یادەوەری گارە بەڵا.. بەڵا

Tuesday, 07/12/2010, 12:00

بۆ سوێندی بەهارانیش رێوبانان یەك چل كەسكاییان نیشانی بینایی رێبواران نەدەدا، تا خوداوەندی وەرزی پووش حەزبكات، تا بینایی بڕدەكات هەر پووش و پووش، ئاقاری گارە بە دیوی رۆژدا هەمووی پووش، هەر پووشە بە هەناسەی با دەشكێتەوەو بە پێیەكانی من كە جاروبار خەیاڵی قووڵ قووڵتر لەو دۆڵەی دەمێدی منی هەڵدایەوە سەر زەوی، دەپەڕێ و دەكەونە دەست با و نەمدەزانی ئەو پووشانە با بۆ كوێی دەبردن، هەر لەوەشەوە، لە پەڕینی پووشەوە،زانیم ساڵ لە مانگی پووشپەڕدا رێدەكات، لە بیرمە بەراوردێكم لە نێوان خۆم و پووشی دەم با كرد، چاوێكتان لێمبا ئەودەمانێ چەند لە پووش دەچووم، پووشی دەم با..ئێستا دەمەو نیوەڕۆیەكی پووشپەڕیی ساڵێكی هەڵەتاوییە، من و هێسترێكی بۆز، رەنگی هێستر چەند لە رەنگی پووشی دەكرد، جا ئەو رۆژە رەنگ هەبوو رەنگی پووشی نەگرتبێ! خۆ جلكەكانی من هەر دەتگوت لە پووشی بەر تەپوتۆز چنراون، هێستری پووشاوی لە پێشەوە منی پووشاوی بە دوویەوە، هێستر ئەژدیهاشی بێتە پێشێ رێ ناگۆڕێ، بەڵام من... رەنگە هێستر خەیاڵی نەبێت دەنا ئەویش جاروبارێ بە لا رێدا دەچوو، باری هێستر قورسە،چەند قاتی باری منە، بەڵام من بە بارەوەش ببمە سەرباری لە رۆینی هێسترانەی خۆی ناكەوێت، باری من كڵاشینكۆفێكی رووسیی یەك لاق، بە هی سەریەوە حەفت مەخزەن، مەتارەیەك لە جۆری گەورە، كۆڵەپشتێك كە چەند نووردووە نانێك ومستە قەسپێك و.. باری هێستریش ئەوەی دیارە كڵاشینكۆفێك و تاخمێك، نادیارەكەش با جارێ هەرنادیاربێ.. من و هێستر هێشتا لە ئاقاری گوندی (یەكماڵە)ین ئەو گوندەی ئەگەر دواتر عەلی كیمیاویی لە بڵندایی گارەوە تۆپ تۆپ، مست مست ژەهری بە سەردا نەڕژاندبا ئێستا عەلی و فاتیمەكانی نەوەیان خستبۆوە و دەبووە هەزار ماڵە و زەماوەند زەماوەند، دەبووە گوندی زەماوەندان، دوور نەبوو زەماوەندی منیش بكەوێتە گوندی یەكماڵەی هەزار ماڵەوە.. من و هێستر لە هەورازەكەی پشت یەكماڵە سەركەوتین و وا بەو دیودا دیوی بارەگا شۆڕ بووینەوە، ئەگەر یەكپێ بڕۆین و هیچ بەڵایەكی عەردی و ئاسمانی نەیەتە رێ بۆ نان و ئالیكی ئێوارە من و هێستر لەدوڕ بارەگاین، ئەرێ پرسیتان، ئەو چەك و تاخمەی باری هێسترە بۆزی قورستركردووە خاوەنی هەبوو یان نا؟! ئا، هەتا هێستریشمان باركرد خاوەنی هەبوو، كوڕێكی باریكەلەی كەم تەمەن،وا بزانم ناوی سەربازیی نەهاتبوو، ئەو تفەنگ و تاخمەشی جوان لێدەهات لەو جێگەیەی كە رۆژە رێیەك لێرەوە دوورە، دەستبارمان گرت و بە یارمەتیی یەك دوانێك بارەكەمان باركردو هەچەمان لە هێستر كردهەر هاوڕێی رێیە ترسناكەكانی ئاقاری گارە بووین، ئەو ئاقارەی لە هەر بستە زەویەكی لە هەر ناو لەپە ئاسمانێكی بەڵایەك چاوشلكانێت لەگەڵ دەكات.. رەنگی هەڵبزڕكابوو، نزیك لە هەڵبزڕكانی شیر، قوڕگی خاوێندەكردەوە، دیار بوو رستەیەكی قورس عاسێ بووەو نایەتە دەرێ، ویستم یارمەتیبدەم، هەستمكرد رستە لە قوڕگی منیش عاسێ بووە، ئەو كوڕە دەبێت چی لە دڵ بێت! دەیەوێت چی بڵێت!

+ببوورە، تۆ بە تەنیا بڕۆوە بارەگا
- ئەدی..
+ من، دەچمەوە، ماندوو بووم..
- بە قەستیتە، تۆ ماندوو نابیت
+بە راستیمە زۆر ماندووم، بە ئەبو عەلی بڵێ رۆیشتەوە، ماندوو بوو..
- ئەدی بۆچی لە بارەگا وات نەگوت..
+نازانم، چەكەكەم لێوەرگرە و من دەچمەوە
- چۆنە بە چەكەوە ناچیتەوە؟
+ خیانەت ناكەم
- كوا، لە كوێ خۆت رادەست دەكەیتەوە؟
+ لە خوارەوە لە نزیك جادە
- ئێستا لێبووردن هەیە؟
+ هەیە..
هەبوو، لێبووردنێك بۆ بە چیاكەوتووەكان بۆ عەشقیاكانی چیا هەبوو، كوڕە ماندووەكە بە دەستی خۆی خۆی چەككردو بە ماڵئاواییەكی شەرمنانە بەجێیهێشتم، ئەوەتە كوڕە ماندووەكە چەند ماندووانە، چەند نابەدڵانە شەقاوی خۆ رادەستكردنەوە دەهاوێ، هەر دەڵێی بۆ تیربارانكردنی دەبەن، پێیەكانی لە دووی ناڕۆن، ئەو پێیانەی پێشتر لەرۆیشتنێ پێ بە پێی با رێیان دەبڕی، كوڕە ماندووەكە رۆیشت، لێژبۆوە، بڕۆ لە بەڵای دەوڵەت بە دوور بیت، ئەی كوڕی ماندوو، من ئیدی ناوت دەنێم كوری ماندوو، بە هیچ ناوێكیدی ناتخەمە ناو سەرهاتانەوە، پیاوێكی ئاقاری گارە گوتی:
+دەزانی بۆچی ئەنگۆی كۆمەنیستی خودانەناسم خۆشدەوێ؟
- چونكێ هەندێكمان لە بنەوە خودادەناسین! ههە هه
+هاهاهاه..چونكێ كاتێك كەسێكتان خۆ رادەستی حكومەت دەكاتەوە، نەك هەر هاوڕێ و هاوسەنگەرەكەی خۆی ناكوژێت، چەكەكەشی بەجێدێلێ..
قسەی پیاوە گارەییەكە ترساندمی، ترس دەهات و ترس ترس لێمدەنیشت، ترسی سەردەمانی منداڵیش گەیشت و نیشت، قسەی پیاوە گارەییەكە گەڕاندمیەوە ئەو رۆژەی كە هەواڵی قادر شۆڕەبی گەیشت، هێشتا كانەبی گچكە نەببووە سەرهاتی ترس دەنا ئەویش دەهات و لە بیناییمدا خۆی رادەخست، من ئێستا لە ترس ئاڵاوم ترسی خیانەت، كوڕە ماندووەكە! كوڕی باش بە پێ هەڵێنە، چەندی دوورتر بكەویتەوە ئاسوودەترم، چیدی ئاوڕ مەدەوە، با شەیتان نەیەتە بن كەلەكەت و پەژیوانی گەڕانەوەت بكاتەوە، دەزانم تۆ خیانەت بە خەیاڵتا نایەت، بەڵام دڵی من وا ناڵێت، لە دوای قسەی پیاوە گارەییەكەوە، گومان گومان، دەستی چەپم گومانی لە هی راستم هەیە، دەڵێ ئاگاداربە، تفەنگ لە سەر پێیە، گوللەی خیانەت لە رێیە، خۆ من پێش قسە گارەییەكەش هەركوڕی پانتایی ترس و خیانەت بووم، بەڵام بەو قسەیە راچڵەكیم، توند راچلەكیم، لە راچڵەكیندا هەرچی رستەی خیانەتە لە بیستنمدا خۆیان لێكگرێدەدایەوە، تەمەن چ رستەیەكی درێژی ترسئامێزە! پیاوە گارەییەكە گەڕاندمیەوە لای حاجی كەریم ئەو پیاوەی یاران و نەیارانی بە پیاوە بەوەجەكەی بەستی شەرغە ناویان دێنا، ئەو پیاوە خەڵكی گوندی حاجی وسووی دەو بەستی شەرغە بوو، برادەری بابم بوو، لە بیرمە شەوێك لە حەوشەیەكی هاوینیی سەیداوەیی لەگەڵ بابم لە بارەی خیانەتەوە مشتومڕیان بوو، پیاوی بەوەجی بەستی شەرغە گوتی:
لەهەر سێ پیاوی كورد پیاوێك خیانەتكارە
بابم گوتی: ئەگەر سێیەكە بكەیتە سی ئەشهەدوت لۆ دەكەم
پیاوە بەوەجەكەی بەستی شەرغەگوتی: تووڕەتر بم، سێیەكە دەكەمە دوو
بابم گوتی: حاجی لێگەڕێ، لە سێی راگرە مەیكە دوو، دەنا تۆش خایەن دەردەچیت..
پیاوی بەوەجی بەستی شەرغە لە بەر خاتری بابم نەیكردە دوو..
دەیانگوت پیاوە بەوەجەكەی بەستی شەرغە بە هۆی كۆمەنیستبوونەوە و لە سەر دەستی كەس و كار و پیاوانی ئاغا زۆر دەردی دیتووەو و ئازاری چەشتووە، بۆیە وا لە سێیەكی پیاوی كورد بە رقدا چووە، زۆر سەرچیخ رۆیشتووە، لە بیرمە بابم بە پێكەنینەوە دەیگوت: هەتا پیاوە بەوەجەكەی بەستی شەرغە لە كۆمەنیستی وەرنەگەڕێ سێیەكی پیاوی كورد بە خایەنی دەمێننەوە..

من كە سەرهاتی قادر شۆرەبی لە سەرمدا سەرەتاتكێی لەگەڵ یادەوەریم دەكرد، سیمای چەندان قادری شۆرەبیم دەدیت چۆڕ چۆڕ خوێنیان لێوە دەچۆڕا، خوێنی گوللەی خیانەت، لەو هەموو سیما خوێناویەوە خیانەت خیانەت كەڵەكەی دەكرد، دەمگوت پیاوە بەوەجەكەی بەستی شەرغە چ راستیەكی گوژاركیی رژاندۆتە بەستی یاردەوەریمەوە، قادری شۆڕەبی یەكەم كوژراوی دەستی هاوسەنگەرەكەی خۆیەتی كە لە یادەوەریی مندا جلكە خاكیە خوێناوییەكەی بە رستی یادەوەریی مندا هەڵواسراوە و دڵۆپ دڵۆپ خوێن.. قادر شۆڕەبی هەر لە تەمەنی كوڕە ماندووەكە بوو، ئەو كوڕەی پێش كەمێك رووەو جادە بە ئاراستەی ئامێدی بە پێی كیسەڵ شۆڕبۆوە، ئەو ساڵەی هاوسەنگەرەكەی شۆڕەبی خوێن بەرچاوی گرت و لە شیرنەی خەوێ شۆڕەبیی لە خوێن هەڵكێشا، من منداڵ بووم، پێشتر چەند جارێ شۆڕەبیم دیتبوو، بە قەد دنیایەكی منداڵی خۆشمویستبوو، ئەو ئێوارەیەی هەواڵی مەرگی قادری شۆرەِبی گەیشت، گەڕەك خەمی دنیای لێنیشت، ئەو ئێوارەیە خەمگینترین منداڵی گەڕەك من بووم.خەمی دنیام لە قادری شۆڕەبی خوارد، قادری باب نەماوی تاقە برای دوو خوشكان.. لە ئاقاری گارەوە بەژنی زراڤی قادری شۆڕەبی لە دوورەوە لە یادەوەریم دەشنایەوە، تا دەهات نزیكتر دەكەوتەوە، گوێم لە دەنگی بوو، قسەی دەكرد، شۆڕەبی گەیشتە لام و دەناورایەوە چ ناورانەوەیەك خودایە، یوسف لێیەوە فێردەبوو، بە دەنگێك مەگەر كۆتری بریندار بكارێ لاسایی بكاتەوە، گوتی:
متمانەی تەواو بە هێستر بكە بەڵام گومانت هەبێ لە هاورێكەت، هاوسەنگەر لە مار خراپتر پێوەت دەدات..
هێشتا زاری وشەیتری تێدا مابوو، سەرمهەڵبڕی، شۆڕەبی نەمابوو، جارێكیدی من و هێستر تەنیا ماینەوە، بە راست شۆڕەبی چۆن گەیشتە گارە! بە دەم رێوە خەوم لێكەوتبوو؟!
ئێستا من و هێستركەوتینە پێدەشتێكی پووشاوی كە كەندێكی وشكی ئاونەدیتەی لێرەو لەوێ بنەدارێكی تینووبەری چەپ و راستی بە پێدەشتەكە بەخشیوە، ئاسمانیش وەك پێدەشتەكە پووشاویە، پێشان ئاسمان رەنگی شین بوو! ببینن چەكدارێك كزو مات بە دوای هێسترەوە، هاورێكەی بەجێیهێشتووە، بەڵام دەبێت تا مردن لە چاكەی دەرنەچێت كە نەیكوشتووە، چەكدارێك دوای چەند دەمژمێرێك رەنگە بگاتەوە بارەگا، بارەگای پرسیار، پرسیار هەزار پرسیار.. ها هاورَێكەت چی لێهات؟ چەكەكەی بۆ لای تۆیە؟ ئەو جا ئەبو عەلی شایب بە عەرەبی پرسیاران دەكات، منیش بە تێكەڵەیەك لە كوردی و عەرەبی وەڵامی دەدەمەوە، رەنگە بە هۆی كێشەی زمانەوە وەڵامەكانم وا بكەونەوە تووشی كێشە بم، وەك باپیرم لە ختوخۆڕا بە هۆی زمانەوە تووش بم، باپیرم كە وەك خۆی دەیگوت یەكەم حاجیی فڕۆكەیە، ئەوەش لەوەوە هات، بەگەڵ یەكەم دەستەی حاجیان كەوتبوو كە لە بەغداوە بۆ یەكەم جار بە فڕۆكە چووبوونە دیداری كابە و پێغەمبەر، باپیرم دەیگێڕایەوە: لە حەجێ لە نزیك ماڵی خۆشەویست، هەر لە پێش دەرگایان، عارەبێك وەرگەڕایە سەر عارەبێك، لێكیان دا خراپ لێكیان دا،یەكیان كەوت، وەك گا كەوتە زەوی، ئەویدی لێیدا بە عارەبی لێیدا، ماركوژی كرد، من ویستم ناوبژیان بكەم، بەڵام نەمكرد، لە دڵی خۆم گوتم، ئێوە هێند حەرامزادە بن رێز لە خشەویستی خوداو خزمی خۆتان نەگرن، بە تكای منی بێگانەی بنی دنیا واز لێكدی دێنن! سەرتان نەیەشێنم، ئەوەی دەستی خۆی وەشاند،هەڵات، پۆلیس هات، منی بەدبەخت وەك شایەد لەوێ مابوومەوە، عارەبیەكەم بایی ئەوە بوو كە لە جیاتی بڵێم: (پیاوێك لێدا و حیزانە هەڵات..) گوتبووم: (من لێم دا و هەڵنەهاتیشم تا نەڵێن حیزە) باش بوو عارەبی لە عەرد راكشاو نەمرد و بە ئاگا هاتەوە و فریام كەوت، دەنا خۆشەویستی خوداش لە زیندانێ دەرینەدەهێنام.. باپیرم ئامۆژگاری دەكردین ودەیگوت:
كوڕینە ئەگەر عارەبی نازانن، لە كن شەڕی عارەبان رامەوەستن..
ئەگەر چوونە حەجیش بە فڕۆكە بچن، فڕین بە ئاسماندا هەر دەڵێی رێی بەهەشتێیە..
نەنكم دەیگۆت، بە باپیرمی دەگۆت:
حاجی ئەدی كوو كاس نەبوون لە گڕە گڕ و هووشە هووش؟
باپیرم دەیگوت: فڕۆكەی حەجێ خۆ وەكو ئەوانە نیە كە هەموو رۆژێ لە سەرمان دەسووڕێنەوە و ئاگر و ئاسنمان بە سەردا دەبارێنن، فڕۆكەی حەجێ هەندەی دەلینگی تۆش خشە و دەنگی نایە..
نەنكم دەیگوت:
بە خودای نەك بۆ حەجێ، بۆ ناو بەهەشتێش من پێ ناخەمە ناو فڕۆكەوە، فڕۆكە هەر فڕۆكەیە..
ئۆی، فڕۆكە رەنگ و دەنگی گورگی هەیە، هەر ناوی بێنیت پەیدا دەبێت، ئەوە دەنگی كۆپتەرە، نزیكە، وەی وەی، چەند نەوین، قەوما لە كەس نەقەومێ، لەو دەمە سێ بنە داری ترس لێنیشتوو، بە بانگكردن بانگمیان كرد، جلەوی هێسترم راكێشا، هێسترم بەستەوە، بەستانەوەیەكی گورج، نازانم لە ئازایەتی بوو، یان لەوپەڕی ترس، چەك و تاخمەكەی كوڕە ماندووەكەشم هەڵگرت و خۆم گەیاندە بن دارێكیدی، دەبوو لە هێستر دوور بكەومەوە، هێستر جێگەی متمانە نیە، دەجوولێ و كۆپتەر دەیبینن، لە بن دارەكە دوو بەردی گەورە پووش و پەلاشیان بە خۆیان دادابوو، سەریان بەیەك كردبوو، خودا دەزانی لە كەنگێوە لێرە خەوتوون، ئەگەر ناپاڵمێك زرمەیان لێوە نەهێنێ پێناچێ بەئاگا بێنەوە، كۆپتەرەكان دوانن، نەوین زۆر نەوی، زگیان لە زەوی دەخشێ، لمووز بە درەختەوە دەنێن، بۆنی شتێكیان كردووە، بۆنی هێسترێك و پێشمەرگەیەكیان كردووە، ئێستا نا ئێستا دەیانبیننەوە.. بمبم..بم..بمبمب..، ئۆی ئەوە بە چی كەوت! ئاگر، ئاگر.. هێسترەكە پیاو بەو تووشم مەكە، مەجوولێ، دەنگت نێ، دەنا تیادەچین، لە تڕێ تۆ و سەگ دەچین، ئارام بگرە، من لە تۆ پتر دەترسێم، بەڵام دەبێت ئارام بگرم، ژیان خۆشە، ژیان لە هەر جێگەیەك بێت لە مردن خۆشترە، تا مەرگ تیچاوت نەداتێ، نازانی ژیان چەند نازدارە چەند ئاودار و مەزەدارە، ئەوەتە مەرگ لە پێش چاوە، خودا دوو ئیزرائیلی سواری دووكۆپتەر كردووە، یەكیان بۆ من یەك بۆ تۆ، هێسترەكەم ئارام بە، كۆپتەر ئیزرائیلی خودایە بەو دەمەو عەسرە بۆ گیانكێشانی ئێمە هاتوون، نەكەی خۆتیان نیشانبدەیت.. بمب بمب.. ئەو كۆپتەرانە زۆر لە هی سەردەمی منداڵی ترسناكترن، ئەو دەمەی من و باوكم نازانم بۆ رێمان بەو زوورگانەی رۆژهەڵاتی هەولێر كەوتبوو، رەنگە بۆ ماڵات كڕین بووبێت، بۆ چێڵ كڕین بووبێت، خۆ ساقۆیەكەی بابم رێك لەو ساقۆیانە بوو كە خەڵك لە بەر هەر كەسێكیان دیتبا دەیانگوت: دەڵێی چێڵكڕە.. دوو كۆپتەری وەك ئەو كۆپتەرانە گەیشتنە سەرمان، بابم رایكێشامە ناو كەندڕێك، خۆم هاویشتبووە بن ساقۆ درێژەكەی بابم، بابم گوتی :
لە منت نەكەوێ، مەترسێ، ئەوە نیە لە كن بابی خۆتی لە چی دەترسی؟
گۆتمە بابم: دەترسم، تەقە دەكەن، دەمانكوژن..
بابم بە دەنگێكی سەررێژ لە دڵنیایی:
هیچ مەترسێ، لە باوەشی بابی خۆتی، كۆپتەری گوو خواردی چیە، ئەوان لە ئێمە دەترسێن، ئێستا هەڵدێن..
ترسم نەما، ساقۆیەكەی بابم سەنگەرێكی پتەو بوو زۆر لە بەرد پتەوتر، گەیشتمە ئەو باوەڕەی كە تەقەی كۆپتەر نایبڕێ، زۆری نەبرد، كۆپتەرەكان هەڵاتن، دواتر دەمگوتە بابم:
تۆ كۆپتەرەكانت راونا؟ بە چی؟
بابم دەیگوت: لە من زیاتر كێیە، كوا كەسیدی لەوێ بوو، هەر بە فوو راوم نان..
بابە، وەرە بمگەیێ، پێویستم بە ساقۆی دڵنیاییت هەیە، بابە من بە تەنێ لە ئاقاری گارە لەگەڵ دوو كۆپتەری هار لە سەگی هار هارتر لێم قەومایە، بمگەیێ...
ئۆی هێسترەكەیان دیوە، لە نزیكە وی بە عەرد كەوت، ((خودایە ئەگەر تۆ ئەو دوو كۆپتەرە ئیزرائیلیەت نەناردووە، فووێكیان لێبكە و بەرزیانبكەوە ئاسمان، هێند بەرز هێند بەرز، لە مەداری زەوری دەرچن و لە ئەستێرەیەكیدی بنیشنەوە، خودایە، ئەگەر ژیان و مەرگ لە دەست تۆیە، مەمكوژە، حەزم لە ژیانە، ئەو كۆپتەرانەم لێ دوور خەوە، گوناهم نیە، هەموو گوناهم ئەوەیە كە لە دەولەتێكی عەرەبی یاخیم، دەوڵەتێك بە چاوی خۆم دیتوومە چەندان جار دیتوومە كە بەو كۆپتەرانە، بە فڕۆكە بە دەردی نەنكم گۆتەنی بەو فڕۆكەی باپیرم سواری بوو هاتە ماڵی پێغەمبەرەكەی تۆ، بە چاوی خۆم دیتوومە قورئانە عەرەبیەكەی تۆیان سووتاندووە، من لە رێزی كۆمەنیستانم بەڵام لە بیرم نیە سووكایەتیم بە كتێبەكانی تۆ كردبێت، چەندان جار گلەییم لە ستالین كردووە لە سەر ئەوەی رێزی تەواوی لە گوتەكانی تۆ یان ئەوانەی بە ناوی تۆوە هاتوون، نەگرتووە)) لە بیرمە قسەم لەگەڵ خودا كرد بەڵام گوێم لە دەنگی نەبوو، هیچی نەگوت، بۆیە چیدی لێی نەپاڕامەوە و بیرم لە خۆم كردەوە..
دەبوو لە هێسترەكە دووربكەومەوە، ئەگەر تۆ دەتزانی باری هێستر چیە لە مێژبووبە دووری سەد بنە داری لێكدی زۆر دووریش لە هێستر دووردەكەوتیەوە، ئەگەر دەتزانی باری هێستر چیە، هەر زوو بە سێ دەنگان و بە شێوەزاری گارەییان دەتگوت:
كوڕۆ، دینۆ، مال خەرابۆ، رابە، چاڤێ خۆ ڤەكە، تو نزانی، ئەها....
ئەگەر هێستر دەیزانی چی لێ بار كراوە رۆژە رێیەك پتر لە خۆی دووردەكەوتەوە، كۆپتەرەكان بۆنیان كردووە، ناوە ناوە جێگەیەك لە پێدەشتەكەی دەڤەری گارە ئاگر دەدەن، بەس دوعا بكەن هێستر نەتەقێتەوە، باری هێستر نەدتەقێتەوە، بارووت نەتەقێتەوە، بەهارێ رێك بێرەدا هاتین دەستەیەك پێشمەرگە كوڕە ماندووەكەشمان لەگەڵ بوو، بێرەدا هاتین، باری هێستر ئاردو شەكر بوو، ئەوجارە لە بەدبەختی من لە تەنیایی من باری هێستر بە سەربار و بن بارەوە فیشەكە بە هەموو جۆرەكانەوە، دۆشكە، ئارپێجی، كڵاشینكۆف، رەنگە فیشەكی دەمانچەشی تێدا بێت، نارنجۆك.. ناهەقمە لە تەقینەوەی هێستر بترسێم! ئەگەر هێستر بتەقێتەوە پڕووشكی دەگاتە من و ئەو دوو بەردەی سەریان بە یەكتر كردووە و منیان لە چاوی كۆپتەر شاردۆتەوە دەبنە كێلم، كێلێك نە دەبینرێتەوە نە دەخوێندرێتەوە، من دەبێت ئەو بنە دارە بەجێیهێلم، نامەوێت ئەو بەردانە ببنە كێلم، هەرچەندە لە سەر قسەی باپیرم زۆرم متمانە بە بەرد هەبوو، باپیرم دەیگوت: (بەرد بەرد، تەنیا بەرد).. سەرهاتی بەردو بەرد بەردەكەی پاپیرم دەگێڕێتەوە..
ئەو هێسترە تا ئێستا زۆر بە هۆشە دەڵێی خوداوەندی ئاژەلان هۆشی بێدەنگیی لێ كردووە، ئەوەتا لەگەڵ زرمەیەك پتر خۆی بەو دارەوە دەنووسێنێت كە لێی بەستراوەتەوە، گوێیەكانی فیچ كردۆتەوە، كلكی لە ناو گەڵی ناوە، دەنگی لێوە نایە، بە راستی هێستر جێگەی متمانەیە، قادری شۆڕەبی راستی گۆ، لە خەونێ، یان لە زیندە خەوێ شۆڕەبی راستی گۆ.. هێستر جێی متمانەیە بەڵام باری هێستر گەمە نیە، دەبێت لێی دووركەومەوە، كاتی ئەوەم نیە هێستر لە بارەكەی دوورخەمەوە، بەڵام هەوڵدەدەم خۆم لە هەردووكیان دووربخەمەوە..كۆپتەرەكان وازناهێنن، بمب بمب، دووكەڵ، دووكەڵ.. لە سەر زگ، لە سەر چۆك، خشكە خشك بە قوونە خشكێ، خۆم گەیانەدە كەندڕێك، داربەرووێك سێبەری لێكردبوو،تیشە بەردێك بە دانیشتن دانیشتبوو، لە كۆندڕێ و لە پاڵ تیشە بەردێ و لە سێبەری دار بەرووێكی تۆزاوی وەك پشیلە خۆم گرمۆلە كرد، ئێستا تەواوێك لە هێستر و بارە بارووت دوورم، ئەگەر بتەقێتەوەش مەترسیەكی وای لە سەرم نیە، تەماشاكەن پێشمەرگەیەكی تەنیا چۆن لە ترسی دوو كۆپتەری نازانم لە كوێوە هەڵدراو چۆن بە بەرزایی گارەی لێرەوە دیار، ترسی لێنیشتووە، پێشمەرگەیەك دوو تفەنگی بە دەستەوەیە و هەتا ئێستاش تەقەیەكی نەكردووە، رەنگە هەر نەشیكات، ئەرێ لە ترسەوەیە یان لە هۆشەوە تەقە ناكات؟! كەلكی تەقەی نیە، كۆپتەر گەمە نیە، تەقە كردن لە كۆپتەر گەمە نیە، بەڵام گەمەی كۆپتەر وگەمەی تەقەكردن لە كۆپتەریش گەمەیەكە پێشمەرگە زۆر پێشمەرگە چوونەتە ناویەوە، منیش پێشتر چەند جارێك تووشی ئەو گەمەیە بوومە، قەتیش وەك ئەمجارە لە كۆپتەر نەترساوم، رەنگە ترسەكەم لە تەنیاییەوە هاتبێت، خۆزگە كوڕە ماندووەكە ماندوو نەدەبوو، ئەگەر ئەوم لەگەڵ با ترسم كەمتر دەبوو، ئەگەر جێگەشم باشتر با و كەلكی تەقەی هەبا، ترس وەها وەك پووشی پووشپەڕێ داینەدەگرتم، تەقە كردن ترس دەڕەوێنێتەوە، ئەوە هەر قسەی من نیە، هەركەسێ سووكە شەڕێكی كردبێ ئەوە دەزانێ، ئەو جارەی لە دۆڵی ئاكۆیان، دوو كۆپتەری زۆر لەو دوو كۆپتەرە بە گڕەگڕتر، گوللە هاوێژتر، دڕتر، بەڵام كەمێك بڵندتر، بەری ئاسمانیان لێگرتین و چەپ و راست دایاندەبێژاین، هێندەی ئەو جارە نەیانترساندم، ئەوان كۆپتەرەكان بە هەوەسی خۆیان دەیانكوتاین ئێمەش بە دڵی خۆمان تێماندەگرتن، گەمەكەی دەڤەری مەتینیش هەر ئەوها، گەمەكەی ئەو دیوەی چیای سەفینیش،هی....
ئەو كۆپتەرانە كەتنێكیان لە چاوە، دەڵێی گفتیان بە خۆیان داوە، بێ دەسكەوت ئەو پێدەشتەی ئاقاری گارە بەجێنەهێلن، وا بڕوا دەمبیننەوە، نەشمبیننەوە ساچمەیەك ساردم دەكاتەوە، گوێتان لە گڤەی ساچمە نیە! سەر دەكات، كورت دەكات، ئەوەتە داربەڕووەكە ساچمەیەكی بە توندی گرتەوە و بە نەرمی هەڵیدایەوە بەردەمی خۆی، تیشە بەردەكە ساچمەیەكی بە توندی گرتەوە و توندتر دوور هەڵیداو نەمدیت لە كوێ كەوتەوە، ئاگرێك لە نزیك هێسترە بارووتیەكە كەوتەوە، باشە بای نایە، خەریكە دەكوژێتەوە..كۆپتەریش نەمكوژێت، ترس دەمكوژێت، خۆزی ئازایەتی یان كەرایەتی دەیگرتم و دەسرێژێكی مەردانەم دەهاویشتە كۆپتەران، دوای ئەوە چ دەبوو با ببێت، خۆ ترس دەڕەویەوە..
ئەرێ كۆپتەر ماندوو نابێ! پێناچێ، لە كەیەوە لە ئاسمانی من و هێستر دەسووڕێنەوە؟ كۆپتەر چەند لە ئاسمان دەمێنێتەوە؟ بایی چەند سووتەمەنی هەڵدەگرێت؟ تەقەمەنیی زۆرە؟ بۆ ئەو پرسیارانە گەڕامەوە لای مولازم ریاز، لە دانیشتنێكی شەوانەی زستانیی سپی سپی، بەفر بارەگای داپۆشیبوو، بارەگا لە قەدپاڵێك بوو، لە دوورەوە بە دووربین، ئەو دەمانەی بەفر چیای بەجێدەهێشت، شانەدەر جوان دیار بوو، شانەدەر ئەو جێگەیەی كۆن زۆر كۆن جێژوانی نەنكە گەورە و باپیرە گەورەمان بوو، لەوێ یەكتریان رامووسی و جووتبوون و ئێمەیان نازانم نە بۆ شەڕوشۆڕخستەوە نە بۆ عەشقبازی.. مولازم ریاز دیار بوو خولی سەربازیی زۆری دیبوو، كتێبی زۆری سەربازیی خوێندبۆوە، شەوێك باسی فڕۆكە و كۆپتەری كرد، هەر یەكەی توانای چەند مانەوەی لە ئاسمانی هەیە، دوای چەند پێویستی بە سووتەمەنی هەیە؟... هەمووی بە وردی بە ژمارەو بە خولەك دەگوت، حەیف هی كۆپتەرم لە یاد نەماوە، ئێستا چەند پێویستمە بزانم دوای چەندی دی ئەو كۆپتەرانە بە ناچاری دەڕۆن و لە مۆلگەی خۆیان دەنیشنەوە، بە راست دەبێت لە كوێ بنیشنەوە، تا جارێكیدی دێنەوە من دەبێت دەرفەتی هەڵاتنم چنگكەوێت! من جگە لە چاوەڕوانی، چاوەڕوانیی دوا چركەی ماوەی مانەوەی كۆپتەر لە ئاسمان چ چارەیەكیدیم نەبوو، چ ئومێدێكیدیم لە دڵ نەمابوو،خودایە ئەگەر لە توانات هەیە، ئەو دوو ئیزرائیلە ئەو دوو كۆپتەرە هەڵكێشەوە لە بەرزایی گارەوە هەلیاندە ئەو دیوەوە، وا بزانم تكایەكی وام لە خودا كرد، نەمزانی چ خودایەك، خودایەكەی دایكم یان خودایەكیدی، بەڵام كوا خودا كاری ئەوها دەستوبرد دەكات! دایكم زۆر جار لە كاتی تووڕەبووندا دەیگوت:
خودا، بە قوربانی بم، قەت لە وادەی خۆی بە هاناتەوە نایەت، دواییش پێویستت پێی نامێنێ..
ئەرێ لەمێژە كۆپتەر بە ئاسمانەوەیە؟ لە مێژە لە سۆراخی من و هێستر سەراو سەر، تەنیشتاو تەنیشت، كلكاو كلك عەرد و ئاسمان دەكات، هێشتا خودا خودای نەنكم قەڵەمی دیتنەوەمانی لێنەداوە، نەنكم زۆر جار دەیگوت:
تۆ كە لە دەستی چەتە و زۆرداران خۆت بشاریەوە، تا خودا قەڵەمی دیتنەوەی لێنەدا ناتبیننەوە، دنیا هەڵگێڕو وەرگێڕ بكەن ناتبیننەوە..
خودای نەنكم قەڵەمی لێمەدە..گەمەی دوو كۆپتەر و هێسترێك و پێشمەرگەیەك چەند دەخایەنێت؟ هێند لە پڕ هاتن و هێند شلەژام لە بیرمچوو دەمژمێر بگرمەوە، ئەوجا با بشمگرتابایەتەوە كە نەزانم توانای مانەوەیان چەندە لە ئاسمان، بە چی دەچێ..
ترسی تەقینەوەی هێستری بارووتی دووكەڵە و ناڕەوێتەوە، خودایە، خودای مام چەتۆ نەیتەقێنیتەوە،چەتۆ پیاوێك بوو باوەڕی بە خودا لە ئاستێك بوو دەیگوت:
هیچ چەكێك بێ خواستی خودا تەقەی لێوە نایە، گوللەی لێوە دەرنایە..
ئەو پیاوە بایی سەرە دەرزییەك لە تفەنگ نەدەترسا، دەیگوت:
كێ ئامادەیە تەقەم لێبكات با تفەنگی سواربكات، سینگم دەدەمە بەرێ، پەنجەی پێدا بێنە، تا خودا پەنجە بە پەلاپیتكەیدا نەهێنێ، بە هیچ پەنجەیەك ناتەقێ..
خودای مام چەتۆ، پەنجە مەگەیەنە بارە بارووتی هێستر، هێستر بتەقێتەوە، من دەبمە خۆڵەمێش، گوللەی هێستر، ساچمەی هێستر نامگرێتەوە، بەڵام بە تەقینەوەی هێستر هەرچی كۆپتەری بەغدا هەیە، ئاسمانم لێدەگرن و جاش و سەرباز دەڕژێنە زەوی، هێزی نادیاری دنیا دیتە،هێشتا چ دنیام نەدیتیە، با هێستر نەتەقێتەوە..
دووكەڵ، دووكەڵ لە زۆر لاوە دووكەڵ، پێدەشتی پووشاوی بە هەڵكردنی بایەك رەنگە گڕی دۆزەخی بگرێت، دەبێت لە خوداوەندی با بپارێمەوە دەرگای با نەكاتەوە، بیكاتەوە، هێسترە بارووت بە ئاسماندا دەچێت، من دەبمە قەلەرەشكەی برژاو، قەلەرەشكەیەك دوو كۆپتەر باڵیان بەستووە، خودای با هەڵنەكەیتە با، ئەگەر بە خۆشت نەوەستایت، هەڵكە بای شەماڵی، با ئاگر كە دەڵێی گایە زمان دەردێنێ، رووەو ئەولا بێتەوە، دوورتر بكەوێتەوە، ئۆی ئەوە لەو لایەش ئاگر كەوتەوە، خوداوەندی با، هەڵنەكەیتە بای شەماڵیش، با دنیا بێ با بمێنێتەوە، با بایی هەناسەیەكیش با نەیە..
كۆپتەر دەڵێی سوێندی خواردووە بمانبینێتەوە، دەترسم بنیشنەوە، بن پنچك بن پنچك، بن بەرد بن بەرد بگەڕێن..كۆپتەریش نەنیشنەوە، باش هەڵنەكات، ئاگر دەمسووتێنێ، تا دێ ئاگر پتر دەكەوێتەوە، دووكەڵ گەیشت، هەردیتت هێستر لە پڕمەی دا، خۆی راپسكاند، پەتكی پساند، تێیدەقاند، هێستر بەرگەی گڕە و تەقەی كۆپتەری گرت، بەڵام بەرگەی دووكەڵ ناگرێت، كێ بەرگەی دووكەڵ دەگرێت، كێ بەرگەی ئاگر دەگرێت، ئاگر وا دەگات، من سێ رێگەم لە پێشە، تەنها سێ رێگە دەبینم:
1- بە دەسرێژێك خۆم لە كۆپتەر ئاشكرا بكەم، ئاكامەكەیشی چی دەبێ با ببێ..
2- بە ناو دووكەڵ و ئاگردا راكەم،كۆپتەریش دەمبینێ، خۆ چاویان نەبەستراوە...
3- گوللەیەك بە دڵ یان بە سەری خۆمەوە بنێم و تەواو ئەو سەر و دڵەی زەویەك نەخشە و ئاسمانێك حەزیان تێدایە..
با كەمێكیدی خۆ بگرم، بڕیاری پەلە نەدەم، كام رێگەیان هەڵبژێرم، خۆزی كوڕە ماندووەكەم لەگەڵ با، لەو سێڕیانە یارمەتیمی دەدا، نا باش بوو رۆیشت، ئێستا ئەویش بە دەردی من دەچوو، ئەو زیرەك بوو، دڵی ئاگایی دابوویێ، خۆزگە منیش وەك وی ماندوو دەبووم، بەگەڵی دەكەوتم..
ها، دەڵێی، راستە! چ روویدا؟ دەنگ نەما! لە كۆندڕێ بێمە دەرێ؟ كۆپتەرەكان ماندوو بوون! رۆیشتن، دەبێ زوو نەگەڕێنەوە؟ وا باشە هەڵێم تا پێم تێدایە هەڵێم، لە بیرمە یەكپێ هەڵاتم، رەخت وتفەنگی كوڕە ماندووەكە و هێستری بارووتیم بەجێهێشت، رەنگە سەدە هێسترێك بە ناو دووكەڵ و ئاگردا هەڵاتبم، خۆم گرتەوە، لە هەڵاتن پەژیوان بوومەوە، گەڕامەوە لای هێستری هەمیشە هاوڕێی چاك، جێی متمانە، دیتمی ناسیمیەوە، بۆنی پێوە كردم، خەریكبوو لە پڕمەی گریان بدا، تۆ گریانی هێسترت دیوە؟ تفەنگ و تاخمەكەشم هەڵگرتەوە، هەچەم لە هێستر كرد، هێستر لە من بەپەلەتر بوو لە بەجێهێشتنی ئاقاری دووكەڵ و ئاگر، نەیدەگەیشتمێ، ئەگەر زمانی هەبا، دڵنیام دەیگوت:
هاوڕێ، پێ هەڵێنە نەوەك كۆپتەرەكان بێنەوە..
پێم هەڵێنا دوور كەوتینەوە، تەواوێك دوور كەوتینەوە، چاوێكیشم هەر لە ئاسمان بوو، رەنگە هێستریش تەماشای ئاسمانی كردبێت.. ئۆی چەند تینووم،ترس مەتارەشی لەبیرم بردۆتەوە، نیو مەتارە ئاوی شیرتێنم خواردەوە، هێسترەكەش رەنگە تینووی بێت، دەی زۆر نەماوە، كانیەك لەو خوارە هەیە، جگەرە، جگەرە جگەرەیەكی مامبایزییم پێچایەوە، ئەو پیاوە جگەرەی ئەستوور و رێكی دەپێچایەوە، تووتنی دوو جگەرە پتری دەكردە جگەرەیەكەوە، هێند پتەویش هێند پتەو، لێرە لۆ ئێرێهێی هەڵدەدا هەڵنەدەوەشایەوە، لە دوای لە ترس دەرچوون چەند بە تامە جگەرەی مامبایزی..
ئەوەش كانی، من و هێستر پێكەوە ئاوی ساردمان خواردەوە، پشووێكمان دا، هێستر پشووی نەدا، بە باری بارووتیەوە پشووی چی بدا! هێستر تا كورتانی لێنەكەیتەوە و خۆ نەگەوزێنێ پشوو نیە، نانێك و چەند قلە قەسپێكم خوارد، جگەرە جگەرە، چەند بە تامە دوای قەسپ و ئاوی كانی، دەبێت ئەوە بڵێم ئەو دەو كانیە، جێگەی خۆ شاردنەوەی زۆرە و مەترسی ئاگر كەوتنەوەشی كەمە، لە باتی دوو كۆپتەر دە كۆپتەریش بێنە ئاسمانێ دەتوانیت خۆ بپارێزیت و لە بەڵای كۆپتەران دوور بیت، گابەردی وا سەریان بەیەك كردووە، نەشیری عەلی دەیبڕێ و نە مووشەكی حوسێنیش دەیلەقێنێ، كونە شاخ و بەردی وا ئامادەن داتبكەن، دەڵێی هێزی نادیارتایبەت بۆ خۆ شاردنەوە لە كۆپتەر و فڕۆكەی هەڵكەنیون ..تا هێستر بە بارەوە نەگەوزیوە، با بەرێكەوین..
لە رێیێ،شەیتان! ئەو شەیتانەش زۆر شەیتانەو شتی سەیر دێنێتە پێشێ، بۆ هێستر میزی نەكرد،هێستر میزی كرد، ئەو كەسەی میزكردنی هێستری ماچەی نەدیتووە و ورد لێیوردنەبۆتەوە، دەڵێ ئەوجا چیە هێستر میزی كرد، میزی هێستر چ تامێكی هەیە بێتە ناو سەرهاتەوە؟ بەڵام ئەگەر ئەو پرسیارە دەگاتەوە مام سوارە یەك شیڕت لێبەردەدا شیڕی حەفتاو حەفت هێستر لێك گرێبدەیتەوە نە لە دەنگ نە لە درێژی ناگاتە شیڕەكەی سوارە، ئەوپیاوە لە تەمەنی بابم بوو ئێستاش پێوە ژنی نەهێنا، دەیانگوت گوتوویەتی: (تا هێستری ماچە و ماین هەبێ هەرامەكەم لە ژن خەسار ناكەم) هەبوو ناویان لەو پیاوە نابوو هاوسەری هێستر، خۆیشی شانازی بەو نازناوە جوانەوە دەكرد، من لە میزكردنی هێسترەوە قسەكانی هاوسەری هێسترم بیردەكەوتەوە، بە منداڵی لە كۆڕی وی دانیشتوومە تا ئێستاش زۆر قسەی ویم لە گوێیە، دەیگوت:
هەر پیاوێك لە میزكردنی هێستر وردبێتەوە ئەگەر پیاوەتیی هەڵنەستێ، پیاو نیە، دەزانی چ جولانەوەیەك دەكات، چ نازێك دەكات،پیری نەوەد ساڵە بیبینێ شەرواڵی تەڕدەكات..
من كە بە وردی لێیوردبوومەوە،بە چاوی خۆم دیتم ئەو دینبەرە چ وەرزشێكی سێكسیانە دەكات، هێندەی نەمابوو بچمە سەر ئایینی هاوسەری هێستر، لەو كاتە زەردە مارێكی سندانكوشتی هەر لە بەر دەمم تیژ لە رێ لە بەری چەپ پەڕیەوە بەری راستی رێ، ترسام، وەرزشی هەرامەی هێسترم لەبیركرد، هێسترم راگرت و گۆتمە هێستر:
ناچمە سەر دینی هاوسەری هێستر، بەڵام دەبێت هەڵمگری و لە مارم بپارێزی، لە شەڕی كۆپتەر رزگارم بوو، نامەوێ لە شەڕی مار تیا بچم..
هێستر دەتگوت لە زمان تێگەیشت، لە تەنیشت بەردێك وەستاو خۆم هەڵدایە سەر پشتی، پێشتریش زانیبووم ئەو رێگەیە بە مارە، هەرچی جۆری مار هەیە لەو دەڤەرە بینراون..دواتر لە خۆم پرسی: چۆن بوو هێسترەكە هەستی بە مارەكە نەكرد ونەڕەویەوەو ئاگاداری نەكردمەوە؟ هەبێ نەبێ ئاگاداری كردوومەتەوە بەڵام من بە هۆی سەرقاڵیم بە وەرزشی دامەنیەوە ئاگام لێی نەبووە.. هەرچەندە هێستر باری قورسە و ماندووە، بەڵام بۆ وەی بە مار نەچم، لە سەر پشتی هێستر دەمێنمەوە و بۆ خۆم بە دڵوداو جگەران دەپێچمەوە، تازە شەوم بە سەردا دێت، هێشتا هەر رۆژە بەڵام رێگە زۆری ماوە..
گەیشتینە هەورازەیەكی پڕ لە دارو دڕ، پووش و پەلاشی حەفتا پووشپەڕ و هاوین لەورێوبانە خڕبۆتەوە، دوعا بكەن لە كۆپتەر بە دوور بێت، ئێرە ئاگر بگرێت، ئەو هاوینە ئاگر بگرێت بە حەفتا زستان ناكوژێتەوە، ئێستا بە قونكە جغارەیەكی نەكوژاوە دەتوانم لێرەوە ئاگرێك بخەمە دنیاوە، ئاگرێك پاش كەمێكیتر كە تاریكی دادێت لە بەغداوە شەوقەكەی ببینرێت، باش نەبوو لێرە لەگەڵ كۆپتەر لێم نەقەوما، خۆ دەبوومە ماری برژاو، ماری برژاوت دیوە؟ بۆ ماری برژاو دەبێت رێی دوور ببڕم و بە دامێنی مەتین شۆڕ ببمەوەو رۆژە رێیەك پتر بڕۆم هەتا دەیگەمێ، رۆژێك لە گوندی بناڤێ فڕۆكە خانووێكی ئاگر دا، مارێك دیارە فریای هەڵاتن نەكەوتووە، فڕۆكە هێند بە دەستوبردە ماریش سەری لێدەشێوێ، بەو چاوانەی خۆم مارم دیت هێند برژابوو هێند برژا بوو، لە برژاندا سووتابوو، كەلكی خواردنی نەمابوو، ئەو مارە سەردەمانێك بە مارە برژاوەكەی بناڤێ لە ناو ماران دەناسرایەوە.. ماریش لە كۆپتەر و گورگ دەچێ ناوی نەهێنرێ باشە، ئەوجا چ لە كۆپتەر ناچێ هەرچی بەڵای پێوەیە خزمایەتی لەگەڵ كۆپتەر هەیە..
هێستر ماندوو دیارە، ئەگەر زمانی هەبا، دەیگوت:
هاوڕێ، بەزەییت بێ، پشتم شكا، وەرە خوارێ و وەك من بە پێی خۆت بڕۆ..
بەڵام لێم خۆش هاتبوو، جار جارە قلە قەسپێكم دەخستە دەممەوە، جغارەیەكم دادەگیرساند، لێوم بە مەتارەوە دەنا، لە شەڕی مار دوورم و بۆ بە قسەی هێستر بكەم، خێرا ناڕوا قەیناكە با هێواش هێواش لە كیسەڵیش هێواشتر بڕوا با نیوەی شەو بگەمەوە بارەگا، ئەگەر منیش رێم لێتێكچێ هێستر شارەزایە، سەد سێڕیان و حەفتڕیانیشی بێتە رێ، رێی بارەگا دەناسێتەوە.. بۆیە بە هێسترم گوت:
هاوڕێ، ببوورە، لە سەر پشتت بم باشترە نەك لە دوات بڕۆم و لە دینی هاوسەری هێستر نزیك بكەومەوە..
دەڵێی لە زمانم تێگەیشت و تووڕە بوو، ئەوە بۆ پێ لە زەوی دەكوتێ و ناڕوا، مانی لە رۆیشتن گرت، دەنگێك لە لووتیەوە هات، نانووسرێتەوە، ناگوترێتەوە، ناگێڕدرێتەوە.. سەری نەوی كرد، لووتی رەنگە گەیشتبێتە زەوی، پشتاو پشت دەگەڕێتەوە.. تێگەیشتم هێستر لە من تووڕە نەبووە، هەڵوێستەكەی پەیوەندی بە قسەكەی منەوە نیە، كە سەر هەڵدەبڕم، بریا سەرمهەڵنەبڕیایە، چ ببینم باشە، ئەوەی من دیتم خودایە دوژمنیشم بەس لە تەلەفزیۆن بیبینێت، ئەوەی دیتم یەك جار لە خەونێ دیتبووم، بەس لە خەونێ ئەژدیهای ئەوهام دیتبوو، ئەژدیهایەكی كتومت لەوەم دیتبوو، ئێستا نازانم كام ئەژدیها نیشانبدەمەوە ئەوەی ناو خەونەكە یان ئەوەی ئەوەتە لە پێشمانە، چەند لە یەك دەچن، رووداوی ناو خەون و ئێرە هەر دەڵێی یەك رووداون و دوو جار روویانداوە، ئەو مارە نابێ پێیبگوترێ مار، ئەژدیهایە ئەژدیها ئەوەتە رێی لێگرتووین، سات لە دوای سات درێژتر، ئەستوورتر، سەر پانتر دەبێت، زەق زەق تەماشادەكات، ئەوەتە خۆی رێكدەخات بۆ پەلاماردان، دڵنیام دەكەومە ناو زگی ئەژدیها، هێسترەكە، ئەرێ لە ناو خەونەكە هێسترم لەگەڵ بوو؟! هێسترەكە دەیەوێ هەڵێت دەڵێی ناوێرێ وەرسووڕێ و تێتەقێنێ، رەنگە ترسی ئەوەی هەبێ لەگەڵ روو وەرگێران پەلاماربدرێ، هێواش هێواش پشتاو پشت دەكشێتەوە، من تاساوم، قەت ئەوها نەتاساوم، ئەو ئەژدیهایە هەر گەورە دەبێت لە چاوی من گەورە و گەورەتر دەبێت، وا دێتە پێشێ، نازانم كێ بە بیری هێنامەوە كە من تفەنگم لە دەستە و تەقەش دەكات، لە جیاتی تفەنگێكیش دوو، باشە تفەنگ ساتێكی ئەوها كەلكی لێوەرنەگیرێت بۆ چیە، بە خۆم گوت، نەتوێرا تەقە لە كۆپتەر بكەیت، نەوێری تەقە لە ئەژدیها بكەیت، ئەدی سەگی سەگباب تفەنگت بۆچی هەڵگرتووە..
سێرەم لە ئەژدیها گرت و پەنجەم پێوەنا، نازانم چەند گوللە رۆیشت، سێ، چوار، شەش.. هێندەم زانی وا بە سەر پاشەلی هێستردا بەردەبمەوە، ئەوەشم لە بیرە چەنەگەی من و سمی هێستر، پێدەچوو سمی هێستر بێت، بەریەك كەوتن، بەریەك كەوتنێك گڕ لە چاوم هاتە دەرێ، ئیدی.. كاتێ بە ئاگا هاتمەوە، رەنگە دوو جغارە خۆرێك لە بێئاگایی مابمەوە، رۆژ لە سەر ئاوا بوون بوو، تفەنگەكەم لە تەنیشتم راكشابوو، خوێنێكی زۆر لە چەنەگەم هاتبوو،گوللەش هەر هێندە خوێنە دێنێ، كراسەكەم لە خوێن هەڵكێشرابوو، پارچەیەكم لە پشتێنەكەم بڕی و پێچام، هێستر ئای هێستر، تێمهەڵدەدەیت و چەنگەم دەشكێنیت و بەجێشم ناهێڵیت، بارەكەشی هەر پێوە بوو، مانەوەی هێستر بە لامەوە سەیر بوو، دواتر بۆ زۆر كەسم گێڕاوەتەوە كەمیان باوەڕیان كردووە، ئەژدیهاكە چی لێهات؟ دوو سێ دەسرێژم بەو ناوەوە نا، پێكەنینم بە كەرایەتی خۆم دەهات، ئاخر ئەگەر هێندەی كەریش مێشكم لە سەر با، لە سەر پشتی هێسترەوە تەقەم لە مار دەكرد! ئیدی بە رێكەوتین، گەیشتمە كانیەك بەو تاریكیە، نیوە خۆ شووشتنێك خۆم شووشت، جلكەكانم شووشت، هەندێك سۆتەكە جغارەم خستە سەر برینەكە و پەڕە كاخەزی جغارەم لە سەری داناو، پێچام،هەر چۆنم دەپێچا شێوەی قەڕاسەی وەردەگرت، هێستری سندانكوشتی برینی خستۆتە جێگەیەكی وا نابەستری.. بڕۆ، بڕۆ، رێیەكی پڕ بەڵا بوو، خودای رێوبانان بەسە بەڵا، لە یەك رۆژ ئەو هەموو بەڵایە..
شەو درەنگە، وا گەیشتم، لەو پێچە بسووڕێمەوە، بارەگایە، دەزانن ئێستا خەمی من چیە؟ كوڕە ماندووەكە! نا، ئەو خەم نیە، پرسیارەكانی ئەبو عەلی شایب و ئەوانیدی لە بارەی كوڕە ماندووەكەوە خەم نیە، خەمی من برینی چەنەگەمە، خۆزگە برینەكە برینی گوللە دەبوو، هی ساچمە دەبوو، هی چ دەبوو با ببا، بەس هی سمی هێستر نا، خۆ بزانن هێستر لووشكەی لێداوم، دیارە، لێكدانەوەی لووشكە دیارە، چ دەگەیەنێت، چەند شەرمە، چەند شەرم بوو، ئەو كات چەند شەرم بوو، پێشمەرگە بە لووشكەی هێستر بریندار بێ! خۆزگە ساچمە دەبوو نەك سم... ئەوە چیە، گەیشتوومەتە ناو بارەگا، چ هەستوخوست نیە، تۆ بڵێی هێندە درەنگ بێ هەموو چووبنە خەوێ، ئەدی ئێشكگر بۆ دەنگی نەدام! ناسیمیەوە، بارەگا چۆل دیارە، تۆ بڵێی باریانكردبێ، ئای! ئای!
هاوڕێیان، هاوڕێیان، لە كوێن؟ هاوڕێیااااااااان