مامۆستایانى زانكۆ و مامۆستایانى ئایینى و خوێندكاران و رۆشنبیران چەقۆكێش و سەرسەرى و بەرەڵڵان!!!

Monday, 02/05/2011, 12:00

كاتێك ناونیشانى ئەم بابەتە دەخوێنیەوە رەنگە لێكدانەوەیەكى نادروست بتباتە خەیاڵێكەوە ، بەڵام كاتێك دێیتە سەر ناوەرۆكى بابەتەكە بۆت روون دەبێتەوە ناونیشانى ئەم بابەتە بۆچى بەم شێوەیە دانراوە !!!
دواى ئەوەى لە17ى شوباتەوە دۆخێكى نائارام هەرێمى كوردستانى گرتەوە بەتایبەت سنورى پارێزگاى سلێمانى كەشێكى زۆر ناتەندروست باڵى بەسەرماندا كێشا كەلاى هەموو كوردێكى دڵسۆز جێگاى نیگەرانى و دڵتەنگى بوو ، بەتایبەت كاتێك بینیمان رۆڵەى كورد بەدەستى كورد برینداركرا و شەهیدكران و خۆپیشاندانەكانى سلێمانى تووندوتیژى لێكەوتەوە ، لەهەمووى ناخۆشتر ئەوەبوو كەزۆرێك لەمیدیاكان هێرشى نارەوایان كردە سەرتاكەكانى ئەم هەرێمە و بوختان و تانە و تەشەرى نارەوایان بۆهەڵبەستان و بەئاوازى شەرى ناوخۆى نەفرەت لێكراو دەیانخوێند !!! جێگاى نیگەرانیە كۆمەڵێك دەزگاى راگەیاندن تۆمەتى جۆراوجۆریان خستەپاڵ خۆپیشاندەران و رۆڵەئازادیخواز و چاكسازویستەكانى ئەم هەرێمە ئازیزە ، لەهەمووى نەویستراوتر ئەوەبوو رۆژانە هێرش دەكرایە سەردەیان رۆژنامەنووس و چالاكوانى بوارى كۆمەڵگەى مەدەنى و نووسەر و روناكبیرى ناسراوى گەلەكەمان كەجێگاى پەنجەیان درەوشاوەیە لەئەزموونى ئەم هەرێمە ، ئەگەریش چاوێك بەمێژوودا بخشێنینەوە دەبینین زۆرجار كاتێك كورد هاتۆتە سەرئەوەى شتێك بەشتێك بكات بەڵام بەهۆى رەفتار و گوفتارى كۆمەڵێك بەرپرسى نابەرپرس دۆخەكە بەرەوهەڵدێر رۆیشتووە و ئەزموونەكەمان لەدەستچووە ، بۆچى سەرۆكى هەرێم توانى سەرجەم لایەنە ناكۆكەكانى عێراق لەهەولێر لەسەریەك مێزى گفتووگۆ كۆبكاتەوە بۆناتوانێت لایەنەكانى كوردستان لەسەریەك مێزكۆبكاتەوە؟ وەكو لاى هەمووانیش روونە ناكۆكیەكانى نێوان لایەنە عەرەبیەكان زۆرگەورەتربوون لەناكۆكیەكانى نێوان لایەنەكوردییەكان، هەموو ئەو حالەتە نێگەتیڤانەى لەوماوەى رابردوو رویاندا بەلاى زۆربەى زۆرى تاكى كورد نەویستراو بوو بەتایبەت كاتێك چەندكەسێك لەخۆپیشاندەران بەردیان گرتە هێزەكانى ناوخۆ و پۆلیسى چالاكیەمەدەنیەكان و لەلایەكى دیكەشەوە بەگوللە وەڵامى داواكارى خۆپیشاندەران درایەوە ، رۆڵەى ئەم كوردستانە بەدرێژایى دەیان ساڵى رابردوو خوێنیان بەخشیوە و شەهیدیان داوە تاهەرێمى كوردستان بەمڕۆ گەیشتووە و زۆربەى تاكەكانى ئەم هەرێمەش كەس و كارییان شەهیدكران و ئەنفال كران و كیمیاباران كران و لەزیندانەكانى رژێمى بەعسى لەناوچوو جۆرەها ئەشكەنجە و توندوتیژیان بەرامبەر كراو لەسێدارە دران و زۆرێكیشیان زیندەبەچاڵكران و زۆرێكیشیان تاكو ئەمرۆ چارەنووسیان نادیارە ، هەموومان لەدژى بارەگاكانى رژێمى بەعس راپەریوین و خەباتمان كردووە و ئەزموونى هەرێم بەرهەمى هەموومانە و جێ پەنجەى هەموومانى پێوەدیارە ، ئاخر چۆن دەبێت لەسایەى حوكمرانى خۆماڵى و كوردى بەمجۆرە مامەڵە لەگەڵ رۆڵەكانى ئەم هەرێمە بكرێت ؟ ئەمانە و سەدان حالەتى تر كەجێگاى باسكردن و هەڵوەستە لەسەركردنە لەشوێنى خۆى ئەوەى لەهەموویان گرنگترە كەدەمەوێت هەڵوەستەى لەسەربكەم لێدوانەكانى ئەمدواییەى وەزیرى پێشمەرگەى حكومەتى هەرێمى كوردستان كەلەدەزگاكانى راگەیاندن داى ، هەموو لایەكمان ئەوەمان بیرماوە كەسەرۆك كۆمارى عێراق و سەرۆكى هەرێمى كوردستان و سەرۆكى حكومەت و سەرۆكى پەرلەمانى و فراكسیۆنەجیاوازەكانى پەرلەمانى كوردستان هەموویان ئەوەیان ووت كە داواى خۆپیشاندەران رەوایە و ئەوان رۆڵەى ئەم هەرێمەن و مافى خۆیانە داواكارییان هەبێت ، بەڵام بەپێچەوانەى ووتەى ئەم لایەنە گرنگ و جۆراوجۆرانەى كوردستان وەزیرى پێشمەرگەى حكومەتى هەرێمى كوردستان لێدوانى نارەوا دەدات !!! خۆپیشاندەرانى بەردەركى سەراى سلێمانى پێكهاتبون لە (مامۆستایانى زانكۆ و مامۆستایانى ئایینى و مامۆستایانى خوێندنگەى بنەرەتى و ئامادەییەكان و قوتابیانى زانكۆ و پەیمانگاكان و خوێندنگەكان و كرێكاران و ئەندازیاران و پزیشكان و پارێزەران و پێشمەرگە و پێشمەرگەى دێرین و دایك و باوكى شەهیدانى رێگەى رزگارى كوردستان و رۆڵە خێر لەخۆنەدیوەكانى پاشماوەى كیمیاباران و ئەنفال و نوگرەسەلمان و دایكان و خوشكان و رۆشنبیران و رۆژنامەنوس و نوسەران و منداڵان) بەڵام زۆر بەداخەوە وەزیرى پێشمەرگە هەموو ئەوچین و توێژە پیرۆزانەى بەردەركى سەراى بە (چەقۆكێش و سەرسەرى و بەرەڵڵا) ناوبرد لەسەردەزگاكانى راگەیاندن !!! سەرۆكى هەرێم و سەرۆكى حكومەت و سەركردایەتى حزب و لایەنەسیاسیەكانى كوردستان و خەلكى بەشەرەفى كوردستان ئاخر ئەم ووتانە لەووتەى وەزیردەچێت ؟ ئاخر رەوایە خۆپیشاندەران بەو ووتە نەشیاو و بازاڕییانە ناوببرێن؟ ئاخر ئەم قسانە هى كەسێكى سەرشەقامە پێى دەڵێن قسەى بازارى ، نەك قسەى سەر دەزگایەكى راگەیاندن و لەهەمووشى سەیرتر قسەى وەزیرى توێژێكى گرنگى ئەم كوردستانە كەپێشمەرگەن ، لەهەمووشى سەیرتر ئەوەیە وەزیرى پێشمەرگە ووتى :- هەمووئەفسەرەكانى پێشمەرگە بەبێ گەرانەوە بۆسەرووى خۆیان دەست كراوەن بۆهەرجۆرە رەفتار و جولانەوەیەك !!! دەست كراوەن بەرامبەر عەرەبەشۆڤینیەكان؟ یان بەرامبەر ئەوانەى رۆژانە ناوچەسنورییەكانى هەرێم تۆپباران دەكەن ؟ یان ئەوانەى گەندەڵن و رۆژانە قووتى هاوڵاتیان و بەروبومى ئەم كوردستانە بەراست و چەپ هەڵدەلوشن ؟ نەخێر بەرامبەر ئەمانە دەستیان بەستراوە بەڵكو بەرامبەر خۆپیشاندەرانى داماو ئەفسەرانى پێشمەرگە دەستكراوەن بۆهەرجۆرە رەفتارێك !!!كارەساتە ئەم جۆرە لێدوانانە !!!ئەم جۆرە لێدوانانە رێگا خۆشكردن و زەمینەسازكردنە بۆشەرى ناوخۆ و بۆكوشتنى رۆڵەى كورد بەدەستى كورد ، سەرۆكى هەرێم كەفەرماندەى گشتى هێزى پێشمەرگەى كوردستانە و سەرۆكى هەرێمە و واجبە لەسەرى گیان و كەرامەتى یەكە بەیەكەى تاكەكانى ئەم هەرێمە بپارێزێت ، بۆیە لەم سۆنگەیەوە پێویستە سەرۆكى هەرێم و سەرۆكى حكومەت بەزووترین كات وەزیرى پێشمەرگە لەسەركار لابدەن و پەرلەمانى كوردستانیش ئەمجارەش بانگهێشتى پەرلەمانى بكاتەوە بەڵام ئەمجارەیان نەك بۆئەوەى بەچەپڵەرێزان متمانەى پێبدەنەوە ، بەڵكو بەچەپڵەرێزان متمانەى لێبسێننەوە و بیدەنە داواكارى گشتى بۆئەوەى ئیجرائاتى یاسایى لەگەڵ بكرێت بەتۆمەتى ناوزراندنى رۆڵەكانى ئەم هەرێمە ، بۆئەوەى لەكوردستان یاسا سەروەربێت وهیچ كەسیش لەمەودوا جورئەتى ئەوەنەكات قسەى نەشیاو و نارەوا بەرامبەر تاكەكانى ئەم هەرێمەبكات.