بۆ ده‌ستێ دکتۆر(مه‌حموود عپمان) ی ، پێشمه‌رگێ ئیلۆنێ و سیاسیێ دیرۆکێ ..
Friday, 19/02/2010, 12:00
ل ده‌ستپێکێ و ژبه‌ری هه‌ر تشته‌کی ئه‌ز دبێژم کو جهێ داخێ یه کو تو هۆسا ده‌رچوویی. من تو ددانایی کو تو هه‌ژی سه‌رۆکێ هه‌رێمێ یی و د چه‌ندین دیوانا دا ، من دگۆت : فه‌ر بوو کو دکتۆر مه‌حموودی ژی خوه بۆ سه‌رۆکێ هه‌رێمێ هل بژارتبا و ئه‌ز بباوه‌رم کو نه‌تیجه‌کا باش دا هه‌بت ، به‌لێ تو وه‌سا ده‌رنه‌چوویی !
باوه‌ر بکه ! ئه‌گه‌ر ب کراسێ خۆ ته خۆ هل بژاتبا ، نه کو د کراسێ پارتی دا ، دا بۆ که‌ساتی و قیمه‌تێ ته باشتر بت.
سه‌یدا ! ته گه‌له‌ك ب ناڤێ راستی و باشی و دیمۆکراتی و نه‌ته‌وه‌یێ دئاخفت ، لێ وه‌سا ده‌رنه‌که‌ت. ئه‌ز نزانم چاوا هۆسا وه‌کی سامی شنگاری و جه‌لال تاله‌بانی چاڤ ل ته گاری بوون ؟
ل سالا 1993 ێ من کاغه‌زه‌ك بۆ سامی شنگاری نڤیسی و من ب ده‌ستێ خۆ ل هه‌ولێرێ دا ده‌ست وی. به‌لێ به‌رسڤا وی بۆ من ئه‌ڤه بوو کو مله‌تێ مه ئه ڤه یه !
هه‌روه‌سا ل هه‌یڤا دو یا سالا 2009ێ من نامه‌ك بۆ جه‌لال تاله‌بانی ژی نڤیسی. ل دووڤ زانینێن من ، ئه‌و ناما من گه‌هشت ده‌ستی سکرتێرێ وی یێ ئێکێ ، ڤێجا ئه‌و و وژدانا خۆ کا دایه ده‌ست جه‌لال تاله‌بانی یان نه ؟
له‌وا من ب فه‌ر دیت کو ڤێ کاغه‌زێ بۆ ته ژی بنڤیسم. لێ هندی ئه‌ز هزرێن خۆ دکم ، من نه زانی کا بۆچی ته وه کر ؟ چنکی ب هزرا من تو ژ هندێ مه‌زنتر بوویی. به‌لێ پاشی من گۆت : نه‌خیر ، تو هه‌ر ئه‌ڤه بوویی ! چنکی سیاسیێن کورد هه‌ر ئه‌ڤه بوونه ، له‌وا حالێ مه هه‌ژاران ژی هه‌ر ئه‌ڤه یه.
ئه‌رێ تو جاره‌کا دی زڤڕی ناڤ رێزێن پارتی کو ببی جێگرێ نێچیرڤانی یان ژی ژبه‌ر پارا بوو ؟ ما تو نزانی کو تو چ تشتی نابی ناڤ قه‌بری ؟ کا سامی شنگاری چه‌ند بر تو ژی هندێ دێ بی. به‌س زه‌ره‌را کو ته کری ، ته کراسێ خۆ یێ باش و جوان و یێ هه‌ژاران هاڤێت و کراسێ سیاسیێن که‌یسۆ (ئینتیهازیان) کره به‌ر خۆ. باوه‌ر بکه ! ئه‌ز نه جاشم و نه خۆفرۆشم ، نه سه‌یدا مه و نه خودان دکتۆرا مه ، ئه‌ز پێشمه‌رگه‌هه‌کێ شۆڕه‌شا ئیلۆنێ مه و هه‌ژاره‌کێ نه خوینده‌وارم . ته‌نها ئه‌ز دشێم چه‌ند رێزه‌کا بنڤیسم . ئه‌ز کوڕێ شه‌هیده‌کێ مه کو ل سالا 1965 شه‌هید بوویه. ڤێجا بلا ئه‌ز و تو و هه‌می سیاسیێن کورد بزانین کو هه‌می دکتاتۆر و خۆفرۆش وه‌کی سه‌ددام حسێنی دێ مرن و چ تشتی ل گه‌ل خۆ نابن و ئه‌ڤه دوماهیکا وانه.
13/ 2/ 2010
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
