(ئەم تراژیدی و کارەساتەی کە لەباشوور هەیە، لەهەر جێگایەک و ووڵاتێکی تر بوایە بێگومان لە تاکێکێکی کۆمەڵگا تاکوو ئاستی هەرە باڵا خاوەن هەڵوێستێکی سیاسی نیشتمانی و ئینسانی دەبوو هەموو کەسێک خۆی بەرپرسیار دەبینی بۆ گۆڕانکاری).

ئەو قۆناغە سەختەی باشوور تێدا دەگوزەرێت دەرئەنجامی بێ بەرپرسیاری و نەبوونی ئیرادەیەکی سەربەخۆ و سیاسی و نیشتمانی نەتەوەی و دیموکراتیە. لە باشوور هەر ڕۆژ گرفت و کێشەی نوێ سەرهەڵدەدات و بەردەوام بەرەو توونێلێکی تاریک هەنگاو دەنێ، بێ ئەوەی هیچ هێز و لایەنێک خاوەن هەڵوێستێکی ڕوون بێت، ئەوەندەی گیرۆدەی شتی ڕۆژانەی و بێ بەهاکان ئەوەندەی تۆزێک لە خەمی داهاتووی خەڵک و هەرێمدا نین، بێباکانە هەڵسووکەوت دەکەن وەک ئەوەی ووڵات شامی شەریف بێت، نایەنەوێت ئەو بازاڕە سیاسیەی خوڵقاوە لەدەستی بدەن، بۆئەوە هەموو لە شەڕی دەسەڵات و بەرژەوەندی خۆیاندا سەرمەستن و بۆ بەرژەوەندی بچووکی خۆیان  ملشکاندنی یەکتری ئەسپی خۆیان تاودەدەن، خەڵکیش لەنێوان بەردەشی ململانێکانیان زۆر بێبەزیانە دەهاڕن.

بۆیە هەر ڕۆژ بە شێوەیەک تراژیدیایەکی ترسناک کاولکاری و داروخان و پەرتەوازەی و کوشتووکوشتار تیرۆر پەیڕەو دەکرێت، لەهەر کوچەوکۆڵانێک بە هۆی کێشەی کۆمەڵایەتی وخێزانی ماددی و لەژێر ناوی شەرەف و  ناکۆکی کەسێتی خوێن دەڕێژرێت، بێ هیچ سڵمینەوەیەک بەرامبەر بە دامەزراوە حوکمیەکان، لە زۆر کاتیش دامەزراوە حوکمیەکان ناتوان ڕۆڵی خۆیان بگێڕن بە هۆکاری دەستوەردانی دەسەڵاتی حزبی، لەگەڵ ئەوەدا دەیان هەزار هێزی چەکداری جیاوازیان بنیاتناوە لە ژێرناوی پاراستنی نیشتمان و خەڵکدا، کە خزمەت بەبەرژوەندی حزب دەکەن،لەسەر ئەم هەموو هێزە چەکدارانەی لە ژێر ناوی لیواو دژەتیرۆر و کۆماندۆ و زرێڤانی و ئاسیش و یەکەیی حەفتا و هەشتا و تاکوو دوایی بۆ مانەوەی دەسەڵاتی خۆیان بەکاریان دێنن، لەئەرکی پاراستنی نیشتمانی دابڕێنراون، بۆیە قافڵای سوپای داگیرکەر شار و شارۆچکە و گوند داگیردەکەن، ئەم هێزە نیشتمانیە دروستکراوانە کە زۆرینەی سەرمایەی ووڵاتیان بۆ تەرخانکراوە، نەک خاوەن هەڵوێست نین بەڵکوو بێدەنگیشن، ئەمە لەلایەک لەلایەکی ترەوە بەدەیان دەزگایی تەنهایی و ئاسیشیان هەیە، بەڵام ڕۆژ نییە دەیان کەس بە هۆکاری کۆمەڵایەتی و جیاوازی ڕەگەزی و فکر و سیاسی ڕووبەڕووی تیرۆری فزیکی کەسێتی نەبێتەوە، ئەم دەزگایانە هیچ ڕۆڵیان نییە، بەڵکوو گەر بیانەوێت دەستوەردان بکەن تووشی لێپرسینەوەی حزب و دەسەڵات دەبن ڕێگایان پێ نادرێت. داڕشتنی چەندین سینارۆی داتاشراو لەلایەن حزبەوە ئامادە دەکرێت و لە ژێرناوی دادگا و سەروەری یاسادا لە دادگاکانی حوکمیدا ڕەوایەتی پێدەدرێت لە بەرژەوەندی حزب و بنەماڵەکانیان، ئەم دەزگایەنە نەک ڕووڵماڵی ڕاستی و دروستی ڕوداوەکان ناکەن، بەڵکوو وەک بەشێک بۆ بەرژەوەندی حزبی و دەسەڵات بەگەڕخراون. بۆیە کەڵەکەبوونی هەموو ئەم کێشە سیاسی ئابووری و کۆمەڵایەتی و ئیداری و ئازادی و دیموکراتی و نەبوونی چارەسەریەکی مایندە  ئەم تراژیدیا ترسناکەی خوڵقاندووە. 

لەسەر ئیفلج بوونی هەموو جومگەکانی ئیداری سیاسی و کۆمەڵایەتی، کەسێک و لایەنێک نییە خۆی بەرپرسیار ببینی لەبەرامبەریدا، کوشتنی خەڵکی مەدەنی داگیرکاری و  تیرۆر بە سیتەماتیک پەیڕەو دەکرێت، خاوەنی هەڵوێست و دەنگێکی جوامێرانە نابینین. کە پێداگری بکات لەسەر چارەسەری کۆی کێشەکان. بۆیە زیاتر لە داڕمان و لەناوچوون خودی ئەو تراژیدیا سامناکەیە کە بەرۆکی باشووری گرتووە و هیچ هیوایەک و تروسکایەک نییە کە کۆمەڵگا و خەڵک هیوایەکی لە سەر هەڵچنن و لەگەڵ ئەوەشدا بێ ئیرادەی باڵی بەسەر تەواوی کۆمەڵگای کوردیدا گرتووە، کە ڕۆژانە مردنی خۆی تێدا دەبینێت. لەوە خراپتر ئەوەی دەگوزەرێت وەک ئاسایی و بە هۆکاری بێ بنەما هەڵسەنگاندن و نرخاندێکی سوکی بۆ دەکرێت، کە ئەم هەڵوێستە لە خۆیدا داڕمانی هەموو بەها نیشتمانی و ئەخلاقی و ئازادی و مرۆڤ و کۆمەڵگایە.ئەگەر چی هەندێک هەڵوێست یان دەنگێک هەبێت بەرامبەر بە داگیرکار و  تیرۆر  و کوژرانی دەیان کەسی مەدەنی لە ژێر ناوی جیاواز، بەڵام چونکە ڕێکخراوی نییە بێ ئەنجام دەبێت و  هیچ لە قورسایی ئەم دۆخە ناگۆڕێت، بەڵکوو دەبینن ڕۆژ بە ڕۆژ بەرفراوان دەبێت و هیچ سنورێک ناناسێت.

تیرۆر داگیرکار شکاندی ئیرادە سێدارە لە هەر چوار پارچەی کوردستان  بە شێوەیەکی بەرفراوان بێ هیچ ئەخلاقێکی سەربازی و سیاسی پەرەدەسێنێت لە دژی گەلی کورد، جیهان و سیاسیەتی نێودەوڵەتی بێ هەڵوێستن و خۆیان نابیناکردووە و لەبەرژەوەندیان نییە دەنگی خۆیان بڵند بکەن، ستاتۆیەی باشووریش کە وەک هیوایەک بوو بۆ هەرچوارپارچە بەرهەمی سەدساڵ تێکۆشینی گەلی کوردە ئەمڕۆ بۆتە ناوەندی قێزەوەترین سیاسەتی خۆی کورد زیاتر لە هیوای داهاتوو بۆتە ناوەنی تێکشکاندن و بە بادانی هەموو ڕەنج و تێکۆشانی گەلی کورد، لەجیاتی بونیادنانی سیاسەتی ئاقڵانی و خزمەتکردن و بە دامەزراوەکردنی سیاسەتی نەتەوەی و دیموکراتی و حزبی و دادی کۆمەڵایەتی و ئازادی،حزب و پارتە سیاسیەکان خەریکی سیاسەتی مل شکاندن و لەناوبردنی یەکترین لەسەر فۆرمیلەی کوردایەتی و دەوڵەتداری و میراسی خۆێن ڕەنجی گەلێک بە با دەدەن.  

باشووری کوردستانی بۆتە گۆڕەپانی شەڕ و لە هەر شوێن و جێگایەک داگیرکەر  چی بووێت بە هاوکاری خیانەتکاران پرۆژەکانی جێبەجێ دەکات لە داگیرکاری هەتاکوو تیرۆر و کوشتن و سوتاندن شاخ و دەشت و دار و کاولکاری ئەنجام دەدات، بێ ئەوەی دەسەڵات و حزبە سیاسیەکان هیچ ووشەیەک بڵێن و باکیان هەبێت پێی، تەنیا ئەوەنەبێت لە ژێر ناوی جیاواز و سینارۆی جیاواز بە ناوی دەزگایەک ڕەوایەتی بە هێرشکان دەدرێت. لەم سەروبەندە دەبینین هەموو لە هەوڵی کورسی و بەرژەوەندی خۆیاندان لە میدیاکاندا خۆیان وەک فریادڕەس دەبین لە کاتێک ناوچەکە بە قۆناغێکی دژوارو گۆڕانکاریدا گوزەرە دەکات، ئەم حزبانە تەنیا لە ناوچە و شارێک خۆیان قەتیس کردوە.