ئایا لە هەرێمى كوردستان ئابوورى و تەندروستى و پەروەردە بوونیان هەیە

Monday, 10/10/2011, 12:00

ئاشكرایە لە هەموو دونیادا (پەروەردە .. تەندروستى .. ئابوورى) پێگەى هەرە گرنگن بۆ بونیادنانى دەولەت و پێگەیاندن و دروستكردنى كومەلگایەكى پێشكەوتوو , بەلام جێگاى داخە ئەم سێ پێگەیە لە ولاتى ئێمەدا نەك تەنانەت بونیان نیە بەڵكو بوونەتە پێگەى دزى و گەندەڵى و مشە خۆرى ,

ئابوورى كە پێگەیەكى دیكەى گرنگى بونیادنانى هەر ولاتێكە , بەلام جێگەى داخە ئەمرو لە ولاتى ئێمەدا هیچ بوون و گرنگى نیە و نەماوە , ئەگەر سەرنج بدەینە بوار ى ئابوورى و بازرگانى ئەمرۆى هەرێمى كوردستان دەبینین لە و پەرى خراپى و لاوازیدایە , لەبەر ئەوەى تەواوى بازار و بازرگانیكردن و هێنانى كەل و پەلى خواردن لەلایەن چەندكەسانێكى بالا دەست كۆنترول كراوە , كوردستان كەى گەیشتە ئەو رادەیە میوە و سەوزایى لەدەرەوە هاوردە بكات , لەكاتێكدا كوردستان كە یەكێكە لەهەرێمە هەرە گرنگەكانى ناوچەكە لەرووى كشت و كاڵ و بەرهەمهێنانى بەروبوومى كشت و كاڵیەوە بەرهەم و بەرووبومى خۆى رەوانەى ولاتانى دەووروبەر دەكرد , بەلام جێگاى داخە ئەم كەرتەش رۆڵ و گرنگى خۆى لەدەست داوە لەسایەى ئەو مافیایەى ئەمرۆ دەستى بەسەر ئەم كەرتەدا گرتووە .
بوار یان پێگەى تەندروستى ئەمرۆى هەرێمى كوردستان لەو پەرى لاوازیدایە و لە لایەن حكومەتەوە هیچ گرنگیێكى پێ نەدراوە و نادرێت و ئەو كەسانەى سەرپەرشتى ئەم كەرتە گرنگە دەكەن لە وەزیر و بەرێَوەبەرە گشتیەكانى فەرمانگە تەندروستیەكان و چەندەها كەسانى تر كەبوونەتە مافیا و بازرگان و لەسەر حسابى ژیان و تەندروستى هاولاتیان كەوتوونەتە خۆ دەولەمەندكردن لە رێگاى بازرگانیكردن بە داوو دەرمان و كەرەستەى پزیشكى ئێكسپایەر و بەكار هێنانى كەرەستەى نەخۆشخانەكان لە عیادە ئەهلیەكان و بازرگانیكردن بە ئامێرە پزیشكیەكان لە ناو نەخۆشخانەكاندا و كردنەوەى نەخۆشخانە ئەهلیەكان و هێنانى دكتورە فاشیل و بێ ئەزموونەكان لە ولاتانى دەورووبەر بەمەبەستى بازرگانیكردن بە گیان و ژیانى هاولاتیان و چەندەها كارى تر كە هەر هەمووى لەسەر حسابى ژیان و تەندروستى هاولاتیانە , بەڵگەش بۆ ئەو رێژە بەرزەى مردنى هاولاتیانە .
بوارى پەروەردە و خوێندنیش بەداخەوە رۆژ لەدواى رۆژ بەرەو خراپى دەروات لەئەنجامى بریارە نابەجێكانى جەنابى وەزیرى بێ ئەزموون و هاوردەكراوى ئەمروى هەرێمى كوردستان و كە هەر روژەى بریارێك دەردەكات و هەر ساڵ سیستەم و جۆرو شێوازێكى نوێ ى خوێندنمان بۆ دادەرێژێت بەناوى جۆرەها سیستەم وەكو سویدى و هولەندى ..... هتد !!! كەنەك تەنانەت لە بەرژەوەندى بوارى پەروەردەییدا نیە بەلكو كارتێكردنێكى زۆرى لەسەر ئاستى قوتابیان و خوێندنیش هەیە .
بۆ نموونە بەر لەچەند روژێك گوێم لە بریارێك بوو كە هەر پەیوەندى بە بوارى پەروەردەییەوە هەیە و ئەگەر بەهەڵەدا نەچووبم لە لایەن وەزارەتى خوێندنى بالاوە دەركراوە , گوایە ئەگەر تەمەنى قوتابى نەگاتە 25 ساڵ لە كۆلیژەكان وەرناگیرێت , واتە لە 25 سالیەوە قوتابى لە كولیژەكان وەردەگیرین , واتە دواى تەواو كردنى ئامادەیى كەئەو كات تەمەنى قوتابى 18 سالە پێویستە 7 ساڵى رەبەق دابنیشێ و چاوەرێ بكات تا تەمەنى دەگاتە 25 ساڵ و دواتر داواكارى وەرگرتن پێشكەش بە زانكۆ بكات , ئایا ئەو بلیمەتەى ئەم بریارەى دەركردوە بیرى لەوە نە كردۆتەوە دواى 7 سال قوتابى چ هەوەسێكى بۆ خوێندن دەمێنێت , بە دیدى من ئەم بریار ە ئەگەر راست بێت بۆ دوو هۆ دەگەرێتەوە .
1- ناچار كردنى قوتابیە بۆ ئەوەى لە كۆلیژە ئەهلیەكان كە هى خودى بەرپرس و ملهورەكانى ئەمروى هەرێمە و بەپارە بخوێنێت .
2- خۆ رزگاركردن و گوایە چارەسەركردنى كێشەى دامەزراندنە , كە ئەمرۆ رێژەیەكى زۆرى دەرچووى زانكۆ و پەیمانگاكان بێ كارن و دەرفەتى دامەزراندنیان نى یە .
ئەمە كورتەیەك بوو لەسەر لاوازى ئەو سێ پێگە گرنگەى بونیادنانى كومەڵگا , بێگومان ئەگەر بێت و بەدرێژى باس لە چۆنیێتى و لاوازى ئەو سێ پێگەیەى ئەمرۆى هەرێمى كوردستان بكەین , ئەوا بە دوو بابەت و سێ بابەت و چەند لێكولینەوەیەك كۆتایى نایێت , لەبەر ئەوەى زۆر هەڵدەگرێت , بەلام دەپرسین ئایا كێ بەرپرسە لە لاوازى ئەم سێ پێگە گرنگە و هەروەها كێ بەرپرسە لە چارەسەركردنیان ؟؟؟؟ لەكاتێكدا سەرانى كوردو بەناو خەمخۆرانى گەل و ولات لە گوێ گادا نووستوون و تەنها و تەنها خەریكى خۆ دەوڵەمەندكردن و بەهێزكردنى پێگەى گەندەڵى و لاواز كردنى ئەم پێگانەن كەلەسەرەوە باسم لێكردن .. بەلام با لەبیرمان نەچێت هەر فیرعەونێك موسایەكى دەبێت ....