پەیکەری چاوەڕوانی

Thursday, 18/12/2014, 12:00

خۆشەویستم

هیواکانم

لەچەشنی دار و بەرد

تێکەڵاو بوون

ئێستاکە هیچ کامیان

شفرەی ئەم ژیانە ناکەنەوە

لەم کتێبی گومانە

کام درەخت ئەبێتە سێبەر

بۆ حیکایەتەکانم

تا لە دەمی وەریندا

لە شوێنی گەڵاکانی من هەڵوەرم

نازانم

چ (با)یەک

جانتای غیرەت ئەکاتە شان و

پشکۆی بیرکردنی تۆ ..

لە مندا ئەکوژێنێتەوە

چاوەڕێم

وەک هەمو ئەو فاریزانەی

چاوەڕوان بوون بگەنە خاڵەکان و

نەگەیشتن

خۆشەویستم

تکا ئەکەم

گه ر ناتوانی دیەبی گەڕانەوەت

بدەیتە بەر تیشکی چاوم

وەک مۆمی ژوورەکەت

پەیکەرێک

بۆ چاوەڕوانیم بتاشە

تاکو چیتر

نەبمە پاسەوانی تەنیایی.




سوزى بابانى