانی تێدا بکەن، ئەو پەرلەمانتارەی کە لەسەر شاشەکان پاڵەوانە لە ناو هۆڵی پەرلەمان ئەوەندە بچوکە خەریکی خوێندنەوەی چیرۆکی بێدەنگی و تەنانەت بێدەنگکردن و بێئیرادەکردنی ئەوانی ترە، یان خەریکی پرۆژە یاسای جگەرەو خەتەنەو ئۆتۆمبیلی شەخسین.

 بێ ئەوەی بزانن ئەگەر ئەرکی چاودێری لە پەرلەمانتار بسەنرێتەوە ئەبێتە کارەکتەرێکی بێ گیان، هەندێ دەزگا لە سەروو پەرلەمانەوە کاردەکەن و پەرلەمان نەیتوانیوە سنوریان بۆ دابنێت، کە پەرلەمانی ناچالاک کردوە، وەک حیزب و مەکتەب سیاسیەکان و هەندێ دەزگای حیزبی، ئێستاش ئەو کێشانە لە خوارەوەی پەرلەمانەوە ئامادەییان هەیەو دیسان پەرلەمان بێتوانایە لە چارەسەرکردنیان، بەراست کەی قسە ئەکەن و ئەم وڵاتە رزگار ئەکەن لە قۆرخکاریەکانی حیزب و برسێتی و  بەهەدەردانی سامانی ئەم وڵاتە، ئەی نەتانگوت چاودێرین بەسەر هەموو دەزگاو کایە گرنگەکانەوە، بەدوای کێشەکانتانەوە ئەچین، دەزگای رەقابی ئەم هەرێمە دەبین، موچە بۆ کابانی ماڵ ئەبرینەوە، ئەچینە هەموو جێگایەک، ناهێڵین نەوت ئاوای بەسەربێت، کرێی تەنکەرەکانمان ئەگۆرین بۆ موچە، ئایا تەنها دەرکەوتن لەسەر شاشەی میدیاکان بەسە بۆ ئەوەی ئێوە بڵێن پەرلەمانتارین و گوزارە لە رۆحی ئۆپۆزسیۆن بوون ئەکەن، یان ئەرکی نیشتیمانی و ویژدانی خەڵک قورس و گرانەو بە ئێوە هەڵناگیرێت و سەرچیخ چون، خۆ ناشێ بڵێن کورسیەکەی پەرلەمان سیحری لە ئێوەش کرد، کورسی و دانیشتن سڕی کردین، دەبوو بتانزانیبا دیکتاتۆر هەبێت کورسیە، کورسی هەمیشە سیحرو ئەفسونی خۆی هەیە، بەتاڵت ئەکاتەوە لە ئیرادە، شتێکت پێ ناهێڵێت بۆ وتن، مرۆڤ بە ئاسانی ناتوانێت لەسەری دابنیشێت، دەبوو بتانزانیبا، ئەوەی بە تەواوی مرۆڤ ئەکوژێت فیشەک نیە بەڵکو کورسیە.

دواجار وەک ئەو پەرلەمانتارە، وتی: سەرۆکی پەرلەمان ئەگەر بیەوێت پەرلەمان چالاک و کارا بکات وەک مەجلیسێکی رەقابی، دەبێت لەو قاوغە دەرچێت کە خۆی وەک سەرۆکی دەزگایەکی ئەکادیمی زانکۆیی پیشان بدات، ئەمە پەرلەمانەو ئەزمون و کاری سیاسی خۆی دەوێت"

دواجار نابێت یوسفی نوێ سەرۆک پەرلەمانە گەنجەکە وەک پیرەکان بیر بکاتەوە، رێگە بەوە بدات بکەوێتە ژێر هەژمون و کاریگەری پیاوە کلاسیکیەکان و خەشمی براکان و بەوە رازی بێت بیخەنەوە چاڵ و کاریگەری و جوانیەکانی بکوژن.

• ((لە ژمارە 298 ی گۆڤاری لڤین، لە 1/4/2015 بڵاو کراوەتەوە))