ئیدى بەهدینان بێ دەنگ نابیت

Tuesday, 03/05/2011, 12:00

زێدەبارى هەبونا كێم وكاسیا ونەبونا خزمەتگوزاریان ئەوێ هەمی گەندلی ودزیا د دام ودزگەهێن میرى دا هەی، هەروەها دەستپێكرنا خوەنیشاندانان لدەڤەرا سلیمانیێ بەلێ هەتا نوكە خەلكێ دەڤەرا بەهدینا چ هەلویستەك نەبونە و خو بێ دەنگ كرنە.
ئەڤ بێ دەنگیا خەلكێ دهوكێ نە ژبەر ڤیانا وانە بو حزبا دەستهەلاتدار و نە كو كێم وكاسى نینن یان ئازادی هەیە یان گەندلى و دزی نینن بەلكو ژ ترس و سەركوتكرنا وانە ژئالیێ حزبا دەستهەلاتدارڤە،خەلكێ بەهدینان ب ئاوایەكى هاتنە چەوساندن وترساندن كو لسەردەمێ حزبا بەعس ژى ئەو ترسە لدەڤ وان نەبو، چونكى پارتى حزبەكە چ دەم وزەمانان ئازادییا رەئى دەربرینێ یان رەخنەگرتنێ لدەڤ نەبویە، هەر كەسێ گوتبیت بنێ پێ تە خوارە بێ یەك دوو هاتیە هنداكرن وكوشتن، ئەف رەفتارا پارتیێ بو خەلكێ دەڤەرا بەهدینا بویە عیبرەت وكەس مایێ خو دپارتیێ دا ناكەت.
هەرچەندە بێ دەنگیا خەلكێ دهوك وزاخو ودەڤەرێن دن یێن بەهدینان كەلەك ڤەكێشا وپێدڤى بو ددگەل خەلكێ دەڤەرا سلیمانیێ ئەو ژى هاتبان دەنگ و نەرازیبونا خو لسەر ڤێ رەوشا نوكە یا هەرێما كوردستانێ دیاركربان، بەلێ ئەگەر هەتا نوكە بێ دەنگ بونە، ئیدى ئەو ژى بێ دەنگ نابن، لگور وان زانیاریێن دەست من كەتنە خەلكێ بەهدینان پتریا وان ژ ڤێ رەوشێ عاجزن و نە دگەل رەفتارێت پارتیێ نە، باش دزانن كو گەندلى ودزى مشەیە ودزانن كو نەفتا تاوكێ ب بورییا برنە ئیبراهیم خەلیل و پاشى برێكا تانكان تێت دزین بو ئیرانێ ، باش دزانن كو خودانێن عەردێ تاوكێ سالێ بتنێ 75 دولار ددەنێ، باش دزانن كو پارتیێ پتریا عەردێت دەوربەرێن زاخو و دهوكێ سەنتەرێن باژێری لسەر ناڤێن بارزانیا تابوكرنە وعەردێت زیراعیێن خەلكێ زاخو ودهوكێ ب نەحقى ژوان ستاندنە و بتنێ دبێژنە وان 3% بەروە دكەفیت،باش دزانن كو پارتیێ جاڤدێر خستنە سەر تاخ وكولانان و بونە مافیا بدیڤ خەلكێ ڤە،خەلكێ بەهدینان باش دزانن كو پارتی حزبەكى هوڤە و بساناهی خەلكێ خو دكوژیت و دكەتە قوربانیا كورسیكا خو.
بەلێ بلا مالا بارزانى و پارتی باش بزانن ئیدى خەلكێ بەهدینان ئەڤێ هەمی گەندلى ودزیێ ژوان قەبیل ناكەت و دەم كێم مایە كو ئەوژى بێنە دەنگ و نەرازیبونا خو راگەهینن چ زوى بیت یان درەنگ ئەفجا بلا مالا بارزانى باش بزانیت ئەگەر رەفتارێن خو دگەل خەلكێ نەگوهورن و گەندلیێ و دزیێ ژناڤ نەبن و حەقێ خەلكێ نەدەنێ روژا وان ژى نیزیك بویە.