بەختەوەری ھەرگیز نایەت تا ئێوە فاسد بن

Friday, 13/01/2012, 12:00

(ھەرچی دەرگای بەختەوەری ھەیە داخراوە تەنھا دەرگاکانی دۆزەخ نەبێت)

بەختەوەری ھەمو مرۆڤێک بەبێ جیاوازی نەتەوە و ڕەگەز و ڕەنگەوە یەکێکە لەو ئومێدانەم کەھەمیشە لەگەڵیدا دەژیم و کاتێک بەختەوەریش دەبم کەتەواوی ژیانی مرۆڤایەتی پڕبێت لەبەختەوەری ، بەڵام مرۆڤی کورد یان مرۆڤەکانی ئەو پانتایە مەزنەی کەناوی (کوردستان) ە تاچەند بەختەوەرن و ئەو دەرگایانەی بەناوی بەختەوەریەوە ھەوڵی کردنەوەی بۆئەدرێت ، تاچەند مرۆڤی کوردی توانیوێتی لێیان نزیک ببێتەوە؟
لەوەتەی کورد ھەیە خیانەتی لێدەکرێت و خیانەت لەخۆی دەکات ، لەوەتەی کورد ھەیە دەکوژرێت و ئاوارەدەکرێت و ھێندەی ئەوەش ھەرخۆیان ، یەکتریان دەکوشت و یەکتریان ئاوارەدەکرد ، جارێ بەناوی پاککردنەوەی نیشتمان لە (خائن) و جارێکیش بەناوی (پاراستنی ئازادی و دیموکراتی لە (ھێزی تاریکی) جارێکیش ھەربۆخۆشی و بۆبەکات بەسەربردن و حەزکردن لە دەنگی کوللە و مەست بون بە بۆنی خۆین ، ھەر شەڕبو لەدەرگای ماڵەکانی ئەدا و حەزێکی شێتانە ھەبو ، بۆ خۆشەویستی کردن لەگەڵ تفەنگدا ، ھەمیشە وایان پەروەردەدەکردین کە مردن و لەدایک بون تەنھا بەچەکەوە پیرۆزەو ھەرماڵێک تفەنگێکی تێدا نەبێت ، ماڵ نیەو دەبێت بە نەفرەتبکرێت ، دوای ئەو ھەمو ئەزمونە تاڵە لەتەنیشت ئەو خۆ کوشتنانەدا ، ھێشتا ئومێدێک لەدڵی مرۆڤەکاندا بەسەوازی چاوەڕوانی گەیشتنی بەختەوەری بون
ئێستاش ھەرچی دەرگای بەختەوەریە داخراوە و کلیلەکانی لە گیرفانی (حەزرەتی فــەساد) دایە ؟! ھەمو کون و قوژبنەکانی ئەم مەملەکەتە ھەروەک ئەندامەکانی لەشم شارەزام ، بەڵام ھێشتا نازانم بۆھەرچی خەونمان ھەیە دەکرێتە کەلاوە ؟
بۆچی سەرخوان ھەیە پڕە لەنان و پێکەنین ، سەرخوانیش ھەیە پڕە لەبرسێتی ؟ ئێرە مەملەکەتێکە پرە لەو کەسانەی ھێشتا نازانن کوڕی کامیانن ، جەلــلاد یان قوربانی ، ئێرەمەملەکەتی (تەورە ، تەور) تەورەکانیان دەخەنە سەرملمان و پێمان دەڵێن : بەھەشتی ئێمە ھەڵدەبژێرن یان دۆزەخی خۆتان ؟! ئەگەردۆزەخی خۆمان ھەڵببژێرین ، تەور بە دەستەکان بەشێت بە مناڵانی شار دەمان ناسێنن و لەبەردەم دەرگای مزگەوتەکان ، لە سەر بۆردی فەرماگەکان ، لەسەر دیوارەکانی شار ، لەبەردەم ھۆڵەکاندا وێنەکەکانمان بڵاو دەکەنەوە لەژێرەوە بەخەتێکی تۆخ دەنوسن (ھێشتا نازانن کێ باوکییانە) ؟!
لەسایەی ئەم ڕەوشەی ئێستای کوردستاندا ئەوە گەیشتنە بەدڵنیایی ، ئیدی کەی ئەوە دەبەنگیی و کاڵ فامییە ؟
شۆڕش لە دژی شۆڕش لە تەپۆڵکە وشکەکاندا تەڕ تەڕدەکرانەوە ، ئـــاخر شۆڕش نابێت جەنگاوەری لێببڕێت ؟! ئەوە حیکمەتێکە تەنھا شۆِرشگیڕەکان دەیزانن ، ھەموو شۆڕشێک ھەروایە ، تەڕو وشک پێکەوە دەسوتێنێت، ئیدی دیارە ئەوە حیکمەتی شۆڕشەو من نازانم بۆچی دەبێت وەھابێت .

بەڵام ئەوەی ھەرگیز لەیادم ناچێت ، جەنگاوەرەکان ، فریشتەکانی شۆڕش بون کە کۆڵە پشتەکانیان پڕکردبو لە ڕق و مردن و بەرەو جەنگ ملیان دەنا ، ئای چیی دیمەنێک بو ھەرچی کۆڵانەکانی شاربو جمەی دەھات لە کاسبکارو قوتابیی و فەرمانبەرو مامۆستاو ھونەرمەند ، ھەر وەک سواڵکەر لە دەرگای ماڵەکانیان ئەداو داوای نانیان دەکرد بۆ جەنگاوەرە برسیی و ماندوەکانی شۆڕش ؟! تەنھا چەند ھەفتەیک بو دواشۆڕشی تەپۆڵکە وشکەکان دەستی پێکردبو ، ھەرچەند ھەفتەیک بوو (منداڵە بۆیاخچیەکانی شار) چونە بەردەم بارەگای شۆڕشگێرەکان وبەدەم نزاو ھاوارکردنەوە دەیان وت " شەڕەکانتان ، پێڵاوی لاستـیکـی کردە پێی ھەموومان ، ئیدی ئێمە چـی بۆیاخ بکەین " چی وەزعێکە تائێستاش ، مردنی کەسێک ، ئیھانەکردن و سوککردنی کۆمەڵگایەک شۆڕش گێرەکان ڕاناچەڵەکێنێت ، ئیدی چ بکەم لەچێژی ئەو ماڵەی پڕبێت لەشەھوەت ؟ ئەوە بێ ویژدانیە وێنە کاڵەکانی ژیان بەڕەنگی ئەو (مۆم) انە تۆخ بکرێنەوە کە بەگـڕی شەھوەت پێکرابن ، تەنھا ووشە شک ئەبەم ، ئەگەر ئەوم نەبێت ، وەک (ئێوە) دەبمە چەرمێکی ئاوساو لەخەونی پیس .