مه‌سعوود بارزانی و پێشوازی کرنا عه‌لی کیمایی
Wednesday, 21/04/2010, 12:00
خیانه‌تێن مه‌سعوود بارزانی نه ئێك و دو نه ، به‌لکو زنجیرا خیانه‌تێن وی گه‌له‌ك درێژه و ب دوماهیك نه هاتیه و هندی ساخ بت ب دوماهیك نا یێت و هه‌ر دێ درێژ بت. خیانه‌تێن وی د راستا مله‌تێ مه دا هینگێ دێ ب دوماهێك ئێن گاڤا کو مله‌ت رادبت سه‌ر خۆ و وی وه‌کی سه‌ددامی ب سێدارێ ڤه دادله‌قینن.
ل ڤێرێ من دڤێت کو به‌حسا خیانه‌ته‌ك ژ خیانه‌تێن وی بکم ، خیانه‌ته‌کا وه‌سا یه کو دنیا ژبه‌ر دهه‌ژت. ئه‌و ژی خیانه‌تا پێشوازی کرنا خودانێ ئه‌نفالا یه. ئه‌و ئه‌نفالا کو 180 هزار کورد تێ دا شه‌هید بوون. ئه‌نفالا کو باژێڕه‌کێ وه‌کی هه‌له‌بجه و دۆلا بالیسانێ و ده‌ڤه‌رێن زاخۆ و گه‌رمیانێ که‌تنه به‌ر کیمیابارانێ. ئه‌نفالا کو گۆڕستانێن ته‌ڤایی تێ دا بۆ مله‌تێ مه هاتنه چێ کرن و هه‌تا نهۆ ژ نوو تێن ڤه‌دیتن. ب هزاران زاڕۆك و ژنێن کورد ئاهـ و نال ژ ده‌ستێ ڤێ ئه‌نفالێ کێشانه.
ئاشکرا یه کو گاڤا به‌حسا ئه‌نفالێ و ڤان قوربانیێن وێ تێت کرن ، ئێکسه‌ر و بێ راوه‌ستان ناڤێ عه‌لی کیمیایی تێت سه‌ر ئه‌زمانێ مه ، ئو به‌روڤاژیا وێ ژی درسته ، ئانکو گاڤا کو ئه‌م کورد ناڤێ ڤی تاوانکاری دبهیسین ئێکسه‌ر ئه‌نفال و وێنێن کیمیابارانێ تێن به‌ر چاڤێن مه. ئه‌ڤ هه‌ردو ناڤ ، ئه‌نفال و عه‌لی کیمیایی ، بوونه پشکه‌ك ژ دیرۆکا مله‌تێ مه. ڤێجا مه‌سعوود بارزانی هاتیه و پێشوازیا ڤی کوردکوژی کریه بێ کو هیچ بهایه‌کێ بدت خوینا ڤان شه‌هیدا یان ئاهـ و نالێن ده‌یك و خوشکا ، یان زاڕێنا زاڕۆکان.
دبت کو که‌سه‌ك پسیار بکت و بێژت : ئه‌رێ بۆچی مه‌سعوود بارزانی پێشوازیا عه‌لی کیمیایی کر ؟ ژبۆ به‌رسڤدانا ڤێ پسیارێ دێ رێکێ دین که‌سه‌کێ رۆژئاڤایی کو به‌رسڤێ بدت ، چنکی ئه‌و کابرایه‌که چ هه‌ڤبه‌ندی ل گه‌ل کوردا نینه و نه دوژمنێ مه‌سعوودی یه ژی ، به‌لکی رۆژنامه‌نڤیسه‌که.
دێڤـێد مه‌کدۆل د په‌رتووکا خوه دا یا ب ناڤێ (دیرۆکا کوردا یا نووژه‌ن) ، د به‌رپه‌ڕێ 583 دا دبێژت : " بارزانی ڤیا کو تاله‌بانی ژ لایێ سیاسی ڤه بشکێنت. ڤێجا هه‌تا کو دۆستینیا خوه یا گه‌رم بۆ به‌غدا دیار بکت ، ل دوماهیکا چریا ئێکێ (یا سالا 1996 ێ) ل باره‌گه‌هێ خوه ل سه‌لاحه‌ددینی پێشوازیا موهه‌ندسێ ئه‌نفالا (علی حسن المجید) ی کر. ئو هه‌روه‌سا به‌رده‌وام خوه نێزیکی به‌غدا کر ".
ل ڤێرێ دیار دبت کو ئه‌ڤ هاتنا عه‌لی کیمیایی بۆ کوردستانێ و پێشوازی کرنا وی ژ لایێ مه‌سعوود بارزانی ڤه ل سه‌لاحه‌ددینی ، ئو ب خێرهاتن کرنا وی بۆ کوردستانێ ، پشتی هندێ بوو کو ده‌بابێن سه‌ددامێ ل هاوارا مه‌سعوود بارزانی هاتنه د هه‌ولێرێ دا ، چنکی ل ته‌باخا 1996 ێ ده‌بابێن سه‌ددامێ هه‌ولێر گرتن.
هه‌رچه‌ند هه‌تا نهۆ به‌لاڤ نه بوویه کا ڤان هه‌ردو تاوانکارا چ د کۆمبوونا خۆ دا گۆتنه و چ ئۆیین دژی مله‌تێ مه گێڕانه ، به‌لێ ئه‌ز ل وێ باوه‌ریێ مه کو رۆژه‌ك دێ ئێت ، زوو و نه دره‌نگ ، کو دێ ئاشکرا بت و کا چاوا خه‌لکێ وێنێ سه‌ددامێ دا به‌ر شمکا و ب پیا ڤه چوون سه‌ر ، وه‌سا یێ سه‌ددامێ کوردا ژی دێ ب شمکا ئێت قوتان و ب پیا ڤه چن سه‌ر.
ژ لایه‌کێ دی ڤه ، ئه‌گه‌ر ئه‌م به‌رێ به‌رێ خۆ بدین ڤێ هاتنا عه‌لی کیمیایی بۆ کوردستانێ ، دێ بینین ، ده‌مێ کو سه‌ددامی عه‌لی کیمیایی ده‌ست نیشان کریه کو ل گه‌ل مه‌سعوودی روونت خوار ، وی مه‌به‌ست ژێ هه‌بوویه. مه‌به‌ستا وی ئه‌و بوو کو بۆ مه‌سعوودی و هه‌می کوردا دیار بکت کو مه‌سعوود نه خودان دۆزه و نه خه‌مخۆرێ مله‌تیه ، به‌لکی حه‌یرانێ کورسیکا خوه یه و به‌س. ئو به‌س ئه‌و کورسیکا رزی و هه‌ژهه‌ژۆك بۆ وی بمینت ، ئه‌و به‌رهه‌ڤه کو پێشوازیا سه‌د عه‌لی کیمیاییا بکت و ده‌ستێ خوه بکت د ده‌ستێ وان دا ، ئه‌گه‌ر سه‌د ئه‌نفال ژی ب سه‌رێ کوردا ئینابن.
بێ گومان رێدان بۆ عه‌لی کیمیایی بۆ کوردستانێ ب خۆ تاوانه‌کا گه‌له‌ك مه‌زنه ، ئو پێشوازی کرنا وی تاوانه‌کا هێژ مه‌زنتره د راستا مله‌تێ مه و هه‌می قوربانیێن ئه‌نفالا دا. کی هه‌یه کو بشێت پێشوازیا تاوانکاره‌کێ هۆسا بکت و ده‌ستێ خوه بکت د ده‌ستێ وی دا ، ئه‌گه‌ر نه که‌سه‌کێ ژ وی تاوانکارتر بت ؟ پێشوازی کرنا ڤی کوردکوژی تاوان و خیانه‌ته‌کا وه‌سا یه کو کوور و کوور د هزرا مله‌تێ مه دا دێ ئێت نڤیسین و نایێت ژبیر کرن.
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
