گۆڕینی ئه‌م ده‌سه‌ڵاته ئه‌رکێکی نه‌ته‌وه‌یی و مێژوویی یه .
Friday, 04/02/2011, 12:00
(هیچ میلله‌تێك نیه له‌دونیادا سه‌رکرده‌کانی سۆز تێکه‌ڵ به‌سیاسه‌ت بکه‌ن وه‌هه‌روه‌ها هیچ سه‌رکرده‌یه‌ك نیه له‌هه‌مودونیادا هێنده‌ی سه‌رانی کورد موجامه‌له‌ی دوژمناکانی بکات و سازش له‌سه‌ر مافه نه‌ته‌وه‌یه‌کانی گه‌له‌که‌ی بکات) له‌هه‌مان کاتدا هیچ میلله‌تێك نیه به ئه‌ندازه‌ی میلله‌تی کورد گوێڕایه‌ڵی کوێرانه‌ی سه‌رکرده‌کانی خۆی بکات وخێرو شه‌ڕیان له‌یه‌ك جیا نه‌کاته‌وه‌و نیشتمانپه‌روه‌ری و خیانه‌تیان به‌یه‌ك چاوسه‌یربکات له‌زۆر ووتاردا باسی خیانه‌ته‌کانی پارتی و یه‌کێتی مان کردووه پێویست ناکات جارێکی تر باسیان بکه‌ینه‌وه هه‌موو تاکێکی کورد به‌چاوی خۆی خیانه‌ت و زۆرو سته‌م و ناعه‌داله‌تیه‌کانی ئه‌ودوو حیزبه‌ی بینیوه.
با بێینه سه‌ر ناوه‌رۆکی بابه‌ته‌که یه‌کێتی و پارتی وه‌کو نه‌خۆشێکی شێرپه‌نجه وان که دوکتۆر جوابی کردبێت وله‌ماڵه‌وه چاوه‌ڕێ ی مردن بێت ونه‌خۆشه‌که‌ش ته‌مه‌نی هه‌شتا ساڵ بێت په‌یتا په‌یتا خزم و هاوڕێکانی سه‌ری لێ بده‌ن پێ ی بڵێن انشاو الله چاك ده‌بیت ئایا ده‌کرێت که‌س وکاری چاوه‌ڕێ ی موعجیزه بن ئه‌و نه‌خۆشه‌یان چاك ببێته‌وه ؟ له‌وه‌ڵامدا ده‌بێت بڵێین نه‌خێر چونکه ئه‌وه پێچه‌وانه‌ی عه‌قڵ و مه‌نگقه. یه‌کێتی و پارتی وه‌کو ئه‌و نه‌خۆشه‌یان لێ هاتووه شێرپه‌نجه‌ی گه‌نده‌ڵی له‌مۆخ و خوێنیاندا بڵاو بۆته‌وه به‌هیچ شێوه‌یه‌ك ناتوانن چاکسازی بکه‌ن . دوو حیزبی بنه‌ماڵه‌یی نه‌وه‌ك هه‌رخۆیان به‌ڵکو هه‌موو کۆماڵگای کوردیان گه‌نده‌ڵ و چاوچنۆك کردووه هه‌موو دام و ده‌زگاوفه‌رمانگه‌کانی هه‌رێمیان کردووه به حیزبی وزۆر به‌زه‌حمه‌ت خه‌ڵکانی سه‌ربه‌خۆو بێلایه‌ن ده‌بینرێت به‌تایبه‌تی له‌ده‌زگا ئه‌منی و سه‌ربازیه‌کاندا. هه‌وڵدان بۆ چاکسازی کردن له‌ناو ئه‌م دوو حیزبه‌دا به‌جۆرێك موسته‌حیله ئه‌توانم بڵێم چاکسازی له ده‌سه‌ڵاتی ئه‌و دوو حیزبه‌دا یانی جاڕی مه‌رگه بۆیان، چونکه گه‌نده‌ڵیه‌کانی ئه‌ودوو حیزبه له لوتکه‌ی ده‌سه‌ڵاته‌وه ده‌ستی پێکردووه دزینی پاره‌ی گه‌وره‌و قه‌به له لایه‌ن سه‌رۆکی هه‌ردوو حیزب و بنه‌ماڵه‌کانیانه‌وه‌یه چۆن ده‌توانن ده‌ست له‌و دزیه هه‌ڵبگرن ته‌نها مانگێك دزی وخۆشگوزه‌رانی له‌ئه‌ندامان و کادیرانی ئه‌و دوو حیزبه ببڕه ئاشبه‌تاڵ ده‌که‌ن .دواترئه‌و دوو حیزبه خیانه‌تی نه‌ته‌وه‌ییان به رامبه‌ر به مافه‌کانی ئه‌م نه‌ته‌وه‌یه کردووه به بوونیان به پیاوی تورکیاو ئێران وکاری موخابه‌راتیان بۆ ئه‌نجام داون وده‌ده‌ن دژی شۆڕشه‌کانی تری به‌شه‌کانی کوردستان که‌واته ده‌بێت ده‌ست له‌و په‌یوه‌ندیانه هه‌ڵبگرن ده‌ی ناتوانن دواتر ئه‌وه 7ساڵی ڕه‌به‌قه حکومه‌تی عێراق ده‌سی ده‌سی یان پێ ده‌کات بۆ جێ به‌جێکردنی ماده‌ی 140 ناوچه دابڕاوه‌کان به‌ڵام تاکو ئێستا له‌درۆو ده‌ست بڕین زیاتر هیچ شتێك له‌ئارادا نیه.
یه‌کێتی و پارتی خۆشیان چاك ده‌زانن که هه‌رگیز چاکسازیان پێ ناکرێت بۆیه هه‌نگاوی بۆ نانێن ئه‌وه شه‌ش کابینه‌ی حکومه‌ت گۆڕا کابینه له‌دوای کابینه گه‌نده‌ڵ ترو لاوزتره که‌چی ئێستاشی له‌گه‌ڵدا بێت نه‌یان توانیوه به‌ڕێوه‌به‌رێکی گشتی یان جێگر وه‌زیرێك بێننه به‌رده‌م به‌رله‌مان و لێ پرسینه‌وه‌ی له‌گه‌ڵدا بکه‌ن. (ئه‌م دوو حیزبه عوقده‌ی ده‌سه‌ڵاتیان هه‌یه وهه‌رگیز ده‌ست به‌رداری نابن و ئه‌م کۆمه‌ڵگایه به‌ره‌و کۆمه‌ڵگایه‌کی عه‌سکه‌رتاری و پۆلیسی ده‌به‌ن) یه‌کێك له‌هه‌ره ستراتیژیترین بنه‌ماکانی ده‌وڵه‌ت که میلله‌تێك به‌ره‌و سه‌ربه‌خۆیی هه‌نگاوی بنێت ژێرخانی ئابووریه به‌ڵام به‌داخه‌وه ئه‌مان به‌خۆرایی و بۆ به‌رژه‌وه‌ندی ئه و دوو بنه‌ماڵه به‌هه‌ده‌ری ده‌به‌ن به‌شی کورد له‌بۆدجه‌ی حکومه‌تی عێراق له‌سه‌دا حه‌ڤده‌یه له‌پاره‌ی نه‌وتی فرۆشراو چ پێویست ده‌کات ده‌سه‌ڵات بچێت ئه‌وهه‌موو بیره نه‌وته شاراوانه که ئابووری نه‌ته‌وه‌ی کورده هه‌ڵکه‌نێت و نه‌وت له‌کوردستان هه‌نارده‌ی ده‌ره‌وه بکات و پاره‌که‌ی بداته‌وه به حکومه‌تی عێراق له‌کاتێکدا چه‌ندین جار حکومه‌تی عێراقی دژی هه‌ڵکه‌ندنی بیری نه‌وته له‌کوردستاندا ،به‌لام به‌داخه‌وه سه‌رکرده‌کانی کورد ته‌نها بۆ ئه‌وه‌ی دزی له‌و بواره‌دا بکه‌ن ئاماده‌ن ترومپا بخه‌نه ژێر زه‌وی کوردستان و هه‌موو نه‌وته‌که‌ی بمژن وبه نیوه قیمه‌ت بیفرۆشن به‌تورکیاو ئێران ، که‌چی جه‌ماوه‌ری کورد ته‌نها وێڵه به‌دوای موچه‌و سولفه‌ی خانوو ئاو کاره‌بادا ئیتر له‌ده‌سه‌ڵاتی کوردی ناپرسێت ئێوه خه‌ریکی چین به‌داخه‌وه تاکی کورد هێشتا پێناسه‌ی هاونیشیتمانی بوونی خۆی نازانێت و ئاشنا نیه به مافه ئابووری ونه‌ته‌وه‌یی و سیاسیه‌کانی خۆی بۆیه بێ ده‌نگ پاڵی لێداوه‌ته‌وه. خه‌ڵکی سته‌مدیده کوردستان ئایا ده‌زانن ئه‌وه‌ی ئه‌مڕۆ به‌رگری له‌مانه‌وه‌ی ئه‌و ده‌سه‌ڵاته ده‌کات کێن ؟ ته‌نها دارو ده‌سته‌کانی هه‌ردوو حیزب و بازرگانه‌کان و قه‌ڵه‌م فرۆشه‌کان وخه‌ڵکه سودمه‌نده‌که‌یه و که‌سی تر. به بۆچونی من چۆن خه‌ڵکی تونس و میسر بێ ترس و بێ دوودڵی ڕژانه سه‌ر شه‌قام و کۆتاییان هێنا به ده‌سه‌ڵاتی چه‌ندین ساڵه‌ی هه‌ردوو سه‌رۆکی بنه‌ماڵه‌یی تونس و میسر کاتی ئه‌وه‌ش هاتووه که خه‌ڵکی کوردستان بێنه سه‌ر شه‌قام و داوای گۆڕینی ئه‌م ده‌سه‌ڵاته گه‌نده‌ڵ و مافیایه بکات. جه‌ماوه‌ری به‌شه‌ره‌فی کوردستان ده‌سه‌ڵاتی ئه‌و دوو حیزبه ده‌یه‌وێت ئێوه گه‌مژه بکات گوایه گۆڕان ده‌یه‌وێت ده‌سه‌ڵاتی کوردی بڕوخێنێت و ئه‌م ئه‌زمونه تێك بدات.
به پێچه‌وانه‌وه بزوتنه‌وه‌ی گۆڕان ده‌یه‌وێت پارێزگاری له‌م ئه‌زمونه بکات وچیتر نه‌هێڵێت مافه نیشتمانی نه‌ته‌وه‌یی یه‌کانی ئێوه بکرێته قوربانی به‌رژه‌وه‌ندی هه‌ردوو حیزبی بنه‌ماڵه. گۆڕان ده‌یه‌وێت ئازادی و که‌رامه‌تی تاکی کورد له‌ژێر ده‌ستی بنه‌ماڵه‌ی بارزانی تاڵه‌بانی ده‌ربهێنێت وبۆ ئێوه‌ی بگه‌ڕێنێته‌وه که چه‌ندی ساڵه له‌ئێوه زه‌وت کراوه.گۆڕان ده‌یه‌وێت ئێوه سه‌ربه‌رزو ئازاد بژین و موچه‌ی منه‌ت و ته‌زکیه‌ی حیزبی نه‌خۆن . گۆڕان ده‌یه‌وێت ئاسایشی نه‌ته‌وه‌یی بۆ گه‌لی کورد دابین بکات. گۆڕان ده‌یه‌وێت دیموکراسی مافی مرۆڤ و ده‌ستاوده‌ست کردنی ده‌سه‌ڵات بۆ ئێوه زامن بکات ئیتر ئه‌م قسه به‌سه‌رچوانه چیه له ڕاگه‌یاندنه‌کانی ده‌سه‌ڵاته‌وه ڕۆژانه وه‌کو بوق بۆمان لێ ده‌ده‌نه‌وه.
باوه‌ڕتان هه‌بێت چۆن ڕاپه‌ڕینی 1991 ئه‌رکێکی مێژوویی و نه‌ته‌وه‌یی بوو به‌هه‌مان شێوه ڕاپه‌ڕینی ئه‌م جاره‌ش دژی ئه‌و ده‌سه‌ڵاته ئه‌رکێکی میژوویی مرۆیی نه‌ته‌وه‌یی یه .
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
