ئەو کەسە (کوردبوون و موسوڵمانبوون، داعش و چەتەیی) وەک یەک سەیردەکات. ئەمە نەک تەنیا رای ئەو بەڕێزەیە، بەڵکو بە دەیان کەسی دیکە هەمان هاودەنگییان هەیە، کە بەو جۆرە بیرکردنەوە و بەو قسانە دڵی داگیرکەر و دوژمنانی کورد خۆش دەکەن.

من لەناو ئەدەبیاتی فارس و تورک و عەرەبەکاندا گەڕاوم، زۆر بە دوای ئەم بیرکردنەوەیەدا وێڵبووم، تا بزانم بیرکردنەوەی ئەوان چۆنە؟ کەسێکی وام نەدیوە، وەکو کەسایەتیی کورد، هێندە تێکشکاو بێت، خۆی بەکەم بزانێت و نەتەوەکەی خۆی لا سوک بێت . تورکێک نابینم بڵێت من مرۆڤم و تورک نییم، عەرەبێک نابینم هەمان قسە بکات، فارسێک نابینم خۆی بخاتە هاوشانی کوردێک، بەڵکو هەموویان کورد لە خۆیان بە بچوکتر دەبینن، کوردەکەش ئەمەی قبوڵ کردووە، بەبیانووی ئەوەی هەموو مرۆڤین و جیاوازییمان نییە، لە ناخییەوە بچوکی خۆی بە مرۆڤبوونەکە دادەپۆشێت، دەیەوێت هەنگاوێک سەربکەوێت بەرەو (فارس و تورک و عەرەب)بوون، پێیان بڵیت هەموو مرۆڤین، ئەوانیش ئەمە لە کورد وەرناگرن و حیسابی بۆ ناکەن.

 بەو بۆنەیەوە لە کۆمێتی ئەو بەڕێزەدا بە زمانێکی سادە وەڵامم داوەتەوە، بە باشم زانی لێرەدا دایبنێم، تا سەرنجی ئێوەی لەسەر وەربگرم، بزانم ئێوە چی دەڵێن:

-----------

پیسترین رەگەز لەناو ئاژەڵ و گیاندارەکاندا مرۆڤە، کە لە هەموویان دڕندەتر، دڵرەقتر و بێبەزەییە. دیاردەکان بوونەتە بەڵگە و بەڵگەکانیش سەرچاوەکەی زانستە، کە تێکڕا ئەمەیان سەلماندووە.

زۆربەی ئاژەڵەکان (وەکو شێر و پڵنگ، و .... هتد، کاتێک برسییان دەبێت و راوی نێچیرێک دەکەن، کە تێریان خوارد واز دەهێنن و پەلاماری هیچ گیاندارێکی دیکە نادەن).

مرۆڤ (تێربوونی نییە، راوی هەموو شتێک دەکات، وەک راوکردن بۆ تێرکردنی گەدە و ناوگەڵ، گیرفان، و هەموو شتێکی دیکە... ) و هەر بەردەوامیشە ... هتد)... مرۆڤ لە ئاژەڵ دڕندەترە، کەچی شانازیی بە مرۆڤبوونی خۆمانەوە دەکەین.

جگە لەوە مرۆڤ رقی لە مرۆڤێکی ترە، ئەگەر وەک خۆی نەبێت. هەر ئەوەشە کە تورکێک، فارسێک و عەرەبێک، وەکو دەوڵەت، هەروەها زۆربەی خەڵکەکانیشیان رقیان لە کوردە... خاکی داگیر دەکەن. زمانی قەدەغە دەکەن، هونەر و ئەدەبی دەدزن و دەیکەن بە هی خۆیان، کەلتوری دەتوێننەوە و مێژووەکەی دەبەن، ؟ ئەگەر ئەوە بکەین بە پرسیارێک وەڵامەکەش ئاسانە: لەبەر ئەو تایبەتمەندیانەی سەرەوە ئێمەیان لە خۆیان جیاکردتەوە، دەنا وەکو ئەوان هەموو دوو دەست و دوو قاچ و سەر و هەموو شتێکمان لە یەکتر دەچێت. بە بۆچوونی ئەو بەڕێزە بێت کە ئەو کۆمێنتەی نووسیوە، پێێ وایە هەموومان مرۆڤبین نەک کورد. بەڵام ئەوان مرۆڤبوون لە کورد قبوڵ ناکەن، هەروەک چۆن ئیسلام ئافرەت وەک مرۆڤ سەیر ناکات، لە خوار خۆیەوە دایناوە، ئەوانیش بە هەمان عەقڵ ئاوا مامەلەی کورد دەکەن و کوردیان لە خوار مرۆڤبوونەوە داناوە، دەڵێن کوردێکی باش ئەو کەسەیە کە مردووە و لە گۆڕستانە.

نمونەیەکی دیکە: منداڵێک لە دایک دەبێت و چاوی دەکاتەوە، لە پێشدا بە دایکی ئاشنا دەبێت، بەرە بەرە دەوروبەرەکەی خۆی دەناسێتەوە کە تەواوی ئەندامی خێزانەکەیەتی، ئەوانی خۆش دەوێت، و لەگەڵیاندا رادێت، ناچێتە لای هیچ کەسێکی تر، دوای ئەوە... ناسین و خۆشەویستییەکە لەگەڵ گەورەبووندا گەورەتر دەبێت بۆ خزم و ناسیاو، بۆ هاوڕێ و ئەوانەی کە وەکو خۆی قسەدەکەن و لە یەکتر دەگەن، زیاتر لەگەڵ گەورەبوونیدا ئینجا بەرژەوەندیی و ئارەزوو و حەزەکان تێکەڵ دەبن، خۆشەویستییەکە زیاتر دەبێت. (مرۆڤبوون لەوێدا تەنیا مانایەکی نابێت و پیویستیش ناکات باس بکرێت، چونکە هەموو لەناو ئەو پەیوەندییانەدا یەکتر دەدۆزنەوە)، هەر ئەوەشیانە ئێمەی مرۆڤی لەناو کۆمەڵگەی مرۆڤایەتیی پێکهێناوە و دوایی پێی گوتراوە کۆمەڵگای مەدەنی‌.

باشە چی روو دەدات، ئەگەر لەو کاتەدا ئاژەڵێک خۆی بکات بە ناو مرۆڤەکاندا؟، ئەوسا هەموو وەکو مرۆڤ یەک دەگرن و خۆیان دەدۆزنەوە، ئەگەر پێویست بکات دژی ئەو ئاژەڵە، بەرگری لە خۆیان دەکەن، بەڵام کاتێک مرۆڤ لەگەڵ مرۆڤدا کە بە شەڕ دێت، ئەوە تایبەتمەندییەکانە، لە یەکتریان جیادەکاتەوە دژی یەکتر شەڕ دەکەن.) واتا بۆ ئاژەلێک پێویست ناکات کوردبوون و مرۆڤبوون لە یەکتر جیابکرێنەوە، بەڵام کوردێک و تورکێک و نەتەوەیەکی تر بەهۆی ئەو تایبەتمەندییە جیاوازانەوە، لە یەکتر جیادەبنەوە. چونکە سروشتی زیندەوەرەکان وای دروست کردووین، کە بۆ مانەوەی خۆیان ئەو یەکگرتنە دروست ببێت و بەرگری لە خۆیان بکەن، تایبەتمەندییەکانمان وای لێکردووین ئەو رەفتارە بکەین، نمونەیەکی دیکەش ئەوەیانە، کە هیچ ئاژەڵێک ئامادە نییە واز لە لانە و بێشەی خۆی بهێنێت، تا مردن ئامادەیە شەڕی بۆ بکات و بەرگری لێبکات. ئەو کوردەی پاساوی مرۆڤبوون دەهێنێتەوە، دەیەوێت لە ئەرکی کوردبوونی دوور بکەوێتەوە و رابکات، وا دەری دەخات کە ئەو لە هەموومان پلەیەک بیرکردنەوەی قوڵتر و عاقڵانەترە، کە لە راستییدا کەسێکی بێتوانا و تێنەگەیشتووە، نازانێت بۆچی مرۆڤە، ئەم جۆرە کەسانە ناتوانن هیچ بۆ خۆیان بکەن، چ جای ئەوەی بۆ مرۆڤایەتییش هیچیان پێ نییە، جگە لە قسەی زل.

لە کۆتاییدا کەسێک تا منداڵ و خێزانەکەی خۆی وەستابێت، ناچێت ئەوەی هەیەتی بیدات بە یەکێکی دیکە و خێزانەکەی خۆی لە برساندا بمرێت، بیانوو بهێنێتەوە و بڵێت لەبەر ئەوەی من مرۆڤم. بەڵام پلەی بەرزی موڕاڵی مرۆڤبوون لەوێدا دەردەکەوێت، کە ئەو کەسە بتوانێت لەگەڵ خیزانەکەی خۆیدا، یارمەتی خێزانێکی برسیش بدات تا نەهێڵێت ئەوانیش لە برساندا بمرن. لە نمونەی باڵای موڕاڵی مرۆڤبووندا نمونە زۆرن وەک ئەمریکای لاتینییەک، یان ئەوروپییەک دێنە کوردستان بەرگری لە کورد دەکەن. وەکو ئەوەی رۆژئاوا. پلەی هەرە نزمی موراڵی مرۆڤبوونیش ئەوەیانە کە کوردێک واز لە کوردبوونی خۆی بهێنێت، بە بیانووی ئەوەی مرۆڤبوون لە پێشترە نەک کورد بوون.

چەند کۆمێنتێکی سەرنجڕاکێش لە فەیسبوک کە پشتگیرییان کردووم: