په‌یامی مێژوو به بۆنه‌ی یادی ڕاپه‌ڕین و نه‌ورۆزه‌وه
Friday, 13/03/2009, 12:00
مێژووم خوێنده‌وه خوێندمه‌وه مێژوو
گوتی هه‌ڵسه له خه‌و نیمچه مردوو
تۆ عیراقی نیت تۆ کوردستانیت
ده‌ته‌وێ به‌درۆم بخه‌یته‌وه
تۆ کوڕی ئه‌و خاکه‌ی
یاخود بێ ناسنامه‌ی
تۆ ئاوی کانی ده‌خۆیته‌وه
یان زه‌قنه‌بووتی بیابان
تۆ پشووت له‌ژێر دارگوێزه
یان له‌پاڵ دارخورما
تۆ سواری که‌ر ده‌بی
یان حوشتره‌وانی
تۆ خۆرپه‌رستی
یان دوژمنی هه‌تاوی
لات ئاگر پیرۆزه
یان ته‌پۆڵکه‌ی لم
تۆ کوڕی چیای
یان مه‌جنوون له‌یلای
تۆ خاوه‌ن مه‌موزینی
یاخود قه‌یسوله‌یلای
تۆ ڕانگوچۆغه‌یه به‌رگت
یان عه‌گال و عه‌با
تۆ چۆن شه‌رم ناکه‌یت
له‌مه‌ڕ ڕه‌شه‌با
سه‌ر شۆڕ ده‌که‌یت
مل که‌چ ده‌که‌یت
بۆ ڕه‌شه‌با
مێژووم خوێنده‌وه خوێندمه‌وه مێژوو
گوتی هه‌ڵسه له خه‌و نیمچه مردوو
کاروانان گه‌یشتن به دوائێستگه
ئه‌وه‌تا وان له کاروانسه‌را
سه‌رقاڵی خۆئاماده‌کردنن
بۆ دواڕۆژی خۆیان
تۆش تاکوو ئێستا
نێو خۆت به‌هه‌ڵه ده‌نووسی
نه خۆت نه من نا‌ناسی
تاکوو ئێستا نازانی
بۆ له زه‌ریای مردوو
نییه ژین نییه ماسی
شه‌رمه‌که‌ی نه‌خشه‌ی وڵاته‌که‌ت
پێشان دنیا بده‌یت
پێت نه‌نگه بێژی کوردستانیم
"نه‌خێر من عیراقی نیم
هه‌رگیز عیراقی نه‌بوومه
ته‌نها و ته‌نها کوردستانیم"
مه‌ترسێ ئه‌ی ڕۆڵه‌ی کورد
ئه‌ی لاوی کورد
بڵێ بێژه هاوارکه
من کوردستانیم
به به‌رزیی مه‌گروون هاوارکه
به درێژیی زنجیره‌ی زاگرۆس
به دواهه‌ناسه‌ی ئه‌نفالکراوه‌کان
به گه‌وره‌ییی هه‌ڵه‌بجه‌ی گۆڕه‌کان
با هه‌موو دنیا بزانێ
"من عیراقی نیم
من کوردستانیم
من کوردستانیم
کوردستانیم
کور..
دس..
تا..
نیم..."
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
