لێم ببوره
Friday, 13/01/2012, 12:00
من له‌سه‌ر باڵی کڕێوه‌یه‌کی شێت
عاشق بووم
ئه‌سته‌مه ڕه‌نگی گوڵه‌که‌ن بناسمه‌وه
ئه‌سته‌مه بگه‌م به گۆرانی کانی و ..
سڵاوی دار گوێزه‌کان
هه‌نووکه من
له سێبه‌ری سنه‌وبه‌ره‌کان یاخی بوومه
له بالکۆنه‌ی ئێواره‌کان
وه‌کو جاران ، پێکی خه‌یاڵی زه‌رده‌په‌ڕ
مه‌ستم ناکا
لێم ببوره باخه کراس ئه‌ستێره‌که
لێم ببوره ..
ئێستا که‌خۆتم بۆ ڕووت ده‌که‌یه‌وه
نابمه تاڤگه‌ی ماچه‌کان و
نابمه بارانی نیگا
لێم ببوره من خۆم نیم
من هه‌ناسه‌یه‌کی تر که‌نارمه
شه‌قامێکی تر پیاسه‌ی ئازارمه
لێم ببوره ئێستا من
جانتایه‌ك به شانمه‌وه‌یه
پڕه له سه‌فه‌ری بێ مانایی و
کاڵه له ڕۆحی گۆرانی منداڵیم
لێم ببوره ..
له هه‌ر پێناسه‌یه‌ك که عاتیفه‌م نادۆزمه‌وه
له‌هه‌ر ترپه‌یه‌کی وه‌نه‌وشه‌یی
که سه‌مای دڵمی تیادا نیه
لێم ببوره .. ئه‌وه خۆم نیم
یه‌کێکی تره منیش نایناسم
ڕۆحێکی تره ..
کێشوه‌رێکی تره ..
منیش تێی ناگه‌م .!
منیش پێی ناگه‌م ..!
لێم ببوره گه‌ر نه‌مزانی ده‌ستت بگوشم
گه‌ر نه‌مزانی .. ببمه شه‌وی چرپه‌کانت
گه‌ر نه‌بووم به ئاگری باوه‌ش ..
لێم ببوره ..
ئه‌وه من نیم .. ئه‌وه من نیم
دڵنیابه یه‌کێکی تره ..
منیش وه‌ك تۆ ، چۆن به‌دوای منا ده‌گه‌ڕێی ی
تا ئێستاکه ...
منیش خۆم نادۆزمه‌وه ..!!
منیش خۆم نادۆزمه‌وه ..!!
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
