پارتى گۆڕان ژبیر كربوو؟! گەلۆ ڕاستە؟!!

Tuesday, 14/12/2010, 12:00

بەرى هەلبژارتنێت 25_7 هەرێما كوردستانێ لسەر ئێكەتى و پارتى هاتبوو تاپۆكرن و هەمى پارەیێت هەرێمێ بۆ هەردوو حزبێت گەندل بوون، حكومەت بتەمامى دوو ئیدارە بۆ كو هەتا نوكە ژى دوو ئیدارەیە،ئەنجامێت هەلبژارتنان ففتى ففتى بوون و هاولاتیان دەنگ دابا یان نە، ئەنجام هەر وەك یەكبوون، بەلێ پشتى ژدایكبوونا لیستا گۆڕان،هەرێما كوردستانێ بەرەو ئاقارەكى دى چوو، لیستا گۆڕان بۆ دەرگەهەك بۆ هاولاتیان داكو كەرب و نەرزیبوونا خۆ لسەر ڤى سیستەمێ سەقەتێ هەرێما كوردستانێ برێژن و خۆ ژڤان هەردوو كورد فروش و گەندەلان رزگار بكەن.
ژدایكبوونا لیستا گۆڕان تشتەكى ئاسان نەبو، بۆ هەردوو حزبێت گەندەل، هەبۆنا ڤێ لیستێ ئێكەتى و پارتى پتر نێزیكى ئیكو دووكرن ، نێزیكبوونا وانژى بۆ ژ ناڤبرنا لیستا گۆران بو، لەورا ب هەمى شێوەیەكى دەست دانە دژایەتیا گۆڕان.
پشتى گۆڕان 25 كورسى بدەست ڤە ئینان،پارتى وئێكەتى ناچار بۆن واقعێ نیى قەبول بكەن و وەكى هێزەكى سیاسی ل هەرێما كوردستانێ سەرەدەریێ دگەل لیستا گۆران بكەن، هەروەهاپشتى گۆڕان دهەلبژارتنێت پەرلەمانێ عێراقێ دا 8 كورسی بدەست ڤە ئینان خۆ پتر سەپاند و نهە پارتى و ئێكەتى بڤێن و نەڤێن هێزەكى سیاسیا مەزنە ل هەرێما كوردستانێ و وەكى سترییەكێ یە بۆ دزیێت هەردووكا.
ل ڤان دوماهیا پارتى هێدى هیدى خۆ ل گۆڕان نێزیك دكر، وەسا نیشا وەلاتیان ددا كو عەلاقەتێت پارتى و گۆڕان بەرەڤ باشیێ دچن، هەرچەندە كەس باوەر ناكەت كو پارتى بێ مەرەم خۆ ل گۆران نێزیك بكەت، چونكە پارتى هەمى كارەكى خۆ ب تەكتیك ئەنجامددەت و ئنییەتا سەرەكیا پارتى بێدەنگ كرنا گۆڕان بوو ل سەر مەسەلا دزینا نەفتا هەرێمى ژ لایێ پارتى و ئێكەتى ڤە، بەلێ ئەگەر گۆڕان بڤەشارتى هندەك وەعد و پەیمان ژى دابنە پارتى ژ بەر فشارا جەماوەرى و هندەك فاكتەرێت دى نەچار بوو مەسەلا دزینا نەفتێ ئاشكرا بكەت و ڤێ مەسەلێ كارتێكرنەكا مەزن لسەر پارتى و ئێكەتى دروستكر و بتەمامى وەكى دوو حزبێت دزپەروەر هاتنە ناسكرن.
لەوما دەما ل رۆژا 11-12-2010 پارتى كونگرێ خۆ یێ 13 گرێدا، هەر چەندە وەسا دیار بۆ كو گەلەك ئامادەكارى بۆ ڤى كونگرەى كربوون و چەند هەیڤەكە پێڤە دمژیلن، مێهڤان ژهەمى جهەكى گازیكربوون ژ عەرەب و تورك و فارسان ژبلى حزبێت بچوكێت هەرێما كوردستانێ و جەهەپا نەتەوەپەرستا توركا و مەهەپێ و ئاكپارتیا ئەردۆغانى ژى بێ بەهرنەكربوون ژ دەعوەتا بارزانى، ئەڤە ژبلى مێهڤانێت بیانى، هەتا ئوسامە نوجەیفى ژى گازی كربوون و بڕاستى هەژى گازی كرنێ بو چونكە نوجەیفى ئامادەنەبوو دپەیڤا خۆ داژى ناڤێ هەرێما كوردستانێ بینیتە سەر زارێ خۆ و گوت: شیمال حەبیب، بەلێ پارتى ژبیركربوو گازى گۆڕان بكەت!!!! هەلبەت گازینەكرنا گۆران بێ بەرنامە نەبویە بەلكو بەرنامەرێژیەكى باش بۆ هاتیە كرن، ئێكەتى ژى ژڤى كارێ پارتى بێ بەش نینە، چونكە ژ ماستاوا جەلال تالەبانى دیاربۆ دەما پەیڤا خۆ پێشكێشكرى چاوا ماستاو بۆ بارزانى و بنەمالا وى دكر و جار جار ژى خەو لێ دكەت دناڤ كونگرەى دا.
بەلێ یا جهێ حیبەتیبونێ ئەو بۆ كو پشتى سێ رۆژان ژبەردەوامیا كارێت كونگرەى، پارتى دكۆنگرەیەكى ڕۆژنامەڤانیدا ڕاگەهاند، گازینەكرنا گۆران خەلەلەكا هونەرى بۆیەو بارزانى بریاردایە لیژنەیەكێ پێك بینیت بۆ ڤەكولینێ لسەر دەعوەت نەكرنا گۆڕان، گەلۆ پارتى كێ دخاپینت؟! بێگۆمان پارتى بێژیت و نە بێژیت و چەند لیژنێت ڤەكۆلێنێ ژى پێك بینیت و ئەگەر سیناریۆیەكێ ژى دروست بكەت و هندەك كەسا ژى بگازى نەكرنا گۆڕان توهمەتبار بكەت و سزا بدەت، هێشتا كەس باوەر ناكەت كو پارتى گۆڕان ژبیر كرییە و لەوما گازى نەكرییە!!!
نەخێر بدیتنا من گازى نەكرنا گۆڕان ژبەر هەلویستێ گۆڕان بۆیە لسەر گەندەلیێت ئێكەتى و پارتى ل هەرێمێ و هەوەرسا دەركەتنا گۆڕان ژ فراكسیۆنا كوردستانى ل بەغدا ئەگەرەك دییە كو گۆڕان نەهاتییە دەعوەتكرن بۆ كۆنگرێ پارتى.
بەلێ پسیار ئەوە گەلو گۆڕان دێ تەسلیمى پارتى و ئێكەتى بیت یان دى لسەر هەلویستێ خۆ بەردەوام بیت؟ ئەگەر گۆڕان تەسلیم بوو ئەڤە دێ بیتە هێزا سێى یا گەندەل و ئەگەر لسەر هەلویستى خۆ یا بەردەوام بوو، دێ بیتە هێزەكى جەماوەریا مەزنتر.