نامەکەتان بۆ تاڵەبانی ڕای خۆتانە، خۆشبەختانە کە ژمارەتان کەمە.

Sunday, 13/03/2011, 12:00

بۆ نوسەران و هونەرمەندان کە نامەکەیان نارد بۆ تاڵەبانی
بەڕای ئێمە تاڵەبانی هەڵوێستی مێژویی خۆی و بەرپرسیارەتیەکەی زۆر دەمێکە هەرزان فرۆش کردوە. ئەم نامەیەی ئێوە وەکو ئەوە وایە داوای مەرحەمەتی لێبکەن بفەرموێ دەست لە گەنجەکان نەوەشێنێت. ئەو ١٧ ی شوبات و ١٩ ی شوبات و ٢٥ ی شوبات و ڕۆژەکانی تر، گەر باسی مێژوی براکوژیەکانی نەکەین، دەستی خۆی وەشاند.
ئەو کوا لە ئاستی بەرپرسیارەتی مێژودا بوە تا ئێستا داوای ئەوەی لێبکەن.
کوڕەکەی بەرپرسی پیاوکوژەکانە، کوڕەکەی سەرۆکی تیرۆریستەکانە کە شێرزاد و سورکێویان کوشتوە. خۆی و ژنەکەی داهاتی کوردستانیان تاڵان کردوە و گەندەڵییان بڵاوکردۆتەوە. ئەوان سەرچاوەی هەمو کێشەکانن نەک ڕاپەریوەکان.
دەبوو ئێوە نەک داوا بەڵکو بە بێ پێچ و پەنا پێتان بوتایە بڕوات و واز لە کورسیەکەی بهێنێت. یاریەکانی ئەو بەسەرچوە. ئەو سفر و فاریزەش نیە لە مەسەلەی بەرپرسیارەتی مێژوییدا، ئەو کەتۆتە پەراویزی ناپاکیەکانەوە کە بەرامبەر خەڵکی کوردستان کراوە.
ڕاپەریوەکان پێویستیان بەوە نیە کە تاڵەبانی مەرحەمەت بکات و دڵی باش ببێت بەرامبەریان.
ئەوەی راپەریوەکانی توڕە کردوە کەس نیە تاڵەبانی و بارزانی خۆیان نەبێت. ئەوەی لە خۆپیشاندەرەکانی کوشتوە کەس نیە تاڵەبانی و بارزانی نەبێت. تۆ ناتوانیت بچیت داوا لە پیاوکوژ بکەیت دڵی نەرم بێت و زۆرتر نەکوژێت، دەبو داوای ئەوە بکەن تاڵەبانی بدرێتە دادگاو هیچی تر.
لە داهاتودا گەر پێویستی کرد وردتر لەبارەی ناواخنی نامەکەتانەوە قسە دەکەین.