شۆڕه‌شا لاوێن مسرێ و چه‌ند ده‌رسه‌ك
Saturday, 12/02/2011, 12:00
تشتێ کو مله‌تێ مسرێ ل ڤان رۆژا کری، هه‌تا هه‌تایێ دێ جهێ سه‌رفه‌رازی و سه‌ربلندیا وی مله‌تی بت. ئه‌ڤ شوڕه‌شا کو ئه‌و پێ رابوونه ب زێڕی دێ د به‌رپه‌ڕێن دیرۆکا وی دا ئێت نڤیسین، ئو دێ بت نموونه‌ك کو هه‌می مله‌تێن کو ژ ده‌ستێ دکتاتۆریێ دنالن، رابن و سه‌رێن دکتاتۆرا بپه‌لخینن.
لاوێن مسرێ ل رۆژا بیست و پێنجێ کانوونا دووێ، شۆڕه‌شا خۆ په‌قاند، ب هزاران گه‌نج و پیر و ژن و مێرا داڕشتن سه‌ر جه‌هدا و پێکڤه و ب ئێك ده‌نگێ بلند گۆتن: دڤێت کو سه‌رۆك و خونکاریا وی باربکن. ئه‌ڤ خه‌لك گه‌هشتن وێ باوه‌ریێ کو هه‌می ئێش و کول و ده‌ردێن وان ژ ده‌ستێ وی و خونکاریا وی یا دکتاتۆری نه.
ل به‌راهیکێ، ئه‌گه‌ر چه‌ند هزاره‌ك داکه‌تبن سه‌ر جه‌هدا، ئو به‌س ل بایته‌ختێ بن، لێ به‌لێ پاشی بوون ب سه‌دا هزارا و ب ملیونان، ئو ل گه‌له‌ك باژێرێن دی ژی غه‌ونی، پشتی کو په‌ردا ترسێ هاتیه چڕاندن، چنکی ترس په‌رده‌کا ته‌نکه و زوو ددڕت، ئه‌گه‌ر خه‌لك بگه‌هن وێ باوه‌ریێ کو دێ دڕت و ڤیانا به‌رخوه‌دانێ هه‌بن. ئه‌ڤه ل به‌راهیکێ، وه‌کو قانوونه‌کا ژیانێ، دڤێت کو هنده‌ك گوری بێن دان. مله‌تێ مسرێ گه‌هشت وێ باوه‌ریێ و خودانێ وێ ڤیانێ ژی بوو، له‌وا زوو ئه‌و په‌رده دڕاند و داکه‌ت مه‌یدانێ و نه راوه‌ستان هه‌تا كو موباره‌ك ژ سه‌ر كوسيکێ ئاڤێتن.
ئه‌ڤێ شۆڕه‌شا لاوان، چه‌ند ده‌رسه‌کێن به‌رکه‌تی ژێ تێن وه‌رگرتن.
1ـ ئێك گرتنا مله‌تی، ب هه‌می جوون و چین و بڕێن وی ڤه. ئه‌ڤه مه‌رجه‌کێ گوه‌له‌ك گرنگه ژ بۆ سه‌رکه‌تنا هه‌ر شۆڕه‌شه‌کا ملی. مه ب چاڤێن خوه دیت کا چاوا خه‌لکی ده‌ستێن هه‌ڤ گرتن و هه‌میا پێکڤه خوه وه‌کی سکره‌کێ لێ کرن و سینگێن خوه ددان تانك و ده‌بابێن رژێما گه‌نی، بێ کو ژ مرنێ بترسن، هه‌تا كو ل دوماهیکێ له‌شکه‌رێ مسرێ نه‌چار بوو کو خوه نه تاگیر بکت.
2- روهن بوونا ئارمانجێن شۆڕه‌شێ هه‌ر ل ده‌ستپێکێ و رژدبوون ل سه‌ر وان ئارمانجا. گاڤا کو ئارمانج بۆ خه‌لکی روهن بن، خه‌لك دزانت كا ژبۆ چ رابت سه‌ر خۆ و ژبۆ چ شۆڕه‌شێ دکت، چنکی گاڤا کو ئارمانج شێلی بن و خه‌لك نه‌زانن کا بۆ چ رابن سه‌ر خۆ، ئو بۆ چ خۆ بدن کوشتن، گه‌له‌ك بزه‌حمه‌ته کو رابن، ئو ناڤبڕا ترسێ دێ بت ئاسته‌نگه‌ك یان مه‌زنترین ئاسته‌نگ د رێکا رابوونا وان دا. لێ به‌لێ شۆڕه‌شا ملی ل مسرێ، هه‌ر ل ده‌ستپێکێ ئارمانجا خۆ ئاشکرا کر و چ شێلیاتی تێ دا نه‌هێلا. مه هه‌میا دیت و گوهلێ بوو کو هه‌ر ل سه‌رێ رۆژێ لاوێن وان نه‌مانا سه‌رۆکی و خونکاریا وی یا دکتاتۆر و ده‌ینانا خونکاریه‌کا دیمۆکراتی بۆ خۆ کربوون ئارمانج، ژبه‌ر ڤێ چه‌ندێ خه‌لك ده‌رکه‌تن و داڕشتن سه‌ر جه‌هـ دا.
3- رێك و پێکيا شۆڕه‌شا لاوێن مسرێ. مه د درێژیا رۆژێن شۆڕه‌شێ دا هه‌تا رۆژا موباره‌ك چوويی، مه نه‌دیت کو تشته‌کی وه‌سا کر بن کو پێڤه‌ڤانیا قانوونێ بت. چاخێ کو رژێما دکتاتۆر ئه‌ڤ ئێکه زانی، ئینا ره‌شه‌ك و زڕته‌کێن خوه هنارتن کو هنده‌ك کریارێن نه د رێ دا بکن، وه‌کی تالان کرنا دکان و هنده‌ك جهێن دی، کو ناڤێ لاوان و شۆڕه‌شا وان پێ پیس بکت، ئو ب وێ چه‌ندێ بشێت کو ده‌ربه‌کی ل شۆڕه‌شا وان بدت و پاشی ته‌ڕا به‌ڕا بکت، به‌لێ ئه‌ڤ کارێ رژیمێ زوو ئاشکرا بوو، ئو به‌ڕك ژ بن پێن وێ هات کشاندن.
5- ئه‌ڤێ شۆڕه‌شێ راستیه‌ك ده‌رێخست کو سه‌کێشیا لاوان، سه‌رکێشیه‌کا هشیار و زیره‌ك و تێگه‌هشتیه، له‌وا کارین کو هه‌می گه‌روه‌رزیێن (مناوره) رژێما دکتاتۆر تێکبدن و نه‌هێلن کو سه‌ربگرت. رژێم به‌رگه‌ڕها کو ب هنده‌ك گوهۆرینێن ناڤخۆیی و سه‌رڤه سه‌رڤه ئانکو گوهۆرینا جهێ هنده‌ك وه‌زیرا، یان كه‌نکه‌نێن دی، یان چێ کرنا ئاڤه‌ندا به‌رسه‌رۆکی (منسب نائب الرئیس)، ب مه‌به‌ستا هندێ کو لاوان پێ بخاپینت و بێ ده‌نگ بکت، به‌لێ چ ژ وان سه‌رنه‌گرت و هه‌می به‌رگه‌ڕهانێن وێ د به‌ر ئاڤێ دا چوون.
6ـ د درێژاهیا رۆژێن سه‌رهلدانێ دا، وه‌کی هاتيه دیتن کو لاوێن مسرێ بێهنا خوه فره‌هـ کرن. بڕاستی بێهن فره‌هی مه‌رجه‌کێ گه‌له‌ك گرنگه ژبۆ سه‌رکه‌تنێ، وه‌کی کورد دبێژن: " ب سه‌برێ مرۆڤ دبت میرێ مسرێ ". ژبه‌ر کو دژمنی ب گه‌روه‌رزیێن خوه، ب فند و فێلێن خوه دڤيا کو ژیێ ده‌ستهه‌لاتا خوه درێژ بکت و هه‌ر د وی وه‌ختی دا بێهنێ ل شۆڕه‌شگێڕا چك بکت و پاشی ژ سه‌رکه‌تنێ بێهیڤی ببن، لێ لاوێن مسرێ خوه راگرتن و ئارمانجا خوه بجهـ ئينا.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
