ئۆجەلان: با هیچ كەس گومانی لەوەدا نەبێت، ئێدی هیچ هێزێك ناتوانێ ببێتە تەگەرە لە بەردەم ئیرادەی گەلەك

Thursday, 31/03/2011, 12:00

ڕێبەری گەلی كورد عەبدوڵڵا ئۆجەلان رۆژی23/3/2011چاوی بە پارێزەرانی كەوت و سڵاوی ئاراستەی پیرۆزبایی ملیۆنان كەسی نەورۆزی كوردستان كرد و هێرشەكانی دژ بە گەلی كوردی بە زمانێكی توند ڕیسوا كرد و دەستنیشان دەكات كە ئیدی هیچ هێزێك ناتوانێ تەگەرە لە بەردەم ئیرادەی گەلی كورددا درووست بكات و ئاكەپەی ووشیار كردەوە كە دەست لە هەوڵی گێرەشێوێنی بەردا. من سڵاو لە پیرۆزباییەكانی نەورۆز لەكوردستان دەكەم. ئەمساڵ گەل بەشێوەیەكی جەماوەری بەشدار بووە. گەلی كورد بەم هەڵوێستەی خۆی خاوەن لەنرخەكانی دەركەوت. من نەورۆز لەهەموو بەشداربووانی نەورۆزی ئەمساڵ پیرۆز دەكەم. سەبارەت بە ڕێپێوانەكانی بەرەو خێوەتەكانی چارەسەریی دیموكراتیك لە باكووری كوردستان و هەروەها هێرشەكانی بە فەرمانی ئاكەپەش هەڵسەنگاندو ووتی: هەموو لایەك بینی نەورۆزی ئەمساڵ چۆن پێشوازیی لێكرا، ئەمە ئاستی تێكۆشانی ئێمەش نیشان دەدا. تێكۆشانی ئێمە بەرەو سەركەوتن دەچێ. با هیچ كەس گومانی لەوەدا نەبێت، ئێدی هیچ هێزێك ناتوانێ ببێتە تەگەرە لە بەردەم ئیرادەی گەلەكەمان.
ئەو هێرشانەی ئەم دوایەی لەسەر پیرۆزباییەكان بەفەرمانی ئاكەپە بەڕێوەچوونەو ئەوەش گێرەشێوێنی و پیلانگێڕیەكە. تۆ هێرش و گێرەشێوێنی دەكەی و پاشانیش دەڵێی، بەردیان هاویشتووە و، زللەیان لە پۆلیس داوە، قیامەتێك درووست دەكەی‌ !! تۆ بە ئەرتەشێكی یەك ملیۆنی، (30) ساڵە قڕكردن لە سەر ئەو گەلە بەڕێوە دەبەی و كوردان دەكوژی. تۆ هەر جۆرە توندوتیژیەك بەكار دێنی و لە بەر ئەوەی بە بەرد و زللە وەڵامی ئەو هێرشانە دەدرێتەوە، قیامەتێك درووست دەكرێ، ئەمە بێ ئەخلاقییە.
من بە پێداگریی خۆم پێش لە چالاكیەكانی گەریلا دەگرم، ئەگەر وا نەكەم، ڕۆژانە سەدان كەس گیانیان لەدەست دەدەن. بانگ لەحكومەتی ئاكەپە و دەوڵەت دەكەم. من بانگ لە دامەزراوە دەوڵەتییەكان دەكەم، با جددی بن و هێرشەكان دژ بە گەل ڕاگرن. با ڕێگری لەو هێرشانە بكەن. من ئاكەپە هوشیار دەكەمەوە، ئێدی با دەست لەو گێرەشێوێنی و پیلانگێڕییانە بەردا. لە ڕۆژانی ڕابردوودا، بابەتی بە ناو "هەڕەشە لە ڕۆشنبیران" لە ڕۆژەڤدا ڕادەگرن. هەروەها بابەتەكانی بەنگی، سەباحەت و ڕووداوی تاتلیسیش، گێرەشێوێنین و بە زانابوون لەلایەن پۆلیسەوە ئامادە كراون. ئەوەی كە ئەنجام دەدرێ پیلانگێڕییە. ئەو سیاسەتوانانی كورد كە لەئەنجامی پیلانگێڕی ئاكەپەدا خرانە زیندان و گیراوانی نەخۆش كە لە زیندانەكاندا بەرخۆدان دەكەن، وەكوو قارەمانی ئەم پێڤاژۆیە بەناو دەكەم. هەروەها چالاكی خۆسووتاندنی حوسێن
چەتینكایای لە ئەلبستان، وەكوو چالاكی دژ بە تواندنەوە بەناو دەكەم. ئاكەپە هەر لەسەرەتای هاتنەسەركارییەوە، شێواز و سیاسەتیكی نوێی لەناوبردنی گەلی كوردی گرتۆەتە بەرو بانگەوازی لەهەموو لایەنێك دەكەم كە فریوی سیاسەتەكانی ئاكەپە نەخۆن.
لە ساڵی (2002)دا ئاكەپە بە پشتیوانی هەندێ لایەن بەدەسەڵات گەیشت. هەر بە پشتیوانی ئەو لایەنانە هەندێ شێوازی نوێی لەناوبردنی خستە گەڕ. دواتر ئەو شێوازانەی گۆڕی. ئەو جار لەجیاتی ئەوەی پشت بە "گلادیۆ" و "ژیتەم" ببەستێت، پشتی بە هێزەكانی پۆلیسی مەدەنی بەست. بۆ ئەوەی ئەنجامێك لەو ڕێبازەی وەدەست بێنێت، دەزگاكانی چاپەمەنی، بەشێك لە لایەنی سەربازی و تەنانەت زانكۆكانیشی تێوەگلاند.
دوو چەمك كە بەئامانجی لەناوبردنی گەلی كورد و تەڤگەرەكەی دەستیان
پێكردووە، روون دەكەمەوە.
ڕێبازی یەكەمین: لەناوبردنی سیاسی لەخۆ دەگرێت. بە بەهانەی بێناوەرۆك (2)هەزار كەسیان ڕاپێچی زیندانەكان كرد. لەجیاتی ئەوەی بە ڕێگای "ژیتەم" بیخەنە كردارەوە، واتا بە كوشتنی بكەری نادیار، ئەو جارە لە ڕێگەی یاساكانەوە، گۆڕەپانی سیاسەت لەناو دەبەن. تەنها بە بیانوی چەند ووتە، مرۆڤەكان دەگرن. ڕێگە بە پێشكەوتنی سیاسەتی دیموكراتیك نادەن. لەلایەكی ترەوە ئەو كەسانەی پێشتر لایەنگری ڕێبازەكانی گلادیۆ و ژیتەم بوون، لەژێر ناوی ئەرگەنەكۆندا، ڕەوانەی زیندانەكان كران.
ڕێبازی دوهەمین: سیاسەتی سازش كردنە. لە لایەك هەموو ڕێبازەكانی توندوتیژی بەكاردێنن، لە لایەكی تر بە هەنگاوی بچوكی وەك كردنەوەی كۆرسی زمانی كوردی و كردنەوەی تەرەتە (6) وا نیشان دەدەن كە پرسەكەیان چارەسەر كردووە. بەگوێرەی ئەوان، ئەوە چارەسەرییە. هەموو رۆژێ لە ڕۆژنامەكاندا دەنوسن ئەوان پرسی كوردیان چارەسەر كردووە. هەندێ ڕۆژنامەوان و نوسەریش خاوەن هەمان هەڵوێستن، بەڵام لە ڕاستیدا، پرسی كورد وەك چیایەك لەبەردەمماندا قوت بۆتەوە. ئەو نوسەرانە فریوی سیاسەتی سازشكارانەی ئاكەپەیان خواردووە. كاتێك من لێرەوە ڕەخنە ئاراستەی ئەو نوسەرانە دەكەم، دەڵێن ئۆجەلان هەڕەشە دەكات. گەل هەموو ئەو ڕاستیانە دەبینێت.
ئۆجەلان هاوكات باسی لە بانگەشەی ئەو كەسانەش كرد كە دەڵێن، ئەو هەڕەشە لە نوسەران دەكات و تیشك دەخاتە سەر هێرشەكانی ئەم دوایەی سەر پەرلەمانتارانی بەدەپە و دەڵێت؛" بە گوێرەی بەڕێوەبەرانی ئەو چەمكە نوێیە و حكومەتی ئاكەپە، دەبوو بەر لە هەڵبژاردنەكان ئەنجامێكیان لەو سیاسەتە وەدەستخستبا و بەو شێوەیە دەستیان بە قۆناغی هەڵبژاردن كردبا. بەناو ئێمەیان لەناو دەبرد و لەگەڵ كوردانی هاوپەیمانی خۆیاندا، چارەسەرییەكیان بەگوێرەی خۆیان ئاوا دەكرد، بەڵام تیگەیشتن كە ناتوانن ئێمە لەناوبەرن و پرسی كوردیش تا ئێستا بەردەوامە".
من؛ پێڤاژۆی ساڵانی (1999 تا 2002) وەكوو قۆناغێكی ناوین هەڵدەسەنگێنم. ناتۆ دوای قۆناغی (15) تەباخی(ئاب)ی ساڵی (1984)، ویستی سەرلەنوێ ڕۆژهەڵاتی ناوین دیزاین بكاتەوەو شێوەی پێبدات. ئەو بابەتە تا ئێستاش لە ڕۆژەڤدایە‌ و دەستوەردانی ڕۆژئاواش لەلیبیا وەكوو پارچەیەك لەم پیلانە بەناو دەكەم. پیلانەكانی ئەمریكا و هێزە نێونەتەوەییەكان بۆ دەستێوەردان لە ڕۆژهەڵاتی ناوین، لە چواچێوەی پرۆژەی مەزنی ڕۆژهەڵاتی ناویندا بەڕێوە دەچن. ئەوانەی لە بەردەم ئەم پڕۆژەیەدا دەبنە تەگەرە، یەك بە یەك لەناویان دەبەن. ڕاستی ئەمەیە كە ئەم پیلانەی لەناوبردن، بە من و لە
كەسایەتی مندا بە تەڤگەری ئازادیی گەلی كورد پەكەكە دەستی پێكردووە. ئەمڕۆش دیارە، ڕۆژهەڵاتی ناوەڕاست دەكوڵێ. ناتۆ دەست لە لیبیا وەردەدا. دەیانەوێ قەززافی لەناو بەرن. گەلێك وڵاتی عەرەب لەناو ئەو تەڤگەرەدان. ئەوەتا سوریاش دەكوڵێ و لەوێش ڕووداوەكان دەستیان پێكردوون. ڕاستی ئەوەیە كە یەكەم دەستێوەردانی ناتۆ و پێكهێنانی خاڵی (5)، ساڵێك دوای پێڤاژۆی (15)ی تەباخی (1984)، لەساڵی (1985)دا لە بەرامبەر ئێمەدا پێكهاتووە.
ئەرتەشی شەڕی تایبەتی ناتۆ، ئەوكاتە گلادیۆی لە دژی پەكەكە خستە جموجۆڵەوە. نموونەی گلادیۆی ناتۆ لە توركیاش، ژیتەمە. چەمكی‌ گرێدراو بە ئەرتەش و هێزی سەربازی، هەتا ساڵی (1999) بەردەوام بوو. هەتا پیلانگێڕی نێودەوڵەتی (15)ی شوبات‌، گلادیۆی ناتۆ، واتە ژیتەم ڕۆڵێكی چالاكی هەبوو، بەڵام دوای ساڵی (1999) ژیتەم لە دەرەوەی پێڤاژۆیەكەدا ڕاگیراو كاریگەری خۆی لەدەست دا.
لەقۆناغەكانی پێش ساڵی (1999)ش لایەنگەری چارەسەری هەبوون. ئەوانەی لەنێوخۆ لایەنگری چارەسەری پرسەكە بوون، بێكاریگەر كران و دواتر قۆناغێكی نوێ لەساڵی (2002)دا دەستی پێكرد. لەنێوان ساڵانی (1999 و 2000)دا قۆناغێكی ناوین هەبوو. ئەو قۆناغە نوێیە گرینگە و پێویستە باش ببێتە مایەی تێگەیشتن. دوای ساڵی (2002) چەمكێكی نوێ دەستیپێكرد كە ناوەندەكەی لەندەن ــ واشنتۆنە، واتا لەوێڕا بەڕێوەدەبرێت. من، تۆماركردنی ناوی پەكەكەش لە لیستی ترۆڕدا، بەو چەمكەوە دەبەستەمەوە. لەساڵی (2002) بەدواوە، لەئەنجامی هەوڵە ئاشتیخوازییەكانی ئێمە، قۆناخێكی بێچالاكی دەستی پێكرد، بەڵام سەرەڕای ئەو هەڵوێستەش، لە زۆربەی وڵاتانی ئەوروپا و ئەمریكا، پەكەكە خرایە لیستی رێكخراوەكانی ترۆریستی. ئەوە بەهەڵكەوت
نەبوو. ئەوەش ڕوونی دەكاتەوە، ئەوانەی سەركێشی ئەو چەمكە دەكەن ئەمریكا و وڵاتانی ئەوروپان.
هەتا ئێستاش سیاسەتی ئینگلیزەكان كاریگەری خۆی هەیە. پێكهاتەی نەتەوەی دیموكراتیك، لەپێناو گۆڕانكاری لە توركیادا خالێكی گرنگ و ستراتیژیكە.