ده‌ستی کێ ده‌بڕی، فازیل میرانی؟
Tuesday, 22/02/2011, 12:00
ئێواره‌ی 17ــ 2 ــ 2011 چه‌ند کاتژمێرێک پاش ئه‌وه‌ی که پارتی دیموكراتی كوردستان خوێنی ده‌یان لاوی له شاری سلێمانی ڕشت. فازیل میرانی ئه‌ندامی مه‌كته‌بی سیاسی پارتی دیموكراتی كوردستان له که‌ناڵی (کوردستان تیڤی) و به ئاماده‌یی ده‌یان ڕۆژنامه‌نووس زۆر بێشه‌رمانه و زۆر بێباکانه گوتی: (ئه‌وانه‌ی په‌لاماری باره‌گاكانمان بده‌ن تا بۆمان بكرێت ده‌سته‌كانیان ده‌بڕینه‌وه).
پاشان فازیل میرانی گوتی: (له‌راستیدا لێره‌دا پرسیار ئه‌وه‌یه ئایا لقی چوار به‌رپرسه له‌كاره‌با، ئه‌گه‌ر دژی گه‌نده‌ڵین ئایا به‌ته‌نها له‌لقی چوار گه‌نده‌ڵی هه‌یه ، ئایا لقی چوار حكومه‌ته له سلێمانی).
دیسان دووباره‌ی کرده‌وه و زۆر به لووت به‌رزییه‌وه گوتی: (تا بۆمان بكرێت ئه‌وه‌ی ده‌ستی بۆمان درێژ بكات، ئه‌وا ده‌سته‌كانی ده‌بڕینه‌وه).
فازیل میرانی خۆی له ڕاستییه‌کان گێل ده‌کات و ده‌یه‌وێت خۆڵ بکاته چاوی خه‌ڵکه‌وه و پاساوی بێ بنه‌ما بهێنێته‌وه.
خۆپیشانده‌رانی سلێمانی بۆچی له یه‌که‌م هه‌نگاودا ویستیان ده‌ست به‌سه‌ر لقی چواری پارتی دیموكراتی كوردستاندا بگرن؟
چونکه پارتی دیموكراتی كوردستان ده‌ستی به‌سه‌ر حکومه‌ت و داهاتی هه‌موو کوردستاندا گرتووه.
چونکه مه‌سعود بارزانی سه‌رۆکی پارتی دیموكراتی كوردستان به‌زۆر خۆی به‌سه‌ر خه‌ڵکی کوردستاندا سه‌پاندووه و خۆی کردووه به)سه‌رۆک(ی هه‌رێمی کوردستان و هه‌موو ده‌سه‌ڵاته‌کانی له‌ده‌ستی خۆیدا کۆ کردووه‌ته‌وه.
چونکه پارتی دیموکراتی کوردستان لقی چواری کردووه به بنکه‌ی چاودێریی کردنی لاوان و نووسه‌ران و ڕووناکبیران و به‌رده‌وام ڕاپۆرت ده‌رباره‌یان ده‌نووسێت و جاسوسییان به‌سه‌ره‌وه ده‌کات.
چونکه پارتی دیموکراتی کوردستان سۆرانی مامه حه‌مه و دوکتۆر عه‌بدوستار تاهیر شه‌ریف و سه‌رده‌شت عوسمان و ده‌یان تێکۆشه‌ری وه‌ک نه‌زیر عومه‌ر و کامیل ڕه‌ئووفی تیرۆرکرد.
له‌به‌ر ئه‌م هۆیانه و ده‌یان هۆی دیکه، خه‌ڵکی کوردستان پارتی دیموکراتی کوردستان به‌سه‌رچاوه‌ی گشت ئه‌م ناعه‌داله‌تی و دزی و گه‌نده‌ڵییه ده‌زانن.
ئه‌و ده‌مه‌ی که خۆپیشانده‌ران به‌رده‌بارانی لقی چواری پارتی دیموکراتی کوردستانیان کرد، دزه به‌رپرس و ده‌سه‌ڵاتداره‌کانی نێو یه‌کێتیی نیشتمانیی کوردستانیشیان له‌بیر بووه و خۆیان بۆ هه‌ڵمه‌ت بۆ سه‌ر ئه‌وانیش ئاماده‌کردبوو. به‌ڵام پارتی دیموکراتی کوردستان زۆر دڕندانه و وه‌حشییانه که‌وتنه ده‌ستڕێژکردن له لاوان و به (بی که‌ی سی) له سه‌ربانی لقی چواره‌وه له ماوه‌ی پێنج ده‌قه‌دا نزیکی شه‌ست که‌سیان به‌سه‌ختی بریندار کرد و هه‌ر له‌وێدا لاوێکی چواده ساڵ به ناوی (ڕێژوان)یان کوشت و ده‌یانی دیکه‌شیان خڵتانی خوێن کرد.
پاش ئه‌م هه‌موو تاوانانه سه‌رکرده‌کانی پارتی دیموکراتی کوردستان زۆر بێشه‌رمانه و زۆر بێباکانه په‌یتا په‌یتا له وتوێژه ته‌له‌فیزیۆنییه‌کان و له به‌یان و ڕوونکردنه‌وه‌کانیاندا هه‌مان گوته‌ی فازڵ میرانییان دووباره کرده‌وه و گوتیان به‌زووترین کات)فیتنه( و)کاژاوه‌گێڕه‌کان(له‌ناو ده‌به‌ین.
وا پێنج ڕۆژ به‌سه‌ر ئه‌و تاوانه گه‌وره‌یه که پارتی دیموکراتی کوردستان به‌رامبه‌ر به لاوانی شاری سلێمانی ئه‌نجامیان دا، تێپه‌ڕ ده‌بێت. تادێت خۆپیشاندان و ناڕه‌زاییه‌کان په‌ره‌ده‌ستێنن. وا شاره‌کانی دیکه‌شی گرته‌وه. وا کورده‌کانی وڵاتانی دیکه یه‌کڕیز و یه‌کگرتوو پشتیوانیی خۆیان بۆ لاوانی کوردستان دووپات ده‌که‌نه‌وه و داوایان لێده‌که‌ن له‌خۆپیشاندان به‌رده‌وام بن تا به دوا ئامانج ده‌گه‌ین.
ئه‌م ڕۆژانه‌ی که له‌به‌ر ده‌مماندایه نیشانی ده‌ده‌ن که تاوان و هه‌ڕه‌شه‌کانی سه‌رانی پارتی دیموکراتی کوردستان چییان لێده‌که‌وێته‌وه. نیشانی ده‌ده‌ن فازیل میرانی ده‌توانێت ده‌ستی خه‌ڵک ببڕێت یان ئه‌و وه‌کو به‌عسییه‌کان ده‌که‌وێته ژێر پێله‌قه‌ی جه‌ماوه‌ر...
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
