بیرخستنەوەیەك بۆ كاك ڕەوەز عەلى
Sunday, 04/11/2012, 12:00
هیوا ڕەش
وێڕاى ڕێز و خۆشەویستیم بۆ ماڵپەڕى كوردستانپۆست, دەسخۆشیشیان لێدەكەم كە ماڵپەڕەكەیان كردۆتە مینبەرێكى ئازاد بۆ ڕا جیاوازەكان , هەر لەم ماڵپەڕەدا نوسینێكى كاك ڕەوەز عەلیم لە ژێر ناوى (
كەى شیوعییەكان واز لە داكۆكیكردنى پارتى و پاراستن دەهێنن) بڵاوكردۆتەوە , ڕەنگە سەرنج و تێبینیم زۆر بن لەسەر ناوەڕۆكى نوسین و تاوانباركردنەكانى , بەڵام ناچمە ناو كرۆكى گشت باسەكانەوە , هێندەى بە لامەوە جێبایەخە تەنها و بەس , بیرخستنەوەى كاكە ڕەوەزە كە كاتێك دەنوسێ : (ئەم كابرایە موچەى لە لایەن پارتییەوە بۆ بڕاوەتەوە) , نازانم ئەمەى لە كوێ هێناوە و چۆن زانیویەتى , تۆ بڵێى سەرچاوەكەى خودى ئەو پاراستنە نەبێت كە منى پێتاوانبار دەكا ؟ بە هەر حاڵ ئەمە پێش ئەوەى ڕا بێت تاوانباركردنە , بۆیە ناڵێم گومان چونكە ئەو هێندە بە ڕەهایى بڕاندویەتیەوە هیچ گومانێكى تێدا نەهێشتۆتەوە , كە لە گومان دەرچووە و توانیویەتى بە ڕەهایى و بێدودڵى ئەو تاوانەم ئاراستە بكات , خۆ دەشیتوانى بەڵگەى بەرجەستەى بخستایەتە بەر دیدى خوێنەران بۆ ئەوەى بەندە نەتوانم لام و جیم بكەم ! جا كە بەڵگەى نەهێناوەتەوە ئەوا وا دیارە قسەكەى باتڵە و مەبەستى ناوزڕاندنە و هیچى تر , ناوزڕاندنیش پیشەى پیاوى باش نیە .
لە لایەكى تریشەوە بە (گەراى میكرۆبێكى پیس لە ناو لەشى كۆمەڵگاى كوردەواریدا) دەمانشوبهێنێ , بڕوا بكەن ئەم واژەیە موچڕكەى بە جەستەمدا هێنا و نایشارمەوە زۆر كاریگەرى لە سەرم هەبوو , چونكە ڕێك لە بەیانیى 20 \ 10 \ 1990 دا كە پەلكێشیان كردمە ناو هۆڵى مەحكەمە سەورەكەى عەوواد بەندەرەوە , لەوێ بووم كابرایەكى سمێڵ بابڕ بە عەبایەكى ڕەشەوە بە دەم سڵاوكردنەوە خۆى لە ژوورێ هاویشت و لە پەڕێكەوە وەستا و تەماشایەكى منى كرد و ئینجا عەوواد بەندەر ناساندى و گوتى : ئەمە پارێزەرى داكۆكیكارە محامی دفاع - , سەرم سوڕما و لە دڵى خۆمدا وتم : تۆ بڵێى بە هەڵەدا نەچووبم و لە مەحكەمەى سەورەى بەعسییەكاندا بم ؟ ! هێندەى بەوە دڵخۆش بووم كە پارێزەرێك هاتووە و داكۆكیم لێدەكا و وامزانى پیاوى مەرد لە دنیاى بەعسییەكاندا هەر ماوە , دوو ئەوەندەش دڵخۆش بووم بەوەى تروسكەى ئازادى و دیموكراسیەت لە لاى بەعسییەكان نەكوژاوەتەوە , سەرى كاك ڕەوەز نەیەشێنم دواى ئەوەى عەوواد سەرجەلەى خوێندمەوە و تاوانگەلێكى فرەى دایە پاڵم , لە یەكێك لە تاوانباركردنەكانیدا وتى : ئێوە بەكرێگیراوى ئێرانن و پارەیان لێوەردەگرن و داكۆكییان لێدەكەن , بە هەمان چەشنى ئەم بەیت و بالۆرەى موچەیەى كاكە ڕەوەز دەیخاتە پاڵم ئەویش هەر واى گووت , كاتێك پارێزەرى داكۆكیكار هاتە قسە بە ناوەى ئەوەى بەرگریم لێبكات , ئەویش بەم نەزمەى ئێستاى كاكە ڕەوەز گووتى : بەڕێزان ئەمانە جەرسومەى ناو كۆمەڵگان , تا زووتر لەناو ببرێن كۆمەڵگاش زووتر پاك دەبێتەوە , ئەفسوس ئێستا كاكە ڕەوەزیش هەمان تاوانى عەووادم دەداتە پاڵ و بە هەمان (مەردایەتى) كاكى پارێزەرى بەعسیى بە میكرۆب و جەرسومە دەمانشوبهێنێ , من هیچى تر ناڵێم جگە لە دەسخۆشى لە جنێوەكانى بەڵام داواى لێدەكەم ووردتر ڕەفتار بكات لەو تاوانانەى بەموئەوى دەفرۆشێتەوە .
ئەمەش مشتێكە لە خەروارى نوسینەكانم و دەمەوێ ئەوەش بڵێم كە یەكەمین كەس بووم لە وەڵامى شەقاوەیەتى فازڵ میرانى دا هاتمە دەنگ و بزانن بابەتى (سیویەكى ئاب , سەدام ... دەققەل باب)یش كاك ڕەوەز نوسیویەتى؟ بۆ ئەوەى خوێنەرانى بەڕێزى كوردستانپۆست ڕاستى و ناڕاستیى كاك ڕەوەزیان بۆ ڕوون ببێتەوە دەتوانن كەمێك لە كاتیان بگرن و چاوێك بەم نوسینانەمدا بخشێننەوە كە لە ژێر سێبەرى چەقۆدا نووسیومن تا بڕوا بكەن نە تومانى ئێرانى و نە دینارى عێراقى و نە قسەلۆكەى بێڕەواجیش كار لە هەڵوێستمان ناكات .
سه‌رنج و تێبینی کوردستانپۆست
ئێمه به نووسینه‌که‌ی کاک ره‌وه‌زدا چووینه‌وه، راسته ده‌بێت به‌ڵگه هه‌بێت بۆ ئه‌وه‌ی ئێوه له‌لایه‌ن پارتییه‌وه موچه‌تان بۆ بڕابێته‌وه، ئێمه به داوای لێبوردنه‌وه ئه‌و به‌شه‌مان لابرد
هه‌روه‌ها له بڕوابوونمان به رای ئازاد و بۆچوونه جیاوازه‌کان وه‌ڵامی ئێوه‌ش وه‌ک خۆی بڵاوده‌که‌ینه‌وه، پێش وه‌لامدانه‌وه‌ی کاک ره‌وه‌زیش به نامه ئاگادارمان کردنه‌وه، که ئێمه په‌یوه‌ندییمان به کاک ره‌وه‌زه‌وه کرد، ئه‌ویش سه‌رنج و وه‌ڵامی خۆی دایه‌وه، بفه‌رموون له خواره‌وه وه‌لامه‌که بخوێننه‌وه:
وه‌ڵامی ره‌وه‌ز عه‌لی بۆ ئه‌و روونکردنه‌وه‌ی کاک هیوا ره‌ش
ره‌وه‌ز عه‌لی:بۆ مه‌سه‌له‌ی گه‌رای میکرۆب له ناو له‌شی کۆمه‌ڵگای کوردییدا، هه‌ڵبه‌ته مه‌به‌ست له کۆمه‌ڵیک شیوعییه له نمونه‌ی ئه‌و ناوانه‌ی که له نووسینه‌که‌ی خۆمدا ناوم هێنابوون، جگه له‌وه‌یش له‌و مێژووه‌ی که حیزبی شیوعی له رابردوو و له ئیستادا له‌گه‌ڵ ده‌سه‌لاتداران و رژێمه‌کاندا ره‌فتار و هاریکاریی کردووه، هه‌روه‌ها ئه‌وه‌ی که گوایه حیزبی شیوعی له جه‌ماوه نزیک خستبێته‌وه ته‌نها دروشم و ئه‌و قسانه‌بووه که له (ئه‌ده‌بیات، په‌یام، راگه‌یاندن و بانگه‌شه‌کانیاندا) به خه‌ڵکی چه‌وساوه‌ی کوردستانیان داوه و له پشتی کرێکار و زه‌حمه‌تکێشانه‌وه بووبێت، به‌لام به پراکتیک پێچه‌وانه‌که‌ی پیاده کردووه، بۆیه ده‌بێت بڵێین له‌وه‌یاندا مه‌به‌ستم له ئێوه نه‌بووه، یان ته‌نها له ئێوه نه‌بووه، چونکه ئێوه‌ش یه‌کێکن له ده‌ستتاڕه‌ی حیزبی شیوعی، که ئێوه‌شی هاڕیوه، بۆیه سه‌ره‌نجام ئه‌و بیرکردنه‌وه و ره‌فتاره‌ی ئه‌ندام و کادێرانی حیزبی شیوعی لێده‌رچووه وه‌کو له‌و نووسین و ئه‌ده‌بیاتاندا ده‌رده‌که‌وێت.
ئه‌و نووسینه‌ی ئێوه له کاتێکی ئاوادا دڵی بنه‌ماله‌ی خۆش ده‌کات و دڵی خه‌ڵکه ره‌شورووته‌که‌ی ناخۆش کردووه، چونکه چه‌وساندنه‌وه و ناهه‌قیی و زوڵمی پارتیی و یه‌کێتیی ئه‌وه‌نده زۆره ئه‌و نووسینه‌ی کاک هیوا رقی خه‌ڵکه‌که هه‌ڵده‌ستێنێت و له هه‌قیانه‌ته‌وه نزیک نییه، له‌گه‌ڵ ریزماندا ئێوه‌ش به‌و شیوه‌یه په‌روه‌رده کراون.
عیسا پژمان پیاوی ساواک بووه، قانعی فه‌ردیش له‌گه‌ڵ سیاسه‌تی ئیتیلاعاتدا مێژوو ده‌نووسێته‌وه، من له‌گه‌ڵتدام و گومانمان له‌وه‌دا نییه، گۆڕانیش و نه‌وشیروانیش من پشتگیرییان ناکه‌م به هه‌ڵه تێمه‌گه‌ن، ئه‌مانیش تاوانی مێژووییان له‌سه‌ر شانه و به‌شێکن له‌و مێژووه ناشرینه‌ی که ئه‌م ده‌سه‌ڵاته سفره‌که‌ی له‌سه‌ر راخستووه، به‌ڵام بنه‌ماڵه‌ی بارزانی رۆشنایی و لایه‌کی جوانیان تێدا نییه، تا ئێوه بێن پشتگیرییان لێبکه‌ن، ئه‌گه‌ر مه‌سه‌له مێژووه، مێژوو به فیکر و سۆز نانوسرێته‌وه، مێژوو خوێندنه‌وه‌ی رووداوه‌کانه، لێکدانه‌وه‌ی سه‌ره‌نجامه‌کانه، هه‌ڵسه‌نگاندنی که‌سایه‌تییه‌کانه، ده‌سه‌ڵاتی کوردی به بارزانی و تاله‌بانی، هه‌موو ئه‌و حیزب و به‌رپرسانه‌ی تریش ، ئه‌وه‌نده پاک و خاوێن نیین تا ئێوه بێن له‌گه‌ڵ دوو که‌سایه‌تیی ساواک و ئیتیلاعاتدا به‌راوردیان بکه‌ن، له‌وێدا بنه‌ماڵه‌ی بارزانی پاک و جوان خوێن بکه‌نه‌وه، له‌و هه‌موو ناشرینی و تاوانه بیانشۆرنه‌وه. ئه‌مه‌یه که ده‌مه‌وێت بڵێم که‌لتوری شیوعییه‌کان به‌رزراگرتن و پشتگیریی بنه‌ماڵه‌ی بارزانییه.
جگه له‌وه له‌و وه‌ڵامه‌دا وه‌ک قوربانییه‌ک خۆتان ده‌تبینین، که‌سی قوربانی که خوێنی لێده‌چۆڕێت، نابێت ته‌وره‌که بداته ده‌ست جه‌لاده‌که، بڵێ من ته‌واو پێکراوم، فه‌رمو ئه‌وه ته‌وره‌که یه‌کێکی تر بکه‌ره قوربانی، ئێوه ناتانه‌وێت خه‌ڵکی له‌ده‌ست جه‌لاد رزگاری بێت، ده‌تانه‌وێت درێژه به ژیانی بده‌ن. ئێوه له نووسینه‌کانتاندا ده‌ستی جه‌لاد ده‌گرن و شۆڕی ده‌که‌نه‌وه به‌سه‌ر خه‌ڵکه چه‌وساوه‌که‌دا، نه‌ک ده‌ستی کورت بکه‌نه‌وه بۆ ئه‌وه‌ی کۆتایی به رشتنی خۆێن بهێنرێت و خه‌ڵکی تر نه‌کوژێت
ئه‌و نووسینه‌ی ئیوه له‌سه‌ر عیسا پژمان و قانعی فه‌رد نووسیوتانه قوربانی دیکه‌ی لیده‌که‌وێته‌وه، وره‌ی ده‌سه‌لاتی پێ به‌رزکراوه‌ته‌وه، به‌تایبه‌تی بنه‌ماڵه‌ی بارزانی.
ئایا په‌یامی ئێوه له‌و نووسینه‌دا ئه‌مه نییه؟
ئایا مێژووی بنه‌ماڵه و شۆڕشه‌کانیتان خوێندۆته‌وه؟ ئه‌گه‌ر ئاگادارن چۆن ناهه‌قی به‌رامبه‌ر به‌و خه‌ڵکه ره‌ش و رووته ده‌که‌ن و ده‌تانه‌وێت رووی بنه‌ماڵه‌ی بارزانیی جوان بکه‌ن و رابردوویان به باشی تۆماربکرێت!؟
ئه‌م نامه‌یه‌ی که ناردووتانه وه‌کو وه‌ڵامێک به‌و عه‌قله‌وه نووسراوه که وه‌ک مه‌سعود، تاله‌بانی و پیاوه که‌وشدڕاوه‌کانی شاخ، که ده‌ڵێن ئێمه پێشمه‌رگه بووینه، تۆش ده‌ڵێیت منیش پێشمه‌رگه و زیندانی بووم له‌و رێگایه‌وه ده‌تانه‌وێت خاترتان بگیرێت و هه‌رچیتان وت و هه‌رچیتان کرد چاوپۆشی لێبکرێت.
ئه‌مه‌ی ئێوه‌ش له‌به‌ر ئه‌وه‌ی زیندانیی بوونه، ده‌تانه‌وێت ره‌وا به‌و هه‌ڵه و به په‌یامی نووسینه‌کانتان بده‌ن، ده‌تانه‌وێت بڵێن که مادام من له رابردوودا ئه‌وه بووم و ئه‌وه‌م کردووه، ده‌بێت هه‌موو شتێکم لێوه‌ربگرن و قبوڵتان بێت و بڕوام پێبکه‌ن.
له‌گه‌ڵ رێزماندا و داوای لێبوردن ده‌که‌م ئه‌گه‌ر که‌مێک وه‌ڵامه‌که توند بووبێت، مرۆڤ هه‌رچه‌نده ره‌ق بێت ده‌بێت له هه‌مانکاتدا له‌به‌ر ده‌م وشه‌ی حه‌قیشدا وه‌کو شۆڕه‌بی بله‌رزێت،
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
