پەكەكە وەك خۆی...!
Thursday, 27/11/2014, 12:00
لەیادی 36ساڵەى دامەزراندنی پەكەكە و 41 ساڵەى تەڤگەرى ئاپۆچیدا
-------------------------------------
تەڤگەری پارتی كرێكارانی كوردستان (پەكەكە)؛ وەك تەڤگەرێكی ئازاد و سەربەخۆی گەلی كوردستان، بەهەموو رەهەندەكانییەوە، تێكۆشانی ئازادیخوازانەی خۆی گەشەپێدەدات. سەرەتا لەساڵانی (1973 ـــ 1976)دا لە ئەنقەرەوە یەكەم چەخماخەی ئەو تێكۆشانە دەبریسكێتەوە، پاشان بەرەو باكووری كوردستان هەنگاو دەنێت، لە(1)ی تەمموزی(1979)دا رێبەر ئاپۆ كۆچی مێژوویی خۆی بەرەو باشووری رۆژئاوا و سوریا و لوبنان دەستپێدەكات و لە كەمپێكی تێكۆشەرە فەلەستینییەكاندا دەگیرسێتەوە. لەوێوە، لەنێو دۆخێكی دژوار و بێتوانستیدا توانست و دەرفەت بۆ تەڤگەرەكە دەخوڵقێنێ. بەمەش تەڤگەری (پەكەكە) لەنێو كوردانی باشووری رۆژئاوای كوردستان و سوریا و لوبنان و وڵاتە عەرەبییەكانی دیكە و لەگەڵیشیدا لەوڵاتانی خۆرئاوا و جوگرافیا دوورەكانی دیكەدا تێكۆشان بەرزدەكاتەوە و بیر و هوشیاری و رێكخستنی نەتەوەیی دەژێنێتەوە و پانتایی شۆڕشی ژیانەوە فراوانتر دەكات. لەسەرەتای هەشتاكاندا یەكەمین هەنگاو لەسەر رێی "گەڕانەوە بۆ وڵات" دەهاوێژێت و لەسەر سنووری دروستكراوی نێوان باكوور ـــ باشووردا یەكینەكانی گەریلا جێگیر دەبن. بەمەش یەكەم پەیوەندی لەگەڵ خەڵكی باشووری كوردستاندا دەبەستێت و خۆی بەخەڵكانێكی ئەم پارچەیە دەناسێنێت. هەر لەسەر ئەو سنوورەدا ئامادەكاری تەقاندنی یەكەم فیشەكی ئازادی ئەنجامدەدرێت و لە(15)ی ئابی(1984)دا بەتەقاندنی یەكەم فیشەك بڕیاری ژیانێكی ئازاد دەگاتە لوتكە.
لەكۆتایی هەشتاكان و سەرەتای نەوەدەكاندا گەل بەسەرهەڵدانی جەماوەرییانەی خۆی وەڵامی قەڵەمبازە مێژووییەكەی گەریلا دەداتەوە. بەمەش تەڤگەری (پەكەكە) گەوهەری گەلەرییانەی دەردەكەوێتە پێش و گەل و گەریلا ئاوێتەی یەكدی دەبن. لێرەوە سەرەتای پیلانگێڕییە نێودەوڵەتییەكان، بەپشتیوانی داگیركەران و هێزە میللیگەرا و بەكرێگیراوەكان، دەستپێدەكات، باشووری كوردستان دەكرێتە گۆڕەپانی پیلانگێڕییەكان و تەڵەزگەیەكی پرمەترسیدار...!! بەڵام تەڤگەری پەكەكە دەستبەرداری ئیرادەی سەربەخۆ و رۆحی نەتەوەیی ـــ دیموكراتییانەی خۆی نابێت و لەم پێناوەدا قورسترین قوربانی خۆی دەدات و بەدروشمی "باكوور، باشوور، رۆژهەڵات، یەك وڵات و یەك خەبات" لەم پارچەیەدا گوڕ بەتێكۆشانی نەتەوەیی و دیموكراتییانەی خۆی دەدات و هەر لە نەوەدەكاندا بە فەلسەفە و هزری ئازادیخوازانەی خۆی دەپەڕێتەوە رۆژهەڵاتی كوردستان و لەكۆتایی نەوەدەكانیشدا تێكۆشانی خۆی لەم پارچەیەشدا دەگەیێنێتە ئاستێكی جەماوەری بەهێز. لەنەوەدەكانیش بەدواوە، لەگەڵ بەرزبوونەوەی رۆح و هزر و تێكۆشانی نەتەوەیی ـــ دیموكراتییانەی خۆیدا لەدامەزراندن و لەپێكهێنانی دەزگا نەتەوەییەكانی دەدات و پرۆسەی بەگەلبوون و نەتەوەییبوونی گەلی كورد دەگەیەنێتە ئاستێكی شكۆدار.
ئیدی شۆڕشی ژیانەوە بەدەستكەوت و بەهایەكی پڕ بەبایەخەوە سەردەكەوێت و قۆناخی شۆڕشی دیموكراتی و گەیشتن بەچارەسەری دەكەوێتە رۆژەڤەوە. بەمەش لەسەرەتای نەوەدەكان بەدواوە هەوڵدان بۆ گۆڕانی ستراتیژی تادێت چڕوپڕ و قووڵتر دەبێتەوە و لەكۆتایی سەدەی بیستەم و سەرەتای سەدەی بیست و یەكەمیشدا دەگاتە لوتكەی خۆی. تەڤگەری (پەكەكە) لەگەڵ تێپەڕبوونی هەر قۆناخێكی تێكۆشان و دەستپێكردنی هەر قۆناخێكی دیكەدا نوێبوونەوە و هەڵاوێردی لە سیستەمی فەلسەفی، پارادیگمایی، ئایدیۆلۆژی، سیاسی و ژیان و تێكۆشانی خۆیدا دەكات و پووختی دەكاتەوە. بەمەش تادێت گەوهەر و تایبەتمەندییە هەمەلایەنەكەی خۆی دەردەكەوێتە روو، تا ئەو رادەیەی تەواوی تایبەتمەندێتی و گەوهەری ئازادیخوازانەی خۆی لەچوارچێوەی سیستەمێكی هزری، ژیانیی و تێكۆشاندا بەروونی و زەلالی نیشان بدات، كە سیستەمی كۆنفیدراڵی دیموكراتییە.
بێگومان لەمیانەی هەڵسەنگاندنی مێژووی ئەم تەڤگەرەدا دەرك بەو راستییە دەكرێت كە تەڤگەری (پەكەكە) هەروا بەئاسانی، بەبێ كۆسپ و تەگەرە، كێشە و گرفت قۆناخەكانی تێكۆشانی خۆی نەبڕیوە، بەڵكو رێك بەپێچەوانەوە لەهەر قۆناخێكدا ژان و ئازارێكی بێسنوور، قوربانی و فیداكاری و قارەمانێتییەكی نەوازە، كۆسپ و تەگەرەی تاقەتشكێن، كێشە و گرفتی لەبن نەهاتوو، كەموكوڕی و هەڵەی كوشندە هەبووە، تەنانەت رووبەڕووبوونەوەی چەندین تەڵەزگە و پیلانگێڕی ناوخۆیی، هەرێمی و نێودەوڵەتی بۆتەوە. لەبەرامبەر هەر خیانەتێكی مەزندا، بەرخۆدانێكی مەزنیش ئامادەیە، لەبەرامبەر هەر پیلانگێڕییەكەدا قەڵەمبازێك بەرسڤدارە، لەنێو نەبوونی و بێ توانستییەكی دژواردا باوەڕی و هێز و ئیرادەی ئافراندن و مەزنكردنی توانست و توانستەكان دەردەكەوێتە روو. لەبەرامبەر بێ باوەڕی، بێ هێزی، بێ ئومێدی، بێ چارەییدا، كانگای باوەڕی، هێز، هیوا و توانستی چارەسەری دەتەقێتەوە و ملی رێ دەگرێ و دەهەڕكێت. ئیدی تەڤگەری (پەكەكە) وەك دیجلە و فورات لەكانیاوە رەسەنەكاندا هەڵدەقوڵێ و هیوای ژیانێكی ئازاد لە میزۆپۆتامیای لانكەی لەدایكبوونی مرۆڤایەتییەوە بە گەل، رەگەز و چینە ژێردەستەكان دەبەخشێ و هیچ لەمپەر و كۆسپ و هێزێك ناتوانێت بەربەستی بكات یان لەگەوهەر و تایبەتمەندییە رەسەنەكانی خۆی دووریبخاتەوە. هەڵبەتە لە قووڵبوونەوەبە مێژووی ئەو تەڤگەرەدا نهێنی مانەوە و مەزنبوونی ئەم تەڤگەرە دەردەكەوێتەڕوو، كە لەگەوهەر و تایبەتمەندییەكانی خۆیدا بەرجەستە دەبێت. لەسەرووی هەمووشیانەوە پەیوەستبوونییەتی بە فەلسەفەی ئازادی، ئیرادەی سەربەخۆ، گیانی بەرخۆدان و خۆهێزی و ئافراندنەوە.
باوەڕناكەم بزووتنەوەیەك لەمێژوو و رۆژگاری ئەمڕۆماندا هەبێت هێندەی بزووتنەوەی (پەكەكە) رووبەڕووی پیلانگێڕی و هێرش و شاڵاوی لەناوبردن بووبێتەوە. هەر لەسەرەتای سەرهەڵدانییەوە تاوەكو ئەمڕۆ هەمیشە ئەو بزووتنەوەیە بە مەترسی هەرە مەزن دەبینرێت و هەوڵی لەناوبردنی دەدرێت. هەڵبەتە ئەمەش بێ هۆكار نییە و چەندین هۆكاری هاوبەش و تەنانەت شاراوە لەپشت سەرجەم ئەو پیلانگێڕی و هێرش و شاڵاوانەدا خۆی حەشارداوە. كەواتە ئەو هۆكارانە چیین؟ نهێنی ئەو ترس و فۆبیا مەزنە كە لەبەرامبەر بزووتنەوەی ئاپۆچی و (پەكەكە)دا هەیە چییە؟ ئەگەر هەر لەسەرەتاوە هەوڵی لەناوبردنی ئەو بزووتنەوەیە دەدرێت، بۆچی نەك هەر لەناو نەبردرا، بەڵكو بۆتە گەورەترین بزووتنەوە لەهەر چوار پارچەی كوردستان، تەنانەت بووە بەیەكێك لەگەورەترین بزووتنەوە شۆڕشگێڕییەكانی خۆرهەڵاتی ناوین و جیهان؟ كەواتە نهێنی مەزنبوون و خۆڕاگری (پەكەكە) چییە؟ (پەكەكە) دووژمنی كێیە و كێ دووژمنایەتی (پەكەكە) دەكات؟ جیهانبینی و هەڵوێست و چەمكەكانی (پەكەكە) بۆ ژیان، مێژوو، ئازادی، وڵات، گەل، هزر، ئایدیۆلۆژیا، شۆڕش، تاك، كۆمەڵگا، دەوڵەت، دەسەڵات، خیانەت، وڵاتپارێزی و ...هتد، چییە؟ هەروەها چۆن دەڕوانێتە كێشەی كورد، كێشەی ژن و كێشە مرۆڤایەتییەكانی تر؟ لەم پێناوەدا خاوەن چ پرۆژەیەكی چارەسەرییە؟ (پەكەكە) خاوەن چ سیستەمێكی بیركردنەوە و ژیان و كاركردنە؟ بۆچی ئەو پیلان و هێرش و شاڵاوانەی لەناوبردن سەرەتا "ئۆجەلان" و پاشان (پەكەكە) و گەل دەكەنە ئامانجی خۆیان؟ كەواتە "ئۆجەلان" كێیە و خاوەن چ هزر و فەلسەفە و سیاسەتێكە؟ رۆڵ و پێگەی "ئۆجەلان" لەنێو ئەو بزووتنەوەیەدا چییە؟ لەبەرامبەر هەموو هەوڵەكانی لەناوبردندا، ئاسۆی داهاتووی بزووتنەوەی (پەكەكە) چییە و چۆن دەبێ؟
گومانم نییە كە ئەم پرسیارانە و سەدان پرسیاری تر لەهۆش و هزری ئەو كەسانە دێت و دەچێت كە خوازیارن لەراستینەی ئەوە تێبگەن كە بۆچی هێندە پیلانگێڕی و هێرش و شاڵاو لەدژی (پەكەكە) دەكرێت؟ بۆچی (پەكەكە)ش هێندە خۆڕاگری و بەرخۆدانی دەكات و تادێت هەر هەنگاوی مەزنتر دەهاوێژێت؟
لێرەدا بۆ گەیشتن بە وەڵامی راستی سەرجەم ئەم پرسیارانە و سەدان پرسیاری دیكە دەتوانین پەنا بۆ كلیلی هەموو دەرگاكان ببەین، ئەویش مێژووە، مێژووی خودی بزووتنەوەی (پەكەكە). بەڵام كاتێك دەرگای مێژووی بزووتنەوەی (پەكەكە)ش دەكەینەوە ئەمجارەیان سەدان پرسیاری دیكە رووبەڕووی مرۆڤ دەبێتەوە؛ ئەم بزووتنەوەیە چۆن و كەی و بە چ شێوەیەك لەدایكبووە و دەستی بەجموجۆڵ و تێكۆشان و بەرخۆدان كردووە؟ قۆناخەكانی پێشكەوتنی ئەو بزووتنەوەیە چیین و كەی و چۆن و بە چ شێوەیەك ئەو قۆناخانە بەدوای یەكدا هاتوون؟ چ روویانداوە و چ پێشكەوتنێكیان لەگەڵ خۆیاندا هێناوە؟ كارەكتەرە سەرەكییەكانی هەر قۆناخێك لەو قۆناخانە كێن و خاوەن چ تایبەتمەندی و هەڵسوكەوت و پراكتیكێكن؟ هەر پرسیارێك چەندین كلكە پرسیار و لق و پۆپەی لێدەبێتەوە، لەناواخنی وەڵامی هەر پرسیارێكیشدا چەندین پرسیاری دیكە سەرهەڵدەدەنەوە... لەئاكامدا خۆمان لەنێو دەریایەك پرسیاردا دەبینینەوە، كە دەگەینە وەڵامی هەر پرسیارێك زیاتر سەرسوڕمانی دەمانگرێ و خولیای پرسیاری تر و وەڵامی ترمان لەلا زیاتر دەبێت... ئیدی چەندە لەنێو ئەو مێژووەدا قووڵ دەبینەوە هێندەش سەرسام دەبین، هێندەش لەنهێنی پیلان و هێرش و شاڵاوەكانی نەیارانی تێدەگەین... هێندەش لەنهێنی خۆڕاگری و بەرخۆدان و مەزنبوونەكەی تێدەگەین...
لەمیانەی ئەو قووڵبوونەوەیەدا؛ سەرەتا لەوە تێدەگەین كە بزووتنەوەی (پەكەكە) وەك پشكۆیەك لەژێر خۆڵەمێشی هەزاران ساڵەی مێژوودا خۆی حەشارداوە و هەر پزیسك دەدات، تا لەزەمەنێكی شەوەزەنگی بەستەڵەكگرتوودا بڵێسە دەدات و گڕو كڵپە دەسێنێ و گڕكان ئاسا هەڵدەقوڵێ، هەڵدەقوڵێ و گڕ لەمێژووێكی شووم، لەقەدەرێكی سەپێنراو بەردەدات... مێژووێكی نوێ دەئافرێنێ... ئیدی مێژوو لەسەرووی قەدەرە سەپێنراوەكانەوە رێڕەوی خۆی دەگرێ...
لەم چوارچێوەیەدا؛ كاتێك بە هەگبەیەكی پڕ لەپرس و رامانەوە دەچیتە نێو دەریای مێژووی بزووتنەوەی (پەكەكە)وە، بەسەرهات و رووداوەكان، پێشكەوتن و گۆڕانكارییەكان، پەلكێشی خۆیانت دەكەن و تا قووڵایی مێژووی مرۆڤایەتیت دەبەن، بەجۆش و مۆڕاڵێكی بەرزەوە، بە باوەڕی و ئیرادە و وزەیەكی تۆكمەوە، جارێكی دیكە دەتگەڕێننەوە نێو رۆژگاری ئەمڕۆ، لەبانێژەی ئەمڕۆشەوە ئاسۆی داهاتووێكی پرشنگدارت نیشان دەدەن. بەمەش سەفەر بەنێو ئەو مێژووی (پەكەكە)دا، وەك سەفەرە بەنێو سەمفۆنیایەكی نەمردا، وەك سەفەرە بەنێو رۆمانێكی بێكۆتاییدا، سەفەرە بەنێو شیعرێكی هارمۆنیدا، داستانێكی پڕ لەماجەڕادا... بێگومان وەك چۆن لەپشت ئەو سیمفۆنیایەدا؛ ئۆركسترایەكی مەزن، مایسترۆیەكی دانا، بیسەرێكی عاشق دەبینی، ئەوا مسۆگەر لەناواخنی ئەو رۆمانەدا پاڵەوانەكان، بەمەیل و توانستی خۆیانەوە، لەنێو ناكۆكی و ململانێ دان و تادێت گرێی نێو گرفت و رووداوەكان ئاڵۆز دەبێت و رووەو كردنەوە و چارەسەری دەچێت. هەر بەهەمان شێوەش لەو شیعرەدا لەبری ریتمێكی سواو، پانتاییەكی تاریك، چێژ لە هارمۆنیایەكی هەمەچەشنە و پانتایەكی پڕ لە ئیستاتیك وەردەگریت. كاتێك كە بەپەیژەی رووداوەكانی ئەو داستانەدا هەڵدەزنێی لەپێشتدا حیكایەتخوانێك بەهەموو مەندی و حیكمەتی خۆیەوە، شێڵگیرانە هەوڵدەدات ئاراستەی رووداوەكان بەرەو ئاقاری ئازادی ببات، بە قازانجی هەموو ئەوانەی عاشق و دێوانەی ئازادین بشكێنێتەوە... چونكە بەهانەی یەكەم و كۆتایی بۆ لەدایكبوونی ئەم سیمفۆنیایە، ئەم رۆمانە، ئەم شیعر و داستانە تەنیا و تەنیا ئازادییە...
بۆیە كە مرۆڤ بەنێو ئەو مێژووەدا دەگوزەرێ، بەردەوام گوێت لەو زایەڵەیە دەبێت كە بەنەغمەیەكی پڕ لەسۆزەوە دەچریكێنێ و دەبێژێ:" ئەگەر ژیانێك هەبێت، با بە ئازادی و بۆ ئازادی بێت، ئەگەر مردنێكیش هەبێت، با هەر بە ئازادی و بۆ ئازادی بێت". ئەمە فەلسەفە و كرۆك و ناوەڕۆكی بانگەوازی ئەو پشكۆیەیە كە لەگەڵ یەكەم پزیسكی خۆیدا جاڕی دا... بێگومان كە مرۆڤ بەنێو مێژووێكی ئاگریندا دەگوزەرێ، موچرك بەدوای موچرك بەگیانی مرۆڤدا دێت، تا ئاستی سەرسامبوون و شۆكبوون دەڕوات؛ چۆن مرۆڤ موچرك نایگرێت و سەرسام و شۆك نابێت كە دەبینێ؛ لەپێناو ئەو بانگەوازییە نەمرەدا هەر جەستەیە دەسووتێ، هەر گیانە و هەڵدەكڕوزێ... كوا چ سیمفۆنیایەك هەیە وەك ئەم سیمفۆنیایە نەغمەكانی گڕ بن؟ كوا چ رۆمانێك و شیعرێك و داستانێك هەیە وەك ئەم رۆمانە، ئەم شیعر و داستانە حەرفەكانی كڵپە بن؟ چۆن مرۆڤ شۆك نابێت هەر بەتەنیشت ئەو رۆح و جەستانەی دەبنە تۆپەڵێك ئاگر و گڕ لە هەموو ناشیرینییەكانی گەردوون بەردەدەن، رۆح و جەستەگەلێكیش هەن لەبەرد بەردترن، لەبەستەڵەك بەستەڵەكترن، وەك بڵێی گڕی هەموو گەردوون ناتوانێ خاوێنیان بكاتەوە... ئیدی ئەوە سیمفۆنیایەكە بێهەڵچوون و داچوون نابێت، رۆمانێكە بێ ناكۆكی و ململانێ نابێت، شیعرێكە و داستانێكە بێ توخمی نەزۆك و شەڕانگێز نابن...!! بەڵام سیحری ئاگرینی ئەو مێژووە لەچی دایە؟ لەكوێ دایە؟ ئەمە نهێنییەكە و بەتینی گەرم و بڵێسەداری خۆی تا قووڵایی خۆی دەتبات، ئینجا پێت دەڵێت "ئەوە منم ... ئیدی بمناسە و لێم تێبگە...."
بۆیە ئەوەی لە مێژووی (پەكەكە)دا دەیبینیت نهێنی لەدایكبوون و مەزنبوونی بزووتنەوەیەكە كە هیچ كەسێك مەزەندەی لەدایكبوونی ناكات، نەخاسمە پێشكەوتن و مەزنبوون و سەركەوتنەكەی، ئەمە هەر لەدەرەوەی خەیاڵ دابوو... كەچی لەدەرەوەی مەزەندە و شیمانەكان، بەبێ ئەوەی روخسەت لەباڵادەستەكانی ئەو جوگرافیایە و جیهان وەربگرێت، سەریهەڵدا... بەڕوو ئاسا رەگی داكوتا و باڵای كرد، چڵ و پۆپەی دەركرد، چەندە چڵ و پۆپە دەكات ئەوەندەش رەگ دادەكوتێ، چەندە بەقووڵایی مێژوودا شۆڕدەبێتەوە ئەوەندەش بەرەو لوتكە هەڵدەكشێ... ئیدی لەنێو دۆزەخی جوگرافیایەكی ونبوودا، ئەو جوگرافیایەی كە لەمێژ ساڵە هەنجن هەنجنیان كردبوو و پاشان سڕیبوویانەوە، درەختێك باڵانما دەكات و خوازیارە لەو دۆزەخەی كە پێی دەگووترێت گێژاو (كائیوس) نسێیەكی فێنك، ساباتێكی دڵڕفێن بۆ گەلانی خێر لەخۆنەدیو، بۆ ژنانی ئازارچەشتوو، بۆ مرۆڤایەتی لەسەر خاكی میزۆپۆتامیا و هەموو جیهان بخوڵقێنێ...
لەجیهان و خۆرهەڵاتی ناویندا بەگشتی و باشووری كوردستاندا بەتایبەتی، بەشێوەیەكی سیستەماتیك و پلان بۆكراودا، هەڵمەتێكی فراوان و چڕوپڕ و بەردەوامی؛ رەشكردن، ناوزڕاندن، چەواشەكاری و شێواندن لەبەرامبەر راستینەی بزووتنەوەی (پەكەكە) و رێبەر عەبدوڵڵا ئۆجەلان و شۆڕشگێڕانی نێو ئەم بزووتنەوەیە ئەنجامدراوە و پێشخراوە، لەبەرامبەر فەلسەفە و هزر و ئایدیۆلۆژیا و سیاسەت و سیستەمی ژیان و بیر و كاركردنی (پەكەكە)دا هەوڵ و تەقەللایەكی بێوچان دراوە و لەمەشدا ئەگەر بۆ ماوەیەكی كورتخایەنیش بێت، تاڕادەیەكی بەرچاو ئەو هەڵمەتانەیان سەریگرتووە. هەڵبەتە دامودەزگاكانی دەوڵەتە زلەێزە ئیمپریالیستەكان، توركیا و داگیركەرانی دیكەی كوردستان، هەروەها هێزە بەكرێگیراو و تەسلیمكارەكانی كورد و چەندین نووسەری قەڵەمفرۆش و ویژدانفرۆشی كورد و بیانی رۆڵێكی گرنگیان لەو هەڵمەتەدا بینیوە و تەنانەت لەمڕووەوە لەنێو پێشبڕكێیەكی سەرسوڕهێنەر دابوونە و تا ئانوساتی ئێستاش لەسەر پێشخستنی ئەم هەڵمەتە هەر بەردەوامن و چاوەڕێش ناكرێت "ئیمپریالیزم ــ داگیركەرانی كوردستان ــ هێزە وابەستەكانی كورد ـــ نووسەرە خودفرۆشەكان" هەروا زوو دەستبەرداری ئەم هەڵمەتە هاوبەشەیان ببن. بێگومان زۆر كەمن ئەوانەی بەبێ مەبەست و لەخافڵگیری و نەزانییەوە كەوتوونەتە خزمەتی ئەو هەڵمەتە دژە شۆڕشیەوە. بۆیە گێڕانەوە و هەڵسەنگاندن و شیكردنەوەی مێژووی بزووتنەوەی (پەكەكە) لەسەر زمانی خودی (پەكەكە)ییەكان، ئەوانەی بەوپەڕی دروستی و راستگۆیی و جورئەتەوە بەردەوامی بەتێكۆشانی ئازادیخوازانەی خۆیان دەدەن، ئەركێكی گرنگ و پڕ بەبایەخە. بەداخەوە خودی شۆڕشگێڕانی ئەم بزووتنەوەیە لەمڕووەوە كەمتەرخەمیان نواندووە و مێژووی ئەو بزووتنەوەیەیان بەشێوەیەكی فراوان بەهەموو كەسێك نەناساندووە. ئەمەش جێی رەخنەیە. چونكە ناسین و تێگەیشتن لە (پەكەكە) لەڕێی خودی (پەكەكە) و (پەكەكە)ییەكان راستترین و زانستیانەترین رێگەیە بۆ ناسین و تێگەیشتن لەمێژوو و فەلسەفە و سیستەمی بیركردنەوە و ژیان و تێكۆشانەكەی.
لەمیانەی وردبوونەوە و لێكدانەوەی سەرجەم ئەو هەڵمەتە پروپاگەندەییەی لەدژی ئەو تەڤگەرە بەڕێوە براوە دەبینرێت كە زۆر شێواز و ئوسلوب بەكاربراوە بۆ وێناكردنێكی ناشرین بۆ ئەم بزووتنەوەیە. بەر لەهەموو شتێك خواستوویانە ئەو پەیوەندییە دیالیكتییكەی نێوان " گەل، (پەكەكە)، ئۆجەلان" بشێوێنن یان بیپچڕێنن و لەیەكدابڕاو سەیربكرێن. ئەو هێز و لایەنانە بۆ ئەوەی ئەو پەیوەندییە دیالیكتكییە بشێوێنن و لەیەكدی بیپچڕێنن هەرچی بەدەمیاندا هاتووە گووتوویانە، هەرچی لەدەستیان هاتووە كردوویانە، لەكەمپینی ناوزڕاندن و رەشكردنەوە بگرە تا دەگاتە هەوڵەكانی كوشتن و تیرۆر، لەشەڕ و هێرشبردنەوە تا دەگاتە پیلانگێڕییە نێودەوڵەتییەكان ...هتد، بەڵام سەرەڕای هەموو ئەو هەوڵ و تەقەللا بەردەوامانەیان، كەچی نەك هەر پەیوەندی تۆكمەی نێوان" گەل، (پەكەكە) ئۆجەلان " لاواز نەبووە و نەپچڕاوە، نەك هەر ئیرادەی ئازاد و سەربەخۆی ئەم سێینەیە بێ كاریگەر نەبووە و نەشكاوە، بەڵكو تا هاتووە ئەم ئیرادەیە بەهێز و تۆكمەتر بووە و رۆحی بەرگری و بەرخۆدانی، پەیوەستبوونی گەل بە فەلسەفە و ژیانی ئازادی (پەكەكە) و رێبەر ئۆجەلان تا هاتووە مەزنتر بووە، تا هاتووشە باوەڕی (پەكەكە) و رێبەر ئۆجەلان بەهێز و توانا و ئیرادەی گەل و مرۆڤایەتی پێشكەوتنخوازیش تۆكمە و بەهێزتر بووە. بۆیە پێویست دەكات هەركەس و هێز و لایەنێك بخوازێت دۆستایەتی یان دووژمنایەتی ئەو پەیوەندییە دیالیكتیكیانەیەی ئەم سێینەیە بكات، ئەوا پێویستە ئەو راستینەیە بەقووڵی تێبگات كە ئەو پەیوەندییە سەرچاوەی خۆی لەراستینەی فەلسەفە و سیستەمی بیركردنەوە و ژیان و تێكۆشانی رێبەر ئۆجەلان و گەلی كوردستانەوە وەردەگرێت.
لەم روانگەیەوە؛ دەگەینە ئەو راستییەی كە ناكرێت بەزیهنییەت و چەمك و لۆژیكە باوەكان لە (پەكەكە) و رێبەر ئۆجەلان و ئاستی ئەمڕۆی گەلی كوردستان تێبگەین، چونكە رێبەر ئۆجەلان و (پەكەكە) بەزیهنییەت و چەمكێكی نوێوە سەریانهەڵداوە و تێكۆشاون و پەرەیان سەندووە، بەمەش كەسێتییەكی نوێ و هاوچەرخیان بۆ كورد ئافراندووە. زیهنییەتێك لەسەر بنەمای فەلسەفەیەكی پووخت و سەنتێزی (كۆتێزی)یەوە، لەتیۆری و كرداریدا بەئاوێتەیی پێگەیشتووە و پێشكەوتووە، كە قۆناخ بەقۆناخ خۆی پووخت و هەڵاوێرد كردووە و گەیشتۆتە ئەو ئاستەی وەك واقیعێك و راستییەك رەگی خۆی دابكوتێ و لەهەڵكشاندا بێت. بەمەش مێژووی ئەم تەڤگەرە بۆتە قۆناخێكی نوێ و گرنگ لەمێژووی هاوچەرخی گەلی كوردستان و مرۆڤایەتی، پارچەیەكی دانەبڕاو لەمێژووی كوردستان، خۆرهەڵاتی ناوین و كۆمەڵگای مرۆڤایەتی. ئیدی لە ناوەرۆكی مێژووی تەڤگەری (پەكەكە)دا؛ پووختەی مێژووی گەلێك دەبینین، كە دەستبەرداری مەیلی ئازادیخوازانەی خۆی نابێت و لەپێناو گەیشتن بەئازادی لەئاستی هەرە بڵنددا قوربانی، قارەمانێتی و گیانفیدایی هەرە مەزنی نواندووە و بۆتە سەرچاوەی مۆڕاڵ و وزە و توانستێكی بەهادار بۆ گەلانی خۆرهەڵاتی ناوین و جیهان.
ئیدی لەئاكامی تێكۆشانی شكۆدارانەی رێبەر ئۆجەلان و تەڤگەری (پەكەكە) و خودی گەلی كوردستان نموونەی تاك و كۆمەڵگایەكی نوێ و هاوچەرخ ئافرێنرا، تا ئاستێكی بەرزیش توانیویەتی قۆناخی "بەگەلبوون" و "بەنەتەوەبوون"ببڕێت و بەڕادەیەك بتوانێت خۆی ئاوێتەی فەلسەفەی ئازادی بكات و بەجورئەتەوە بێژێ:" ئەگەر ژیانێك هەبێت با بەئازادی و بۆ ئازادی بێت، ئەگەر مردنێكیش هەبێت با هەر بەئازادی و بۆ ئازادی بێت" و ببێتە نموونەی" گەلی سەركەوتوو"، ببێتە ناسنامەیەكی ئازاد بۆ خۆرهەڵاتی ناوینێكی نوێ، ئەو گەلەی لەهەموو ئاستەكاندا نكۆڵی لێدەكرا و دەتوایەوە و قڕدەكرا، تەنانەت گەیەندرابووە ئەو قۆناخەی خۆی نكۆڵی لەخۆی بكات و رازی بێت بەم نكۆڵیكردنە و لەململانێ و ناكۆكی و شەڕ و پێكدادانە جیهانی و هەرێمییەكاندا وەك "قۆچی قوربانی"ی هەمیشەیی و وڵاتەكەیشی وەك "گۆڕەپانی شەڕ"ی بەردەوام وابوو، ئەمڕۆ لەسایەی ئەو تێكۆشانە چڕوپڕەی خۆی و رێبەر ئۆجەلان و تەڤگەری (پەكەكە)دا زۆر بەجورئەت و شێلگیرییەوە دەڵێت:"من هەم و جگە لەژیانی ئازادانە و سەركەوتن بەهیچ شێوە ژیانێكی دیكە و ئەنجامێكی دیكە رازی نابم" و وەك ئەركێكی شارستانی و مێژوویی، ئەخلاقی و مرۆڤایەتی ببێتە داینەمۆی دیموكراتیزەبوونی خۆرهەڵاتی ناوین و پزیسكی شۆڕشێكی زیهنی ـــ ویژدانی سەرتاپاگیر...
رۆژگاری ئەمڕۆ هەر تەنیا بەرهەمی مێژوو نییە، بەڵكو رێبەر ئۆجەلان گووتەنی وەك چۆن:" مێژوو لەئەمڕۆماندا شاراوەیە، ئێمەش لەقووڵایی مێژوودا شاراوەین" ئەوا مسۆگەر داهاتووش هەر لەمنداڵدانی ئەو مێژوو و رۆژگارەوە فرچك دەگرێت و دەپژێت. بۆیە مێژوو هەر تەنیا گێڕانەوەی حیكایەتی رووداوو و ئاڵوگۆڕەكان نییە، بەڵكو كانگای حیكایەتەكانی ئەمڕۆ و داهاتووشە، سەرەداوی ئەمڕۆ و داهاتووشە، بەهەر سێكیانەوە زەمەن پێكدێنن. زەمەنیش بەم دۆخەیەوە خودان رەهەندێكی گشتگیر و ئاوێتەییە. لەم چوارچێوەیەدا تێگەیشتنی راست و زانستیانە لەمێژوو، توانست و وزەی ئەوەمان دەداتێ دەرك بەراستینەی ئەمڕۆش بكەین، روونتریش داهاتوو ببینین. بێگومان ئەمە بەواتای ئەوە نایەت مێژوو خۆی لەئەمڕۆ و داهاتوودا كۆپی دەكات، یان ئەمڕۆ و داهاتوو لەبەرگرتنەوەیەكی قەبای تەواوی مێژووە. ئەگەر وابێت چەمكی پێشكەوتن و گۆڕان بێ واتا دەبێت، سێینەی" تێز، دژەتێز، كۆتێز" یش بێ ناوەڕۆك دەبێت و شتێك نامێنێت ناوی وزەی جوڵە و هێزی دینامیكی بێت. بەڵكو بەو واتایە دێت مێژوو و ئەمڕۆ و داهاتوو بەناویەكداچوون و ئاوێتە و لەیەكدابڕاو نین. كەواتە مێژوو بناخەیە و ئەمڕۆش هەڵچنینی دیوارەكانییەتی و داهاتووش كۆی ئەو خانووەیە كە نیازمەندین بیئافرێنین، یان بئافرێت. لەڕاستیدا پۆلێنكردنی مێژوو و قۆناخەكانی لەسەر ئەو بنەمایە پۆلێنكردنی هەرە ڕاست و زانستیانەیە.
هەموو شتێك مێژووی خۆی هەیە، تەنانەت خودی مێژووش مێژووێكی خۆی هەیە. كۆی مێژوو بریتییە لەتەواوی قۆناخ و پارچەكانی ئەو مێژووە. مێژووی هەر شتێكیش كۆی تەمەن و رەهەند و ئاراستە و ماهییەت و هەبوونی ئەو شتە لەخۆوە دەگرێت. بەڵام لەپێناو دەرككردن بەوەی كە "چۆن؟ بۆچی؟ كێ؟ كەی؟ چی؟ " هەر قۆناخێكی مێژوو بەتەواوی خۆی پۆلێن دەكات و خۆی لە قۆناخی پێش و دوای خۆی جیادەكاتەوە، ئەوا پێویستمان بە كەرەستەی زانستی گونجاو و گێڕانەوەی متمانەپێكراو و شیكردنەوەی بابەتیانە هەیە. بەتایبەتی بۆ مێژووی شتێك كە بەهەموو هەبوون و قورسایی و مەزنی و ئافراندنەكانی خۆیەوە لەگەڵیدا دەژین و لەئاستی هەرە بەرزیشدا لەنێو جموجۆڵ و تەڤگەر و خۆ ئافراندنەوە و خۆ نوێكردنەوە دایە. هەرگیز ناكرێت بە هەرزانی و بێ بەها و بێ پێوانە مرۆڤایەتییەكان مێژووێك بخوێنینەوە كە لەرۆژگاری ئەمڕۆدا بەهەموو ئاراستە "ئاسۆیی، ستوونی، قووڵایی"ەكانی خۆیەوە لەنێو پێشكەوتن و گۆڕاندایە و پرۆژەی خۆی بۆ داهاتووش هەیە. چونكە هیچ شێواندن و چەواشەكاری و بەلاڕێدابردنێك نەیانتوانیوە راستینە و گەوهەری مێژووێك قووتبدات و لەناویببات. هەزاران ساڵ خۆرئاوا نكۆڵی لەمێژوو و شارستانییەتی جوگرافیای میزۆپۆتامیا و خۆرهەڵات كرد و وێنایەكی شێوێندراویان نەخشاند، كەچی ئەمڕۆ ئەو جوگرافیایە بەهەموو مێژوو و شارستانییەتی خۆی دەبێژێ "من هەم و وا بەهەموو سروشت و سیمای خۆمەوە هێشتا دەژیم". ئیدی خودی مێژوو و مێژووی هەر هەبوون و پێكهاتەیەك، سەرەڕای هەموو شێواندن و چەواشەكاری و بەلاڕێدابردنێك گەوهەر و راستینەی خۆی لەرۆژگاری ئەمڕۆ و داهاتووشدا حەشاردەدات و هەر دەبریسكێتەوە و لەدرەوشانەوە ناكەوێت. وەك چۆن خۆدابڕاندن لەمێژوو خۆ خەڵەتاندنە، ئاوا نكۆڵیكردن ـــ بەهەموو شێوازەكانییەوە ـــ لەمێژووێكیش مایەپووچییە، بۆیە راستگۆیی مێژوویی وەك چۆن ئەركێكە، ئاوا بەهەمان شێوە بەهایەكی ئەخلاقیشە و هەرگیز ناكرێ دەستبەرداری ببین.
یەكێك لەو هەوڵانەی؛ بەمەبەست و بێ مەبەست، لەبەرامبەر تەڤگەری (پەكەكە) دراون، ئەوەیە كە خوازراوە ئەم تەڤگەرە تەنیا وەك تەڤگەرێكی سەربازی نیشان بدرێت و بناسرێت. ئەمە لەكاتێكدا تەڤگەری (پەكەكە) بەر لەوەی تەڤگەرێكی گەریلایی و سەربازی بێت، تەنانەت بەرلەوەی تەڤگەرێكی سیاسیش بێت، لەبنچینەدا تەڤگەرێكە بناخەیەكی فەلسەفی، هزری و ئایدیۆلۆژی خۆی هەیە و خاوەن سیستەمێكی سەربەخۆ و ئازادی بیر و ژیان و تێكۆشانە و تێكۆشانی سیاسی و گەریلایی خۆیشی لەسەر بناخەی ئەو فەلسەفە و هزر و ئایدیۆلۆژیا و سیستەمە پێشخستووە. هەندێك كەس وا پێناسەی تەڤگەری (پەكەكە) دەكەن كە تەنیا تەڤگەرێكی نەتەوەیی یان ناسیۆنالیستییە، یاخود پێیان وایە تەنیا تەڤگەرێكی چینایەتی چەپڕەوە. بەڵام لەراستینەی فەلسەفی و هزر و ئایدیۆلۆژیا و سیستەمی ئەو تەڤگەرەدا تاكڕەهەندی یان تاكلایەنی نابینرێت، بەڵكو فرە رەهەند و فرەلایەنە و لەرووی تیۆری و كرداریدا بەئاراستەی ئاسۆیی، ستوونی و قووڵاییدا لەپێشكەوتن و نوێبوونەوە دایە. بۆیە سەرتاپای تێكۆشانی هزری و پراكتیكی خۆی لەئاستی پێنج تەوەری بەیەكەوە پەیوەست و ئاوێتەییدا پێشدەخات كە:" تێكۆشانی خود، تێكۆشانی رەگەزی، تێكۆشانی چینایەتی، تێكۆشانی نەتەوەیی و تێكۆشانی مرۆیی"ن. ئامانج لەو پێنج تەوەرەی تێكۆشانیش بنیادنانی كەسێتی و كۆمەڵگایەكی ئازاد و سیستەمێكی گەلەری دیموكراتییە. لەم پێناوەشدا تێكۆشانی هزری و ئایدیۆلۆژی، سیاسی و گەریلایی (سەربازی)، كولتووری و كۆمەڵایەتی پێشخستووە. بۆیە بەو رادەیەی تێكۆشان لەبەرامبەر "خود"ی دەستەمۆ و بنیادنانی خود (كەسێتی)ییەكی ئازاددا گرنگێتی خۆی هەیە، بەهەمان رادەش تێكۆشان لەبەرامبەر سیستەمی باڵادەستی پیاوسالارێتی و كەسێتی "ژن و پیاو"ی باو و كلاسیك گرنگە، هەر بەهەمان رادەش تێكۆشان لەبەرامبەر شارستانێتی چینایەتی و فەراهەمكردنی یەكسانی و دادپەروەری گرنگە، هەر بەهەمان رادەش تێكۆشانی ژیانەوەی نەتەوەیی كورد و دیموكراتیزەكردنی كۆمەڵگای كوردەواری و گەیشتن بەماف و ئازادی نەتەوەیی، هەروەها بەرگریكردن لەسروشت و ژینگە و تەواوی مرۆڤایەتی و ئەو تەحەدیاتانەی رووبەڕووی تەواوی مرۆڤایەتی بۆتەوە، گرنگ و بایەخدارە. بێگومان بەهۆی هەلومەرجی بابەتی و خودی دەركەوتنی تەڤگەرەكە و هەبوون و قووڵبوونەوەی كێشەی كورد و ئەو سیاسەتە هێرشكارییەی داگیركەران و هێزە ئیمپریالیستەكان و هێزە باڵادەستەكانی چینی سەردەستی كورد، زیاتر مۆركی نەتەوەیی و چینایەتی و سەربازی وەك تایبەتمەندێتی سەرەكی تەڤگەری (پەكەكە) بەدیار كەوتووە و پێیەوە ناسراوە، ئەمە تەنیا بەشێكی راستینە و ناسنامەی تەڤگەری (پەكەكە)یە، بەڵام لەگەوهەر و راستینەی ئەم تەڤگەرەشدا؛ بەر لەهەموو شتێك ئافراندنی فەلسەفە و ئایدیۆلۆژیایەك، سیستەمێكی سەردەمیانە هەیە بۆ بیركردنەوە و ژیان و خەباتكردن. لەسەر ئەو بنەمایەش لەپێناو ئامانجەكاندا شێوە و شێوازەكانی تێكۆشان و بەرخۆدانی لەئاستی كەسێتی، رەگەزی، چینایەتی، نەتەوەیی و مرۆڤایەتی بەڕێوەبردووە و پێشیخستووە. لەمیانەی خوێندنەوەیەكی زانستی و بابەتیانەی مێژووی تەڤگەری (پەكەكە)دا دەرك بەهێڵی گشتی ئەو فەلسەفە و سیستەمە دەكرێت و تایبەتمەندی و بنەما سەرەكییەكانی دەبینرێت. هەروەها لەمیانەی خوێندنەوەی سەدان پەڕتووك و نامیلكەی رێبەر ئاپۆ و هەزاران پەرتووك و نامیلكەی ئەم تەڤگەرەدا راستینەی رێبازێكی فەلسەفی و هزری و ئایدیۆلۆژی و سیاسی دەبینرێت. بێگومان لەچوارچێوەی سەرجەم ئەو شیكردنەوە و لێكۆڵینەوە و هەڵسەنگاندنە فەلسەفی و هزری و ئایدیۆلۆژییەدا شیكردنەوە و لێكدانەوەیەكی قووڵ و زانستیانەی تاك و كۆمەڵگای كورد دەركی پێدەكرێت، كە یەكەمجارە لەو ئاستە فراوان و قووڵەدا لەرووی مێژوو و كۆمەڵناسی و دەروونناسیدا گەلی كوردستان بە تاك و كۆمەڵگایەوە بكەوێتە بەر توێژینەوە و هەڵسەنگاندنەوە. ئەوەش بەهایەكی زانستیانەی مەزنی خۆی هەیە.
لەرووێكی دیكەوە كاتێك قۆناخەكانی مێژووی تەڤگەری (پەكەكە) دەخوێنینەوە مێژووییەكی تەواو بەیەكەوە پابەند و پەیوەست دەبینین. رووداو و ئاڵوگۆڕەكان، پێشكەوتن و گۆڕانكارییەكان گرێدراوی یەكن و هیچیان لەوەی دیكەیان دابڕاو و پچڕاو نیین و یەكدی تەواو دەكەن. هەڵبەتە ئەوەی رۆنەچێتە قووڵایی ئەم مێژووەوە، ناتوانێت دەرك بەراستینەی پەیوەندی نێوان ئەڵقەكانی ئەم مێژووە بكات و لێی تێبگات. بۆیە رەچاوكردنی ئەو راستینەیە تێگەیشتنی قووڵ و راست بۆ ئەم مێژووە دێنێتەدی.
یەكێك لەرەهەندە هەرە گرنگەكانی مێژووی تەڤگەری (پەكەكە) رەهەندی ئەنتەرناسیۆنالێتی و مرۆڤایەتیبوونییەتی. هەم لەپێكهاتە و سەرهەڵدانیدا، هەم لەروانگە فەلسەفی و ئایدیۆلۆژییەكەیدا خاوەن سروشتێكی ئەنتەرناسیۆنالی و مرۆڤایەتی هەیە. كاتێك رێبەر ئاپۆ دەیەوێت ئەوەی لەئەنجامی لێگەڕین و لێكۆڵینەوە هزریەكانیدا ئاكامگیر بووە بۆ هاوڕێ نزیكەكانی خۆی لەزانكۆ بدركێنێت، دوو هاوڕێی هەرە دەستپێكی لەرۆڵەكانی گەلی توركن، كە هەڤاڵان "حەقی قەرار و كەمال پیر" ن. ئەم دوو هاوڕێیەی لەسەر بنەمای چەمكی " تا گەلی كورد ئازاد نەبێت گەلی توركیش ئازاد نابێت" هەڤاڵێتی رێبەر ئاپۆ دەكەن و یەكەمین گروپی سێ كەسی بۆ سەرهەڵدانی تەڤگەری ئاپۆچیتی پێكدێنن. لەماوەی ئەو سی و شەش ساڵەی تێكۆشانی ئەم تەڤگەرەشدا بەسەدان و هەزاران رۆڵەی دیكەی گەلانی خۆرهەڵاتی ناوین "تورك، توركمان، عەرەب، فارس، چەركەس، ئەرمەن، ئاشووری و سریانی..." و گەلانی دیكەی جیهان بەشداری ئەم تەڤگەرە دەبن و بە قارەمانێتی گیانی بێگەردی خۆیان دەبەخشن و تا ئێستاش بەردەوامن لەتەڤلیبوون و تێكۆشاندا و تەڤگەری (پەكەكە)ش شانبەشانی تایبەتمەندییەكانی دیكەی ئەو تایبەتمەندییە ئەنتەرناسیۆنالیستییەی خۆیشی پێشدەخات. لەو باوەڕەدام دوو هۆكاری سەرەكی بۆ تەڤلیبوونی ئەو تێكۆشەرانە لەئارادایە:
یەكەمینیان: پشتیوانی و بەشداریكردنە لەتێكۆشانی ئازادیخوازانەی گەلی كورد، چونكە گەلی كورد وەك یەكێك لە دێرینترین و چەوساوەترین گەل لەمێژوو و رۆژگاری ئەمڕۆماندا، لەكەسێتی گەلی كورددا تەواوی بەها مرۆییەكان ژێرپێ خراون و لەدەستدراون. بۆیە ئازادبوونی ئەم گەلە و گەیشتن بەمافە رەواكانی، ئەوا لەهەمانكاتدا گەڕاندنەوەی رێز و بەها لەدەستدراوەكانیشە بۆ مرۆڤایەتی، لەسەر ئەو بنەمایە پشتیوانی و بەشداریكردن لەتێكۆشانی ئازادیخوازانەی گەلی كورد تێكۆشانە لەپێناو ئازادی و مرۆڤایەتی و گەڕانەوەی بەها مرۆڤایەتییەكان. ئەمەش گەوهەری ئەو ئەنتەرناسیۆنالێتی و مرۆڤدۆستی و ژیاندۆستییەیە كە (پەكەكە) لەخۆیدا بەرجەستەی كردووە.
دووەمینشیان: گەوهەری مرۆڤایەتییانەی تەڤگەری (پەكەكە) و مژوولبوون(خەریكبوون) و تێكۆشانییەتی لەپێناو چارەسەركردنی كێشە و گرفتە هەڵواسراو و قووڵەكانی مرۆڤایەتی، وەك كێشە زیهنی و ویژدانییەكان، كێشەی ژن، كێشە كولتووری و شارستانی و ئیكۆلۆژییەكان.
لەرووێكی دیكەشەوە فەلسەفە و پارادیگمای رێبەر ئۆجەلان و (پەكەكە) پووختەی بەرهەمی تێكۆشانی هزری و مرۆڤایەتییە، كۆتێزی فەلسەفی و هزرە مرۆڤایەتییەكانە، بەواتایەكی دیكە لەهەموو فەلسەفە و پارادیگما و زانست و داهێنانە هزرییەكان سوودمەندبووە و لەئاكامدا پارادیگمایەكی نوێی داهێناوە. بەمەش (پەكەكە) كۆی بەها هزرییەكانی مرۆڤایەتی لەخۆیدا بەرجەستە كردووە. ئەمەش هۆكارێكی گرنگە بۆ تەڤلیبوونی كەسانی دەرەوەی كورد لەم تەڤگەرەدا.
بێگومان هەبوونی دیاردە و كێشەی كورد هۆكار و هەلومەرجی سەرەكی دەركەوتنی تەڤگەری (پەكەكە) بووە، بەڵام وەكو دەردەكەوێت ئەو دیاردە و كێشەیەش بەدەرنییە لەكۆی كێشە مرۆڤایەتییەكانی دیكە. بۆیە دەبینین كاتێك رێبەر ئۆجەلان بەدوای گەوهەری سۆسیالیزمدا دەگەڕێ و لێكۆڵینەوە لەسەر مێژووی پێشكەوتنی كۆمەڵگاكانی مرۆڤایەتی دەكات، لەمیانەی ئەو لێگەڕین و لێكۆڵینەوەیەشدا مێژووی كورد و دیاردە و كێشەی كورد قووڵتر دەناسێت. چونكە تا ئەوكاتە لەهەلومەرجی ساڵانی حەفتاكانی توركیادا بچووكترین زانیاری سەبارەت بەكورد و كوردستان دەست ناكەوێت، بەڵام دەرك بەوەش دەكات كە كورد وەكو گەلێك خاوەن كێشەیەكە. بۆیە لەرێگەی تێگەیشتن لەهزری سۆسیالیزم و مێژووی مرۆڤایەتی لەمێژووی كورد و راستینەی دیاردە و كێشەی كورد تێدەگات و دەگاتە ئەو راستییەی كە "كوردستان داگیركراوە" و سۆسیالیزمیش رێگای ئازادی گەلی كورد و رزگاری كوردستانە. لەمەشەوە بۆی رووندەبێتەوە كە چینی باڵادەستی كوردیش گرێیەكی نێو ئەو كێشەیەیە و بەشێكە لەسیستەمی داگیركەری و سیستەمی داگیركەریش بەشێكە لەسیستەمی سەرمایەداری جیهانی. بۆیە پێشەنگایەتیكردنی كۆمەڵگای ژێرەوە (چین و رەگەزی ژێردەست) لەشۆڕشی رزگاری كوردستان دەبێتە مەسەلەیەكی لێبڕاوانە. بێگومان چەندە لەو لێگەڕین و لێكۆڵینەوەیەی خۆی قووڵ دەبێتەوە لەئاكامدا دەگاتە ئەو دەستنیشانكردنەی كە؛ كێشەی كورد قووڵترین كێشەی نەتەوەییە لەجیهاندا، بەڵام كێشەیەكی دیكە لەكێشەی كورد قووڵتر و دێرینتر و ئاڵۆزتریش هەیە، ئەویش كێشە رەگەزی ژنە. هەروەها ئەو تایبەتمەندییانەی كەوا داگیركەری و سیستەمی سەرمایەداری جیهانی بەتاك و كۆمەڵگای كوردی داوە لەگەڵ خۆیدا زۆر گرفتی كۆمەڵایەتی دروستكردووە، لەسەرووی هەمووشیانەوە گرفت و پرسی كەسێتییە. لەئاكامدا هەموو ئەو تەوەرانە دەبنە تەوەری لێگەڕین و لێكۆڵینەوەكانی رێبەر ئۆجەلان و قووڵبوونەوە بەناخی كێشە و گرفتە مرۆڤایەتییەكاندا. ئەمەش تایبەتمەندێتی فرە رەهەندی و فرە تەوەری فەلسەفە و پارادیگما و ئایدیۆلۆژیای رێبەر ئۆجەلان دەئافرێنێت و دەبێتە تایبەتمەندێتی فەلسەفە و پارادیگما و ئایدیۆلۆژیای تەڤگەری (پەكەكە) و تاك و كۆمەڵگای نوێی كوردیش.
بەر لەسەرهەڵدانی تەڤگەری (پەكەكە)، كێشەی كورد پاوانی دەستی چینی باڵادەستی كورد بوو، ئەو چینەش بەهۆی تایبەتمەندێتی عەشیرەتگەرایی و بەكرێگیراوێتی خۆیەوە كێشەكەی قووڵتر و ئاڵۆزتر كردبوو و لەئاكامدا ببووە هێز و پشتیوانییەكی مەترسیدار بۆ ئەنجامگیربوونی سیاسەتی نكۆڵی و توانەوە و قڕكردنی كوردان. ئەو چینە بە ئایدیۆلۆژیای "میللیگەرای سەرەتایی" خۆیەوە، بەهەر دوو ئاراستەكەیەوە (فیوداڵێتی بەكرێگیراو ــ بۆرژوازی مشەخۆر) تێكۆشانی ئازادیخوازانەی گەلی كورد دووچاری چەندین شكست و كۆمەڵكوژی كردبۆوە، كە لەئاكامدا دەروازەی تەسلیمكاری و بەكرێگیراوێتی و خیانەتی خستبووە سەرگازەرەی پشت و زەمینەی سەرخستنی سیاسەتی داگیركەرانەی زیاتر رەخساندبوو. ئەو چینە سەرەڕای ئەوەی پارچەبوونی كورد و كێشە قووڵەكەی بەچەمكی "پارچەگەرێتی، ناوچەگەرێتی و عەشیرەتگەرایی" پارچە پارچەتر و قووڵتر كردبووەوە، لەهەمانكاتیشدا رێگای سەرهەڵدانی هیچ تەڤگەرێكی ئازادیخوازیان نەداوە و هەمیشە بەلۆژیكی "ئەگەر شۆڕشمان پێناكرێت، ناهێڵین كەسیش شۆڕش بەرپا بكات" هەڵسوكەوتیان كردووە و پاشانیش لەگەڵ دەركەوتنی تەڤگەری (پەكەكە)شدا بەشداری سەرجەم هێرش و پیلانگێڕییەكانی داگیركەران و زلەێزە سەرمایەدارەكانی جیهانیان لەدژی تەڤگەری ئازادیخواز كردووە. بۆیە لەگەڵ دەركەوتنی تەڤگەری ئاپۆچێتی و (پەكەكە)دا چینی باڵادەستی كورد و هێزە میللیگەرا سەرەتاییەكانی بەهەموو شێوەیەك لەنێو هێرش و پیلانگێڕی دابوونە، یەكەم پەیامی ئەو هێزە میللیگەرا سەرەتاییانە بۆ تەڤگەری ئاپۆچێتی كە دەخوازن رووی تێكۆشانیان لە ئەنقەرەوە بەرەو كوردستان ئاراستەگیر بكەن پێیان دەڵێن:"ئەگەر بكەونە كوردستان قاچتان دەشكێنین". ئیدی چینی باڵادەستی بەكرێگیراو و هێزە میللیگەرا سەرەتاییەكان لەسەرەتای دەركەوتنی تەڤگەری (پەكەكە)وە تاكو رۆژگاری ئەمڕۆ، راستەوخۆ یان ناڕاستەوخۆ، لەبەرەی سیستەمی داگیركەری و ئیمپریالیستیدا شوێنگیر بوونە و زۆر جار زەبری مەزنیشیان لەم تەڤگەرە داوە.
بە قووڵبوونەوەلەمێژووی تەڤگەری (پەكەكە)دا ئەم راستییە بەروونی دەردەكەوێتە روو؛ بەتایبەت لەسەرەتای نەوەدەكانی سەدەی رابڕدووەوە تاوەكو رۆژگاری ئەمڕۆ، هێرش و پیلانگێڕییەكانی میللیگەرای سەرەتایی مۆركی خۆی لەرووداوەكان دەدات. وادیارە مورید و پابەندانی هێڵی میللیگەرای سەرەتایی، پێشكەوتن و هەڵكشانی رێبازی ئازادیخوازی تەڤگەری (پەكەكە) بەهەڕەشە و مەترسییەكی مەزن بۆ سەر خۆیان و بەرژەوەندییەكانیان دەبینن، بۆیە ئیدی لەزۆر دۆخدا زۆر بەڕاشكاوی و بێ باكانە پەرە بەهێرش و پیلانگێڕییەكان دەدەن و بەشدارییەكی بەرچاو و ئاكتیڤی سەرجەم هێرش و پیلانگێڕی و كەمپینەكانی رەشكردن و ناوزڕاندنی تەڤگەری (پەكەكە) دەبن، بەمەش خۆیان بەهێز و باڵادەست دەكەن و لەباشووری كوردستانیشدا قەوارە و نیمچە دەوڵەتێكیش سازدەكەن و پشتگیری داگیركەران و زلەێزەكانی دونیاش بەدەستدەهێنن.
بێگومان رێبەر ئاپۆ و تەڤگەری (پەكەكە) لەتاوتوێكردن و دەستنیشانكردندا كێشەی كوردیان بەدابڕاوی و لەدەرەوەی مەسەلە رەگەزی و چینایەتییەكان و كێشە مرۆڤایەتییەكانی دیكەدا نەبینی، تەنیا وەك كێشەی گەل و وڵاتێكی ژێردەستە و داگیركراو و دابەشكراو سەیریان نەكرد. چونكە كێشەی گەلی كورد، سەرەڕای پارچەبوون و دابەشبوون یەك كێشەیە و چوار شێوەی وەرگرتووە و بەهەزار پەتەوە پەیوەستە بەكێشە و گرفتە مێژوویی و شارستانییە مرۆڤایەتییەكانەوە، پابەندە بەسیستەمی هەزاران ساڵەی داگیركەری و سیستەمی پلەداری (هیرارشی) دەوڵەتگەرایی پیاوسالاری. لەسەر ئەو بنچینەیە، تەڤگەرێكی ئازادیخوازی ئەم گەلە ناتوانێت هەر تەنیا لەبۆتەی ماف و ئازادییە نەتەوەییەكاندا قەتیس بمێنێت و خۆی بەرتەسك و سنووردار بكات. لێرەدا چەمكی "شۆڕش" واتایەكی فرە مەودایی و فرە رەهەندی و سەرتاپاگیری بەدەست دەهێنێت. بۆیە "شۆڕش" واتای باوی خۆی، كە تەنیا تەڤگەر و تێكۆشانێكی چەكدارییە لەدەستدەدات و لەتەوەری تاك، رەگەز، چین، نەتەوە و مرۆڤایەتیدا واتاگیر دەبێت و لەئاستی زیهنییەت و ئاكار و ویژدانیشدا خۆی بەرپا دەكات، لەم چوارچێوەیەدا شۆڕشی ژیاندنەوەی گەلی كورد و شۆڕشی دیموكراتی و دیموكراتیزەكردنی تاك و كۆمەڵگای كورد خۆی بەرۆژەڤی تەڤگەر و گەلی كودستان دەكات، كە لەئاكامدا زەمینەی بەرپاكردنی شۆڕشێكی زیهنی و ویژدانی دەڕەخسێنێ و دەگاتە لوتكە. لەسەر ئەو بنچینەیە؛ شۆڕش وەك پرۆسەیەكی داڕووخاندن و سەرلەنوێ بنیادنانەوە، یان سەرلەنوێ ئافراندنەوە لەتەوەری خود (تاك)، رەگەز (ژن ــ پیاو)، چین (كۆمەڵگای ژێرین ــ كۆمەڵگای سەروو)، نەتەوە (ماف و ئازادی نەتەوەیی) و مرۆڤایەتی (سەرجەم كێشە مرۆڤایەتییەكانی وەك مەسەلە زیهنی و ویژدانییەكان، مەسەلە ژینگەییەكان و شارستانییەكان) بەردەوامی بەخۆی دەدات و هەڵدەكشێت.
لێرەدا پێویست دەكات لەمیانەی وردبوونەوەلەم مێژووەدا دەرك بەو راستییەش بكەین كە لەروانگەی ئەم تەڤگەرەوە ئیدی چەمكی "شۆڕش" دەستبەرداری لەپابەندبوونی خۆی بەچەمكی زەبروزەنگ "توندوتیژی" دەكات و بەتایبەتمەندییەكی سیستەمی دەوڵەتگەرایی دەبینێت و جگە لەپرەنسیپی "بەرگری رەوا" هیچ كاتێك پەنای وەبەرنابات. لەمڕووەوە، بە لەبەرچاوگرتنی ئەم دوو تایبەتمەندییەی چەمكی "شۆڕش" واتا فرە رەهەندی و دەستبەرداربوون لەزەبروزەنگ، دەكرێت لەخوێندنەوەی ئەم مێژووەدا بەرپاكردنی شۆڕشێك لەچەمكی كلاسیكی "شۆڕش"دا ببینین، كە خۆی لە "تیۆری گۆڕەپانی سێیەم" و بنیادنانی سیستەمی كۆنفیدراڵی دیموكراتی گەلدا دەبینێتەوە. لەمیانەی ئەو تایبەتمەندییە فرە رەهەندییەی خۆیەوە دەستبەردانی لەچەمكی زەبروزەنگ، وەك تاكە بژارێك پرۆسەی پەروەردەكردن، هوشیاركردنەوە، خۆ رێكخستەكردن، نواندنی چالاكی دیموكراتییانە و مەدەنییانە، بەبنەما وەردەگرێت، كە دەكرێت گۆڕان و وەرچەرخانی ریشەیی لە زیهنییەت و ئاكار و ویژداندا بێنێتەدی. ئەمەش بۆخۆی دەستكەوت و بەهایەكی هێژایە و رێك دووركەوتنەوەیە لەو زیهنییەت و سیستەمە باڵادەستەی دەسەڵاتگەرایی و دەوڵەتگەرایی پیاوسالاری.
لێرەدا گرنگە بڕێك لە سروشت و كرۆكی پیلانگێڕییەكان بدوێین، چونكە لەخوێندنەوەی تەواوی مێژووی تەڤگەری (پەكەكە)دا تەون و تەڵەزگە پیلانگێڕییەكان گرەو لەسەر لەناوبردن، بێ كاریگەركردن، پارچەكردن، مارژیناڵكردن و بەلاڕێدابردن و بەخۆوەگرێدانی ئەم تەڤگەرە دەكرێت. لەراستیدا؛ بەبێ تێگەیشتن لەناواخن و ئامانجە شاراوەكانی كۆنسێپتە پیلانگێڕییەكان ناكرێ لەقووڵایی ئەم مێژووەش تێبگەین.
پیلانگێڕێتی؛ تایبەتمەندییەكی هەرە بنچینەیی زیهنییەتی دەسەڵاتخوازێتی و سیستەمی داگیركەرێتییە. رەگی پیلانگێڕێتی تا قووڵایی مێژوو رۆچووە و لق و پۆپەیشی تا رۆژگاری ئەمڕۆش هاتووە. لەكوێ چەوسانەوە و نادادی و نایەكسانی هەبێت، لەوێ تێكۆشان بۆ ئازادی، دادپەروەری و یەكسانی پێشكەوتووە، بەڵام هەمیشە لەبەرامبەر ئەو تێكۆشانەشدا تەونی پیلانگێڕێتی دەچنرێ. لەگەڵ یەكەم هەنگاوی دابەشبوونی نێو كۆمەڵگا سەرەتاییەكاندا پیلانگێڕێتییش وەك شێوازێكی چەوساندنەوە، باڵادەستێتی و كۆیلایەتیكردن تاهاتووە پەرەی سەندووە و شێوە و چوارچێوەی جۆربەجۆری وەرگرتووە. هەرچەندە شێوە و شێواز و ئامانجەكانیان جیاوازیش بن، بەڵام سروشت و ناواخنی هەموو پیلانگێڕییەكان یەكن.
لەو باوەڕەدام هیچ گەلێك بەڕادەی گەلی كورد پیلانگێڕێتی لەدژدا ئەنجامنەدراوە. رەنگبێ سروشت و پێكهاتەی ئەم گەلە و وڵاتەكەی و مەیلە ئازادیخوازانەكەی، كە لەنێو قۆناخی نیۆلۆتیكەوە سەرچاوە دەگرێت، هۆكارێكی بنچینەیی چنینی پیلانگێڕییەكان بێت لەدژیدا.
(پەكەكە)ش وەك تەڤگەرێكی سەربەخۆی ئازادیخوازی هەڵقوڵاوی نێو ئەم گەل و وڵاتە لەبەرامبەر مەیلە ئازادیخوازنەكەیدا زۆرترین و چڕوپڕترین و مەترسیدارترین پیلانگێڕێتی لەدژدا ئەنجامدراوە. سەرجەم ئەو هەوڵە پیلانگێڕییانەی ئەنجامدراون؛ چ لەناوخۆییدا بێت، یان دەرەكی بێت، لەناوەندێك یان لەچەند ناوەندێكی هاوبەشدا چنراون و بەڕێوەبراون، ئەو پیلانگێڕییە دەرەكییانەی ئەنجامدراون هەوڵدراوە زەمینە و پشتیوانی ناوخۆیی لەناو كوردان (هەم لەناو تەڤگەر و هەم لەناو هێزە كوردییەكاندا) بەدەستبخات. بەهەمان شێوە؛ پیلانگێڕییە ناوخۆییەكانیش بەزەمینە و پشتیوانی دەرەكی (هێزە داگیركەرەكان، زلەێزە ئیمپریالیستەكان) ئەنجامدراون. كرۆك و ئامانجی سەرجەم پیلانگێڕییەكان؛ سەرەتا دەستپێكردنی كەمپینی ناوزڕاندن و رەشكردنی تەڤگەرە، ئەگەر ئەمەش ئەنجامگیر نەبوو ئەوا هەوڵی بێكاریگەریكردن و مارژیناڵكردن، ئەگەر ئەمەش ئەنجامگیر نەبوو، هەوڵی پارچەكردن و بەخۆوەگرێدان و بەلاڕێدابردن دەدرێت، ئەگەرنا هەوڵی لەناوبردن و تەسفیەكردنی دراوە.
دەكرێ لەو پیلانگێڕییانەی كە لەبەرامبەر رێبەر ئاپۆ و (پەكەكە) و گەلی ئازادیخوازی كورددا ئەنجامدراون كۆی ئەزموونی پیلانگێڕێتی مێژووی مرۆڤایەتی ببینین. واتا لەناواخن و شێوازەكانی ئەو پیلانگێڕییانەدا سەرجەم شێواز و تاكتیك و نەخشە و ئامرازە بەكاربراوەكان بەكارهاتوون. بۆیە پیلانگێڕییەكان نموونەی گڵاوترین، هۆڤانەترین و مەترسیدارترین پیلانگێڕیین. لەكۆی ئەو پیلانگێڕییانەدا پەیامێك یان ئامانجێكی زلەێزە باڵادەستەكانی جیهانی و داگیركەرانی كوردستان خۆی حەشارداوە، ئەویش ئەمەیە:" نابێ لە خۆرهەڵاتی ناوین بەگشتی و كوردستان بەتایبەتی هیچ هێز، تەڤگەر و سیستەمێكی سەربەخۆ و ئازاد سەرهەڵبدات، ئەگەر سەریشهەڵبدات ئەوا مسۆگەر مەحكومی ناوزڕاندن، بێكاریگەركردن، مارژیناڵكردن (بچووككرنەوە)، پارچەكردن و بەخۆوەگرێدان، بەلاڕێدابردن و لەناوبردنە" سەرجەم ئەو شێواز و تاكتیكانەش شێواز و تاكتیكی پیلانگێڕیین. لەم پێناوەشدا هەمیشە چینی باڵادەستی كورد و چینە باڵادەستەكانی نێو گەلانی خۆرهەڵاتی ناوین و ئەو هێزانەی نوێنەرایەتییان دەكەن دەست لەسەر سنگ ئامادەی هەموو تێوەگلان و تێوەخزان و بەشداریكردنێكن لەو پیلانگێڕییانەدا. ئیدی ئەوەی لەبەرامبەر رێبەر ئاپۆ، (پەكەكە) و گەلی كورددا ئەنجامدراوە و بەڕێوەبراوە، رێك لەگەڵ ئەو راستییەدا یەكانگیر دەبێتەوە. بێگومان پیلانگێڕان هەمیشە بێباك بوونە لەو گەمە گڵاوانەی ئەنجامیان داوە، گرنگ پاراستنی بەرژەوەندییە كاتی و هەمیشەییەكانیان بووە.
ئەگەر ئەمڕۆ دوای هەموو ئەو پیلانگێڕییانەی لەبەرامبەر گەلی كورد بەگشتی و (پەكەكە) و رێبەر ئۆجەلان بەتایبەتی ئەنجامدراون، بەوردی لەئاكامەكانی ئەو پیلانگێڕییانە بكۆڵینەوە، دەكرێ بپرسین: داخوا گەلی كورد، (پەكەكە) و رێبەر ئاپۆ ملكەچی پیلانگێڕان بوون؟ بێكاریگەر و پارچە و مارژیناڵ كران؟ بەوانەوە گرێدران و بەلاڕێدابردران؟ لەناوچوون؟ پیلانگێڕان ئەنجامگیربوون؟ پیلانەكانیان سەركەوت؟ لێرەوە دەتوانین بڵێین: هەرچەندە پیلانگێڕان زەبریان لە گەلی كورد و (پەكەكە) و رێبەر ئۆجەلان داوە و زۆر زەرەرمەند بوون، چەندین كۆسپ و تەگەرە و ئێش و ژان و كێشە و گرفتی زۆریان بۆ دروستكردوون و رێگای گەیشتن بەئازادی و مافەكانیان دوورتر كردۆتەوە. بەڵام هەرگیز نەیانتوانیوە گەلی كورد، (پەكەكە) و رێبەر ئۆجەلان بێكاریگەر و پارچە و مارژیناڵ بكەن یان بەخۆیانیانەوە گرێبدەن و بەلاڕێیاندا ببەن، یاخود لەناویان ببەن. هیچ كاتێك نەیانتوانی باوەڕی و هیوا و ئیرادەی ئازاد و سەربەخۆیان تێكبشكێنن، یان لەفەلسەفەی ئازادی و ژیانێكی شكۆمەند بەدووریان بگرن. راستە گەلی كورد و (پەكەكە)یان دووچاری چەندین شەڕ و پێكدادانی دەستەویەخە كرد، گەلێك دەرفەتی بەهاداریان لەدەست كورد و (پەكەكە) بەفیڕۆدا، زۆر توانستی ماددی و مەعنەوی گەلی كورد و (پەكەكە)یان بەهەدەردا، رێبەر ئاپۆیان بەگڵاوترین شێوەی پیلانگێڕێتی دەستگیركرد، تەنانەت لەرۆژگاری ئەمڕۆدا، لەنێو دۆخی گۆشەگیری لەناو گۆشەگیریدا بەقێزەونترین رەفتار ژەهرخواردیشیان كرد... مسۆگەر لەمەو دواش پیلانگێڕان دەستبەرداری پیلانگێڕێتی خۆیان نابن... بەڵام سەرەڕای هەموو ئەو گورزە كوشندانە، گەلی كورد، تەڤگەری (پەكەكە) و رێبەر ئۆجەلان لەهەموو كاتێكی دیكە زیاتر بەكاریگەرتر، تۆكمەتر، بەهیواتر و بەباوەڕتر و بەئیرادەترن، لەهەموو كاتێك زیاتر پەیوەستی یەكدی و پەیوەستی ئازادین، ئەمڕۆ گەلی كورد لەرووی چۆنایەتییەوە گۆڕان و وەرچەرخانێكی مەزنی بەخۆیەوە بینیوە و بانگەشەی ئازادیخوازانەی خۆی لەهەر كاتێكی دیكە زیاتر بەرزتر و بەهێزترە. تەڤگەری (پەكەكە)ش ئیدی لەتەڤگەرێكی كادیران و نوخبە دەرچووە و بۆتە تەڤگەرێكی جەماوەری گەلەری هەرە مەزنی جیهان. فەلسەفە و پارادیگمای رێبەر ئاپۆش سنووری تەواوی كوردستانی بڕیوە و بەرەو خۆرهەڵاتی ناوین و جیهان هەڵدەكشێ و وەك بەهایەكی هەرە هێژای مرۆڤایەتی لێیدەڕوانرێ. ئەمڕۆ گەلی كورد بەسروشت و تایبەتمەندی شارستانی و هاوچەرخانەی خۆیەوە رۆڵی داینەمۆی رێنسانس، رۆشنگەری، دیموكراتیزەكردن و كۆنفیدراڵێتی خۆرهەڵاتی ناوین دەگێڕێت. تەنانەت لەدۆخی تەڤلیبوونی توركیا بۆ یەكێتی ئەوروپا گەلی كورد بەو سروشت و تایبەتمەندییەی خۆیەوە، كە تەڤگەری (پەكەكە) تێیدا ئافراندوویەتی وەك چوارەمین گەورەترین گەل لە ئەوروپا توانستی رێڕەوكردنی لەگەڵ گەلانی ئەوروپادا هەیە. بەمەش هەم بە ناسنامەی خۆرهەڵاتییانەی خۆی و هەمیش بە ناسنامەی ئەوروپاییانەی خۆییەوە رۆڵگیر دەبێت. ئیدی ئەو گەلەی بەهەموو شێوەیەك نكۆڵی و قڕدەكرا و لەنێو بۆتەی گەلی سەردەستدا دەتوێنرایەوە، ئەمڕۆ بەو وزەو توانستە شاراوەیەی كە رێبەر ئاپۆ و (پەكەكە) لەم گەلەدا دەریخستۆتە روو، بەو شێوەیە ئاراستەگیر بوو. هەڵبەتە ئاستی پیلانگێڕییەكان وەك چۆن گوزارشت لەئاستی كێشەی گەلی كورد دەكات ئەوا بەهەمان شێوە گوزارشت لە ئاستی پێشكەوتن و بەرزبوونەوەی تێكۆشانی گەلی كورد، (پەكەكە) و رێبەر ئاپۆش دەكات، ئەم تێكۆشانە سەرەڕای هەموو مەترسییەكان و ئەگەری روودانی پیلانگێڕێتی كوشندەتر و گڵاوتریش، بەڵام كۆتایی بەسەركەوتنی سەردەمی پەیماننامە و رێككەوتنە شوومەكانی قەسری شیرین، سایكس بیكۆ، لۆزان، سەعد ئاباد، سەنتۆ، بەغداد، جەزائیر، دبلن و واشنتۆن و ...هتد هێنا و سەردەمی "گەلی سەركەوتن" دەستیپێكردووە و هاوار و بانگەشەی ئازادیخوازانەی تادێَت جیهانی "كەڕ، ڵاڵ، كوێر" تێدەپەڕێنێت و وێنای جیهانێك كە "كوردی ئازاد"یش هەرسبكات، دەنەخشێنێت.
بێگومان ئەمە بەو واتایە نایەت كەچیدی لەبەرامبەر كوردان و تەڤگەر و رێبەرە ئازادیخوازییەكەی پیلانگێڕێتی ئەنجام نادرێت. رێك بەپێچەوانەوە ئێستا پیلانگێڕێتی هەرە مەزن بەڕێوە دەچێت. تەنانەت ئەو پیلانگێڕییە نێودەوڵەتییەی كە لە(15)ی شوباتی (1999)دا رێبەر ئۆجەلانی تێدا رفێنرا و رادەستی رژێمی تۆتالیتاری توركیا كرایەوە، ئێستا لەمیانەی ژەهرخواردكردنی رێبەر ئۆجەلان، هێرشی ئاسمانی و زەمینی بۆ سەر بناری قەندیل و دانانی ئابڵۆقەی ئابووری و راگەیاندنی بۆ سەر مەخموور و قەندیل، دواخستنی ماددەی (140) و پەراوێزخستنی پێگەی كورد لە بەغدا و تەواوی خۆرهەڵاتی ناوین و چەندین ئیجرائات و هەڵوێستی دیكەی دژ بە گەلی كورد لە ئاستی ئێراق و هەرێمەكە و جیهان سەلمێنەری ئەو راستییەن كە لە ئانوساتی ئێستادا پیلانگێڕێتی هەرە مەزن و كۆی هەموو پیلانگێڕییەكان لەئارادایە. بەڵام ئەو پیلانگێڕییانەی ئێستاش و داهاتووش مەحكومی شكست و دۆڕانن. چونكە گرەوە مێژووییەكەیان دۆڕاندووە و ئەوەی مێژووش بدۆڕێنێ ئەمڕۆ و داهاتووش دەدۆڕێنێ...!!
ئەوەی لەدووتوێی مێژووی سی و شەش ساڵەی ئەو تەڤگەرەدا دەبینرێت هەبوونی بەردەوامی پیلانگێڕێتی ناوخۆیی، یان تەسفیەگەری ناوخۆیی نێو تەڤگەری (پەكەكە)یە. بێگومان تەسفیەگەرێتی وەك پرۆسەیەكی بەردەوامی نێو تێكۆشانی ئازادیخوازی تەڤگەری (پەكەكە)، ئۆبژێكتیڤ یان سۆبژێكتیڤ، راستەوخۆ یان ناڕاستەوخۆ، هەمیشە بۆتە زەمینەی پیلاگێڕێتی دەرەكی و كەوتۆتە خزمەتی پیلانگێڕان و جورئەتی پێداون. تەسفیەگەرێتی (تەسفیەچێتی) واتا لادان یان شێواندنی فەلسەفە، ئایدیۆلۆژیا و سیاسەت و پێوانە بنچینەییەكانی ژیانی رێكخستنی و تێكۆشانی تەڤگەر، تەسفیەگەرێتی یاریكردنە بەرێبازی تێكۆشان، بەها ماددی و مەعنەوییەكانی گەل و شۆڕش و مرۆڤایەتی، تێكدانی یەكێتی ریزەكانی رێكخستن و تەمومژاویكردنی ژینگەی تێكۆشان و هزری كادیران و گەل، رووخاندنی پردی باوەڕی و متمانەی پەیوەندی نێوان " گەل ـــ تەڤگەرـــ رێبەر"، شكاندنی باوەڕی، هیوا، ئیرادەی ئازاد و سەربەخۆ، پەرشوبڵاوە پێكردنی توانست و وزەی سەركەوتن، سەپاندن و تەشەنەسەندنی زیهنییەت و چەمكەكانی هێزە پاشڤەڕۆ و دۆڕاوەكانی ناوخۆ و داگیركەرێتی و سیستەمی باڵادەستی سەرمایەداری جیهانی. لەژێر ناوی نوێكردنەوە و گۆڕانكاریدا دووركەوتنەوە لەچەمكی رەنج، هەڤاڵێتی، خزمەتكردن، بەرخۆدان، هەرەوەزكاری و قارەمانێتی، پێشدەخات. لەبەرامبەر ئەمەشدا پەیوەستبوون بەگیانی دەسەڵاتخوازێتی، مشەخۆرێتی، تاكڕەوێتی، تەسلیمكاری، بەكرێگیراوێتی و خیانەتكارێتی پەرەپێدەدات.
تەسفیەگەرێتی لەنێو خودی شۆڕشدا وەك جموجۆڵێكی "دژە شۆڕش"ی پەنا وەبەر هەموو شێواز و ئامراز و رێگایەك دەبات بۆ ئەوەی خۆی لەنێو تەڤگەری شۆڕشگێڕێتیدا باڵادەست بكات، تەواوی دەستكەوت و بەها ماددی و مەعنەوییەكان بۆخۆی گلدەداتەوە. لەم پێناوەشدا هێز و وزەی خۆی لەگەشەپێدانی پێڕپێڕێتی، گروپچێتی، پارچەگەرێتی و ناوچەگەرێتی خەرج دەكات و پشت بە وروژاندنی لاوازییەكانی مرۆڤ دەبەستێت و خیتابی لایەنە غەریزەیی، سۆزداری و هەستەكان دەكات و سوكایەتی بە فەلسەفە و هزر و ژیرایەتی، یەكێتی نەتەوەیی و بەرژەوەندییە گشتییە باڵاكانی گەل و تەڤگەر دەكات. بەمەش مەكیاڤیلیستیانە هەموو شتێك دەخاتە خزمەتی نەوسنێتی (چڵێسی) و داخوازی شەخسی و پێڕپێڕایەتی و گروپێچێتی خۆیەوە و پاساو بۆ گرتنەبەری هەموو شێواز و رێگایەك دێنێتەوە، تەنانەت بەهەڵاتن، تەسلیمبوون و خەیانەتكردنیشەوە...
تەسفیەگەرێتی لەنێو تەڤگەری (پەكەكە)دا واتا دووبارەكردنەوەی مێژوو و قەدەرە شوومەكانی نێو مێژووی گەلی كورد و چارەنووسی تەڤگەرە راپەڕیو و سەرهەڵداوەكانی رابردوو، واتا سەرخستنی هێڵی شكست، تەسلیمبوون و خیانەتكارییە بەسەر هێڵی سەركەوتن، بەرخۆدان و قارەمانێتیدا. بەدرێژایی مێژووی ئەم تەڤگەرەش؛ هاوشانی رێبازی تێكۆشان و بەرخۆدان، تەسفیەگەرێتیش وەك زیهنییەت، چەمك و جموجۆڵ دەركەوتووە و لەزۆر رووەوە گورزی لە گەل و (پەكەكە) داوە، بەڵام نەیتوانیوە وەك هێڵێك باڵادەستێتی خۆی بەسەر تەڤگەر و گەلدا بسەپێنێت. هەرچەندە تەسفیەكاران لەئاستی جیاواز و بەزیهنییەت و چەمكی تەسفیەگەرێتی جیاوازەوە جموجۆڵیان كردووە، بەڵام سەرتاپایان لەگەوهەر و ئامانجدا یەكانگیر بوونەتەوە. گەوهەر و ئامانجی تەسفیەگەرانی نێو تەڤگەری (پەكەكە) هەمان گەوهەر و پیلانگێڕێتی دەرەكیان هەبووە، بۆیە لەزۆر قۆناخی ئەم مێژووەدا بەیەكەوە جموجۆڵیان كردووە و هەوڵ و تەقەللاكانی یەكتریان تەواو كردووە، لەگەڵ شكستی یەكێكیان ئەوەیتریش شكستیهێناوە، لەگەڵ پەرەسەندن و بەهێزبوونی یەكێكیان ئەوەیتریش پەرەیسەندووە و بەهێزبووە. لەئاكامدا قەدەر و چارەنووسی خۆیان بەیەكەوە بەستراوەتەوە و هێزبەخشی و ئومێدبەخشی یەكتربوونە.
ئەوەی لێرەدا گرنگە؛ تێگەیشتن لەهۆكار و زەمینەی دەركەوتنی كەسێتی تەسفیەگەرا و زیهنییەتی تەسفیەگەرێتییە. هەڵبەتە بەبێ تێگەیشتنی زانستیانە لەسروشت و پێكهاتەی كۆمەڵگای كورد و راستینەی تەڤگەری (پەكەكە) ناكرێ شیكردنەوەیەكی ورد و زانستیانەمان هەبێت بۆ ئەقڵییەت و چەمك و جموجۆڵە تەسفیەگەراییەكان. هەڵبەتە ئەگەر رێبەر ئۆجەلان و پێشەنگانی تەڤگەری (پەكەكە) وەك فاكتەرێكی خودی (ژاتی) وەڵامی هەلومەرجە بابەتییەكە دەدەنەوە، ئەوا مسۆگەر تەسفیەگەران و تەسفیەگەرێتیش لەنێو خودی سروشت و پێكهاتەی كۆمەڵگای كورددا دەركەوتووە، ئەو كۆمەڵگایەی لەمیانەی باڵادەستبوونی سەدان ساڵەی سیستەمە داگیركەرەكان لە كوردستاندا شێوەی گرتووە و كارەكتەرێكی تەسفیەگەرێتی پێدراوە. كارەكتەرێك دووژمنایەتی و نكۆڵی لە ناسنامە و هەبوونی خۆی دەكات و دەستەمۆی سیستەمی باڵادەست بووە.
كۆمەڵگای كورد بەهۆی باڵادەستی یەك بەدوای یەكی سیستەمە داگیركەرەكان و سروشت و تایبەتمەندێتی خۆیەوە نەیتوانیوە بەشێوەیەكی سروشتی پێشبكەوێت، بۆیەش یەكلاییبوونەوەیەكی چینایەتیانەی بەخۆیەوە نەبینیوە و زۆر كەم ململانێكان كەوتوونەتە چوارچێوەی ململانێی چینایەتی. ئەوەی هەیە و یەكلایی بۆتەوە، باڵادەستبوونی چینێكی بەكرێگیراو و تەسلیمكار و پاشكۆی سیستەمە داگیركەرییەكانە و خۆی وەك چینێكی سەرووی كۆمەڵگا نیشان دەدات. بۆیە ناكۆكی و ململانێی كۆمەڵگا (گەل)ی كورد لەگەڵ ئەو چینە باڵادەستەدا راستەوخۆ ناكۆكی و ململانێ بووە لەگەڵ سیستەمە داگیركەرییەكاندا. چونكە بەرجەستەكەری ئەقڵییەت و چەمك و كولتووری داگیركەری بووە لە كوردستاندا، بەڵام لەگەڵ دەركەوتنی تەڤگەری (پەكەكە) و بەرزكردنەوەی تێكۆشانە فرە رەهەندی و فرە تەوەرییەكەیدا، ناكۆكی و ململانێییەكانی لەگەڵ ئەقڵییەت، چەمك، كولتوور و رەفتاری ئەو چینەدا خەست و قووڵتر كردەوە. ئەمە هەم لەئاستی كۆمەڵگادا بەگشتی و هەمیش لەنێو تەڤگەردا بەتایبەتی، یەكلایی بوونەوەیەكی لێبڕاوانەی لەرووی كەسێتی، ئەقڵییەت، چەمك، كولتوور و جموجۆڵدا پێشخست. بۆیە ناكۆكی و ململانێیە چینایەتییەكان زیاتر لەزەمینەی ئایدیۆلۆژی، سیاسی و كولتووری و كۆمەڵایەتییدا پەرەیسەند. لەبەر ئەوەی تەڤگەری (پەكەكە) تەڤگەری كۆمەڵگای ژێرینە و لەپێناو بەرژەوەندی و هیوا و ئامانجەكانی رەگەز و چینەكانی ژێرەوەدا لەنێو تێكۆشان و بەرخۆدان دایە، ئەوا ئەمەش راستەوخۆ ناكۆك و دژبەری بەرژەوەندی و هیوا و ئامانجەكانی چینە باڵادەستەكەی نێو كۆمەڵگایە. ئیدی تەڤگەری (پەكەكە) وەك دینامیكێكی بەهێزی هەڵاوێردكردنی یەكلاییكردنەوەی كەسێتی، ئەقڵییەت، چەمك، كولتوور و جموجۆڵی چینەكان بووە بە خاكێكی بەپیت و فەڕی ئەو هەڵاوێرد و یەكلاییكردنەوەیە و چڕ و قووڵكردنەوەی ناكۆكی و ململانێییەكان.
لەم چوارچێوەیەدا؛ هەڵگرانی كەسێتی، ئەقڵییەت، چەمك، كولتوور و تایبەتمەندییەكانی ئەو چینە باڵادەستە لەنێو تەڤگەری (پەكەكە)دا، لەمیانەی پێداگیری و سەپاندنی كەسێتی ئەو كارەكتەرەی لەكۆمەڵگاوە لەگەڵ خۆیاندا هێناوە بۆ نێو تەڤگەر، وەك زەمینە و پاڵنەری سەرەكی دەركەوتنی كەسێتییە تەسفیەگەراكانە. بۆیە دەركەوتنی تەسفیەگەرێتی لەسەر بنەمای "چەمكی فیوداڵ ــ پیلانگێڕی بەكرێگراو، بۆرژوازی لیبڕالیزەبووی تەسلیمكار، چەتەگەرێتی، لومپەنێتی و گروپچێتی، پیاوسالارێتی و پارچەگەرایی" وەك چەندین خەتی تەسفیەگەرێتی لەقۆناخە جیاوازەكانی مێژووی تێكۆشانی تەڤگەری (پەكەكە)دا دەركەوتووە و پێشكەوتنی تەوەرە و رەهەندەكانی تێكۆشانی (پەكەكە)ی ئاستەنگ كردووە و خواستوویەتی تەواوی تەڤگەر بەلاڕێدا ببات، مارژیناڵ و پارچەی بكات و قەدەری شوومی شكست و تەسلیمكاری بەسەر تەڤگەر و گەلدا بسەپێنێتەوە.
هەڵبەتە ئەو زەبرانەی تەسفیەگەرێتی بەتەڤگەر و گەلی گەیاندووە، ئەگەر زیاتر نەبێت، كەمتر نەبووە لەو زەبرانەی كە پیلانگێڕییە دەرەكییەكانی داگیركەران و هێزە پاشڤەڕۆكانی كورد و زلەێزە ئیمپریالیستەكان بە تەڤگەر و گەلیان گەیاندووە. هەرچەندە رێبەر ئاپۆ و (پەكەكە) تێكۆشانی فەلسەفی، ئایدیۆلۆژی و رێكخستنیان لەبەرامبەر چەمك و ئەقڵییەتە تەسفیەگەراییەكان بەبنچینە وەرگرتووە، بەڵام تەسفیەكاران بە پیلانگێڕییەتی و شێوازە مەكیاڤیلیستییەكان و جموجۆڵی شاراوە و دەست تێكەڵكردن لەگەڵ پیلانگێڕانی دەرەكی پەرەیان بە تەسفیەگەرێتی خۆیان داوە. بەمەش تەسفیەگەرێتی بەپێداگری لەسەر سەپاندنەوەی سروشت و كارەكتەری كۆمەڵگای باوی كورد و چینە باڵادەستەكەی خواستوویەتی گەوهەر و فەلسەفە و ستووندەكانی "شۆڕش" بەدینامێتی تەسفیەگەرێتی هەپڕوون بە هەپڕوون بكات و بیسڕێتەوە.
بەڵام سەرەڕای هەموو ئاستەنگ و ئێش و ئازارەكان و لەدەستدانە ماددی و مەعنەوییەكان و بەفیڕۆدانی دەرفەتە زێڕینەكان، پیلانگێڕێتی ناوخۆیی و تەسفیەگەرێتییەكان نەیانتوانیوە دیالیكتیكی پێشكەوتن و مەزنبوونی تەڤگەری (پەكەكە) رابوەستێنن، (پەكەكە) و گەل لە فەلسەفەی ژیانی ئازاد و شكۆمەندێتی بەدوور بخەنەوە و بەلاڕێییدا ببەن. ئیدی بۆ یەكەمین جار لەمێژووی گەلی كورددا مەیل و هێڵی تەسلیمكاری و بەكرێگیراوێتی و خیانەتكاری لەبەرامبەر مەیل و هێڵی ئازادیخوازێتی و بەرخۆدان و وڵاتپارێزێتی سەرناكەوێ و شكست دێنێ.
ئەمەش پێگەیەكی شكۆداری بە رێبەر ئاپۆ و تەڤگەری (پەكەكە) لەمێژوو و رۆژگاری ئەمڕۆ و داهاتووی گەلی كورد و مرۆڤایەتیدا بەخشی.
لەمێژووی تەڤگەری (پەكەكە)دا، رۆڵ و پێگەی رێبەر ئۆجەلان وەك ئافرێنەرو بنیادنەری تەڤگەری (پەكەكە) دەردەكەوێتە ڕوو، رێبەر ئاپۆ بەتێكۆشانی مەزن و بەردەوامی فەلسەفی، هزری، ئایدیۆلۆژی، سیاسی و رێكخستنی خۆی سیما و گەوهەری بەم تەڤگەرە داوە و پێشیخستووە و مەزن و فراوانی كردووە. سەرچاوەی بنچینەیی هزری، باوەڕی، مۆڕاڵ، جورئەت و فیداكاری و قارەمانێتی هێز و ئیرادەی تەڤگەر و گەل رۆڵگیربووە و رێبەرایەتی و سەرۆكایەتی سەرجەم قۆناخ و قەڵەمبازەكانی كردووە. هەروەها لەكەسێتی خۆیدا سیستەمێكی هزر و ژیان و پراكتیكی هاوچەرخ و رادیكاڵی بەرجەستە كردووە و خۆی لەنێو رۆح و هزر و ژیان و پراكتیكی تەڤگەر و گەلیشدا تواندۆتەوە و وەك فەلسەفە و پارادیگمایەك بۆ ژیانەوەی نەتەوەیی و ئافراندنی كەسێتی و كۆمەڵگایەكی ئازاد ئاوێتەگیر بووە.
لەگەڵ هەڵكشانی تێكۆشانی تەڤگەری (پەكەكە)دا؛ پیلانگێڕییە دەرەكی و نێوخۆییەكان لەبەرامبەر ئەو تەڤگەرە بەگشتی و كەسێتی ئۆجەلان بەتایبەتی، تا هاتووە چڕوپڕ و شەڕانگێزتر بووە. تەوەری سەرەكی زۆربەی پیلانگێڕییەكان لەدەوری كەسێتی ئەودا خولاوەتەوە. چونكە ئەو راستییە دەركی پێكراوە كە ئافرێنەری فەلسەفە و سیستەمی تێكۆشان و ژیانی ئەم تەڤگەرە (رێبەر ئۆجەلان)ە. بۆیە ئۆجەلان بۆ سیستەمی سەرمایەی جیهانی (ئیمپریالیستی) و داگیركەران و هێزە وابەستە كوردییەكان بۆتە فۆبیای هەرە مەترسیداری دواچارەكی سەدەی بیستەم و ئێستای ئەم سەدەیە.
لەپێناو رەواندنەوەی ئەو فۆبیایەدا تەواوی هەوڵ و تەقەللاكانیان كردۆتە یەك و لەرێگەی "ناوزڕاندن، بێكاریگەركردن، هەوڵی تیرۆركردن، دەستگیركردن..." و لەرۆژگاری ئەمڕۆشدا ژەهرخواردكردنی دەیانەوێت ئەنجامگیر ببن. بەڵام لەدوا ئاكامدا مایەپووچ بوونە. هۆكارێكی زۆر بنچینەیی ئەو مایەپووچییەش فەلسەفە و پارادیگمای سەربەخۆ و ئازادیخوازانەی خودی رێبەر ئۆجەلانە، كە لەدەرەوەی بازنەی ئەقڵییەت، لۆژیك و چەمكی باو و باڵادەست و سەپێنراودا دینامیكی پێشكەوتن و گۆڕانكاری خۆی ئافراندووە و دەستبەرداری لە دیالیكتیكی بنچینەیی خۆی نەكردووە و نەكەوتۆتە ژێر ركێفی هیچ زیهنییەت، دەسەڵات و هێزێك. بێگومان ئەگەر بخوازین لەم هۆكارە سادەیە قووڵ ببینەوە و لێی تێبگەین ئەوا پێویست بە خوێندنەوە و لێتۆژینەوەی قووڵی سەرجەم بەرهەمە فەلسەفی، ئایدیۆلۆژی، سیاسی و كۆمەڵایەتییەكانی بكەین و قۆناخەكانی ژیان و تێكۆشانیشی بخەینە ژێر لێكدانەوە و شیكردنەوەوە.
خاڵی هەرە سەرنجڕاكێش لەكەسێتی رێبەر ئۆجەلاندا ئاوێتەبوون و یەكانگیربوونی نێوان فەلسەفە و ژیانی، هزر و تێكۆشانی، تیۆری و پراكتیكەكەییەتی. هەروەها لەتەواوی قۆناخەكانی ژیان و هزر و تێكۆشانیدا سیمای فەلسەفەیەك، پارادیگمایەك لەگەشە و نەشونماكردن دایە و تادێت چڕ و قووڵ و فراوان دەبێتەوە، كە لەگەڵ هەر ئەزموون و هەنگاوێكی كرداریانە (پراكتیزەكردن)دا خۆی هەڵاوێرد دەكاتەوە و خۆی لەبێژینگ دەداتەوە. لەرووێكی دیكەشەوە؛ رەخنە و رەخنە لەخۆگرتن وەك گرنگترین پرۆسەی ئەو هەڵاوێردكردن و لەبێژینگدانەدا هەمیشە ئامادە و بەردەوامە.
بێگومان لێرەدا دەرفەتی ئەوە نییە قسە لەسەر ئەو مەسەلانە و خودی كەسێتی رێبەر ئۆجەلان، لەهەموو رووێكەوە، بكرێت، ئەمە لەتوانستی منیشدا نییە. بەڵام دەكرێ تێخوێندنەوەیەكی وردی ئەو مێژووە ببێتە دەروازەیەك بەرووی تێگەیشتن لەكەسێتی رێبەر ئۆجەلان. چونكە كارەكتەری بنچینەیی و سەرەكی ئەو تەڤگەرەیە. لەو باوەڕە دام تێگەیشتنێكی قووڵی هەمەلایەنە لەكەسێتی ئەودا، خۆی لەخۆیدا دەبێتە وەڵامێك بۆ ئەو پرسیارەی كە؛ ئەنجامدانی ئەم هەموو پیلانگێڕییە و گردبوونەوەی ئەم هەموو پیلانگێڕانە لەدژی رێبەر ئۆجەلان بۆچی؟ لەوانەیە زۆر وەڵام بۆ ئەو پرسیارە ئامادەبكرێت، بەڵام لەو باوەڕەدام وەڵامی هەرە سادە و یەكانگیر لەگەڵ راستینەی ئۆجەلان و راستینەی ئەوانەی لە ئۆجەلان دەترسن و وەك فۆبیا و نوێنەری مەترسیدارترین تەڤگەر و گەل دەبینن ئەوەیە؛ ئۆجەلان دەخوازێت خۆی و گەلەكەی و تەواوی مرۆڤایەتی، لەژینگەیەكی سروشتی خاوێندا، بە ئیرادەی ئازاد و سەربەخۆی خۆیان بژین، هەموو كەسێك، گەلێك، رەگەزێك، ئایینێك، ئایینزایەك و هەموو پێكهاتەیەكی كۆمەڵایەتی و كولتوورییەكی تر بە ناسنامە و تایبەتمەندییەكانی خۆی بژیت. ئەو تەڤگەرەی ئافراندوویەتی و ئەو گەلەی سەرلەنوێ خستییەوە سەر شانۆی ژیان، هەموو ئەو تێكۆشان و بەرخۆدانەی كردوویەتی لەپێناو گەیشتن بەو ئامانجە ئاراستەگیربوونە. سەرجەم ئەوانەش كە مەرگی خۆیان لەبەدیهێنانی ئەو ئامانجەدا دەبیننەوە، ئۆجەلان وەك هۆكار و هێز و مۆراڵی بەدیهاتنی ئەو ئامانجە دەبینن، بە سەرچاوەی زیندووكردنەوەی سەرجەم خەون و یۆتۆپیا جوان و فردۆسییەكانی مرۆڤایەتی دەبینن. راستییەكەیشی هەر وایە. بۆیە ئۆجەلان وەك ئیرادەیەك كە بەهیچ شێوەیەك رامناكرێت و دەستەمۆ و دەستخەڕۆ نابێت، بۆتە كانگای باوەڕی و هیوا و مۆڕاڵ و وزە و توانستی هەموو ئەوانەی هەمان خەون و یۆتۆپیا و داخوازی ئۆجەلانیان هەیە. ئیدی ئۆجەلان بۆتە رەمزی هەموو ئەوانەی دەخوازن "بەئازادی و بۆ ئازدی بژین و بمرن". مسۆگەر ئازادیخوازان، گەلی كورد، ژنان، لەپێشەنگی ئەوانەن كە لەدەوری ئۆجەلان گرددەبنەوە. چونكە هێشتا تام و چێژی ژیانە سروشتی و ئازادییەكەی زەمەنی نیۆلۆتیك (چەرخی بەردینی نوێ) لەقووڵایی كەسێتی كورد و ژندا خۆی حەشارداوە و هەزاران ساڵە لێی بێبەشكراون. بۆیە كورد و ژن ئاشق و شەیدای هەرە مەزنی ئازادیین. هەڵبەتە ئازادیخوازانی نێو گەلانی خۆرهەڵاتی ناوین و جیهانیش كە ئازادی خۆیان لە ئازادی كورد و ژناندا دەبیننەوە، بێدوودڵی لەدەوری ئۆجەلان گردبوونەتەوە و لەمەودواش گرددەبنەوە. ئیدی بەو هزر و فەلسەفە و سیستەمەی باوەڕی پێی هەیە و لەخۆیدا بەرجەستەی كردووە، لەپێناویدا تا ئاستی دەستگیركردن و ژەهرخواركردن بردراوە، دەمێكە لەوە دەرچووە تەنیا گوزارشت لەخودی خۆی وەك كەسێك بكات، بەڵكو لەپێناو ئازادیدا خۆی لەنێو قووڵایی مێژووێكی پڕ لەتێكۆشان و بەرخۆدانی ملیۆنان مرۆڤدا تواندۆتەوە، مسۆگەر ئەوەی لەنێو قووڵایی مێژووێكی وەها شكۆداردا توابێتەوە ئەوا لەرۆژگاری ئەمڕۆ و ئاییندەیەكی شكۆداریشدا هەر دەبریسكێتەوە. حیكمەتە نەمرەكەی مێژووش لەمەدایە.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
