لەبەغدا هاوبەشى و لەهەولێر بێبەشى !!!

Friday, 02/04/2010, 12:00

هەموو تاكێكى كورد هاودەنگە لەگەڵ ئەو قسەیەى كەدەووترێ دەبێت هەموو كورد یەكهەڵوێست و یەكدەنگ بێت لەبەغدا باشتر وایە بڵێین لەودیو حەمرین ، هیچ لیست و قەوارەیەكى سەركەوتووى ئەمجارەى كوردستانیش بۆ ئەنجومەنى نوێنەرانى عێراق هاو ڕایە لەگەڵ ئەم قسەیە و لەرابردووش بینیمان لەئەنجومەنى نوێنەرانى عێراق دوو كوتلەى كوردى هەبوون كەبریتیبون لەلیستى هاوپەیمانى كوردستان و لیستى یەكگرتووى ئیسلامى كوردستان بەڵام لەسەرجەم مەسەلە چارەنوسسازەكان و سەرجەم مەسەلەو هاوكێشە پەیوەندیدارەكان هاو ڕاو هاوهەڵوێست بوون كەبەدەگمەن نەبێت هەست نەدەكرا دوو لیستى كوردى لەبەغدا هەیە كەئەمەش جێگاى پێداهەڵدان و دەسنخۆشى لێكردنى هەموو تاكێكى كورد بوو ، پێشتریش لەكاتى بەرێوەبردنى عێراق لەلایەن مەجلیس حوكم لەومەجلیسەدا چەند كەسایەتیەكى كوردى تێدابوو كەهەریەكێكیان تایبەت بوو بەرەوتێكى سیاسى كوردى جیاواز لەیەكترى و بەڵام لەمەسەلە پەیوەندیدارەكانى تایبەت بەكورد یەكهەڵوێست بوون ، دواتریش لەكاتى نووسینەوەى دەستووریش سەرجەم نوێنەرەجیاوازەكانى حیزبەكوردییەكان كەبەشدارییان لەنوسینەوەى دەستووردا كرد بەیەكهەڵوێستى پێداگربوون لەسەر چەسپاندنى مافەكانى گەلى كورد ، بۆیە دەڵێین ئەو كەشەى كەئەمرۆ لەكوردستان هاتۆتەكایەوە بەماندوبون و خەبات و تێكۆشان و یەكهەڵوێستى هەموو لایەنە جیاوازەكانى كوردستانە بەبێ جیاوازى ، دەستەكەوتەكانى كورد لەمرۆدا مایەى سەرفرازییە بۆهەموو كورد و پێویستیشە بەهەموو لایەك بیپارێزین و لەئێستا و لەداهاتووشدا هەموو لایەكمان داواى یەكهەڵوێستى و یەكدەنگى سەرجەم پێكهاتەو لایەنە سیاسیە جیاوازەكانى كوردستان دەكەین و داوا دەكەین بەرامبەر دەرەوە كورد بەیەك ئاواز بخوێنێت و نێوماڵى كورد تۆكمە و پتەوبێت بۆبەدەستهێنانى سەرجەم مافەكانى كورد و هەموومان ببینە یەك شورەى پۆڵاین بۆپاراستنى كورد و كوردستان ، بەڵام سەرەراى ئەو یەكهەڵوێستى و هاوبەشییە لەگەڵ یەكترى تێبینیەكى گرنگ هەیە كەپێویستە لەمەودوا سەركردایەتى و پەرلەمان و حكومەتى هەرێمى كوردستان بەپلانێكى تۆكمە و یەكسان كارى بۆبكەن بۆفەراهەمكردنى خۆشگوزەرانى بۆهەموو تاكێكى كوردستان بەبێ جیاوازى بیر و ئایدیا ئەویش دەبینین جیاوازییەكى زۆر گەورەهەیە كەهەموو لایەك زۆر بەئاسانى هەستى پێدەكەین كەلەنێوان تاكەكانى كوردستان و حیزب و قەوارە سیاسیەكان دادەكرێت بێبەشكردنیانە لەماف و ئیمتیازاتەكان كەمافى رەواى خۆیانە ، لەماوەى رابردوو بگرە تائەمرۆش ئەوانەى سەربەدوو حیزبە دەسەڵاتدارەكەى كوردستانن زۆربەى ماف و ئیمتیازاتەكانیان وەرگرتووە و لەلایەن حیزبەكانیانەوە بۆیان فەراهەم كراوە هیچ تاكێكى كوردى دژى ئەوە نیە كەدانیشتوانى كوردستان ماف و ئیمتیازات وەربگرن بەڵام بەبێ جیاوازى دەنگ و رەنگ ، لەرابردوو بینیمان دیاردەى تەزكیەى حیزبى و دورخستنەوەى ئەوانەى لەحیزبە دەسەڵاتدارەكان نزیك نەبوون و بێبەشكردنیان لەمافەرەواكانى خۆیان و دوورخستنەویان لەپلەوپایە حكومیەكان ، بەمدواییەش بینیمان بەهۆى بیرو راى جیاواز و بەبیانوى ئەوەى كەدەنگیان بەلیستێكى جیاواز لەلیستى دەسەڵات داوە لەلایەن حزبێكى دەسەتدارى خۆمان مووچەى سەدان هاووڵاتى ئەم كوردستانە بردراو لەپۆستەكانیان دوورخرانەوە و گوازرانەوە بۆشوێنێكى تر و بەم هۆیەشەوە نان و قووتى سەدان منداڵ و خانەوادەى بێنازى ئەم كوردستانە كەبەخوێن و خەباتى هەموو لایەك هاتۆتەكایەوە بردرا و كەشێكى ناهەموار بۆخانەوادەكانیان هاتەكایەوە كەجێگاى دڵگرانیە ، لەم چەند رۆژەش دەنگۆى ئەوە بڵاوبۆتەوە كە50% ى بودجەى حیزبەكان كەمكراوەتەوە كەبودجەكانیان مانگانە و دیاریكراوە بەڵام كەس نازانێت بودجەى یەكێتى و پارتى كەمكراوەتەوە یان نا چونكە كەس نازانێت بودجەى ئەوان چەندە ؟ زۆربەى حیزبەكانى كوردستان جگەلەدوو حیزبە دەسەڵاتدارەكە بەردەوام لەرووپەرى رۆژنامەكانیان و لەرادیۆ و تیڤیەكانیان باس لەوناحەقیانە دەكەن كەبەرامبەر هەوادارانیان و زۆربەى تاكەكانى ئەم هەرێمە دەكرێت بەڵام بەداخەوە تائێستا ئەم مەسەلەیە و چارەسەركردنى هاوكێشە و رێرەوێكى جددى وەرنەگرتوەو بەدواداچونێكى وەهاى بۆنەكراوە كەچارەسەرێكى جددى بۆبدۆزرێتەوە ، هەروەك راگەیاندراوە كەلیستەبراوە كوردییەكان لەگەڵ سەرۆكى هەرێمى كوردستان كۆبونەوە سازدەكەن بۆیەكخستنى دەنگى لیستەكوردییەكان هاوهەڵوێستى لەبەغدا كەجێگاى دەستخۆشیە بەڵام پێویستە هەر لەم كۆبونەوەیەدا لیستەبراوەكان بەتایبەت سێ لیستەكەى دەرەوەى هاوپەیمانى كوردستان گفتوگۆى جددى لەسەرئەومەسەلانە بكەن كەپەیوەستە بەژیان و گوزەرانى هەموو تاكێكى كوردستان بەبێ جیاوازى حیزبایەتى و نەهێشتن و بنبركردنى ناعەدالەتى و گەندەڵى و جیاوازى و تەزكیەى حیزبایەتى و نانبرین ، پێویستە پرۆتۆكۆلێكى هاوبەشیش مۆربكەن سەبارەت بەوەى كەلەمەودوا ناكرێت لەبەغدا هاوبەش و هاوهەڵوێست بین لەهەولێریش بێبەش بین ، وەپێویستیشە لەمەودوا هەموو لایەكمان بەشى یەكسانمان هەبێت لەسەرجەم ماف و ئیمتیازاتەكان و هیچ كەس و لایەنێكیش هاووڵاتى پلە دوو نەبێت ، ناشكرێت لەمەودواحزب و قەوارە سیاسیەكوردییەكان لەبەغدا هاوبەش بن و هەندێكیشیان لەكوردستان بێبەش بن لەماف و ئیمتیازاتەكان .