نامەیەكی كراوە بۆ بەڕێز (شوان ئەحمەد)

Wednesday, 07/07/2010, 12:00

برای بەڕێز ....
سڵاوی من..
سڵاوی وشە...
سڵاوی ئەو كوردەی شیاوی ئەوەی هەیە پێی بوترێ مرۆڤ ... بۆ تۆ .. بۆ جورئەتی تۆ ... بۆ بوێریی قەڵەمی تۆ....
هەر چەند من و تۆ یەكتر ناناسین و سەرو كارمان لەگەڵ یەكدا نییە بەڵام لە دنیای نووسین و شتی وادا پێم وا نییە لەگەڵ یەكتردا جارێك لە جاران (قرچ)ێكمان نەكرد بێت، لە حاڵێكی ئەوتۆدا ئەگەر یەكتریش نەناسین شتێكی ئاسایییە چونكە من و تۆ دوو تەمەن و دوو نەوەی جیاوازین، ئێمە نەوەی پەنجاكانی سەدەی بیستەمین و لەگەڵ ڕۆژگار و ئێش و ئازار و مەرگەساتەكانی ڕابردووی نیشتماندا پیر بووین و بووینە سەرو ڕیش سپیانی وڵات، ئێوەش نەوەی ڕۆژگاری دەماودەمی (ڕاپەڕین)ی گوماناویی 1991و دواترن، هێشتا هەرەتی لاویی و جوانیتانە. نەوەی ئێمە بە نەوەی سووتەمەنی ئەو سەردەمە (زۆڵەكانە) دەناسرێت بە ناوی شۆڕشێكی (قۆڕ)ی بێ مانا و دواتر بێ ئەنجام، كە ئێوە بەروبوومەكەی بە دەستی خەڵكانی سووك و ڕیسواوە ئەبینن... لەبەرئەوە هەرچی جوانیی و هەرەكەت و بەرەكەت و سەروسامانی ئەو نەوەیە هەبوو لەو بەناو شۆڕشەدا (لووش) درا و كرایە قوربانی مشتێك دەعبای نا مرۆڤ و درۆباز و نابووتی ئەم كۆمەڵگایە و ئاو بێنەو دەست بشۆ.... نەوەی ئێوەش نەوەی لە دایك بووی ناو شەڕ و شۆڕەو بە كاڵفامیی و بێ ئاگا لە ڕاستییەكانی كۆن و نوێی ئەم گەلە و لە سێبەری دەسەڵاتی پڕ گومانی (پیاوە درۆینە)كانی ناو هەراو هوریای (ڕاپەڕین)دا گەورە بوون و چاوتان كردەوە و بە قسە بریقەدارەكانی چ هی ئەوان و چ هی دەرەوەی ئەوان تەفرە دران و سەر لە نوێ ئێوەش كرانە قوربانی هەمان كارەساتی دڵتەزێن كە بەسەر ئێمەدا هات، ئێمە بە ناوی فریاگوزارانی كۆمەڵگاو ڕزگاریخوازی لە ژێر دەستی و چەوسانەوە فریودراینو ئێوەش بە ناوی مەعریفە و مەعریفەبازیی و دژە دەسەڵات و شتی واوە تەفرە دران، تەنها جیاوازی ئێمە و ئێوە لەوەدایە ئێمە نەوەیەكی یاخیی و سەركێش و خۆنەویست بووین و كۆشتەی دەستی ئەو جەلادانەین كە بۆسەی خیانەت و غەدریان بۆ ئەناینەوە بەڵام نەوەی ئێوە نەوەیەكی كاڵفام و نە شارەز او خۆ بە شت زانی بوون و كۆژراوی دەستی غرورو نەشارەزایی خۆتان بوون بە قازانجی خەڵكی فێڵباز و دووفاق، بۆیە ئەبێ بزانیت لەگەڵ ئەوەی ناسیاوی یەكتریش نین بەڵام من (شوانە) بە پێی نووسین و وەرگێڕانەكانی ئەناسم و ئەزانم كێیە و كێ نییە، پێم خۆشە تۆ كە یەكەمین كەس بوویت لەو (نەوە لێ قەوماوە)دا سەری ئاگا بونت بەرزكردووەتەوە و دەستی جورئەت و پەنجەی هەڕەشە ڕائەوەشێنی و لەقە بە پشتی درۆ و خەساویدا ئەكێشیت و پڕ بە دنیا هاوار ئەكەیت و ئەڵێی: (پێویستە هەستین و سەردەمی (بت پەرستی) ڕیسوا كەین و (بت و بتەوان) وردو خاش كەین). ئەم جوانی یە لە گەنجێتی تۆدا، ئەم جورئەت و بوێرییە لە هەستانەوەی تۆدا، ئەم ڕاستگۆیییە لە (هەق) نووسینەوەی تۆدا، هانی دام دەستی دۆستایەتیت بۆ درێژ بكەم و بڵێم دڵنیا بە: (تەنیا نیت)، هەر ئەو بە خەمەوە هاتنەش بوو بە مایەی نووسینی ئەم نامە كراوەیە بۆ ئەوەی هەندێ قسە و باسی پێویستی تێدا باس بكەم تا بزانیت تۆ تەنیا نیت، هەم تێشبگەیت لەوەی تۆ دیوارێكی بە بێدەنگی هەڵچنراوت هەرەس پێ هێناو خەڵكێكی زۆرت هوشیار كردەوە تا هیچ نەبێ دەوروپشتی خۆیان بخوێننەوە و بە ئاشكرا لە شتەكان بگەن، هەر لەبەرئەوە من شەخسی خۆم پشت و پشتیوانتم تا پێكەوە بتەشكاوەكان ئەشكێنینەوە و ڕۆژگاری (بت پەرستی) ڕیسوا ئەبێت...
برا جوانەكەم... (دە ساڵ) لەمەوبەر من لە وەڵامی شەخسی (مام جەلال)دا سەبارەت بە (بت)ێك كە ناوی (شێركۆ بێكەس)ە هاتمە قسە و زۆر نهێنی ئەو بتە شكاوەم بۆ خەڵكی ڕوونكردەوە چونكە لە محازەرەیەكی (ئەو)دا بە ناوی (دەبێ ڕۆژنامە و ڕۆژنامە نووسی بەم شێوەیە بن) و دواتر لە ژمارە (1930)ی (كوردستانی نوێ)شدا بڵاوكرایەوە ئەوەهای ئەوت:
(هەموو كەس ناتوانێت ببێتە نووسەر، بۆ نموونە هەموو كەس ناتوانێت ببێت بە شاعیر..... بەڵام بۆ نموونە كاك شێركۆ ئیبداع دەكات... شیعر دەنوسێ شتێكیش كە گرنگە حەز ئەكەم پێتان بڵێم كە زۆر گرنگە بۆ ئەوەی ببیت بە نووسەر، نووسەرێكی ناودار ئەمەیە كە دەبێت هەڵوێستت هەبێت، ئەگەر هەڵوێستت نەبێت هەر ئەوە نییە بنووسیت شتەكە بێ تام دەردەچێت، لەم ڕۆژانەدا یەكێك لە منی پرسی وتی بۆچی شێركۆ بێكەست پێ شاعیری یەكەمە و (لەت ........) پێ شاعیری یەكەم نییە ....... جارێ من (لەت ......) پێش شێركۆ بێكەس دەناسم و ئەو كاتەی كە ئەوم دەناسی و دۆست بووین شێركۆ بێكەسم خۆش نەدەویست و ئەو (كاژیك) و شتی وا بوو... هۆیەكە چییە، بۆ نموونە وەرە تۆ تەماشای سەرەتاكانیان بكە هەردووكیان شتی زۆر سەیریان ئیبداع كردووە، بەڵام شێركۆ لە دوو سێ شت پێشكەوتووە، یەكەم شێركۆ هەرهەڵوێستی هەبوو لەسەر هەموو ڕووداوێك هەڵوێستی گرت، لەسەر ئاشبەتاڵ هەڵوێستی گرت، لەسەر شۆڕش هەڵگیرسانەوە هەڵوێستی گرت، لەسەر پێشمەرگە، لەسەر گفتوگۆ لەگەڵ حكومەت هەڵوێستی گرت، لەسەر هەڵبژاردن هەڵوێستی گرت، هەڵوێست ئینسان دەردەخات بە چاك بە خراپ، هەڵوێستەكەت خراپ بوو خەڵك دژت دەبێت هەڵوێستەكەشت باش بوو، خەڵك پشتیوانیت لێ دەكات... ئەگەر ... بێ بار بوو هیچ نییە)، جا لە ساڵى دوو هەزاردا من بە نامیلكەیەك بە ناوی (بەسەرهاتی شاعیرێكی چەواشە) كە (بە خۆڕایی و دەستاو دەست بوو زیاتر لە چەند هەزار دانەیەكم بڵاوكردەوە) لەسەر ئەو قسانەم نووسیو بڵاوم كردەوە و بڕیارمدا وەك زنجیرەیەكی درێژ لەسەری بڕۆم كە بە دوایدا (پاشكۆی یەكەم)یشم بڵاو كردەوە و لەوەو بەدوا ئەو ئیمكانیەتەم نەما لەسەری بڕۆم بەڵام ئەمە یەكێكە لەو پڕۆژانەی كە هەرگیز دەستبەرداری نابم و بە پێ ی (ئیمكان) لەسەر ئەو بڵاوكردنەوەیە ئەڕۆم، لێرەدا مەبەستم خۆ هەڵكێشان نییە بەڵكو مەبەستم هەندێك شتە كە لە چاو هی ئەو كاتەدا جیاوازە ئەویش ئەوەیە:

1/ دە ساڵ لەمەوبەر ئەو شتانەی ئێستا هەن، نەبوون وەك گۆڤار و ڕۆژنامەی زۆرو زەبەند،.
2/ دە ساڵ لەمەوبەر بڵاوبوونەوەی كۆمپیوتەر و فێربوونی لە لایەن خەڵكەوە نەبوو كە وەك ئاو خواردنەوەی لێهاتووە.
3/ دە ساڵ لەمەوبەر پەیدابوونی (ئینتەرنێت) و سەدان سایت و ماڵپەڕى كوردی نەبوو... ئەمانە ئەوسا نەبوون، ئێستا هەموو شت هەیە و كەس ناتوانێت ڕێگریت لێ بكات، ئێرە نا ئەوێ...هتد، دوای ئەم دەستپێكە جا دێمە سەر ئەو شتانەی ئەمەوێ لەم نامەیەدا قسەی لەسەر بكەم، چاك وایە بەم شێوەیە لە سێ خاڵدا كۆی بكەمەوە:

1/ لە دنیای نووسین بە تایبەتیی و هونەر بە گشتی بۆ هەموو جۆرە كەسێكی ئەو بوارانە پێویستە دوو بنەما هەبێت یەكێك لەم بنەمانە پێ ی ئەوترێ (داهێنان) و ئەوی تر پێی ئەوترێ (هەڵوێست) زۆر كەمن ئەوانەی ئەیانەوێ خاوەنی هەڵوێست بن لە ژیانی ڕۆژانەو گشتی خۆیاندا چونكە هەڵوێست مانای ڕاستەقینەی ژیانی ئەدەبی یا هونەری ئەو كەسە دەرئەخات كە بەهای شەخسی چەندەو چەند ئەهێنێ.
نووسەر یا شاعیر یا هونەرمەند یان بە گشتی بەرهەمی بێ هەڵوێست وەك گوڵى جوانی بێ بۆن وایە چونكە جوانی گوڵی سروشتی بە بۆن و بەرامەیە و بەهای هەیە گەر وا نەبێت لەگەڵ گوڵێكی باغەیی دا جیاوازی نابێت، لە تەواویی ژیاندا هەڵوێست مانا بە بوونی مرۆڤەكان ئەدات و مرۆڤەكانیش بە هەڵوێستەوە هەم جوانن و هەم زیندوون. با دوور نەڕۆین و سەرنجی ئەو نموونەیەی پێشتر هێنامەوە بدەین .... ئەوەتە (مام جەلال) خۆی ئەڵێ: (ئەو كاتەی كە ئەوم دەناسی و (واتە لەت .....) دۆست بووین شێركۆ بێكەسم خۆش نەدەویست و ئەو (كاژیك) و شتی وا بوو) حەز ئەكەم ئەوەش بزانی (مام جەلال) ئەو كاتە لەسەر شیعرێك كە بۆ سلێمانی نووسرا بوو لە (بەكرەجۆ) هات (شێركۆ)ی گرت و بە هەزاران تكای ئەم و ئەو و نامەی (برایم ئەحمەد) جا بەرەڵای كرد، بەڵام لە ڕۆژگاری ئەمڕۆدا (مام جەلال) خۆی ئەڵێ: (شێركۆ بێكەس)م پێ شاعیری یەكەمە.... چونكە (شێركۆ) ئێستا پیاوی (یەكێتی نیشتمانی)یە و هەڵوێستی لەسەر ئەو شتانە هەیە كە (مام جەلال) لای گرنگە و (یەكێتی) تیا دەرئەكەوێ ئەگەر بە پێودانگی مانای شیعریش لە (ئەوسای شێركۆ) و لە (ئێستای شێركۆی یەكێتی) بڕوانین: نییە نەڵێ (شێركۆ) (ئەوسا) شاعیرتر نەبووە لە ئێستای كەچی ئەوان ئێستای پەسەند ئەكەن و پلەی گەورەیی شاعیریەتی بۆ دائەنێن، جا مەرگە ساتەكەی (شێركۆ) لێرەدایە ئەگەر ڕۆژێك ڕوو لە (یەكێتی)وەرگێڕێت بۆ خۆی ئەمرێت و ئەبڕێتەوە و ئیتر گەورەیی بۆ ئەو فلسێك ناكات و نەفرەتی مێژوو ونی ئەكات، بەڵێ ئەمە مانای هەڵوێستە، جا مرۆڤی بێ هەڵوێست وەك (شێركۆ)ی بەسەر دێت، ئەگەر لێرەوە بگەڕێینەوە سەر شەخسی تۆ وەك (شوانە) ئەبینین بەو هەڵوێست وەرگرتنەت ئێستا (شوانە)یەكی تریت هەموو شتەكان لە بەرامبەرت گۆڕان ئەوانەی جاران وەك دۆست و ناسیاو ئەتناسین ئێستا دەمیان لێكردوویتەوە ئەوانەی جاران نەتناسیوون ئێستا ئەبنە ناسیاوت، خەڵك دەماو دەم باست ئەكات، تۆش لە نێوان ئەم ململانێیەدا وردە وردە لە (بەرەی ناو دەسەڵاتەوە) دێتە خوارەوە بۆ ناو (بەرەی گەل) ئەو گەلەی دەسەڵات و نووسەرو شاعیرەكانی دەسەڵات پێ ی ئەڵێن (مێگەل)، كاتێك لەوێدا جێت گرت و لەسەر پێی خۆت وەستایتەوە ئەبینی ئەژدیهای دەسەڵات چڕنووك و شاڵاوت بۆ ئەبات و هەڕەشەی مردنت لێ ئەكات و دەستو پێوەندەكانی هان ئەدات بەرد بارانت بكەن، ئێستا تۆ لەو حاڵەتەدایت و لەو شەڕە سەرسووڕهێنەرەدا ئەژیت و هەست ئەكەیت پێویستیت بە هێز و پشتیوانی ناو ئەو بەرە تازەیە هەیە كە بۆی هاتوویت و بەرگری لێوە ئەكەیت، لەوێدا هەست ئەكەیت هەڵوێستی ژیان وەرگرتن چەند قورس و گران و سەختە و پێویستی بە (باجدان) و خۆجیڕكردنەوە هەیە بەڵام لە ناختەوە بەوە دڵخۆشیت كە لەشكرێكی گەورەی خەڵكت لە پشتە و هێز و تینت ئەداتێ و بەردەوام تیژت ئەكاتەوە.
لەسەر ئەو هەڵوێست وەرگرتنەت ئیتر لەمەودوا تۆ وەك (شوانە) ڕووبەڕووی ململانێیەكی نوێ ئەبیتەوە، ململانێی ڕاستەقینەی ژیان، ململانێی نێوان پاك و پیس، درۆزن و راستگۆ، داوێنپیس و داوێنپاك، خۆپەرست و خۆنەویست، هەق و ناهەق، زۆردار و زۆر لێكراو، راستیی و ناراستی، وڵات فرۆش و وڵات پارێز،....... هتد، ئەمەش هێز و توانای بەرەنگاربوونەوەی ئەوێت جا لێرەدا كۆڵ ئەدەی یا كۆڵ نادەیت بەخۆتە، لەسەر قەناعەت و بڕوای خۆت وەستاوە، بەڵام لەو ململانێیەدا ژیانێكی بێ وەهم ئەبینی، ژیانێكی سادە و ساكاری ناو ململانێیەكی بەردەوام تا ئەوپەڕی سنوور، ڕووناكی وەك خۆی ئەبینی، تاریكی وەك خۆی هەست پێ ئەكەیت، ژیانێك تا بڵێی ئاسان و بێ قەرەباڵغی كردنی مادەی هۆشبەر و بادەی خۆ سڕكردن و خۆ گیژ كردن و خۆ مەست كردن، ژیانێكی ڕوون و ڕەوانی پێكهاتوو لەسەر ململانێ ی نێوان چاكە و خراپە، نەخۆش و ساغ، هەقو ناهەق، دز و دەستپاك، چەوساوە و چەوسێنەر، داگیركەر و داگیركراو......هتد، تۆ لەو نێوەدا لایەنگری بەلایەك و كاری تیا ئەكەیت و ڕەنجی تیا ئەدەیت. ئا لەبەر ئەمانەیە هەڵوێست مرۆڤ دروست ئەكات و فێری تێگەیشتنی ژیانی ئەكات و بە ئاگای ئەهێنێتەوە و دواجاریش ئەبێتە مەترسی بۆ سەر بەرامبەرەكەی كە بە دوایدا شەڕی مان و نەمان لەوێوە دەست پێ ئەكات.
2/ یەكێك لەو كەسانەی بووە بە تەوەری سەرەكی باسەكەی تۆ (شێركۆ بێكەس)ی شاعیری گەورەی (یەكێتی نیشتمانی)یە ئەگەر (شێركۆ) بە ناوی شیعر و شاعیر و قەڵەمەوە نەبوایە و تەنها كەسێكی كۆمەڵایەتی و بەرپرسێكی حیزبی بووایە من بە لامەوە ئاسایی بوو چونكە (دەسەڵاتی حیزبایەتی كورد) ماوەی (18-19) ساڵە ئەو كۆمەڵگایە فێری ئەوە ئەكات دز بن، درۆزن بن، وڵاتفرۆش بن، تەنانەت خۆ فرۆشیش بن، دیارە زۆرو كەم ئەو خواستەی دەسەڵاتی حیزبایەتی كورد كاری خۆی كردووەتە سەر ئەو كۆمەڵگایە، ئێستا كۆمەڵگاكە گەندەڵ بووە و گەندەڵى تاسەر ئیسقانی چووە و ئەتوانم بڵێم زۆرینەی خەڵكەكان تا بینە قاقایان بە گەندەڵیدا ڕۆچووە.... بەڵام لەبەرئەوەی (شێركۆ) بە ناوی شیعر و شاعیر و قەڵەمەوە لە مەیدانەكەدایە مرۆڤ گوناحی ئەگات قسەی لەسەر نەكات و باسی نەكات، چونكە (شێركۆ) ڕابردوویەكی دوور و درێژى هەم پەتپەتێنی حیزبایەتی كوردی هەیە و هەم كێشەیەكی ئاژاوەی دنیای شیعرە و ئەمڕۆش بە بكوژی ئەدەب و ڕۆشنبیری كوردیش حساب ئەكرێ بمانەوێ و نەمانەوێ، باسكردنی خۆی ئەسەپێنێ و ناچاریت لەسەری بێیتە قسە و باسی بكەیت، ئەمەش شتی شەخسی نییە و هەقێكی ئاسایی كۆمەڵایەتی كوردە بەسەر (شێركۆ)وە هەیە و خۆی ئەو وەزعەی خولقاندووە و پێویستە بۆ بەرگری كردن لە شیعر و شاعیر و قەڵەم ڕووبەڕووی وەها مۆتەكەیەكی بەزۆر سەپاو یا سەپێنراو ببیتەوە.
حەز ئەكەم شتێكی بچووكت بۆ باس بكەم بۆ ئەوەی بزانی هیچ نەبێ (شێركۆ) لە كوێوە بۆ كوێ هاتووە، دوای ئاشبەتاڵى (1975)، ئەو لە سەر (تینوویەتی بەگڕ ئەشكێ) و بەهۆی خۆگیف كردنەوەكانی ڕابردوویەوە دووچاری وەزعێك ببوو خەریك بوو لە ترسا زیڕەی ئەكرد چونكە وەزیفەكەی نەقڵى نزیك (بەغدا) كرابوو، پاشان چۆن گەڕێنرایەوە بۆ سلێمانی؟ ئەوە نهێنییەكەی لە فایلەكانی (ئەمنی عامەی بەغدادایە كە بە داخەوە ڕەنگە ئێستا ئەو فایلە دەست (حیزبی دەعوا) كەوتبێت، بەڵام لەو هاتنەوەیەدا (شێركۆ) لە لایەن ڕۆشنبیران و نووسەران و شاعیرانەوە بە قێزەوە ناوی ئەبرا تەنانەت لە نامەیەكدا كە ئەوسا بۆ سەرنووسەری ڕۆژنامەی (هاوكاری) نووسیووە بۆ خۆشی ئاماژەى بەو وەزعەی كردووە و زۆر بە بێتاقەتی باسی خۆی ئەكات و ئەڵێ: (وا چەند ڕۆژێكە هاتووینەتەوە سلێمانی، بەڵام ئەوەندەی لەم دوو ڕۆژەدا، زوخاوی بێ ڕەوشتیان كردووە بە دڵما، بڕوا بكە، بە درێژایی ئەو چەند مانگە و لە دەربەدەریدا نەم چەشتووە هەر چۆنێك بێ دنیای بێ ڕەوشتی یەقی داوەتەوە..
كاكە گیان: خۆت (شێركۆ) ئەناسی، كە چەند وەسواس و دوو دڵ و شپرزەیە، جا هەر لەبەرئەوە ئەو شیعرەی دامیتێ جارێ لای خۆت هەڵى بگرەو با بڵاو نەبێتەوە... ڕەنگە بپرسی بۆ، بۆ؟ منیش ئەڵێم هەر بۆ؟.. مەیدانی ئەدەب، گواوی بووە پاڵەوانیەتیم پێ ئەفرۆشن، ڕەوشتم پێ ئەفرۆشن... كاكە ... وازبێنە .. نازانی چی لە دڵمایە...)،
هەروەها لە نامەیەكی تریدا هەر بۆ هەمان كەس و شوێن (شێركۆ) باس لە دوو شتی تر ئەكات كە ئەمەیە:
(حەز ئەكەم ئەوانی ترت لەبیر نەچێتەوە، مەسەلەی ناردنی نقو دەكان و سەرپەرشتی ئەو شیعرەی لە (بەیان)دا بڵاو ئەبێتەوە ئەگەر بڵاو بۆوە)، ئەویش:
1/ (مەسەلەی ناردنی نقوو دەكان) واتە موكافەئەكانی (هاوكاری) كە یەكێك بوو لەو شتانەی (شێركۆ)ی لەسەر ئەژیا، جا (ئەو)ێك لە وەها (نەبوونی) یەكەوە هاتبێتە سەر خەزێنەیەكی (وا مفت) لەو زیاتر چاوەڕوانی چی لێ ئەكەیت كە تۆ و (دیوانی چاودێری دارایی) باسی لێكردووە.
2/ (سەرپەرشتی ئەو شیعرەی لە (بەیان)دا بڵاو ئەبێتەوە ئەگەر بڵاو بۆوە)، وشەى (ئەگەر بڵاو بۆوە) ئەوپەڕى زەلیلی و بێ دەسەڵاتی و چاوەڕوانكردنی دەستی ئەم و ئەو ئەگەیەنێت كەسێك وەها بۆ شیعر بڵاو كردنەوەیەك بپاڕێتەوە ئێستا كە حیزبەكەی دەزگایەكی چاپەمەنی نابێتە بەر دەست لەوە زیاتر چاوەڕوانی چی لێ ئەكەیت؟

براكەم .... ئەوانەی تۆ لەسەر (شێركۆ)ت بڵاو كردووەتەوە وەك ئێمە ئەیزانین ڕەنگە (دڵۆپ بە دەریا) بێت.
من شەخسی خۆم قێزم لە شیعر و لە شاعیرایەتی و لە قەڵەم دێتەوە ئەگەر وەها بێت، بەڵام شاعیران و نووسەرانی (زووی ئێمە) هەموو (لە برسا مردوو بوون) هەر بۆ ئەوەی لەگەڵ شعوری خۆیان درۆ نەكەن، هەر بۆ ئەوەی پەنجەی خراپیان بۆ درێژ نەكەن، هەر بۆ ئەوەی خەڵك حورمەتی خۆیان و شیعریان بگرێت، هەر بۆ ئەوەی بە حورمەتەوە ناویان بهێنرێت بۆ نموونە (پیرەمێردی نەمر) كە مرد تەنها یەك دینار و ڕووبعێكی لە دوا بەجێ ماوە، من چی لە شیعرێك بكەم كە خاوەنەكەی (كاسبی) پێوە بكات، خاوەنەكەی هەرچی خراپ و خراپە هەیە بیكات هەر بۆ ئەوەی بە دڵى خۆی بژی، بە ئارەزووی خۆی درۆ بنووسێت و بە كەیفی خۆی شەن و كەو بە شیعر و ڕۆشنبیری نەتەوەیەكی داگیركراو و ژێر دەستە بكات، ئێمە هەقێكی نەتەوەیی بوون و كورد بوون و كۆمەڵایەتی بوون و هاوڵاتی بوونی خۆمانە ئەگەر لەسەر شەخسی (شێركۆ) قسە بكەین چونكە ئەو سنووری شەخسی خۆی بەزاندووەو (تەعدا) لە كەسایەتی كوردبوونی ئێمە و نەتەوەیی بوونی ئێمە ئەكات و ئەیەوێ بە زەبری دەسەڵات ئێمە بێ دەنگ بكات، بە زەبری ئەو دەسەڵاتەی كەلەسەر ئێسك و پروسك و ماندوو بوون و ڕەنجی فەرهادانەی خەڵكی تر سەری جوقاوە و (شێركۆ)ش لە كاتی (ناپێویست)دا وەك (مفتە خۆر)ێك خۆی خزاندووەتە ناویەوە و تیایدا بووە بە كەڵەگای گەندەڵى.
3/ لەگەڵ ئەو نووسینەی تۆدا هەفتەنامەی (ئاوێنە)ش سنوورێكی دەقگرتوی شكاند كە كاتی خۆی (هاوڵاتی) لەگەڵ خۆی وەك مۆد هێنابووی ئەویش: (هەست وروژاندنی خەڵكی ئاسایی بەرامبەر ڕووداوە بچووك و كەم بەهاكان و سەركووتانەوەی هەر بە تەنهای كارمەندی بچووك و مەسئولی بچووكو شتی وا) بوو بەو سنوور شكاندنە (ئاوێنە) خەریك بوو بەرەو دنیای بەرینی خەڵكی و كردنەوەی دەرگای ڕاستی بەسەر ڕووداوە گەورەو بچووكەكاندا هەنگاو هەڵگرێت، كەچی بە فەرمانی دوو ڕوونكردنەوەی (گوایە جیاواز) ئاوێنە پاشەكشەی كرد و سڵەمیەوە و نەیویست خۆی بكاتە ئاوێنەی دەنگی خەڵكی.... ئەوەی سەیر بوو ڕوونكردنەوەی یەكەم لە لایەن (سێ برا)وە بوو كە هەڕەشەی سزادانی ئاوێنە و تانەدان لەسەر نووسەرەكەی تیادا كرابوو بەوەی گوایە داب و نەریتی ڕۆژنامەگەری بەزاندووە، بە بڕوای من ئەو ڕوونكردنەوەیە بەڵگەی نهێنی ئەو (سێ برا)یەی خستە ڕوو كە بۆ چ ترسیان لەو سنوور شكاندنە هەیە ... ڕوونكردنەوەكەی تر هی (سكرتاریەتی یەكێتی) بوو كە سەرجەم قسە و هەڕەشەكانی پێچەوانەی ئەو دانیشتنەی شەخسی (مام جەلال) بوو كە یەك دوو مانگ لەوە و بەر لەگەڵ ڕۆژنامەنووسو شتی وادا كردبووی و بە دوورو درێژی باسی لە بارەی (شێركۆ) وە كرد بوو، ئەم پاشگەز بوونەوەیە بۆ (یەكێتی) عەیبەیەكی ئەمەندە گەورە و گرانە كە لە باسكردن نایەت و ئەوەش دەر ئەخات (شێركۆ) بە جۆرێك پەیوەستە بە (یەكێتی) كە هەر جوڵەیەكی ئەو دیواری ماڵى (یەكێتی) وێران ئەكات.... بەڵام دنیای ئێستا ئەو دەرگا داخراوە نییە، که‌ كلیلەكەی تەنها لای (یەكێتی) و دەست و پێوەندەكانی بێت و بە هیچ كەس نەكرێتەوە، بەڵكو ئەو دنیا گەورە و گرانە ئێستا بە دەستی دەسەڵاتی عەولەمەوە گەمەی پێ ئەكرێت و بوون و نەبوونی هەموو شتێك لە ئان و ساتدایە و هیچ شتێك (نهێنی و نەمر) نییە، چۆن تیشكی خۆر بە هێڵەك ناگیرێت، دەسەڵاتی (مالۆسانە)ی عەولەمەش وەهایە و هیچ هێزێك ناتوانێت بەری پێ بگرێت، بۆیە ئەو پاشگەز بوونەوەیەی (یەكێتی) لەم دنیای گۆڕانە خێرایەدا تەنها بە زیانی خۆی ئەبێ و بە قازانجی تۆی (شوانە) و ئەو ڕاستیانەی (دیوانی چاودێری دارایی) دەری خستبوون تەواو ئەبێ...
هەموو دیمان دەسەڵاتی زەبرو زەنگی (بەعس) و (سەدامی) كە ڕۆژگاریان تەواو بوو چی بەسەرهات، هەموو دیمان دەسەڵاتی زەبەلاحی ئەمڕۆی ئەمەریكی هەر لە ئێستاوە لە سنووری ئەو (تاكە پێڵاوە)دا دیاری كراوە كە لاوێكی بە جەرگی عێراقی گرتیە (جۆرج بۆشی) و پێ ی وت.. (بڕۆ ملت بشكێنە) ئەمڕۆ گۆڕان (مەبەستم یاسای گۆڕان خۆیەتی نەك شتی تر) لافاوێكی بێ بەزەیی گەورەیە هەموو هێز و توانایەك بە گەورە و بچووكەوە لەگەڵ خۆیدا ڕائەماڵێت و ئیتر هیچ شتێك (نهێنی و نەمر) نییە و نامێنێ، هەموو شتێك لەو سنوورەدایە كە ئەڵێ ئەمرۆ تا سبەینێ، (ئاوێنە) هەڵەی كرد ڕوونكردنەوەكەی تۆی ناچار كرد بگاتە دنیای زەبەلاحی ئینتەرنێت و بە ترسەوە پاشەكشێ ی كرد چونكە دنیا ئەو دنیا داخراوەی جاران نییە كە بیانەوێ كێ بگرن و كێ بكوژن و خۆیان هەموو شت بن بە پێچەوانەوە ئێستا ئەوان ئەوەندە بچووك و بێ توانان لە هەموو دەنگ و هاوارێك ئەترسن و لە هەموو جووڵەیەكیش ئەتۆقن لەبەرئەوەی ئەوان لەسەر ڕەنجی فەرهادانەی خەڵكی تر ئەم دەسەڵاتەیان بۆ خۆیان دابین كردووە و هەموو شتێكیان بە زەبری پارە و پول ڕاگرتووە، لەسەرتاسەری ئەو دەسەڵاتەدا یەك گیانلەبەری تێدا نییە ناوی مرۆڤ بێت و شانی بیروباوەڕى بەر (دەسەڵات)دا بێت بەڵكو هەموو شوێنێكی ئەو دەسەڵاتە لەسەر حسابی (كرێ)یە و (كرێ گرتەیی) ئەیبات بەڕێوە.
زۆرم پێ ناخۆش بوو كە لە (كوردستان پۆست)دا وتبووت: (لێرە بە دواوە هەر هەڕەشەو دەست درێژییەك بكرێتە سەر ژیانی خۆم و كەسوكارم شێركۆو...و... لێی بەرپرسن) چونكە ئەوەی لەمەوبەدوا بە تۆ ئەوترێ لە دنیای (شەڕى دەروونی)یەوە سەرچاوە ئەگرێ و لە فشە زیاتر نییە، من دڵنیام ئەوانە هیچیان ئەوە نین تا تۆ وەها بترسیت بەڵكو تۆ لەمەوبەدواوە لەو جۆرە داوە بترسە كە زووتر (حەمە ڕەنجاو)ی تێكەوت و زۆرتر شتێكی وەها چاوەڕوانی تۆ ئەكات تا (اغتیال) كردن و شتی وا ئەوەش كە لەم لاو لەولا بە كوشتنی ئەم و ئەو تەواو ئەبێ وەك هی ئەوەی تۆ نییە، چونكە تۆ وەزعێكت ڕوونكردووەتەوە كە پێش تۆ (دیوانی چاودێری دارایی) كە دامەزراوەیەكی ڕەسمی حیزبی و دەوڵەتی خۆیانە بڵاوی كردووەتەوە، ئەوان لەو پاشگەز بوونەوەیەدا ئا ئەو دامەزراوە ڕەسمییەی خۆشیان ناشیرین كرد.
(یەكێتی) عادەتی وابووە هەمیشە هەڵەی بە هەڵە پینە كردووە و دواییش بەسەر خۆیدا شكاوەتەوە... ترس لە (مەزەبتا) نەبێ و هەوڵ بدە خۆت ڕونتر بكەیتەوە و بە بۆچوونەكانی خۆتدا بچیتەوە، ئەوەی دوێنێ بە پیرۆزت ئەبینی خۆت دیت تەنها وەهم بوو پیرۆزی لەناو خەڵكدایە، لەناو ئەوانەدایە كە بەردی بناغەی ئەم كۆمەڵگا و نەتەوەیەن، لە قەڵەم و قسەی قەبە و خەیاڵاتی نووسەری درۆنووس و تۆسیرام خۆر و بەنگكێش و شتی وادا نییە لەو ڕاستییە دایە كە پێ ی ئەوترێ: خەڵكی لێ قەوماو، خەڵكی ڕەنج براو، خەڵكی ماف دزراو، خەڵكی چاو بەستراو..... ئەوانەش بە بڕوای من ئەم دەسەڵاتە لێرەو لەوێ كوشتوونی تەنها یەك كەسیان تاوانێكی گەورە بوو ئەویش (بەكر عەلی) بوو چونكە من شایەتم (بەكر) لەسەر هەژاری و نەبوونی كوژراو لەسەر هیچی تر نەبوو، ئەو شەهیدی ڕێگەی هەژاری و نەبوونییە....
جارێكی تریش پیرۆز باییت لێ ئەكە مو ئەڵێم مەترسە و ترس لە (مەزەبتا) نەبێ چاكە چونكە تۆ ڕاستیی و لەسەر ڕاستی هاتوویتە قسە ئەوە ئەوانن لە خۆیان، لە سامانە دزراوەكانیان، لە دەسەڵاتە شلۆقەكەیان ئەترسن، ئەوان ئەو هەموو شتە لە دەست ئەدەن لەبەر ئەوە ئەترسن، بەڵام تۆ هیچت نییە لە دەستی بدەیت تا بترسیت ....
ئیتر چاوت ماچ ئەكەم و سەرفراز بیت و ڕێگەیەك گرتووتە بەری مەدەو بەردەوام بەو دڵنیابە لەوەی كە تۆ سەركەوتوویت.

سەرنج: ئەم نامەیەم نارد بۆ هەفتەنامەی ئاوێنە ووتیان بە داخەوە ئەو مەلەفەمان داخست! بەڵام وا لێرەوە بڵاوی ئەكەمەوە، تا خوێنەر ئاگاداریی هەموو ڕوویەكی كێشەكە بێت.

 بو بینینی دوو به‌ڵگه‌، کلیکی نامه‌کانی شێرکۆ بێکه‌س بکه‌

 دوو نامه‌ی شێرکۆ بێکه‌س