پارتى و ئێكەتى ئێعتراف كرن كو گەندەلن بەیانناما گۆڕان و بەرسڤا پارتى و ئێكەتى

Tuesday, 01/02/2011, 12:00

بزاڤا گۆڕان كوبزاڤەكى سیاسیا نویە ل هەرێما كوردستانى و دهەلبژاردنێت پەرلەمانا كوردستانێدا شیان (25) كورسیێت پارلەمانى بدەستڤە بینن و دماوێ پترى سالەكێدا ل پەرلەمانێ كوردستانێ ب ئەزموونا ئوپوزسیۆن كار كرنە، خودان داهێنانەكى گرنگە ل هەرێما كوردستانێ، نەژبەر هندێ كو (25)كورسیێت پەرلەمانى بدەستڤەئینانە، بەلكى ژبەر هندێ كو دساڵێت رابۆریدا هێزەكى ئوپوزسیون دناڤ پەرلەمانیدا نەبو، بەلكى هەمى لایەنێت بەشدارى پەرلەمانى بەشدارێت حكومەتێ ژى بون وهەر ئەڤەژى مەزنترین هوكارێ سەرهلدانا ئەڤێ گەندەلیێ بویە كو ل كوردستانێ هەیە.
ئەزموونا گۆڕان دناڤ ئیدارە و رێڤەبەریا كوردیدا داهێنانەكى نو یە، لەوچێدبیت هەم گۆڕان دكارێ خۆدا خەلەتییا بكە و هەم بوو دەستهەڵاتێ زەحمەتە تەقەبول و تەحەمولا رەخنێ ژ گۆڕان بكەت، چونكى فێر نەبویە كەس رەخنێ لێبگریت و هەمیشە پێخۆشە هەر تاكەكى جڤاكێ بێژیتە وان دەست خوەش و ئەڤا هەوەكرى باشتر ناهێتە!! بلا ئەو كار خراب و زیانبەخشبیت بۆ مللەتى و دۆزا كوردى بگشتى.
بڤى رنەگى قەلسبوون و بەرسڤا هێستریاییا هەردوو پارتێت دەسەڵاتدار بۆ بەیانناما گۆڕان كو داخازا پێكئینانا حكومەتەكى تەێریف ئەعمال و ژ كارخستنا حكومەت و پەرلەمانێ كوردستانێ دكەت، كارڤەدانەكى سروشتى یە و ئەز باوەر دكەم ئەگەر سەركردە و كاربدەستێت گۆڕان چاڤەریێ بەرسڤەك دى كربـن، دواقعى نەگەهشتنە.
لگۆرى بەیانناما هەردوو مەكتەب سیاسیێت (پارتى و ئێكەتى) و سەرۆكایەتیا هەرێمێ و حكومەتا هەرێمێ و پەرلەمانێ كوردستانێ ژى تشتێ سەیر ئەوە هەوڵەك جدى دهێتە دیتن كو (پارتى و ئێكەتى) وەسا خەلكێ تێبگەهینن داخازیێت گۆڕان بزاڤەكە بو كودەتاكرنێ بسەر حكومەتا هەرێما كوردستانێدا، كەچى ناڤەڕۆكا بەیانناما گۆڕان نە ڕاگەهاندنا شەڕییە و نە كۆدەتاییە دژى حكومەتا هەرێمێ و هەروەسا نە داهێنانەكى بزاڤا گۆڕان بخۆیە ژى بەلكى بەرى گۆڕان، ئەڤە بووچۆن و داخازا شەقامێ كوردییە بدوست و لایەنگرێت پارتى و ئێكەتى ڤە، هەر (7) خالێت گۆڕان و پترى وان ژى داخازا هەمیانە، بۆچى داخازا دەست تێوەرنەدانا كاروبارێت، حكومەتێ و دەوائیرا و پەرلەمانى و دادگەهێ و ئاسایشێ و پێشمەرگەى، ژ بال سەركردایەتیا ئێكەتى و پارتى ڤە وەكى راگەهاندنا شەرى بێتە شرۆڤەكرن؟
یان حەتا هەلوەشاندنا حكومەتا هەرێمێ و پەرلەمانى و پێك ئینانا حكومەتەكى ئینتیقالى بكودەتا بێتە شروڤەكرن؟
مانە ئەڤە داخازەكى ئاساییە بۆ سیستەمەكى دیموكراسى وهەرئۆپۆزسیۆنەكێ؟ و كەس هندى پارتى و ئێكەتى ل ڤێ جیهانێ خۆ ب دیموكراتى نزانیت، مادە هەوە باوەرى بدیموكراتیەتێ هەیە بۆچى هنگ عاجز بینە؟
مەسەلا دارخازا هەلوەشاندنا حكومەتێ و پەرلەمانى دناڤ دەستورێ عیراقێ و ڕەشنڤیسا دەستوورێ هەرێمێ داژى هاتیە باسكرن (هەر چەندە گۆڕان و پتریا خەلكێ رەوشەنبیرى تێبینى لسەر رەشنڤیسێ دەستورێ هەرێمێ هەنە) چەواتیا هەلوەشانا پەرلەمانى ژى هاتییە دیاركرن، لەوما ئەڤەژى داخازەكى دەستوری و یاساییە و بهیچ شێوەیەكێ نابیتە كودەتا بسەر حكومەتێ و پەرلەمانیدا، بەلكى بەرەڤاژى ئەركەكى گۆڕانە داخازا هەلوەشاندنا حكومەت و پەرلەمانێ كوردستانێ بكەت و تەنانەت بەیانناما هەردوو مەكتەب سیاسیێت (پارتى و ئێكەتى) و لایەنێت سیاسیێت كوردستانى ژى ئەڤى مافى ددەتە گۆڕان. دەما كو دخالا (4)ێ دا دبێژن: هەبوونا كێم و كاسى و كێشە وگەندەلى و نە تەمامیێ درەوشا هەرێمێدا واقعە و ئەم خازیارن حكومەت و ئۆپۆزسیۆن و كۆمەلگەها مەدەنى و هەمى ئالیان و هەر یەك ژ ئالیێ خۆڤە و ل پێگەها خۆ بەشداری پێشڤەبرنا بزاڤێت چاكسازیا و نەهێلانا كێم و كاسیا و باشتر كرنا ژیارا هەڤوەڵاتیێت هەرێما كوردستانێ و پەرەپێدانا سەربوورا حكومرانى و دیموكراسیا هەرێمێ بكەت.
ئەگەر برادەرێت پارتى و ئێكەتى باوەری بڤێ گوتنا خۆ هەبیت، كو دگەل (17) لایەنێت دى ئیمزاكرنە، بێگومان داخازا هەلوەشاندنا حكومەتا هەرێمێ ژ لایى هەر كەسەكێ ڤە بیت نابیتە كۆدەتا و راگەهاندنا شەڕى، ئەگەر حكومەت گەندەل بیت و هوون بخۆ بیژن: گەندەلە! و هوون كو دەسەڵاتدارن وێ گەندەلیێ چارەسەر نەكەن، بووچى گۆڕان و خەلك بێدەنگ بن؟ بۆچى داخازا ڤەگەراندنا قوتابخانەیەكى بۆ پەروەردێ كو دەهان قوتابخانە ژلایێ ئێكەتى و پارتى هاتنە داگیركرن، وەكى كۆدەتایەكێ بێتە شرۆڤەكرن؟
یان ئەڤە تێگەهشتنا هەوەیە بۆ دیموكراسیەتێ و پرۆسەیا سیاسى ل هەرێما كوردستانێ؟ ئەگەر هەوە بەڵگەیێن گەندەڵیێ دڤێن: هوون بخۆ دزانن هەوە چەند دزى كرنە و چەند فەتا هەرێمێ بدزى فروتییە و چەند ملك ومالێ خەلكێ داگیر كرییە؟
دراستیێ دا پێتڤییە گۆڕان ئوپوزسیونا سیستەمێ دەسەڵاتێ بیت ل هەرێمێ نەكو ئوپوزسیونا حكومەتێ چونكى ئەو گەندەلیا ل هەرێما كوردستانێ هەی لناڤ سیستەمێدایە و سەرجەم سیستەمێ حوكمێ هەرێمێ گەندەلە.. بۆنمونە ئەگەر سیستەمێ حوكمى گەندەل نەبیت، مللەتى پێتڤى پێنینە كو سەرۆكێ هەرێمێ بسەر خەلكێدا بكەتە منەت و بێژیت: ئەز مەعاشى ژ حكومەتێ وەرناگرم!! كەچى دەسەڵات هەبیت ب ملیونا دۆلارا بۆ هەر تشتەكێ وى بڤێت سەرف بكەت و لگورى ئەوان بەڵگەنامەیێن گۆڤارا (لڤین) بەڵاڤكری، موچەیێ سەرۆكێ هەرێمێ موچەیەكى خیالیە، ئەڤە ل چ سیستەمەكێ ڤێ جیهانێدا هەیە ئەگەر ئیدیعایا دیموكراسیەتێ بكەن، ل هەرێما كوردستانێ نەبیت؟
لسەر مەسەلەیا ڤەكێشانا رەشنڤیسێ دەستوورێ هەرێما كوردستانێ ژى دراستیێ دا نەكو تەنێ یاسا ناس دشێن كێم وكاسیێت دەستوورێ هەرێمێ دیار بكەن، بەلكى هەر كەسەكێ بەندێت رەشنڤیسێ دەستوورێ هەرێمێ بخینیت، دێ زانیت، هەڤسەنگی تێدانینە، دڤێ نڤێسینا كورتدا دەلیڤا شرۆڤەكرنا ئەوان بەندێت هەڤدژ نینە، بەلێ ئەگەر سیستەمێ حكومى ل هەرێما كوردستانێ پەرلەمانى بیت، چێنابیت سەرۆكێ هەرێمێ (هەركەسەكێ هەبیت) ئەو دەسەڵاتا رەهایا درەشنڤیسێ دەستووریدا هاتییە دیاركرن هەبیت و ئەگەر سیستەمێ حكومى ل هەرێما كوردستانێ سەرۆكایەتى بیت، كەواتە بۆچى ئەم داخازا سیستەمێ پەرلەمانى بۆ عیراقێ دكەین؟
دە مەسەلا دیاركرنا بودجەیا (2010)ێ دا حكومەتا هەرێمێ ملیارا دینار بۆ پرۆژە و كارێ حیزبى تەرخانكرنە و بسەدان جهێت وێران كرى ژبیركرنە، وەكى تەرخانكرنا (3) ملیار و (540) ملیۆن دینارا بۆ دروستكرنا دیوارەكى پالپشت ل (سەرێ رەش) و (179) ملیۆن دینار ژى تنێ بۆ دروستكرنا (گۆڕەپانەكێ) هەر ل سەرێ ڕەش هاتنە تەرخانكرن. ئەڤە بۆ پارتى.
هەر دبودجەیا(2010)ێ دا(722)ملیون دینار بۆ قیركرنا رێكا بنكەیەكى زێرەڤانێت مێهڤانخانا (جەلال تالەبانى)ل دەباشان هاتنە تەرخانكرن و هەروەسا(363)ملیۆن دینارژى دیسان بۆ قیركرنا رێكا بنكەیەكى دى یێ زێرەڤانێت (تالەبانى) ل قەلاچولان هاتنە تەرخانكرن.
بنكە و بارەگەهێت حزبیێت پارتى و یەكەتى ژى نەهاتنە بێباركرن و لسەر بودجەیا وەزارەتا ناڤخۆى (156) ملیۆن دینار بۆ دروستكرنا هۆلەكى (11) ژوورى بۆ لەقا (2) یا پارتى ل هەولێرێ و لسەر بودجەیا وەزارەتا ئاڤاكرنێ ژى (397) ملیۆن دینار بۆ دروستكرنا مێهڤانخانەیەكێ بۆ مەلبەندێ خانەقین یێ ئێكەتى هاتنە تەرخان، باشە بودجەیا وەزارەتا ناڤخۆى و ئاڤاكرنێ چ پەیوەندییەك دگەل لەقا پارتى و مالبەندێ ئێكەتى هەیە؟؟؟!
هەروەها (31) ملیار و(649)ملیۆن دینار لسەر بودجەیا وەزارەتا دارایى بۆ نووژەنكرنەڤەیا مەرقەدێ بارزان هاتنە تەرخانكرن و (57) ملیۆن ژى بۆ دیوارەكێ بۆ گۆڕستانا (زەینلوعابدین) ل داقوق هاتنە تەرخانكرن!!
ئەگەر ئەڤە شافافیەتا بودجێ بیت و حكومەت نەشێت (5) ساعەتێت كارەبێ بۆ هەڤوەڵاتیان دابین بكەت و بسەدان تاخێت باژێرێ هەولێر و سلێمانى و دهۆكێ بێ ئاڤــبن و بسەدان مالباتێت شەهیدان كرێچى بن و پێ چێ نەبیت كرێیا خۆژى بدەن و گەندەلى و دزینا مال و مالكێ مللەتى بەردەوام بیت و پارتى و ئێكەتى هەر پەیمانان بدەن و تشتەكێ بعەمەلى جیبەجێ نەكەن! و خەما پتریا كاربدەستێت حكومەتێ و پارتى و ئێكەتى خۆ دەولەمەندكرن و كۆمكرنا پاران بیت! بۆچى گۆڕان و خەلكێ ماف نەبیت داخازا هەلوەشاندنا حكومەتێ بكەن؟!
حكومەتە بڤى رەنگى بیت مانە بوو هەڕفاندن و ژناڤبرنێ یا باشە؟؟؟؟؟