پەژاك: هۆكاری كێشەكانی ئێران، نەبوونی یاسایەكی بنەڕەتی ودیموكراتیكە
Thursday, 21/10/2010, 12:00
پارتی ژیانی ئازادی كوردستان پژاك هەڵمەتێكی تری دەستپێكرد لەپێناو چارەسەر كردنی پرسی كورد بە ڕێبازی ئاشتیانە.
دوێنێ مەجلیسی پژاك جاڕنامەی چارەسەری دیموكراتیكی لەپێناو چارەسەری پرسی كورد لە ئێراندا بۆ ڕای گشتی ڕاگەیاند.
مەجلیسی پەژاك لەجاڕنامەكەیدا دۆخی ئێستای ئێران لە ئاستی ناوخۆیی و نێونەتەوەییدا هەڵدەسەنگێنێت و دەستنیشانی دەكات كە" ئەمڕۆ ئێران به قۆناخێكی هەستیاری مێژوویدا تێپەر دەبێت. قۆناخێكە كه دەوڵەت هەم لەبواری ناوخۆییدا بەگشت رەهەندەكانی ئابووری، سیاسی، چاندی و ئەمنیەتیەوه له قەیراندایه و هەمیش لە ئاستی ناونەتەوەییەوه ڕۆژانه بەرەو گۆشەگیری زیاتر دەچێت و لەسەر ئەو بنەمایەش ڕەوایەتی لەئاستی ناوخۆیی و دەرەكیدا كەوتۆتە بەر باس.
ئەمە بەلەبەرچاو گرتنی ڕاستینەی مێژوویی ئێران و ئەو میراتەی كە گەلانی ئێران بە درێژایی مێژووی چەند هەزار ساڵەی ئەم هەرێمەدا تۆماریان كردوە لە ناكۆكیدایە و ئەو ڕەوشه نه شایانی گەلانی ئێرانه و نه شایانی پێكهاتەی سیاسی ئەم وڵاتەیە.
پەژاك هۆكاری سەرەكی ئەم كێشانەش دەگەڕێنێتەوه بۆ نەبوونی یاسایەكی بنچینەیی دیموكراتیك و نەبوونی زیهنەتی دیموكراتیكی سیاسی لەناو ئێراندا و بەو شێوەیە دەنوسێت:"
پرسێك كە لە سەد ساڵی ڕابردوودا مژاری سەرەكی گۆڕەپانی سیاسی- كۆمەڵایەتی ئێران بووە,هێشتنەوەی كێشەكان له ئاستێكی دژواردا و ڕەچاونەكردنی پێوانەكانی دیموكراسی لەچارەسەری كیشەكاندا؛ هەم دەرەتانەكانی گەشەسەندنی سیاسی و ئابووری بنبڕ كردووە و لەهەمان كاتیشدا هەمیشە زەمینەی دەستێوەر‌دانی دەرەكی و بەكارهێنانی ئەم كێشانه له لایەن وڵاتانی دەرەكی ڕەخساندووە. ئەوه لەكاتێكدایە كە پێكهاتەی فرە ڕەنگی ئەتنیكی، نەتەوەیی، ئایینی و زمانی ناوخۆی ئێران دەتوانێت مەزنترین دەرەتان له گشت بوارەكانی سیاسی، كۆمەڵایەتی و ئابووریدا بخوڵقێنێت و بگاته ئاستێك كە كۆمەڵێك دەرفەت و دەرەتانی ئەرێنی پێكبێنن كه ئێران بكاتە وڵاتێكی پێشەنگ لەئاست ڕۆژهەڵاتی ناڤین و جیهاندا."
مەجلیسی پەژاك لە جاڕنامەكەی خۆیدا وەها ئاراستەی دۆخەكه دەستنیشان دەكات:" ئێمه لەو بڕوایه داین كه ئێران له دووریانێكی مێژوویی و چارەنووسساز دایە. یان ئەوەتا بەئەساس گرتنی سروشتی كۆمەڵایەتی گەلان و مافەكانیان دەرگا لەبەردەم دیموكراسیەكی ڕاستەقینە دەكاتەوه كە هەموو پێكهاتە و گەلانی ئێران به بەلوچ، عەرەب، ئازەری، فارس، كورد و گشت ئەتنیك و ئاینزاكان لەخۆ دەگرێت و به ناناوەندیكردنی دەسەڵات و به ئەساسگرتنی خۆرێوەبەری دیموكراتیكی گەلان، هەموو گەلان لە ئامێز دەگرێت، یان ئەوەتا دووبارەبوونەوەی مێژوو و دەرئەنجامی دیكتاتۆری قەبووڵ دەكات و هاوكات لەو ڕەوته دیموكراتیزاسیۆنەی كه له ئارادایه دوا دەكەوێت."
پەژاك زیاتر دۆخەكە رووندەكاتەوه و دەڵێت:" ئیتر ئاستی تێكۆشانی گەلانی ڕۆژهەڵاتی ناڤین ڕۆژانە لەبەرز بوونەوەدایه و ئیتر گەلان چاوەڕوانی دەوڵەتان نامێنن لە چارەسەركردنی پرسەكانیان. هاوكات ئەمڕۆكە لەئاستی ڕۆژهەڵاتی ناڤیندا هەوڵدان و جموجۆڵی نوێ بە دەستپێشخەری ناوخۆیی و دەرەكی لە ئارادان، كه ئەگەر ئێران هەوڵ نەدات خۆ لەتەك ئەو پێشكەوتنانە بگونجێنێت، ئەوا لەساڵی داهاتوودا بەرەو قەیرانی قووڵتر دەڕوات. لێرەدا ئێران پێویستە هەوڵدانەكانی دوایی له ئاست هەرێمی ڕۆژهەڵاتی ناڤیندا و ئاستی بەرزبوونەوەی پرسی كورد لەهەرێمەكەدا لەبەر چاوبگرێت و لەو ڕەوتە دوا نەكەوێت."
لە بەشێكی تری جاڕنامەكەدا پارتی ژیانی ئازادی كوردستان پژاك هەڵوێستی خۆی سەبارەت به دۆخی ئێستای ئێران و چۆنیەتی چارەسەر كردنی كێشەی كورد ئاشكرا دەكات و 7 خاڵیش ڕوووبەڕووی دەوڵەتی ئێران دەكاتەوە لەپێناو چارەسەر كردنی پرسی كورد و هەموو پرسەكانی تری ناو ئێران.
مەجلیسی پارتی ژیانی ئازادی كوردستان پژاك لەو بەشەی جاڕنامەكەیدا هەڵوێستی خۆی بۆ چارەسەری كێشەی كورد لە ڕۆژهەڵاتی كوردستان بەو شێوەیە دەخاتە ڕوو:
ئێمە وەك پارتی ژیانی ئازادی كوردستان، سوورین لەسەر چارەسەری ئاشتیانەی پرسی كورد له چوارچێوەی ڕێ و ڕێبازی سیاسیدا. ئەگەر بێت و دەوڵەت لەو بوارەوە هەنگاو هەڵبهێنێتەوه ئەوا ئیتر واتای شەڕ و پێكدادان نامێنێت. ڕاگەیاندنی ڕاگرتنی چالاكی لەشكری لەلایەن هێزەكانی ئێمەوه لەدوو ساڵی ڕابردوودا، باشترین بەڵگەیه بۆ نیشاندانی نیەتی پەژاك لەگەیشتن بەكەش و هەوایەكی لەم چەشنەیە.
پێویستە كۆماری ئیسلامی ئێران بزانێت كه پەژاك لەهەر بوارێكدا خاوەن هێزه و سوورە لەسەر رێبازی چارەسەری سیاسی و دیموكراتیانە.
مەجلیسی پەژاك لە جاڕنامەی چارەسەری خۆیدا بەوردی ئاستەنگەكانی بەردەم چارەسەری گەلان دەخاته ڕوو و دەڵێت:"
ئێمە وەك پەژاك لەو بڕوایەداین كە پرسی مافەكانی گەلانی ئێران، به شەڕ و خوێنڕشتن و زیهنیەتی ئەمنیەتی دەوڵەت كه گوفتمانی 'جودایی خوازی' و میلیگەرایی بەسەر ئەو پرسەدا و گشت داخوازیە دیموكراتیك و ڕەواكانی گەلانی ناو ئێراندا دادەسەپێنێت، چارەسەر نابێت. هەر بۆیه هەوڵدان لەپێناو چارەسەریەكی ئاشتیانه و سیاسی، باشترین ڕێبازە بۆ گەیشتن به چارەسەری پرسە هەڵپەسێردراوەكانی هەنووكەیی ناوخۆی ئێران. ئێمه وەك پەژاك لەپێناو ڕاپەڕاندنی ئەرك و بەرپرسیارێتی خۆمان لەبەرامبەر نرخ و بەهاكانی گەلاندا، بەپێویست دەزانین كە خاوەن دەستپێشخەریەك بین له پێناو چارەسەری ئەو كێشانە لەناو سنوورە سیاسیەكانی ئێستادا.
مەجلیسی پەژاك لەو جاڕنامەیەدا بە حەوت خاڵی سەرەكی داخوازییەكانی خۆی لەپێناو چارەسەری ئاشتیانەی پرسی كورد و گەلانی ئێراندا ڕووبەڕووی كۆماری ئیسلامی ئێران دەكات كە پێك هاتوون لە:
1.بەفەرمی ناسینی پرسی كورد و چارەسەری ئەم پرسە بەشێوازی دیموكراتیك له ڕێگای دیالۆگەوە.
2.بۆ ئەوەی كه له كەش و هەوایەكی سیاسی و دیموكراتیكدا بەرەو چارەسەری هەنگاو هەڵبهێندرێتەوە، پێویسته زەمینەی دانیشتن (مژاكرە) ساز بكردرێت.
3.بۆ ئەوەی كه زەمینەی دیالۆگ، موزاكەره و چارەسەری سیاسی پێشبكەوێت، پێویستە كەش و هەوایەكی گو‌نجاوی ئارام، دوور لە توندوتیژی كە سیاسەت بتوانێت تێیدا ڕۆڵ بگێڕێت بێته ئاراوە. هەر بۆیه پێویستە ئۆپەراسیۆنەكانی سەربازی ڕابگیردرێت.
4.له پێناو چارەسەری پرسی گەلاندا و بۆ ئەوەی كە له رووی كرداریەوە مافی گەلان لە بوارەكانی سیاسی، ئابووری و فەرهەنگی و ئازادی بیر و ڕا دەربڕین و لە هەمانكاتدا ئیرادەی جەوهەری گەلان بەدیبێت پێویستە گشت ئەو مافانە گەرانتی بكرێن و كەند و كۆسپەكانی ئێستا لەو بوارەوه هەڵبگیردرێن.
5.به فەرمی ناسینی مافی خۆرێكخستن كردن و چالاكی سیاسی- دیموكراتیكی گەلان.
6.گەلێك كه بێ زمان بهێشترێتەوە، ناتوانرێت گوزارە له هەبوونی ئەو وەك گەل بكرێت و له ئەنجامدا مرۆڤ ناتوانرێت باس لە مافی ئەو وەك گەل بكات. چونكه له جەوهەری فەرهەنگی، ئەتنیكی و نەتەوەیی خۆی دادەبڕدرێت. به ڕەسمی كردنی زمانی گەلان بە تایبەتی زمانی كوردی، پەروەردە، پێشخستن و بەكارهێنانی زمانی زگماكی لەگشت گۆڕەپانەكان و نەهادەكانی دەوڵەتی و نادەوڵەتی شەرتێكی سەرەكیە.
7.له پێناو لەناو بردنی كەش‌وهەوای ترس و وەحشەت و سازكردنی هەوایەكی دیموكراتیانه و ئازاد بۆ بەشدارییەكی ئازاد، ئازاد كردنی زیندانیانی سیاسی و ڕاگرتنی یاسای ئێعدام پێداویستییەكی حاشاهەڵنەگرە.
ئەمه و مەجلیسی پەژاك له كۆتایی جاڕنامەكەی خۆیدا وەها دەڵێت:" ئێمە وەك پاڕتی ژیانی ئازادی كوردستان، هەڵسوكەوتی دەوڵەت له دوای ڕاگەیاندنی ئەو جاڕنامەیە لەبەر چاوان دەگرین و چاوەڕوانی هەنگاو هەڵێنانەوەی جددی لەلایەن دەوڵەتەوەین. ئێمه وەك پەژاك ماوەیەكی درێژه كه قۆناخی بێ چالاك بوونمان ڕاگەیاندووه، بەڵام دەبینین كه شەڕ و پێكدادان و خوێنڕشتن له ڕۆژهەڵاتی كوردستان بەردەوامە. هەتا ئێستاكەش گیراوانی كورد بریاڕی سێدارەیان پێدەدرێت و لەسێدارە دەدرێن. لەهەمان كاتیشدا گیراوان ڕووبەڕووی ئەشكەنجه و ئازار دەبنەوە. له پێناو وەدیهێنانی كەش و هەوایەكی دیموكراتیك و كۆتاییهێنان به توندوتیژی لە كوردستان و ئێران و به تایبەت پێشگرتن لە رانتخۆرانی شەڕ، وەڵامی دەوڵەت بۆ ئەم جاڕنامەیە خاوەن گرینگیەكی مێژووییە.
مەجلیسی پژاك هەروەها ڕادەگەیەنێت كە ئەوان ئەو جاڕنامەیە نەتەنیا بە پرسی كوردەوه سنووردار ناكەن، بەڵكو لەو بڕوایەدایە كە ئەو جاڕنامەیە پێش زەمینەی چارەسەری پرسی گشت گەلانی ئێرانە."
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
