خوێن و ئابڕو

Saturday, 01/03/2014, 12:00

ئیتر بەسە
خوێن خاوێنتان ناكاتەوە،
خوێن بڕێژن وەكو لافاو
پەڵەی ڕەشی بێ ئابڕویی
ناشواتەوە،
ئیتر بەسە
ئەم خوێن ڕشتنە ڕاگرن،
كە بێ ئابڕون
كەسێكی تر بۆ ئەكوژن
خۆتان بمرن !
ئێوە ئەڵێن
ئابڕو بارێكی سەنگینە
گەر هەتانە
كوا لە كوێدا هەڵی ئەگرن ؟
بەنەفرەت بن
ئابڕوی خۆتان ونكردووە،
ئەڵێن پیاوین!!
كام پیاوەتیتان كردووە؟
بۆ ئابڕوی بزربوی خۆتان
بەرۆكی ژنتان گرتووە،
درۆ بەسە
ژن بۆخۆی ئابڕوپارێزە،
بێ ئابڕویی
هەرپیشەی نێرە مرۆڤی
خاڵی لە ڕێز و بەهێزە،
بەدوای ئابڕودا مەگەرێن
لە ناو خوێن و مەرگی ژندا،
ئێوە هەڵەن
وەك ئەوانەی ئابڕویان هەڕاج كردووە
لە ژێر پۆستاڵی دوژمدا،
ئێوە هەڵەن
خاك و ناسنامە ئابڕووە،
تەنها ئازادیخوازەكان
ئابڕوی خۆیان پاراستووە،
مرۆڤێكی تر مەكوژە
ئەو ئابروی تۆی نەبردووە،
بڕۆ ئابڕوی خۆت بێنەوە
قالۆنچەی ڕەش
بەچنگ تۆپەڵی كردووە.