خەونی شاعیرانەی ئاشتەوایی و یەکێتی پارتەکانی ئۆپۆزسیۆن

Thursday, 22/03/2018, 0:56

لەم ماوانەی دوایدا زۆر دەستپێشخەری و دەنگ بەرز دەبێتەوە، بۆ پێک هێنانی بلۆکی سیاسی و ئاشتەوایی لایەنەکانی دەرەوەی دەسەڵات و هاوپەیمانی نێوان هەندێک پارتی سیاسی، بۆ ئەوەی کۆتایی بە هەیمەنەی پارتی وبنەماڵەی بارزانی بهێنن لە کوردستان، کە زۆرجار بە چەسپ یەکێتی و بنەماڵەی تاڵەبانیش بە پرۆسەی کۆتایی پێ هێنانەکەوە دەنوسێنن، جار جارەش چەسپەکە حوکمی نامێنێت و پێکەوە نووسانەکە هەڵەوەشێتەوە، لێرەدا دەمەوێت بپرسم ئەم داواکارییە خەونە یان واقعە؟ هەرچەندە هەمومان هەمان خەومان هەیە و دەمانەوێت کۆتایی بەو تارماییە بێت کە 27 ساڵە شەو رۆژ لە بەرچاومانن، دەمانەوێت پشوییەک کاتیش بێت لە ژێر وێنەو تارمایەک دیکە بدەین.
دیارە ململانێی ئەم پارتانە لە کوردستان لەسەر بنچینەی دروشمی باوەکەی داواکاری خەڵک دادپەروەری کۆمەڵایەتی و دابەشکردنەوەی سەروەت و سامان بەسەر کۆمەڵگادا نییە، زیاتر بۆ دابەشکردنەوەی ئیمتیازاتی سیاسیە لە کوردستان بە تایبەتیش هەیمەنەی سیاسی لە پارێزگای سلێمانی، باشترین نموونە یەکەم یاسای پەسەندکراوی ئەم خولەی پەرلەمان یاسای بودجەی حیزبەکان بوو ، زۆرترین رێژەی بودجەی بۆ دیاریکرا کە زۆر زیاتر بوو لە 1٪ ی داهاتی نەتەوەیی کوردستان، رێژەی وا لە جیهاندا بوونی نییە.
گەندەڵی و ناعەدالەتی لەو رۆژەوە ئەنجام نادرێت کە ئەوان ملی رێگایەکی دیکەیان گرتۆتە بەر کە ناوی ئۆپۆزسیۆنە، بەڵکە لە ساڵی 1991ەوە ئەم دیاردەیە بوونی هەیە، زۆرجارانیش ئەوانەی باسی گەندەڵی دەکەن پێش وەزیفەی ئێستایان بەشێک بوونە لە  پرۆسەی گەندەڵیەکە، کە ئەوکات بە ئەندازەی داهاتی نەتەوەیی کوردستان قێزەونتر بوو لە ئێستا، وە ئەم لایەنە سیاسیانەی کوردستان جگە لە باڵەکانی پکک و حککع  ئەوانی دیکە  هەموو بەشێک بوونە لەم پرۆسەی سیاسیەو پریشکی گەندەڵی و نادادپەروەریان بە بارستایی خۆیان بەرکەوتووە، لە تۆپباراندا مرۆڤی باڵا بەرزو پان و پۆڕ پارچەی زیاتری بەر دەکەوێت.
ئایا ئەم لایەنانە  دەتوانن ئاشتەوایی هەمیشەیی لە نێوان خۆیان پێک بهێنن، بە تایبەت " گۆڕان و هاوپەیمانی و  ینک و نەوەی نوێ" هەرچەندە  وتەیەک نا فەرمی باوی ناو کۆنە سیاسیەکان هەیە دەڵێت: هەر چواریان سەرێکیان لە باخەڵی دلێری سەید مەجیدە؟.
من پێم وایە خەونە باس لەوە بکرێت ئەم 4 لایەنە  نزیک ببنەوەو کۆتایی بە بەرامبەر کێ بهێنن لە پرۆسەی هەڵبژاردندا، چونکە ئەوە کۆتایی دوو هێزە نوێکەیە گەڕانەوەیە بۆ خاڵی سفر، تەنانەت ئەگەر ینک  یشیان لێ داببڕیت، 3 لایەنەکەی  دیکە ناتوانن بە ئاشتەوایی  لە نێوان خۆیان پرۆسەی هەلبژاردن تێپەڕێنن، چونکە ئەمان کار لەسەر رێژەیەکی  دەنگی دیاریکراو دەکەن کە ئەویش دەنگی ینک ی جاران و ، دواتر  ینک - گۆڕان ە، هەر لایەک لەوان دەیانەوێت گەورەترین پارچەیان لەو کەعەکە بەر بکەوێت، بۆیە پێویستیان بەوەیە لاینی بەرامبەر تێک بشکێنن، هاوکات تایبتمەندی هێزی پۆپۆلیست ئەوەیە، هانا بۆ گوتاری رۆمانسی تێکشکێنەر ببات،  نێچیری ئەوان رێژەیەک دەنگی دیاریکراوە دەبێت شەڕی مان و نەمان  بکەن بۆ ئەوەی زۆرترین پشکیان لێ بەر بکەوێت، بەرهەم ساڵەح  خۆی بە نەوەی سیاسی مام جەلال دەزانێت، بە کۆچی دوایی کاک نەوشیروان گۆڕان کاریگەری لەسەر بنکەی ینک  نەما، ئێستا ئەم پیاوە کاریگەرە، وە تموحاتی سیاسی  لە بنکەی ینک یش  تێپەڕی  کردووە، وەکو سیاسیەکی پراگماتیک دەیەوێت لە سنوری دەنگدەرانی ینک  بپەڕێتەوە  بۆ  دەنگی گۆڕان و ئیسلامیەکان"ئەمەیان زەحمەتە" بۆ دەنگدەرانی زەحمەتکێش و شیوعی و  ..... تەنانەت پارتیش.
هەرچی نەوەی نوێیە کار لەسەر دەنگدەرانی  گۆڕان دەکات بە تایبەتی، شاسوار عەبدالواحێد تەنانەت جل و بەرگی نەوشیروانانەو رەنگی مۆریش دەپۆشێت، ئەوەندەی خەریکی رەنگ و دەنگی گۆڕانە ئەوەندە ریکلام بۆ رەنگ و ئارمی خۆی ناکات، هەرچەندە ئەو لە بیری چووە کەسایەتیەکان لە مێژوودا وەک خۆیان دوبارە نابنەوە، ئەگەر ببنەوەش لە بری تراژیدیا دەبنە کۆمیدی، بۆیە خەونی ئاشتەوایی گۆڕان و  نەوەی نوێ، خەونێکی شاعیرانەیە.
 شەڕی ئەمان وەک سێ پارتی پۆپۆلیستی هەڵبژاردن بۆ میراتی کورسیەکانی تاڵەبانی و  نەوشیروان مستەفایە، تاکە رێگا بۆ رێگا گرتن لەم شەڕە دابەزین بوو بە یەک لیستی هەڵبژاردن، ئەویش نە هێزە کۆنەکان ئامادەن دەستبەرداری کورسیەکانیان بن، نە تازەکانیش بە پشکی ئەوان رازی دەبن، نە تموحاتە سیاسیەکەشیان بەو پشکەی بۆیان دیاریدەکرێت  ئاو دەخواتەوە، ئەمان لە خەونی بوونە مەلیکدان نەک دروستکەری مەلیک  وەک نەوشیروان مستەفا، بۆیە ناتوانن بە پرۆسەکە پۆپۆلستیەکەی ئەو هەمان رۆڵ بگێڕنەوە.
هێشتا نەگەیشتوینەتە قۆناغی بانگەشەی هەڵبژاردن، دەکرێت لە  ئێستادا هودنەو بێدەنگیەک هەست پێبکەین، حیوار و دانیشتن و بەیان دەرکردن و لیست دروستکردن لە ناوچەکانی دەرەوەی هەرێم، رێگا هێشتا کراوە بێت بۆ سوڵحە خەیاڵیەکان رۆشتبیرەکان، کە ئەوانیش زۆرجار لە رێگای ئەو سوڵح و پیاوچاکیانەوە بەدوای پارچە کەعەکی خۆیانەوەن، وەلێ لە قۆناغی بانگەشەی هەڵبژاردن شەڕە سەختەکەی پۆپۆلیستەکان کە زیاتر گرایشی راستگەرایانەیان هەیە لە کوردستان، دەبێت شەڕی ئێسک شکاندن یەکتر، شەڕێکی وا کڵاوی ناوبژیوانکەر دەبات، بۆیە ئەوانەی  پێیان وایە دەتوانن رۆڵی پیاوچاکی لەو نێوەدا بگێڕن، ئەگەری زۆرە بەر پروشکی ئاگرەکە بکەون، چونکە شەڕی پۆپۆلیستەکان زیاتر شەڕی ئەخلاقیە نەک  شەڕی دابەشکردنەەی سەروەت و سامان، ئەمەی لە کوردستان هەیە رەوتێکی پۆپۆلستی راستگەرایانەیە نەک پۆپۆلستیەکی چەپگەرایانە، خەون بۆ سکی هاووڵاتیانەوە ببینێت، ئەمان خەون بە کورسی و ئیمتیازاتەوە دەبینن، ئاخر هەر یەکێک  لەم لایەنانە کۆمپانیای زەبلاح  لە پشتیانەوەن و ناتوانن شەڕی ئەخلاقی بگوازنەوە  بۆ شەڕی چینایەتی  و دابەشکردنەوەی سەروەت سامان.
تەڵەی پۆسیدیدس تەنها بۆ ئەسینا و ئەسپەرتە، چین و ئەمەریکا لە ئێستادا راست نییە، شەڕ لە نێوان هێزی باڵا دەستی جیهانی و بەهێز بووی جیهانی روبدات، تازە سەری کۆن بخوات،  وەک لە مێژوودا لە کۆی 16 جێگۆڕکێی هێز 12 جار بەهێز یەکلا کراوەتەوە لە نێوان کۆن و نوێدا، ئەمە بۆ هەرێم و شارێکیش راستە، ینک دەیەویست باڵادەستی پارتی کۆتایی پێ بهێنێت لە باشوری کوردستان، وەلێ پارتەکەی خۆی تەقیەوە بۆ چوار پارچە و ئەگەری تەقینەوەی زیاتریش هەیە لە داهاتوو، چونکە پۆپۆلیزم چارەنووسی زۆریان تەقینەوە بوو نەک کۆکەرەوە، شەڕی ئەم لایەنانە لەسەر سلێمانیە  لە ئێستادا، هەولێر و دهۆک بۆ پارتی لەم قۆناغەدا پارێزراوە، کەرکوک و خانەقین و دوزیش بۆ ینک، هەڵەبجەش بەهۆی هژمۆنیای ئیسلامیەکانەوە ئەستەمە یەکلا بکرێتەوە بە سانایی، بۆیە شەڕی قورس لەم هەڵبژاردنە  لەسەر بەدەستخستنی سلێمانیە لە هەنووکەدا، ینک و گۆڕان بە سانایی دەستبەرداری نابن بۆ دوو هێزە تازەکەی لێیان بونەتەوە" هاوپەیمانی -نەوەی نوێ"،  وەک چۆن لە نۆ ساڵی رابردوو ینک و گۆڕان ئەم شەڕەیان کردو درەنگانێک ینک رازی بوو بە واقعی نوێ و دەستبەرداری باڵا دەستی بوو بەشێوەی ئاشتیانە، بۆیە لە چاوەڕوانی بانگەشەیەکی هەڵبژاردنی واداین خەونی رۆشنبیرە  وردە بۆرژواکان لە جەنگە ئەخلاقیەکاندا دەخنکێن، ئەگەریش پرشکی گڕاویان بەر نەکەوێت چونکە کە  شەڕ هەڵسا  ئەوانیش لە پیاو چاکەوە دەبنە لایەندار و ئەرک بەڕێکەر، جەنگاوەری شەڕی ئەخلاقی بێلایەنی و پیاوچاکی ناوێت تەنها جەنگاوەری شەڕکەری مەیدانی  دەوێت، چونکە شەڕەکە کورت  ماوەیەو  کاتی زۆریان لەبەردەست نییە بۆ پیاوچاکی و گفتوگۆو سوڵح کردن، ئەو مانگە دەبێت شەڕی خۆیان بکەن و کۆتایی پێ بهێنن، دەستپێکردن و کۆتایی کاتەکەی نراوەتەوە، پێویستی بە پیاوچاک و نێوەنجی گەر نییە.