ڕەفتارى فاشیستانەى چەكدارە فەندامەندالیستەكانى سوریا دژ بەچەمكى (شۆڕشە)!!
Monday, 27/05/2013, 12:00
مێژوویەكى زۆرە كۆمەڵگاى سوریا بە دەستى دڕندەترین و خوێن ڕێژ ترین دەسەڵاتى دسپوتیزم دەناڵێنن و دووچارى ستەمكارى سیاسى دەبنەوە لە سەر دەستى حزبى فاشیزمى بەعس ، بە هەزاران ئینسان بە هۆى ڕادەربڕین و جێوازى بیركردنەوەى سیاسیان ، یان بە داكۆكى كردن لە ئازادى ئینسان دووچارى وەحشیترین ئەشكەنجەو لە ناو بردن بوونەوە بە دەستى دام و دەزگا داپڵۆسێنەرەكانى بەعسیزم . بەڵام بە كڵپە سەندنى شۆڕشەكانى ووڵاتانى عەرەبى و سەر كەوتنى بزووتنەوەكان لە هەندێك وولاتانى عەرەبیدا مژدەیەكى گەورە بوو بۆ گەلانى ناوچەكەو گەلانى سوریاش ڕۆحى بەرخوردانى سیاسى بە بەرداهاتەوەو ، دەستیان كرد بە ڕاپەڕین و شۆڕش كردن دژ بە دەسەڵاتى دكتاتۆرى بنەماڵەى ئەسەد كە ماوەیەكى دورودرێژە گەلانى سوریان كردۆتە كۆیلە . شۆڕش و بەرخوردانى گەلانى سوریا خوێناویترین و درێژ ترین شۆڕشە لە مێژووى كۆمەڵگاى مرۆڤایەتیدا ، بە درێژایى مێژوو هیچ شۆڕشێك نەبووە بە ئەندازەى شۆڕشى سوریا ئەمەندە خوێناوى بێت و ئەمەندە مرۆڤى بێتاوانى تێدا بووبێتە قوربانى . شۆڕشەكانى ووڵاتانى عەرەب پێش ئەوەى لە ئاراستەو ئامانجە سیاسیەكانى خۆى لا بدات ،لە سەرەتاوە مژدەیەكى گەورەو ئیلهامێكى شیرین و ئیستاتیكا بوو بۆ چەمك و بزووتنەوەى شۆڕشگێڕى لە ناوچەكەو تەنانەت لە جیهانیشدا ، بۆیە بزووتنەوەى ((ۆۆڵ ستریت داگیر بكەن و ، بۆرسەى لەندەن داگیر بكەن)) لە سەر دەستى گەنجان لە ئەمریكاو لەندەنیش دەستی پێكرد و بە هەزاران ئینسانى هێنایە سەر شەقامەكان بۆ داكۆكى كردن لە ئازادى و مافە سیاسى و كۆمەڵایەتیەكان و داواكارى ئاسودەى كۆمەڵایەتى . هەرەس هێنانى یەك لە دواى یەكى سیستەمە تۆتالیتارو دیسپوتیزمەكان لە ناوچەكەدا هیوایەكى گەورە بوو بۆ هەموو مرۆڤێكى ئازادیخواز . ئەم گۆڕانكارى و بزووتنەوە سیاسیانە لە دۆخێكدا ڕوو دەدات كە قەیرانێكى ئابوورى قووڵ ئەمریكاو سەرتاسەرى ئۆرپاو زۆربەى وڵاتانى جیهانى تەنیوەتەوە ،بانقەكانى سەرمایەدارى جیهانى دوچارى سەخترین و دوژوار ترین ئیفلاسى دراویان بە خۆوە دەبینى . لە گەڵ ئەوانەشدا زەمەنێك بوو میدیاكانى دنیاى سەرمایەدارى و ژوڕنالیستەكانیان و بیرمەندانى لیبرالیزمى نوێ پارادۆكسێكیان تێوریزە دەكرد بۆ جیهان كە چیتر((چەمكى شۆڕش و بزووتنەوەى شۆڕشگێڕى)) جگە لە خەیاڵ كارى نەكردەیە و ئەم دۆخە سیاسى و ئابووریەى جیهان كۆتایى میژووە . بەڵام ئەو پارۆدۆكسەى كە لیبرالیزمى نوێ وەكو ئایدۆلۆژیایەك دەیەویست بناغەى لۆژیكى لێوە هەڵجێنێت و بیكاتە واقیعێكى باوەڕ پێكراو لە سەر ئاستى جیهاندا شكستى هێنا ، ڕەو ڕەوەى مێژووش بەردەوامی بە ڕێچكەى بەرەو پێش چوونى خۆیدا . دەبێت ئەوەش لە بەر چاو بگرین هەموو گۆڕانكارى و بزووتنەوەیەكى شۆرشگێڕى ، ئامانجێكى گرنگ و پڕ بەهاى هەیە كە بریتیە لە ئاڵوگۆڕى سیستەمى حوكمڕانى و دۆخى ئابوورى و سیاسى و كۆمەڵایەتى بۆ دۆخێكى جێوازتر . بەو مانایەى گۆڕانكاریەكى ڕادیكاڵانەى بنەڕەتى لە كۆى ژێرخان و سەرخانى كۆمەڵگا . یەكێك لەو بەها زۆر گرنگەى دەبێت بگۆڕێت دیدو تێڕوانین و ئاستى بیر كردنەوەو هۆشیارى و ڕۆشنبیرى تاكەكانى كۆمەڵگایە ، كە دەكرێت ناوى میتۆدى ((شۆڕشى ڕۆشنبیرى)) لێبنێین ، یان فەراهەم كردنى پانتایەك بۆ مەعریفەو عەقڵانیەت ، كە تێیدا ئینسانى خاوەن ئیرادەو تێگەیشتوو لە دنیا بهێنرێتە بەرهەم ، ڕەوشێكى لەو چەشنەش ڕێخۆشكەرە بۆ پێكەوە ژیان و لێبوردەیى و ئاسودەى كۆمەڵایەتى . بەڵام هەندێك جاریش بزووتنەوەى شۆڕشگێڕى ئاوەژوو دەبێتەوەو وەردەچەرخێت بۆ دۆزەخێكى ڕاستەقینەو دژە شۆڕش ، ئەویش بە زاڵ بوون و باڵا دەست بوونى ئینسان گەلێكى فەندامەندالیست و ڕەفتار فاشیزم . ئەگەر پێشتر مێژوو چیرۆكى ((شۆڕش ڕۆڵەكانى خۆى دەخوات)) ى بۆ دەگێڕاینەوەو ، چۆن ((ڕۆپسپێر)) و هاوكارەكانى ڕۆژانە گەردنى هاو بیرو هاو خەباتەكانى خۆیان بە مەقنەسە دەقرتاند ، ئەوڕۆ هەمان سیناریۆى ڕەش لە ((سوریاو میسرو ئەو وڵاتەكانى)) دیكەى عەرەبى كە بزووتنەوەى شۆڕشگێڕى تێیاندا ڕویدا بە شكست هێنانى هێزە پێشكەوتوخوازەكان و زاڵ بوونى هێزە تاریكەكانى فەندامەندالیزم دووبارە دەبێتەوە ،بەڵام بە فۆرمێكى ئاینى و مەزهبى كە ژیانى مرۆڤەكانى ئەو وڵاتانەیان كردۆتە دۆزەخ . ڕەفتارى فاشستانەى ئەو گروپ و تەوژمە سیاسیایى ئاینییە بە ناوى شۆڕشەوە ئەمەندە قێزەوەن و نا ئینسانیە ویژدانى هەموو مرۆڤ دۆستێك دەهەژێنێت ، تۆڕەكانى كۆمەڵایەتى فەیسبوك و یوتوب و توەیتەریان كردۆتە مەنبەرێك بۆ پیشاندانى لەت و پەت كردنى ئینسان و سەر بڕینیان بە دڕندە ترین شێواز كە وێنەى نەبووە لە مێژووى مرۆڤایەتیدا . تەنانەت كار گەیشتە ئەوەى وەكو ئاژەڵى دڕندە گۆشتى نێچیرەكانى خۆیان كە ئینسانەبخۆن ، یەكێك لە جەنگاوەرەكانى ئەو گروپانە كە ناوى شۆڕشگێڕیان لە خۆ ناوە دڵى یەكێك لە سەربازە كوژراوەكانى لایەنگرى ڕژێمەكەى ئەسەد دەخوات . لە ڕاستیدا ئەم ڕفتارە نا مرۆیە دیمەنێكى دڕندەیى و وەحشیگەری نیشان دەدات ، مەگەر ئەم خەسڵەتە لە كولتورى عەرەبدا هەبوبێت ، دواجاریش ئەو مەشهەدەمان بیر دەخاتەوە لە یەكێك لە فیلمەكان بە ناوى ((ڕسالە)) كە باس لە مێژووى جەنگەكانى سەرتاى ئیسلام دەكات . كاتێك مامى پیێغەمبەر محەمەد ((حەمزە)) دەكوژرێت ژنە عەرەبێكى برا كوژراو لە بەرەى دژدا بە ناوى ((هند)) هەڵدەستێت بە خواردنى دڵى حەمزە، ئەمە بەرئەنجامى ئەو پەروەردە نا تەندروستەیە لە ژێر ڕایەڵەى كوتەك كارى و توندو تیژى كە دۆخێكى سایكۆلۆژى شێواو و نا ئینسانى بەرهەم دێنێت ، مەگەر لە سروشتى جانەوەرو دڕندە كێویەكاندا هەبێت . ئێمە پەرتوكى ((مردوو خۆرەكانمان)) خوێندوەتەوە چۆن لە جەنگى جیهانى دووەم خەڵكى شارى ((لینینگراد)) و ئازادیخوازەكان لە بەرامبەر لەشكرى ((نازیزمى هتلەر)) بە شێوەیەكى سەرسەختانە دیفاعیان لە شارەكەیان كردووە بۆ ماوەیەكى زۆر و دواجاریش خۆراكیان نامێنێت ، ناچارن گۆشتى كوژراوەكانیان بخۆن بۆ ئەوەى خۆیان نەدەن بە دەستەوە . تا ئەرتەشى نازیزم تێك دەشكێنن و دواجاریش سەردەكەون لەو جەنگەدا . لە ڕاستیدا ئەو مەشهەدو دیمەنە ترسناكانەى كە لە تۆڕە كۆمەڵایەتیەكانى پەیوەندى دەبینرێن تراژیدیایەكى گەورەیە لە میژووى مرۆڤایەتیدا كە ئەمڕۆ لە سوریا ڕوو دەدات بە ناوى شۆڕشەوە، دنیا خۆرەكانى جیهان نەك هەر لێى بێدەنگە بەڵكو هەر ئەوانن درێژە پێدەرى ئەو سیناریۆ ڕەشە ، باجى ئەو تراژیدیایەش خەڵكى بێتاوان و سفیلى سوریا دەیدات ، كە پتر لە دوو ساڵە ڕۆژانە دەهاڕێنرێن لە نێوان هەردوو بەرداشى فاشستانەى بنەماڵەى تۆتالیتارى ئەسەدو فەندامەندالیزمى ئیسلامى سیاسى . ئەمڕۆ وڵاتى سوریا بۆتە پانتایەكى جوگرافى بۆ تاقى كردنەوەو پاكتاو كردنى حیساباتى سیاسى هێزە گەورەكانى دنیا و هێزە مەزهەبیە كۆنەپەرەستەكانى ڕۆژهەڵات بە مەبەستى پتر كردنى قەڵەمڕەوى دەسەڵاتى خۆیان لە ناوچەكەدا . هیلالى مەزهەبى شیعى بە ڕابەرایەتى ئێران كە جگە لە پاكستان و ئەفغانستان كە لە ئێرانەوە دەست پێدەكات و بە عێراق و سوریاو لوبنان و تا دەگاتە غەزەى نزیك ئسرائیل دیفاعێكى سەرسەختانە لە ڕژێمە خوێن ڕێژەكەى ئەسەد دەكات ، چونكە حیزبى بەعس و ئەسەد هاو پەیمانیەكى مێژوویی مەزهەبیە بۆ ئێران و نوێنەرایەتى ئێران دەكات لە بەرانبەر وڵاتانى سنى مەزهەبى توركیاو سعودیەو قەتر كە كۆیلەو قەمتەر كراوى ئەمریكاو ولاتە سەرمایەدارە هاوپەیمانەكانە لە ڕۆژهەڵاتى ناوەڕستدا . لە لایەكى دیكەشەوە سوریا وەكو سەنتێزێكى ئابوورى بۆ ڕایكردنى بەرژەوەندیەكانى ڕوسیاى پاشماوەى جەنگى سارد ، كە سوریا هەمیشە ناوەندێكى گەورە بووە بۆ ساخ كردنەوەى كاڵاى سەربازى و كڕینى چەك و تەقەمەنی لە كارگەكانى ڕوسیا ،ڕوسیاى تازە دەر كەوتووى سەرمایەدارى دوور لە هەموو ئاكارێكى سیاسى و بە لۆژیكى ماكیاڤیلانە بە بەر چاوى دنیاوە دیفاع لە مانەوەى دەسەڵاتێك دەكات كە ڕۆژانە هاونیشتمانیەكانى خۆى قەتڵ و عام دەكات . شەڕى ناوخۆى سوریا كە هەر گروپ و حزبێك هێزێكى گەورەى جیهانى لە پشتەوەیە بۆ پاراستنى بەرژەوەندى سیاسى و ئابووریان ، ڕەنگە ئەم شەڕە زیاتر درێژە بكێشێت تا ئەو كاتەى بە تەواوەتى بنەماكانى دەوڵەتى سوریا هەڵدەوەشێنرێتەوەو شتێك نامێنێت بە ناوى دەوڵەتى سوریاوە ، ئەوەى دەمێنێتەوە چەند دەوڵەتۆچكەیەكى تائیفى و مەزهەبى و قەومی و ئاینیە كە كۆمەڵگاى سوریا نوقمى شەڕو دواكەوتن و كۆنەپەرەستى و جهل و خورافە دەكەن ، بەو مانایەى سڕینەوەى هەموو دیمەن و سیمایەكى مەدەنیانەى هاوچەرخ بە ڕوخسارى كۆمەڵگاى سوریاوە . لە گەڵ ئەوانەشدا خوڵقاندنى فەزایەكى سیاسى ترسناك و قێزەوەن بە ناوى شۆڕشەوە ، بە مەبەستى چێكردنى وێناى((چەمكى شۆڕش)) بە چەشنێكى ناشرین و نا پەسەند بۆ بەر چاوى جیهان ، بە ڕادەیەك كە خەڵك بگاتە ئەو بڕوایەى كە هەر كۆمەڵگایەك لافى شۆڕش لێبدات دەگاتە ئەو دەرئەنجام و ئاقارە خوێناوى و وێرانكاریەى كە ئەوڕۆ لە سوریا دەگوزرێت . دەبێت ئەو ڕاستیەش بزانین هەموو ئەو وێرانكارى و كوشت و كوشتارەى ئەوڕۆ كۆمەڵگاى سوریا دووچارى بوونەتەوە لە سەر دەستى دەوڵەتە كۆنە پەرەستەكانى ناوچەكەو زل هێزەكانى جیهان كە هەردوو لایەنى دەوڵەتى فاشستى بنەماڵەى ئەسەدو گروپە فاشیزمە فەندامەندالیزمەكانى ئایینى نوێنەرایەتى ئەو هێزانە دەكەن ، تەنها بۆ ئەو مەبەستەیە كە مەرگ و كۆتایى چەمكى شۆڕش ڕابگەیەنن و سوریا بكرێتە دوا وێزگەى سەرەتاى كۆتایى فۆبیاى ئەو بزووتنەوە سیاسیە كە هەموو دنیاى هەژان و . هەروەها پێشبینى ئەوەى لێدەكرا هەموو دەسەڵاتە دسپوتیزمەكانى جیهان بسڕێتەوە . چونكە ئەو ڕەفتارانەى كە فەندامەندالیزمى ئایینى لە سوریا ئەنجامیدەدەن دژ بە بنەماكانى شۆڕشە و بە ئەندازەى ڕەفتارى فاشستانەى دەوڵەتى ئەسەد فاشستانەیە .
[email protected]
نووسەرەکان خۆیان بەرپرسیارێتی وتارەکانی خۆیان هەڵدەگرن، نەک کوردستانپۆست
