ده‌سه‌ڵات له نێوان دیالۆگ و توندوتیژیدا
Friday, 17/06/2011, 12:00
توندوتیژی ئه‌وکاته له دایک ده‌بێت که‌وا کۆتایی به ژیانی دیالۆگ بێنێت ، دیالۆگ و توندوتیژی دوو دیارده‌ی دژ به یه‌ک و ناکۆکن ، له هیچ ئان و سات و زه‌مه‌نێکدا له یه‌ک کاتدا پێکه‌وه ناژین ، وه‌ک جه‌مسه‌ره جیاوازه‌‌کانی موگناتیس هه‌میشه له یه‌کتر دوور ده‌که‌ونه‌وه. دیالۆگ و توندوتیژی هه‌میشه له مه‌رگ یاخود پشوی ئه‌وی تریانه‌وه ده‌ست پێ ده‌کات.
تووندوتیژی ، لێدان ، فڕاندنی ڕۆشنبیران ،براکوژی، به‌کارهێنانی زه‌بروزه‌نگ به هه‌موو جۆره‌کانیه‌وه ته‌فسیرێکی ته‌واوه بۆ ئه‌م دوالیزمه دژ به یه‌ک و ناکۆکه له کوردستان، ده‌لاله‌تێکی گرنگیشه بۆ ته‌نگه نه‌فه‌سی ده‌سه‌ڵات به‌رامبه‌ر ناڕه‌زایه‌تیه جه‌ماوه‌ریه‌کان و کوشتن و بڕین و له خاچ دانی هه‌موو خه‌باتێکی مه‌ده‌نی له کۆمه‌ڵگادا، ئه‌م کارو کرده‌وه ناشیرین و قێزه‌ونانه ته‌نها له و ده‌سه‌ڵات و حکومه‌تانه ده‌وه‌شێته‌وه که‌وا مانه‌وه‌یان له حوکم دا به‌نده به ته‌راتێن کردن له نێوان توندوتیژی و دیالۆگ، شه‌ڕو ئاشتیدا، ڕۆڵی سه‌ره‌کیشیان هه‌یه له خوڵقاندنی که‌ش و هه‌وای نائارام و پشێوی سیاسی و کۆمه‌ڵایه‌تیدا ، مانه‌وه‌یان له ده‌سه‌ڵاتدا به‌نده به دارایی و چه‌وساندنه‌وه‌و فریودانی گه‌له‌که‌یان ، پیرۆزی خۆیان و حیزب و بنه‌ماڵه‌که‌یان له‌خاک و نه‌ته‌وه‌و گه‌له‌که‌یان به‌لاوه گرنگتره، ئه‌م جۆره ده‌سه‌ڵاته هیپۆکراتیه به ڕوخسار خۆیان وا ده‌رده‌خه‌ن که‌وا فیرده‌وسی کۆمه‌ڵگان ، به‌ڵام له ناوه‌ڕۆکدا لێواو لێون له گه‌نده‌ڵی و خراپه‌کاری .
ده‌سه‌ڵات له کوردستان به‌رده‌وام له نێوان دیالۆگ و تووندوتیژیدا ته‌راتێن ده‌کات، له نێوان ساناتۆس (خواوه‌ندی شه‌ڕ) و فیرده‌وسدا گێره ده‌کات ، ڕۆژێک ئاشتی خوازه‌و ڕۆژێکی تر شه‌ڕانگێز، ئه‌مڕۆ شه‌ڕی براکوژی ده‌ست پێ ده‌کات و تووندوتیژی به‌رامبه‌ر جه‌ماوه‌ر به‌کارده‌هێنێت، سبه‌ینێ مه‌حرومی ده‌کات و بانگه‌شه‌ی دیالۆگ و دانیشتن و کۆبوونه‌وه ده‌کات ، ساتێک بۆ چه‌واشه‌کردنی جه‌ماوه‌ر جلی سپی و بابا نوئێل له‌به‌رده‌کات و دیاری و ئیمتیازاتی جۆراوجۆری حیزبی به سه‌ر ئه‌ندامانیدا ده‌به‌خشێته‌وه ، ساتێکی تر به جلی سه‌ربازیه‌وه مارشی شه‌ڕو ماکینه‌ی شه‌ڕ وه‌گه‌ڕده‌خات و ده‌بێت به فیرعه‌ونی گه‌له‌که‌مان، له لایه‌که‌وه پڕوپاگه‌نده‌ی ئازادی دیموکراسی و مافی مرۆڤ ده‌کات ، له لایه‌کی تره‌‌وه زه‌بروزه‌نگ و ده‌سه‌ڵاتی کوته‌ک به‌رامبه‌ر خۆپیشانده‌ران و ڕۆشنبیران و چین و توێژه‌کان به‌کارده‌هێنێت ، ئاشتی و ئازادی و دیموکراسی خه‌ڵتانی خوێن ده‌کات ، ئه‌م جۆره ده‌سه‌ڵاتانه پێیه‌کیان له هۆڵ و باره‌گا حیزبیه‌‌کانه، پێکه‌ی تریان له مه‌عه‌سکه‌ر سه‌لام و ئوتێله ڕاقی و سه‌د نهۆمیه‌کانه، ده‌ستێکیان ڕۆڵی خه‌باتی مه‌ده‌نی ده‌بینێت، ده‌سته‌که‌ی تریان زێڕه‌ڤانی و لیوای تایبه‌ت و هێزه حیزبی و تایبه‌تیه‌کان ، ئه‌م ده‌سه‌ڵاته خۆشێان نازانن چی ده‌که‌ن و چیان ده‌وێت،ته‌نها شتێک که ده‌یانه‌وێت پاره‌و ده‌سه‌ڵات و به‌ناوبانگیه، له پێناو ئه‌م سێکوچکه سیاسیه و مانه‌وه‌ی خۆیان له ده‌سه‌ڵات هه‌موو کارێک ئه‌نجام ده‌ده‌ن ، ڕۆژانه وه‌ک حه‌ربا شێوه‌ی خۆیان به‌رامبه‌ر گه‌له‌که‌مان ده‌گۆڕن.
ئه‌گه‌ر کۆمه‌ڵگا ده‌نگیان پێ بدات و به ئاره‌زوی ئه‌وان بجوڵێنه‌وه ئه‌وا لای ده‌سه‌ڵات وڵات شامی شه‌ریفه‌‌و دیموکراسی عه‌یاره بیست و چواره‌و شه‌وانه بێ خه‌م سه‌ر ده‌خه‌نه سه‌ر سه‌رین ، سه‌ری زمان و بنی زمانیان دیالۆگ و ئاشتی و ئاوه‌دانی و دیموکراسی و خه‌باتی مه‌ده‌نی ده‌بێت ، به‌ڵام ئه‌گه‌ر ناڕه‌زایه‌تیه کۆمه‌ڵایه‌تی و سیاسی و ئابوریه‌کان ببێته قه‌یران و ڕۆژانه ڕوبه‌ڕوی ئۆپۆزیسیۆنێکی کاراو ناڕه‌زاییه جه‌ماوه‌ریه‌کان ببنه‌وه ئه‌وا وه‌ک ئێستا کێچ ده‌که‌وێته که‌وڵیان و شه‌لم کوێرم ناپارێزم به ئاگرو ئاسن و توندوتیژی وه‌ڵامی ئۆپۆزیسیۆن و ناڕه‌زایه‌تیه جه‌ماوه‌ریه‌کان ده‌ده‌نه‌وه.
هه‌ڵبژاردنی دیالۆگ یان تووندووتیژی له لایه‌ن ده‌سه‌ڵاته‌وه کارێکی ئاسان نیه و هیچ کاتێک ده‌سه‌ڵات ناتوانێت یه‌کێکیان هه‌ڵبژێرێت، به ئاشتی و ئارامی و دیموکراسی و ده‌نگدان له ژێر هه‌ل و مه‌رجێکی سیاسی ڕاسته‌قینه‌دا جه‌ماوه‌ر سزای ده‌سه‌ڵات ده‌دات و ده‌ستیان له حوکم و بنی هه‌مانه‌که‌وه ده‌رده‌چێت ، چونکه یه‌کێتی و پارتی له ماوه‌ی بیست ساڵی ڕابوردودا کارێکی وایان نه‌کرد که‌وا جه‌ماوه‌ر لێیان ڕازی بێت و سزایان نه‌دات، به پێچه‌وانه‌شه‌وه ئه‌گه‌ر به ته‌نها ئیختیاری زه‌بروزه‌نگ و توندوتیژیش بکه‌ن ئه‌وا جه‌ماوه‌ر لێیان خۆش نابێت و کاره‌ساته‌که قوڵترو گه‌وره‌ترو خراپتر ده‌کات و چاره‌نوسیان له‌و حوکم ده‌سه‌ڵاتانه‌ی ڕۆژهه‌ڵاتی ناوه‌ڕاست باشتر نابێت که‌وا فه‌شه‌لیان هێناو سه‌رکه‌وتوو نه‌بوون له ته‌راتێن کردن له نێوان توندوتیژی و دیالۆگ دا، که‌واته باشتره ده‌سه‌ڵات له نێوان تووندوتیژی و دیالۆگ دا ڕۆشتن هه‌ڵبژێڕێت.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
