شۆڕشگێڕه‌کان بوون به دیکتاتۆر
Saturday, 27/08/2011, 12:00
فیرعه‌ونه‌کان به‌رده‌وام هه‌ره‌س دێنن، که‌وتن و توانه‌وه‌ی به‌رده‌وامی دیکتاتۆره به‌فرینه کانی تونس و میسرو لیبیا گه‌واهی ئه‌وه ده‌ده‌ن که‌وا هیچ دیکتاتۆرێک ناتوانێت تا سه‌ر به زه‌برو زه‌نگ و پاره‌و ده‌سه‌ڵات بۆ ماوه‌یه‌کی دورودرێژ حوکمی گه‌له‌که‌ی بکات و ڕۆژێک دێت جه‌ماوه‌ر وه‌ک ئه‌مڕۆ به توندی سزایان ده‌دات، قه‌زافی و موباره‌ک کاسترۆو چه‌ندین له دیکتاتۆره‌کانی ئه‌مڕۆ پێش ئه‌وه‌ی ده‌ستیان بگاته ده‌سه‌ڵات له لایه‌ن جه‌ماوه‌ره‌‌وه شۆڕشگێرو خۆشه‌ویست بوون و سیمبولی گه‌ل و نیشتیمان بوون، به‌ڵام سه‌ه‌د مه‌خابن که ده‌ستیان گه‌شته ده‌سه‌ڵات و حوکمی وڵاتیان بۆ ماوه‌یه‌کی درێژخایه‌ن کرد ئیترخه‌سڵه‌تی شۆڕشگێڕیان له ده‌ست داو له فریادره‌وسه‌وه بوون به فیرعه‌ون، له سه‌رکرده‌یه‌کی شۆڕشگێڕو خۆشه‌ویسته‌وه بوون به گه‌نده‌ڵێک و مڵۆزمێکی قێزه‌ون، له خه‌باتگێڕێکه‌وه بوون به خراپترین دیکتاتۆر له ناوچه‌که‌دا، ئه‌م شۆڕشگێرانه‌ی دوێنێ و دیکتاتۆرانه‌‌ی ئه‌مڕۆ له پێناو مانه‌وه و به‌رژه‌وه‌ندی تایبه‌تی خۆیان و خانه‌واده‌کانیان چه‌ندین ساڵ عاشقی ده‌سه‌ڵات بون، ته‌ڕو وشکیان پێکه‌وه سوتاند، ژێرخان و سه‌رخانی وڵاتیان به‌ره‌و کاولکاری برد، گه‌نده‌ڵی و خراپه‌کاریان له وڵات دا بڵاوکرده‌وه، هه‌وڵی له‌ناوبردنی هه‌موو ده‌نگێکی جیاوازو ناڕه‌زایان دا، پشتیان له ڕابوردو دروشمه شۆڕشگێڕه‌کانیانی خۆیان کرد، ئابوری وڵاتیان له پێناو به‌رژه‌وه‌ندی حیزبی و تایبه‌تی خۆیان به‌کارهێنا، کۆمه‌ڵگایان میلیتاریزه کرد و چه‌کیان به سه‌ر ئه‌ندامه‌کانی خۆیان دا دابه‌ش کرد، سیاسه‌تی کۆنترۆڵ کردنی گه‌وره و بچوکیان په‌یڕه‌و کرد، ئه‌گه‌ر ئه‌م شۆڕشگێڕانه ی سه‌رده‌می شۆ ڕش پاش ماوه‌یه‌کی کورت له به‌ڕێوه‌بردنی وڵات وه‌ک که‌سایه‌تی ناسراوی ئه‌فریکا نیلسۆن ماندێلا بکردایه‌و وازیان له حوکم و ده‌سه‌ڵات بهێنایه ئه‌وا هه‌میشه له نێو دڵ و ده‌رونی جه‌ماوه‌رو گه‌لان دا وه‌ک باوکی ڕۆحی و سیاسی ته‌ماشا ده‌کران و ناویشیان له مێژودا وه‌ک ئه‌ستێره‌یه‌ک و سه‌رکرده‌یه‌کی مه‌زن ده‌دره‌وشایه‌وه.
له کوردستانیش یه‌کێتی و پارتی ماوه‌ی بیست ساڵ زیاتره حوکمی گه‌له‌که‌مان ده‌که‌ن و پشتیان له دروشمی سه‌رده‌می شۆڕشگێڕی و سه‌ر دیواری ماڵه‌کانی خۆیان کرد به تایبه‌ت دروشمی وه‌ک که‌م بژی و که‌ڵ بژی ، له بری ئه‌مه دروشمی زۆر بژی و فیرعه‌ونانه بژی په‌یڕه‌و کرد، یه‌کێتی و پارتی به هۆی سیاسه‌تی کۆنترۆڵ کردنی کۆمه‌ڵگا، ئابوری ، ڕاگه‌یاندنه‌کان به بینراوو بیستراوه‌وه،به‌کارهێنانی زه‌برو زه‌نگ به هه‌موو جۆره‌کانیه‌وه، داڕشتنی چه‌ندین یاسا له پێناو به‌رژه‌وه‌ندی خۆیان، فرت و فێڵ، ته‌زویرکردن، ده‌نگ کڕین، ده‌نگ فرۆشتن، ده‌نگ فریودان، سیاسه‌تی میکیاڤیلیانه، گرتنه‌به‌ری چه‌ندین ڕێگای سیاسی شه‌رعی و ناشه‌رعی حوکمی گه‌له‌که‌مان ده‌که‌ن ، به نیازیشن تا کۆتایی دونیا واز له کورسی و ده‌سه‌ڵات نه‌هێنن ،تاقه ڕێگایه‌ک بۆ درێژه‌دان به ده‌سه‌ڵاتی ناشه‌رعی و مانه‌وه‌یان له حوکم دا دوباره‌کردنه‌وه‌ی ئه‌زمونه‌کانی میسرو سوریاو لیبیاو عێراق و یه‌مه‌ن و مۆدێله سیاسی کۆن و دیکتاتۆره کانی ناوچه‌که‌و جیهانه.
زۆر له تیۆریه سیاسیه‌کان ئه‌وه‌یان سه‌لماندوه ئه‌گه‌ر له کۆمه‌ڵگا و سیسته‌می سیاسیدا ده‌ستاوده‌ستکردنی ده‌سه‌ڵات بۆ ماوه‌یه‌کی درێژخایه‌ن ڕونه‌دات ئه‌وا ئه‌و ده‌سه‌ڵات و سیسته‌می سیاسیه ده‌که‌وێته ژێر پرسیارو گومانه‌وه،هه‌روه‌ها ده‌لاله‌تێکی خراپ و گرنگیشه به‌ره‌و نه‌بونی ئازادی و دیموکراسی و عه‌داله‌تی کۆمه‌ڵایه‌تی له کۆمه‌ڵگادا ، زه‌نگێکی خه‌ته‌رناکیشه به‌ره‌و نیزامی دیکتاتۆریه‌ت.
له‌به‌رئه‌وه تا کار له کار نه‌ترازاوه و سه‌رکرده‌کانی ئێمه هه‌مان چاره‌نوسی حوسنی موباره‌ک و بن عه‌لی و قه‌زافی چاوه‌ڕێیان نه‌کات و کۆمه‌ڵگای کوردی به‌ره‌و هه‌ڵدێری دیکاتۆریه‌ت نه‌به‌ن، هیوادارم به‌ڕێزان مام جه‌لال و کاک مه‌سعود به تایبه‌تی و یه‌کێتی و پارتی به گشتی کار بۆ گۆڕینی سیسته‌می سیاسی و جێبه‌جێ کردنی ئازادی و دیموکراسی و عه‌داله‌تی کۆمه‌ڵایه‌تی بکه‌ن، چونکه له کۆتایدا مێژوو ڕه‌حم به هیچ که‌سێک ناکات.
حه‌مه گۆپاڵه
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
