ئه‌مجاره‌ش پیس دۆڕانی.... جه‌نابی سه‌رۆک بارزانی
Sunday, 19/09/2010, 12:00
هه‌رچه‌ند ته‌ماشای قه‌ڵافه‌تی سه‌رۆک و کوره‌که‌ی ده‌که‌م، گوێشم له قسه و ده‌م و گوفتاریان ده‌بێت، ناچێت به عه‌قڵمدا ئا ئه‌مانه سه‌رۆک و سه‌رکرده‌م بن و چاره‌نووسی من ئه‌مانه بینووسنه‌وه. وا ده‌زانم خه‌و ده‌بینم.
من وه‌کو کۆنه ئه‌فسه‌رێکی پۆلیس حه‌ز ده‌که‌م رووداوێکتان بۆ بگێڕمه‌وه، ده‌قا و ده‌ق به‌سه‌ر ئه‌م سیناریۆیه‌ی بنه‌ماڵه‌ی بارزانییدا ده‌سه‌پێت، واته له‌یه‌کچوون هه‌یه:
له سلێمانی دوو گه‌ڕه‌ک هه‌یه، که سنووره‌کانیان به‌یه‌که‌وه نووساوه. (گه‌ڕه‌کی شێخ محیه‌دین) و (گه‌ڕه‌کی ئابڵاخ). دیاره هه‌ر گه‌ره‌که به‌ڕیوه‌به‌رایه‌تییه‌کی پۆلیسی خۆی هه‌یه، ئه‌گه‌ر تاوانێک، یان هاوڵاتیی و دانیشتوانه‌که‌ی کارێکیان هه‌بێت سه‌ردانی ئه‌و پۆلیسخانه‌یه ده‌که‌ن، که سه‌ر به سنووری ئیداره‌ی خۆیه‌تی، هیچ کام له‌و بنکه‌ی پۆلیسخانه‌یه‌ش داوای یه‌کێک وه‌رناگرێت، ئه‌گه‌ر بزانێت له سنووری ئیداریی و به‌ڕیوه‌به‌رایه‌تی خۆیدا نییه.
وه‌ک له بیرم مابێت له نێوان ساڵه‌کانی 95 / 96 په‌یوه‌ندیی ده‌کرێت به بنکه‌ی پۆلیسی شیخ محیه‌دینه‌وه ده‌ڵێن لاشه‌ی مردوویه‌ک له فڵانه شوێن که‌وتووه و بڕۆن بزانن چییه و کێیه؟ کاتێک پۆلیس ده‌چێت، ته‌ماشا ده‌کات ته‌نها مه‌ترێک له سنووری ئابڵاخه‌وه دووره، یه‌کسه‌ر لاشه‌ی کوژراوه‌که راده‌کێشن و بیست مه‌ترێک دووری ده‌خه‌نه‌وه، ده‌یبه‌نه ئه‌و دیو، واته بۆ سنووری ئیداری ئابڵاخ، ئه‌م کاره‌ش بۆیه ده‌که‌ن، چونکه مفه‌وه‌زی ته‌حقیق ته‌ماشا ده‌کات راپۆرت نووسین و لێکۆڵینه‌وه زۆری پێده‌چێت و که‌مێکیش ته‌مبه‌ڵ ده‌بێت، ده‌ڵێت با له کۆڵ خۆمی بکه‌مه‌وه و بیده‌م به کۆڵ پۆلیسی ئابڵاخدا.
پاش ئه‌وه ته‌له‌فون ده‌که‌ن بۆ پۆلیسی ئابڵاخ و ده‌ڵێن بڕۆن لاشه‌یه‌ک له سنووری ئێوه‌دا که‌وتووه و لێکۆڵینه‌وه‌ی له‌سه‌ر بکه‌ن، پۆلیسه‌کانی ئابڵاخیش که ده‌چن و ئه‌مه ده‌بینن، ئه‌وانیش به‌هه‌مان شێوه، فرسه‌ت ده‌هێنن و لاشه‌که جارێکی تر ده‌گوێزنه‌وه بۆ ئه‌و به‌ر، واته بۆ سنووری ئیداری شێخ محیه‌دین، دێنه‌وه و ته‌له‌فون بۆ پۆلیسی شێخ محیه‌دین ده‌که‌ن، ده‌ڵێن ته‌ماشامان کرد، ئه‌وه له سنووری ئێوه‌دایه. مفه‌وه‌زه‌که‌ی شێخ محیه‌دین هاوار ده‌کات، ده‌ڵێت: کوڕی خوا، من خۆم به‌یانی لاشه‌که‌م گواستمه‌وه بۆ لای ئێوه، چۆن و کێ هێنایه‌وه بۆ شوێنی خۆی؟
به‌هه‌رحاڵ . . . خوێنه‌ری خۆشه‌ویست با سه‌رتان نه‌یه‌شێنم، که‌سێک له‌م چه‌ند رۆژه‌ی رابردوودا که پارتییه و دڵ و جگه‌ری زۆر بۆ کاره‌سه‌ته‌که‌ی سه‌رده‌شت ده‌سوتێ، شتێکی نووسیوه، به ناونیشانی (
ئه‌ی هاوار خه‌ریکه مێشکم بته‌قێت له داخی ڕه‌خنه‌ی نابه‌جێی، گوایه ناهه‌قی به‌رامبه‌ر به پارتی ده‌کرێت) ئه‌وه‌ی به‌لامه‌وه سه‌یر بوو، ئه‌و براده‌ره پارتییه، که مێشکی نییه و مێشکی به‌کار هێناوه، ده‌ڵێت:
غه‌در له پارتیی ده‌که‌ن که تاوانبارتان کردووه به‌وه‌ی سه‌رده‌شتی تیرۆرکردووه، ئه‌وا هه‌موو شته‌کان ساغ بوویه‌وه و ئه‌نسار و ئیسلام کردوویه‌تیی .
من دێمه‌وه سه‌ر مه‌سه‌له‌ی رفاند و دۆزینه‌وه‌ی لاشه‌که و ده‌ڵێم: ئه‌گه‌ر سه‌رده‌شت رفێنراوه بۆ موسل و له‌وێ کوژراوه، به‌پی هه‌موو یاسایه‌ک ده‌بێت پۆلیسی موسڵ لێکۆلینه‌وه‌ی له‌سه‌ر بکات، نه‌ک هه‌ولیر؟ ئه‌گه‌ر لیژنه دروست بکرێت، ده‌بێت ئه‌و لیژنه‌یه حکومه‌تی عیراقی دروستی بکات و لێکۆڵینه‌وه‌ی له‌سه‌ر بکات، نه‌ک جه‌نابی سه‌رۆکی هه‌رێم . ئه‌و که‌سانه‌ی له‌و لیژنه‌یه‌‌دا کار ده‌که‌ن ده‌بێ شاره‌زا و پسپۆڕ بن، نه‌ک نه‌شاره‌زا و که‌م ئه‌زمون، لێکۆڵینه‌وه‌که‌ی پارتیی خاڵییه له یاسا و رێسای لێکۆڵینه‌وه، هه‌ره‌مه‌کیانه قسه‌یان نووسیوه‌ته‌وه.
ئه‌م ده‌سه‌ڵاته و بنه‌ماڵه‌ی بارزانیی هه‌موو شتێکیان بۆ چۆته سه‌ر، بۆیه گاڵته به عه‌قڵی خه‌ڵکی کوردستان ده‌که‌ن. که‌وابوو ده‌ستتان خۆش بێت کاکه مه‌سعود، تۆ شایسته‌ی ئه‌وه‌ی رابه‌ڕی ئه‌و گه‌له نه‌خوێنه‌وار و نه‌فامانه‌ی وڵاته‌که‌م بکه‌یت، هه‌رچیی ده‌که‌یت بیکه، که‌س نقه‌ی لیوه‌نایه‌ت، هه‌رچییه‌ک ده‌ڵێیت بیڵێ، هه‌مووی راستن، ئه‌مه‌ی نووسیومه هه‌مووی فشه و درۆیه، ئه‌وه‌ی له زاری تۆ دێته ده‌رێ هه‌موو نه‌قشی به‌رده و مێژوو به جوانی بۆتی ده‌نووسێته‌وه.
سه‌رده‌شت ئه‌نسار و ئیسلامه.
سه‌رده‌شت تیرۆریسته.
به قوربانی گۆڕه‌که‌ی بارزانیی بم، که نمونه‌یه‌کی وه‌ک تۆی بۆ خستووینه‌ته‌وه.
بمرێ کورد... بژی پارتیی و بنه‌ماڵه‌ی بارزانی
تێبینی: ئه‌م نووسینه به ته‌له‌فون له سلێمانییه‌وه وه‌رمانگرتووه و له‌کاتی قسه‌کردنه‌کاندا نووسیومانه‌ته‌وه.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
