(بەختیار عەلى) شپرزەى كامە باوكێتى، (ئەمیتر) یا (ئەویتر)؟ بەشى پێنجه‌م

Wednesday, 01/05/2013, 12:00

خوێنەری بەڕێز ... كێشە و ماناو قورسایی ئەم نووسینەی من لە ڕاستی دا لە بەشی (چوارەم)ەوە دەست پێ ئەكات ئەو بەشانەی پێشتر خۆی بۆ ڕوونكردنەوە و ڕێ خۆشكردنی ناو باسەكە بوون تا خوێنەر لە هەموو ڕوویەكەوە لە شتەكە گەشتبێت هەر بۆ ئەو مەبەستە ئامادەییم بۆ ئەم بەشەو ئەوانی دواتر كرد بوو. هەر زوو بڕوام بەوە بوو بەشی چوارەم تەگەرەی تێ ئەكەوێ و وەك خۆی بە خوێنەر ناگات ، هەرواش بوو ، زۆر بە داخەوەم بۆ یەكەمجار لە (كوردستان پۆست) كە خۆی بە مینبەرێكی گوایە ئازاد و سەربەخۆ و دژ بە ناهەقی ڕاگەیەنێ یەكسەر بەشی چوارەمی ئەم نووسینە بە ناهەقی شێوێنراو دەسكاری كراو وەك خۆی نیشانی خوێنەر نەدرا ، ئیتر نەمزانی ئەو مینبەرەی دیعایەی ئازادی و سەربەخۆیی بۆ خۆی ئەكات چۆن ناهەقی وەهای بە نووسینی منەوە كرد لە كاتێكدا ئەو ئەیتوانێ تەنها بڵاوی نەكاتەوە و هیچی تر. لە حاڵەتێكدا ئێوە بە ڕاستی ئەبینن كە نووسینەكەی من بە وێنە و ناوی سەریحی خۆمەوەیە وەك هەندێك ترسنۆك و دوو ڕوو بە شاراوەیی و ناوی خوازراوە نەبووە. لەمەدا من (كوردستان پۆست) دڵنیا ئەكەمەوە نەك لە ئینتەرنێت و شتی وا تەنانەت لێرەش لە كوردستاندا ئەگەر نووسینەكەم بەو جۆرە بوایە كە ئەوان بە دەسكاریەوە بڵاویان كردەوە هەر بەو جۆرەش لێرە لە (كوردستانی نوێ) كە ڕۆژنامەیەكی حیزبی دەسەڵاتدارە هەر بەو شێوەیەی ئەوان بۆیان بڵاو ئەكردمەوە بەڵام بەو شێوەیەی تر كە من ناردم چۆن (كوردستان پۆست) ئامادەی بڵاو كردنەوەی نی یە دیارە لێرەش هەر بەو جۆرەیە و بڵاوی ناكەنەوە لەم حاڵەدا جیاوازی نێوان (كوردستانی نوێ) و (كوردستان پۆست) لە بڵاو نەكردنەوەی ئەسڵی نووسینەكەی من لە چیدایە؟ ئەمە پرسیارێكە و ڕووبەڕووی ئەوانەی ئەكەمەوە كە فشە بە ئازادی ڕادەربڕین و شتی واوە ئەكەن و لە كردەوەشدا هیچ بە دەستەوەن . هەرچەند تا ئێستاش داوام لە (كوردستان پۆست) ئەوەیە بەراوردێكی نێوان خۆی و میدیاكانی دەسەڵاتی كوردی بكات و (خۆی بەوان) نەچووێنێ و (خۆی ساغ بكاتەوە) بۆ ئەوەی نووسینەكەی منیش (لای خۆی) وەك خۆی كە بۆی چووە بڵاو بكاتەوە و لایەنگری ئازادی پەروەری بێت و خۆی تووشی دیعایەی (بوونە سێبەر) و شتی وا نەكاتە . من هێشتا چاوەڕوانم تا بزانم ڕاستی یەكە چۆن یەكلایی ئەبێتەوە و شتەكە بەكام لادا ئەكەوێ.

تێبینی کوردستانپۆست: ئه‌و پێشه‌کییه‌ی سه‌ره‌وه‌ی کاک حسێن به‌فرین که‌ نووسیوێتی، ئێمه‌ی تووشی سه‌رسوڕمان کرد، چونکه‌ ئه‌وه‌ی باسی ده‌کات، بۆ ئێمه‌ نامۆیه‌ و نازانین قسه‌ و ره‌خنه‌کانی له‌ کوێوه‌ سه‌رچاوه‌ ده‌گرن، ئێمه‌ نووسینه‌کانی کاک حسێن له‌ رێگای د. جه‌زا چنگیانییه‌وه‌ بۆمان دێت، واته‌ کاک حسێن به‌فرین راسته‌وخۆ نووسینه‌کانی بۆ ئیمه‌یلی کوردستانپۆست نانێرێت، چاکتربوو ئه‌و به‌ڕێزه‌ ئه‌و کێشه‌یه‌ی له‌گه‌ڵ د. جه‌زادا تاوتوێ بکردایه‌، ئه‌و چۆنی ناردووه‌ ئێمه‌ وامان بڵاوکردۆته‌وه‌، دوای ئه‌وه‌ نووسینه‌که‌ی دژی یه‌کێتیی، یان لایه‌نێکی سیاسیی نه‌نووسیوه‌، که‌ ئێمه‌ سۆزدارییمان بۆ ئه‌و لایه‌ن و حیزب و ده‌سه‌ڵاته‌ هه‌بێت و سانسۆرمان کردبێت، که‌ کاک حسێن به‌فرین ئێمه‌ به‌ کوردستانی نوێ ده‌چوێنیت، یان خۆشی باش ده‌زانیت که‌ دیسان ئێمه‌ په‌یوه‌ندییه‌کمان به‌ ره‌هه‌ندییه‌کانه‌وه‌ نییه‌، تا له‌ ژێر کاریگه‌ریی هاوڕێیایه‌تی ئه‌واندا چه‌قۆمان خستبێته‌ ملی نووسینه‌که‌یه‌وه‌ و لێمان قرتاندبێت. تکا له‌ کاک حسێن به‌فرین ده‌که‌ین، بۆ له‌مه‌وداو نووسینه‌کانی به‌ ده‌ستی یه‌که‌م بنێرێت و تا هه‌رچ هه‌ڵه‌یه‌ک رووی دا ئێمه‌ راسته‌وخۆ به‌رپرسیارێتی هه‌ڵبگرین، ئه‌مه‌ش ئیمه‌یله‌که‌مانه‌، که‌ ده‌توانێت له‌ نووسینی داهاتوودا بۆمان بنێرێت. ([email protected]).

نووسینەكانی (بەختیار عەلی) بە گشتی بەم نووسینەشەوە سەرەڕای دوور و درێژیی و زۆر لەسەر شت ڕۆشتن پڕن لە حاڵەتی:

1/ پچڕ پچڕیی و

2/ نەشارەزا بوون لە زمانی كوردی و

3/ كاڵ فامی و

4/ نا تەبایی بۆچوون دەربڕین..

ئەوەش وەك ئەوە وایە كە ئەم نووسینانە لە حاڵەتێكی ئاسایی نووسیندا بەرهەم نەهاتبن و نووسەر لە بارێكی (نا ئارامی دەروونی) و (بێ ئاگایی هۆش و بیر) دا كاتی بەسەر برد بێت ، ئەمە حەقیقەتێكە لای (بەختیار) بە ڕاشكاوی دیارە و ڕەنگە بۆ ساغكردنەوە و نموونە هێنانەوە پێویستی بە قسە لەسەر كردنێكی زۆر و زەبەند هەبێ ، بەڵام ئێمە بۆ دروستی قسەكانی خۆمان و بۆ ڕوون كردنەوەی شتەكان دێین هەر لە سەرەتای نووسینەكەی بەردەستمان چەند پەڕەگرافێك وەك نموونە ئەخەینە بەرچاوان و دواتر ئەگەر گونجاو دەرفەت بوو هەندێك ڕوونكردنەوەی لە بارەوە ئەخەینە ڕوو . ئێوە تەنها گوێ بۆ سەرەتای وتاری (باوكێك بە جەستەوە /باوكێك بێ جەستە)ی هەفتە نامەی (ئاوێنە)ی ژمارە (357) بگرن كە لە چەند شوینێكدا نموونەی لێ ئەخەینە ڕوو:

{ 1/ جارێكی دی نەخۆشكەوتنەوەی تاڵەبانی ئاوێنەیەك و ئامێرێكی پشكنینی گرنگی دایە دەستمان تا هەندێك قسەی سەرەتایی دەربارەی هەندێك ڕەهەندی سایكۆلۆژی نێو دەروونی مرۆڤی كورد بكەین.

2/ ساتی دەركەوتنی جەبەرووتی باوك و ساتی نەخۆشكەوتن و لاوازیی ، دوو چركە ساتی گرنگن بۆ تێگەیشتن لە كۆمەڵگاكان.

3/ كۆمەڵگاى ئێمەش وەك هەموو كۆمەڵگەكانی تر قۆناغێكی ئۆدیبی كاریگەرمان هەیە.

4/ دیمەنێكی سواوی ئۆدیبی یە كە هەر كەس دوو پەڕەی لە فرۆید خوێندبێتەوە تێ ى ئەگات ، ئەوە نە دیاردەیەكی سیاسی یە نە ئەوە دەردەخات باوك فیگەرێكی ئەفسانەییە ، بەڵكو تا سەر ئێسقان كۆمەڵگایەكی ئۆدیبی یە كە لەسەر پارادۆكسی (كینە و پەشێمانی) دامەزراوە .

5/ ئەوەی لە كۆی ئەم دیمەنەدا گرنگە و مانای سیاسی قووڵی هەیە ئەوەیە كە دەریدەخات ڕیشەكانی دیكتاتۆرییەت و سەرهەڵدان و نوێبوونەوەی دەسەڵاتی ڕەها و پەتریار كێیەت بەر لە هەر شت لە ناو ئەو پەیوەندییە ئۆدیبییەدایە كە كۆمەڵگا بە سەرۆكەكەیەوە ، خێڵ بە پەتریاركەكەیەوە گرێ دەدات.

6/ وێنەی باوكی نەخۆش بانگهێشتێكی گەورەی هەموو ئەو كولتوورە ئۆدیبی یە یە كە لە منداڵی یەوە پێ ی گۆش دەبین.

7/ لە ساتی مردنی باوكدا تووشی ئەو خواستی پەشیمانی و هەستی خۆسزادانە دەبێت كە لە هەموو ئۆدیبی یەكی ڕەسەن چاوەڕوان دەكرێت.

8/ هەندێك دەتوانن ئەو ئازارە بچەپێنن و زاڵبن بەسەریدا و ئەو قۆناغە ئۆدیبی یە تێ بپەڕێنن.

9/ لە كۆمەڵگای مۆدێرندا ئەلتەرناتیفەكانی باوك زۆرن.

10/ لە مۆدێردنەدا باوك دەچێتە پشتەوە ، شێوەی تارمایی یەك وەردەگرێت ، ڕووخساری دەگۆڕێت ، دەبێتە خێوێكی نەبینراو.} ئاوێنە / ژمارە (357) / 2012 /

ئەمەی بەردەستان ڕەنگە بستێك بێت لە سەرەتای ئەو نووسینە دوور و درێژەی (بەختیار عەلی) كە یەكەمجار لە ژمارەكانی (357 ، 358 ، 359 ، 360) و دواتر لە چەند ژمارەیەكی تریشدا درێژەی پێدا . لەم نموونانەدا وەك وتبووم

1)پچر پچڕیی و

2)نەشارەزایی بون لە زمانی كوردی و

3)كاڵ فامی و

4)ناتەبایی بۆچوون دەربڕین

بە ئاشكرا بەم نووسینەوە دیارە و هەست ئەكەیت نووسەری ئەم بابەتە لە :

1/ حاڵەتی وڕێنە كردندایە و

2/ ئاگای لە خۆی نی یە و

3/ بیرو هۆشێكی شێواوی هەیە و

4/ هەموو وتنەكانی لەگەڵ یەكتردا كۆك نین و

5/ هەر لە خۆیەوە ڕای جیاواز ئەدات و

6/ بە قینەوە قسە ئەكات و

7/ شپرزەیی بێ ئارامی كردووە

تا ئەگاتە ئەوەی وەك دێوانەیەك دارو بەرد بەسەر یەكدا ئەدا و بەم جۆرە ئەبزركێنێ:

1/ دەمێك (ئۆدیبی یەت) لای ئەو نەخۆشیەكە تا سەر ئێسقان

2/ دەمێك كولتوورە

3/ دەمێكی تر قۆناغێكە و لێ ی تێ ئەپەڕی

4/ دەمێكیش سەرچاوەی لە دایك بوونی دیكتاتۆریەتە

5/ دەمێكی تریش هەموو كۆمەڵگاكان پێوەی گیرۆدەن

6/ دەمێك ئەلتەرناتیڤی هەیە

7/ دەمێكی تر ئۆدیبێكی ڕەسەنە و ........هتد

لە ئەوروپادا نووسەرەكان دەرمانی (LSD) بەكار ئەهێنن بۆ چالاك بوونی مێشك ، وەك چۆن لە كوردستان (تۆسیرام) و شتی وا بەكارئەهێنن بۆ زەوق و خۆ گێژ كردن . سارتەر یەكێك بوو لەوانەی ئەم دەرمانی (LSD) یەی لە كاتی نوسینیدا زۆر بەكار هێناوە بۆ ئەوەی:

1/ چەنەبازتر و

2/ زۆر بڵێ تر و

3/ درێژ دادڕ تر بێت و

4/ نووسینی زۆر بێت

ئەمە یەكێكە لە سیفەتەكانی بەرهەمە جۆربەجۆرەكانی سارەتەر، چونكە كەسێكی :

1/ نا ئاسایی و

2/ ئاڵۆز و

3/ شپرزە بووە .

من كە نووسینی (بەختیار عەلی)یش ئەخوێنمەوە درك بەو جۆرە ڕەفتار و شێوە كەسایەتی یە ئەكەم كە لەوانەیە لە ژێر كاریگەری ئەو (بارە ئاڵۆزیی)یەدا ئەم نووسینە شپرزانە بەرهەم بهێنێ چونكە جارێك لای من بە دەمی خۆی باسی بەكارهێنانی دەرمانی بە شێوەیەكی سەیر كرد ، ئێستا ئەزانم ئەو لەو بارەیەوە (خەبیرە) و ئەزانێ چی وچی ئەكات... لێرەدا وا هەست ئەكەم ئەم نووسینە شپرەزە و سەیر سەیرانە بەرهەمی دنیایەكی وەها نەگونجاو بێت و بە واقیعی ئێمەی بفرۆشێتەوە. ئاڵۆز بوون بەو جۆرە (كە پێشتر نموونەم لەسەر هێنایەوە) بۆ كەسێك كە بە دەردی (فارس) ئەڵێ: (هەمە كارەی هیچ كارە) دەربچێت لەسەر (بەختیار) قورس ئەكەوێت و هەروا بە ئاسانی ناتوانێت لە ژێر ئەو بارەدا خۆی دەرباز بكات دوای ئەوەی ئەو هاتووە بەم حاڵە شپرزەیی یەوە كە تووشی هاتووە بەردی تۆمەتی (ئۆدیبی) واتە (دایكە خۆ گێ)یی لەسەری ئێمەدا (وەك كۆمەڵگای كوردی) ئەشكێنی..